လံာ်မးသဲ 17 - Sgaw Karen Common Bible

ယ့ၣ်ၡူးအက့ၢ်အဂီၤလဲလိာ်အသး

¹ ဃုသီဝံၤအလီၢ်ခံဒီး, ယ့ၣ်ၡူးကိးန့ၢ်စီၤပ့းတရူး, စီၤယၤကိာ်ဒီးအဒီပုၢ်ဝဲၢ်စီၤယိၤဟၣ်, ဒီးလဲၤဆှၢထီၣ်အဝဲသ့ၣ်ဆူကစၢၢ်ဖးထီတဖျၢၣ်အလိၤ, ဒီးအိၣ်ဝဲဖဲန့ၣ်ထဲအဝဲသ့ၣ်ဧိၤလီၤ.

² ဒီးအက့ၢ်အဂီၤလဲလိာ်အသးလၢအဝဲသ့ၣ်အမဲာ်ညါ, ဒီးအမဲာ်သၣ်ကပီၤဝဲဒ်မုၢ်အသိး, ဒီးအဆ့ကၤဝါဝဲဒ်တၢ်ကပီၤအသိးလီၤ.

³ ဒီးအပျဲၢ်အဘီၣ်သၢဂၤထံၣ်ဘၣ်စီၤမိၤၡ့ဒီးစီၤအ့ၤလံယၤဟဲအိၣ်ဖျါထီၣ်ဒီး ကတိၤသကိးတၢ်ဒီးယ့ၣ်ၡူးလီၤ.

⁴ ဒီးစီၤပ့းတရူးစံးဘၣ်ယ့ၣ်ၡူး, “ကစၢ်ဧၢ, ပအိၣ်ဘၣ်ဖဲအံၤဂ့ၤမးလီၤ. နသးမ့ၢ်အိၣ်ဒီး ယကဘှီထီၣ်ဒဲသၢဖျၢၣ်ဖဲအံၤ, တဖျၢၣ်လၢနဂီၢ်, တဖျၢၣ်လၢစီၤမိၤၡ့အဂီၢ်, ဒီးတဖျၢၣ်လၢစီၤအ့ၤလံယၤအဂီၢ်လီၤ.”

⁵ ဖဲအဝဲကတိၤဒံးတၢ်အဖၢမုၢ်န့ၣ်, တၢ်အၢၣ်လၢအကပီၤတလိၣ်ဟဲလီၤကဒုဘၣ်အဝဲသ့ၣ်, ဒီးတၢ်ကလုၢ်သီၣ်ထီၣ်လၢတၢ်အၢၣ်အပူၤဒီးစံး, “အအံၤမ့ၢ်ယဖိခွါဒၣ်ယဲလၢယအဲၣ်အီၤ, ဒီးဘၣ်ယသးလၢအီၤဒိၣ်မးလီၤ. ကနၣ်အကလုၢ်တက့ၢ်.”

⁶ တုၤအပျဲၢ်အဘီၣ်တဖၣ်နၢ်ဟူတၢ်အံၤဒီး, အဝဲသ့ၣ်ပျံၤတၢ်ဖုးတၢ်ဒိၣ်မး, တုၤဒၣ်လဲာ်အထိၣ်လီၤပှီၤအသးဒီးကျးလီၤအမဲာ်လၢဟီၣ်ခိၣ် အလိၤလီၤ.

⁷ ဘၣ်ဆၣ်ဒီး, ယ့ၣ်ၡူးဟဲထိးဘၣ်အဝဲသ့ၣ်ဒီးစံး, “ဂဲၤဆၢထၢၣ်တက့ၢ်. တဘၣ်ပျံၤတၢ်တဂ့ၤ.”

⁸ ဒီးတုၤအကွၢ်ထီၣ်တၢ်ဒီး, တထံၣ်လၢၤပှၤအဂၤနီတဂၤဘၣ်. ထံၣ်ဝဲထဲယ့ၣ်ၡူးတဂၤဧိၤလီၤ.

⁹ ဒီးဟဲက့ၤလီၤဝဲလၢကစၢၢ်လိၤအဖၢမုၢ်ဒီး, ယ့ၣ်ၡူးမၤလိာ်အဝဲသ့ၣ်ဒီးစံး, “တချုးလၢပှၤကညီဖိခွါဂဲၤဆၢထၢၣ်က့ၤလၢတၢ်သံဒံးဘၣ် န့ၣ်, တၢ်လၢသုထံၣ်ဘၣ်အံၤ, တဘၣ်စံးဘၣ်တဲဘၣ်ပှၤနီတဂၤတဂ့ၤ.”

¹⁰ ဒီးအပျဲၢ်အဘီၣ်သံကွၢ်အီၤဒီးစံးဝဲ, “မ့မ့ၢ်ဒ်န့ၣ်ဒီး, ဘၣ်မနုၤလၢပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ် စံးလၢစီၤအ့ၤလံယၤဘၣ်ဟဲဆိလၢညါန့ၣ်လဲၣ်.”

¹¹ အဝဲစံးဆၢတၢ်ဒီးစံးဝဲ, “စီၤအ့ၤလံယၤကဟဲဆိသပှၢ်ကတၢၢ်, ဒီးအဝဲဒၣ်ကကတဲာ်ကတီၤပာ်စၢၤတၢ်ခဲလၢာ်လီၤ.

¹² မ့မ့ၢ်, ယစံးဘၣ်သုလၢစီၤအ့ၤလံယၤဟဲတ့ၢ်လံဝဲလံ. ဒီးအဝဲသ့ၣ်တသ့ၣ်ညါအီၤဘၣ်ဒီး, မၤအီၤဒ်အသးအိၣ်မၤဝဲအသိးန့ၣ်လီၤ. ပှၤကညီဖိခွါစ့ၢ်ကီး, ကဘၣ်တူၢ်တၢ်လၢအဝဲသ့ၣ်အစုပူၤဒ်န့ၣ်အသိးလီၤ.”

¹³ တုၤနုၤတစု, အပျဲၢ်အဘီၣ်တဖၣ်နၢ်ပၢၢ်ဝဲဒၣ်လၢ, အဝဲကတိၤတၢ်ဘၣ်ဃးဒီးပှၤဘျၢတၢ်စီၤယိၤဟၣ်န့ၣ်လီၤ.

ယ့ၣ်ၡူးမၤဘျါက့ၤပိာ်ခွါဖိတဂၤလၢတၢ်နါဒိးအီၤ

¹⁴ ဒီးတုၤအဝဲသ့ၣ်ဟဲက့ၤတုၤဆူပှၤဂီၢ်မုၢ်တဖၣ်အအိၣ်ဒီး, ပှၤတဂၤဟဲဆူယ့ၣ်ၡူးအအိၣ်, ချံးခီၣ်တီၤလီၤလၢအမဲာ်ညါဒီးစံး,

¹⁵ “ကစၢ်ဧၢ, သူၣ်ကညီၤသးကညီၤဘၣ်ယဖိခွါတက့ၢ်. အဂ့ၢ်ဒ်အံၤ, အဝဲဘၣ်န့ၢ်တၢ်ပျုၢ်ထိးအတၢ်ဆါ, ဒီးဘၣ်တူၢ်ဝဲနးမး, တုၤဒၣ်လဲာ်လီၤတဲာ်နုာ်ဆူမ့ၣ်အူအပူၤ, မ့တမ့ၢ်ထံကျါတလီၢ်လီၢ်တလီၢ်လီၢ်လီၤ.

¹⁶ ယဟဲဆှၢဆူနပျဲၢ်နဘီၣ်တဖၣ်အအိၣ်, ဘၣ်ဆၣ်အဝဲသ့ၣ်မၤဘျါအီၤတသ့ဘၣ်.”

¹⁷ ဒီးယ့ၣ်ၡူးစံးဆၢတၢ်ဒီးစံး, “ပှၤတစိၤလၢအတၢ်နာ်တအိၣ်ဘၣ်ဒီးအနၢ်က့ၣ်သ့ၣ်ဧၢ, ယကဘၣ်အိၣ်ဒီးသုဆံးယံာ်ဒံးလဲၣ်. ယကဘၣ်ဝံသးစူၤသုဆံးယံာ်ဒံးလဲၣ်. ဟဲစိာ်ပိာ်ခွါဖိဆူယအိၣ်ဖဲအံၤတက့ၢ်.”

¹⁸ ဒီးယ့ၣ်ၡူးဒူတၢ်နါအလိၤ, ဒီးတၢ်နါဟးထီၣ်ကွံာ်လၢအလိၤ, ဒီးပိာ်ခွါဖိသၣ်န့ၣ်ဘျါက့ၤဝဲတကတီၢ်ဃီဖဲန့ၣ်လီၤ.

¹⁹ တုၤနုၤတစု, အပျဲၢ်အဘီၣ်တဖၣ်ဟဲဆူယ့ၣ်ၡူးအအိၣ်ကစုဒု, ဒီးသံကွၢ်အီၤ, “ဘၣ်မနုၤလၢပဟီထီၣ်ကွံာ်တၢ်နါတန့ၢ်န့ၣ်လဲၣ်.”

²⁰ အဝဲစံးဆၢအဝဲသ့ၣ်, “မ့ၢ်လၢသုတၢ်နာ်န့ၢ်ယွၤဆံးဝဲစှၤဝဲအဃိလီၤ. နာ်ယၤတက့ၢ်. သုတၢ်နာ်မ့ၢ်အိၣ်ထဲသိးဒီးသဘၣ်အချံတဖျၢၣ်ဒီး, သုမ့ၢ်စံးဘၣ်ကစၢၢ်အံၤ, ‘သုးကွံာ်နသးဖဲအံၤဆူန့ၣ်တက့ၢ်.’ ဒီးကသုးကွံာ်အသးလီၤ. ဒီးတၢ်လၢသုမၤတသ့ဘၣ်န့ၣ်, တအိၣ်ဘၣ်နီတမံၤဘၣ်လီၤ.

²¹ (ဘၣ်ဆၣ်ဒီး, ထဲလၢတၢ်ထုကဖၣ်ယွၤဒီးတၢ်ဒုၣ်တၢ်အီၣ်ဧိၤန့ၣ်, ပှၤနီၣ်ထီၣ်တၢ်နါဒ်သိးအံၤသ့ဝဲလီၤ.)”

ယ့ၣ်ၡူးကတိၤကဒီးတၢ်ဘၣ်ဃးဒီးအတၢ်သံ

²² ဖဲအပျဲၢ်အဘီၣ်တဖၣ်ခဲလၢာ်ဟဲပာ်ဖှိၣ်ထီၣ်အသးလၢကီၢ်ကၤလံၤလါ အပူၤဒီး, ယ့ၣ်ၡူးစံးဘၣ်အဝဲသ့ၣ်, “ပှၤကညီဖိခွါအံၤဘူးကဘၣ်တၢ်ဟ့ၣ်လီၤကွံာ်အီၤဆူပှၤကညီ အစုပူၤလံ.

²³ ဒီးအဝဲသ့ၣ်ကမၤသံအီၤ, ဒီးလၢသၢနံၤတနံၤန့ၣ်, ကဘၣ်တၢ်ဒုးဂဲၤဆၢထၢၣ်က့ၤအီၤလီၤ.” အပျဲၢ်အဘီၣ်တဖၣ်အသးအုးဒိၣ်မးလီၤ.

တၢ်ဟ့ၣ်တၢ်လုၢ်ဟံၣ်အခိအသွဲ

²⁴ တုၤယ့ၣ်ၡူးဒီးအပျဲၢ်အဘီၣ်တဖၣ်ဟဲတုၤဆူဝ့ၢ်ကပ့းရနီၣ်ဒီး, ပှၤထၢတၢ်အခိအသွဲလၢတၢ်လုၢ်ဟံၣ်အဂီၢ်တဖၣ်, ဟဲဆူစီၤပ့းတရူးအအိၣ်ဒီးစံး, “သုသရၣ်န့ၣ်ဟ့ၣ်တၢ်လုၢ်ဟံၣ်အခိအသွဲကစီဒီဧါ.”

²⁵ အဝဲစံးဆၢဝဲ, “မ့ၢ်.” ဒီးတုၤအက့ၤနုာ်ဆူဟံၣ်ပူၤဒီး, ယ့ၣ်ၡူးကတိၤတၢ်ဒီးအီၤလၢအဆိဒီးစံးဝဲ, “စီၤၡံမိၣ်ဧၢ, နဆိကမိၣ်ဒ်လဲၣ်. ဟီၣ်ခိၣ်စီၤပၤတဖၣ်န့ၣ်, ဟံးန့ၢ်တၢ်အခိအသွဲလၢမတၤတဖၣ်အအိၣ်လဲၣ်. လၢအထံဖိကီၢ်ဖိအအိၣ်ဧါ. မ့တမ့ၢ်ဘၣ်ဒီး, လၢပှၤထံဂၤကီၢ်ဂၤဖိအအိၣ်လဲၣ်.”

²⁶ စီၤပ့းတရူးစံးဆၢဝဲ, “လၢပှၤထံဂၤကီၢ်ဂၤဖိအအိၣ်လီၤ.” ယ့ၣ်ၡူးစံးဘၣ်အီၤ, “မ့မ့ၢ်ဒ်န့ၣ်ဒီး, ထံဖိကီၢ်ဖိတဖၣ်ပူၤဖျဲးဝဲလီၤ.

²⁷ ဘၣ်ဆၣ်ဒီး, ဒ်သိးပသုတမၤတမုာ်ဘၣ်အဝဲသ့ၣ်အသးတဂ့ၤအဂီၢ်န့ၣ်, လဲၤဆူပီၣ်လဲၣ်, ဒီးစဲၤလီၤနတခွဲဘိတက့ၢ်. ဟံးန့ၢ်ညၣ်အဆိကတၢၢ်လၢနတခွဲန့ၢ်အီၤတဘ့ၣ်, ဒီးအိးထီၣ်အကိာ်ပူၤ, ဒီးနကထံၣ်န့ၢ်စ့တဘ့ၣ်လၢအကလၢဝဲလၢတၢ်လုၢ်ဟံၣ်အခိအသွဲလၢနဂီၢ်, ဒီးလၢယဂီၢ်လီၤ. ဟံးန့ၢ်စ့အဝဲန့ၣ်ဒီး, ဟ့ၣ်လီၤတၢ်လုၢ်ဟံၣ်အခိအသွဲလၢယၤဒီးနၤအဂီၢ်တက့ၢ်.”