လံာ်လူၤကၣ် 24 - Sgaw Karen Common Bible

ခရံာ်ဂဲၤဆၢထၢၣ်က့ၤလၢတၢ်သံ

¹ ဖဲမုၢ်ခီၣ်ထံးအနံၤ, ဂီၤခီဂီၤဂီၤအဆၢကတီၢ်န့ၣ်, ပိာ်မုၣ်တဖၣ်လဲၤဆူပှၤသွၣ်ခိၣ်အပူၤ, စိာ်ဃုာ်ဒီးတၢ်နၢမူလၢ အဝဲသ့ၣ်အိၣ်ကတဲာ်ကတီၤပာ်ဝဲတဖၣ်န့ၣ်လီၤ.

² အဝဲသ့ၣ်ထံၣ်လၢလၢၢ်တဖျၢၣ်န့ၣ်ဘၣ်တၢ်တလ့ၣ်ကွံာ်အီၤလၢ ပှၤသွၣ်ခိၣ်အပူၤအခိၣ်ထိးလီၤ.

³ လၢတၢ်န့ၣ်အဃိအဝဲသ့ၣ်နုာ်လီၤကွၢ်ဝဲ, ဘၣ်ဆၣ်ဒီး, တထံၣ်န့ၢ်ကစၢ်ယ့ၣ်ၡူးအစိၣ်ဘၣ်.

⁴ ဖဲအဝဲသ့ၣ်အိၣ်ဆၢထၢၣ်ဖဲန့ၣ်ဒီးကမၢကမၣ်ဝဲလၢတၢ်တမံၤအံၤအဂ့ၢ်န့ၣ်, သတူၢ်ကလာ်ပှၤခံဂၤကူသိးတၢ်ကူတၢ်ကၤကပြုၢ်ကပြီၤ ဆၢထၢၣ်လၢအဝဲသ့ၣ်အဃၢၤလီၤ.

⁵ ပိာ်မုၣ်တဖၣ်အံၤပှဲၤဒီးတၢ်ပျံၤတၢ်ဖုးဒီးဆုးလီၤအခိၣ်, ဖဲပှၤခံဂၤန့ၣ်စံးဘၣ်အီၤ, “ဘၣ်မနုၤအဃိသုဃုပှၤမူတဂၤလၢပှၤသံတဖၣ်အကျါလဲၣ်.

⁶ အဝဲဒၣ်တအိၣ်ဖဲအံၤဘၣ်. ဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤ လံ. သ့ၣ်နီၣ်ထီၣ်က့ၤတၢ်လၢအဝဲဒၣ်စံးဘၣ်တ့ၢ်သုဖဲအအိၣ် ဝဲလၢကီၢ်ကၤလံၤလါအဆၢကတီၢ်န့ၣ်တက့ၢ်.

⁷ ‘ပှၤကညီဖိခွါကဘၣ်တၢ်ဟ့ၣ်လီၤကွံာ်အီၤဆူပှၤတၢ်ဒဲးဘးဖိတဖၣ် အစုပူၤ, ကဘၣ်တၢ်ပျၤထီအီၤလၢထူၣ်စုညါအလိၤ, ဒီးကဂဲၤဆၢထၢၣ်သမူထီၣ်က့ၤဝဲဖဲသၢသီတသီန့ၣ်လီၤ.’ ”

⁸ တုၤနုၤတစုပိာ်မုၣ်တဖၣ်သ့ၣ်နီၣ်ထီၣ်က့ၤအတၢ်စံးတၢ်ကတိၤတဖၣ်,

⁹ ဟးထီၣ်လၢပှၤသွၣ်ခိၣ်အပူၤဒီးက့ၤစံးဘၣ်တဲဘၣ်တၢ်သ့ၣ်တဖၣ် အံၤခဲလၢာ်လၢပှၤတၢ်မၢဖိတဆံတဂၤဒီးပှၤအဂၤတဖၣ်ခဲလၢာ်လီၤ.

¹⁰ ပိာ်မုၣ်တဖၣ်န့ၣ်မ့ၢ်ဝဲပှၤမၤကဒါလၣ်မုၣ်နီၢ်မၤရံ, နီၢ်ယိၤအၣ်နၣ်, ဒီးစီၤယၤကိာ်အမိၢ်နီၢ်မၤရံန့ၣ်လီၤ. အဝဲသ့ၣ်ဒီးပိာ်မုၣ်အဂၤလၢအအိၣ်ဒီးအဝဲသ့ၣ်တဖၣ်န့ၣ်, စံးဘၣ်တဲဘၣ်ပှၤတၢ်မၢဖိတဖၣ်လၢတၢ်ဂ့ၢ်သ့ၣ်တဖၣ်အံၤလီၤ.

¹¹ ဘၣ်ဆၣ်ဒီးပှၤတၢ်မၢဖိတဖၣ်ဆိကမိၣ်ဝဲလၢတၢ်လၢပှၤပိာ်မုၣ် တဖၣ်တဲအီၤန့ၣ်မ့ၢ်ဒၣ်တၢ်လၢအခီပညီတအိၣ်, ဒီးတနာ်အဝဲသ့ၣ်ဘၣ်.

¹² မ့မ့ၢ်စီၤပ့းတရူးတခီဂဲၤဆၢထၢၣ်ဒီးဃ့ၢ်ဆူပှၤသွၣ်ခိၣ်အပူၤ, သကူးလီၤအသးဒီးကွၢ်နုာ်တၢ်ဒီးထံၣ်ဒၣ်ဝဲထဲတၢ်ကံးယာ် အဝါတဖၣ်လီၤ. တုၤနုၤတစုအဝဲဒၣ်က့ၤက့ၤဆူဟံၣ်ဒီး ကမၢကမၣ်ဝဲလၢတၢ်လၢအမၤတ့ၢ်အသးအဂ့ၢ်န့ၣ်လီၤ.

တၢ်လဲၤဆူသဝီအ့းမၤအူ

¹³ တနံၤဃီအဝဲန့ၣ်, အဝဲသ့ၣ်အကျါခံဂၤလဲၤဆူသဝီအ့းမၤအူ လၢအစီၤစုၤဒီးဝ့ၢ်ယရူၤၡလ့ၣ်ကဘၣ်နွံမံးလး

¹⁴ ဒီးအဝဲသ့ၣ်ကတိၤသကိးဘၣ်ဃးတၢ်လၢအမၤတ့ၢ်အသးခဲလၢာ်လီၤ.

¹⁵ ဖဲအဝဲသ့ၣ်ကတိၤသကိးတၢ်အဆၢကတီၢ်န့ၣ်, ယ့ၣ်ၡူးအနီၢ်ကစၢ်ဒၣ်ဝဲသုးဘူးဃီၤအသး, ဒီးလဲၤဃုာ်တၢ်ဒီးအဝဲသ့ၣ်လီၤ.

¹⁶ အဝဲသ့ၣ်ထံၣ်အီၤ, ဘၣ်ဆၣ်ဒီးအဝဲသ့ၣ်တသ့ၣ်ညါအီၤဘၣ်.

¹⁷ ယ့ၣ်ၡူးစံးဘၣ်အဝဲသ့ၣ်, “ဖဲသုလဲၤတၢ်အဖၢမုၢ်န့ၣ်, သုကတိၤသကိးတၢ်ဂ့ၢ်မနုၤတမံၤလဲၣ်.” အဝဲသ့ၣ်အိၣ်ဆၢထၢၣ်ဂၢၢ်တပၢၢ်, ဒီးအမဲာ်လီၤသပှၢ်ဝဲလီၤ.

¹⁸ အဝဲသ့ၣ်အကျါတဂၤလၢအမံၤမ့ၢ်စီၤကျ့အီးပၤန့ၣ်သံကွၢ်အီၤ, “နမ့ၢ်ပှၤသမှံၤဖဲဝ့ၢ်ယရူၤၡလ့ၣ်ထဲတဂၤဧိၤလၢအတသ့ၣ် ညါဘၣ်ဃးတၢ်လၢအမၤတ့ၢ်အသးဖဲအပူၤကွံာ်စှၤသီလၢဝ့ၢ် အဝဲန့ၣ်အပူၤ, လီၤဧါ.”

¹⁹ အဝဲသံကွၢ်ဝဲ, “တၢ်မနုၤတဖၣ်လဲၣ်.” အဝဲသ့ၣ်စံးဆၢဝဲ, “တၢ်လၢအမၤတ့ၢ်အသးဒီးပှၤနစၤရ့းဖိယ့ၣ်ၡူးအဂ့ၢ်တဖၣ်န့ၣ် လီၤ. ပှၤတဂၤအံၤမ့ၢ်ဝဲဝံတဂၤ, ဒီးကစၢ်ယွၤဒီးပှၤဂီၢ်မုၢ်ခဲလၢာ်ပာ်အီၤဒ် အအိၣ်ဒီးတၢ်စိတၢ်ကမီၤလၢ တၢ်စံးတၢ်ကတိၤဒီးတၢ်ဖံးတၢ်မၤန့ၣ်လီၤ.

²⁰ ပပှၤလုၢ်တၢ်အခိၣ်အဒိၣ်ဒီးပှၤခိၣ်ပှၤနၢ်တဖၣ်ဟ့ၣ်လီၤကွံာ်အီၤဒ်သိး အကဘၣ်တၢ်စံၣ်ညီၣ်သံအီၤ, ဒီးအဝဲဒၣ်ဘၣ်တၢ်ပျၤထီအီၤလၢထူၣ်စုညါအလိၤန့ၣ်လီၤ.

²¹ ဒီးပမုၢ်လၢ်တ့ၢ်ပဝဲလၢအဝဲကမ့ၢ်ပှၤတဂၤလၢအကအုၣ် က့ၤခီၣ်က့ၤအံၣ်စရ့လးလီၤ. အါန့ၢ်အန့ၣ်, မုၢ်တနံၤအံၤမ့ၢ်ဝဲတၢ်မၤအသးပှဲၤထီၣ်သၢသီတသီလီၤ.

²² ပှၤပိာ်မုၣ်လၢပသိးပကျါတနီၤမၤကမၢကမၣ်ပှၤလီၤ. အဝဲသ့ၣ်လဲၤဝဲဒၣ်ဂီၤဂီၤဆူပှၤသွၣ်ခိၣ်အပူၤ,

²³ ဘၣ်ဆၣ်ဒီးတထံၣ်ဝဲအစိၣ်ဘၣ်. အဝဲသ့ၣ်ဟဲက့ၤတဲဝဲလၢအထံၣ်ဘၣ်ကလူးတဖၣ်လၢ အစံးဘၣ်တဲဘၣ်အဝဲသ့ၣ်လၢယ့ၣ်ၡူးမူဝဲန့ၣ်လီၤ.

²⁴ ပှၤလၢပကျါတနီၤလဲၤဆူပှၤသွၣ်ခိၣ်အပူၤ, ဒီးထံၣ်ဘၣ်ဝဲတၢ်တမံၤဃီဒ်ပိာ်မုၣ်တဖၣ်စံးတ့ၢ်ဝဲအသိးလီၤ. မ့မ့ၢ်အနီၢ်ကစၢ်န့ၣ်အဝဲသ့ၣ်တထံၣ်ဘၣ်.”

²⁵ တုၤနုၤတစုယ့ၣ်ၡူးစံးဘၣ်အဝဲသ့ၣ်, “ပှၤသူၣ်တဆးသးတဆး သ့ၣ်ဧၢ, သုကစူၢ်ကနာ်တၢ်ခဲလၢာ်လၢဝံတဖၣ်စံးတ့ၢ်ဝဲန့ၣ် ကီမးလဲၣ်.

²⁶ မ့ၢ်အလီၢ်တအိၣ်လၢခရံာ်ကတူၢ်တၢ်သ့ၣ်တဖၣ်အံၤ, ဒီးနုာ်လီၤဆူအတၢ်လၤကပီၤအပူၤဘၣ်ဧါ.”

²⁷ ဒီးယ့ၣ်ၡူးတဲနၢ်ပၢၢ်အဝဲသ့ၣ်ဘၣ်ဃးတၢ်လၢအဘၣ်တၢ် စံးတ့ၢ်လၢအဂ့ၢ်လၢတၢ်ကွဲးအသးစီဆှံခဲလၢာ်အပူၤ, စးထီၣ်လၢလံာ်မိၤၡ့တဖၣ်ဒီးဝံခဲလၢာ်အတၢ်ကွဲးတဖၣ်န့ၣ်လီၤ.

²⁸ ဖဲအဝဲသ့ၣ်ဟဲဘူးထီၣ်ဒီးသဝီလၢအကလဲၤဝဲန့ၣ်, ယ့ၣ်ၡူးမၤအသးဒ်အကလဲၤယံၤထီၣ်ဒံးဆူညါအသိးန့ၣ်လီၤ.

²⁹ ဘၣ်ဆၣ်, အဝဲသ့ၣ်တြီအီၤဒီးစံးဝဲ, “အိၣ်ဒီးပှၤတက့ၢ်. ဘူးတ့ၢ်လံလၢမုၢ်ကဟါဝဲဒီးတၢ်ခံးလီၤဝဲလံ. လၢတၢ်န့ၣ်အဃိအဝဲဒၣ်လဲၤနုာ်အိၣ်ဒီးအဝဲသ့ၣ်လီၤ.

³⁰ အဝဲဒၣ်ဆ့ၣ်နီၤလၢစီၢ်နီၤခိၣ်တပူၤဃီဒီးအဝဲသ့ၣ်, ဟံးန့ၢ်ကိၣ်ဒီးဆိၣ်ဂ့ၤတၢ်အီၣ်လီၤ. အန့ၣ်ဝံၤဒီး, အဝဲဒၣ်စိၢ်ဘျဲးကိၣ်ဒီးဟ့ၣ်လီၤအဝဲသ့ၣ်လီၤ.

³¹ အဝဲသ့ၣ်အမဲာ်အိးထီၣ်အသးဒီးသ့ၣ်ညါက့ၤအီၤ, ဘၣ်ဆၣ်ဒီးအဝဲဒၣ်ဟါမၢ်ကွံာ်လၢအဝဲသ့ၣ်အမဲာ်ညါလီၤ.

³² အဝဲသ့ၣ်စံးလိာ်အသး, “ဖဲအဝဲဒၣ်ကတိၤတၢ်ဒီးပှၤလၢကျဲဒီး တဲနၢ်ပၢၢ်ပှၤဘၣ်ဃးတၢ်ကွဲးအသးစီဆှံတဖၣ်အဂ့ၢ်န့ၣ်, တၢ်မၤမးအသးဒ်မ့ၣ်အူအီၣ်တၢ်လၢပပူၤတမ့ၢ်ဘၣ်ဧါ.”

³³ အဝဲသ့ၣ်ဂဲၤဆၢထၢၣ်တဘျီဃီ, ဒီးက့ၤက့ၤဆူဝ့ၢ်ယရူၤၡလ့ၣ်ဒီးဖဲန့ၣ်ထံၣ်အပျဲၢ်အဘီၣ်တဆံတဂၤ ပာ်ဖှိၣ်အသးတပူၤဃီဒီးပှၤအဂၤတဖၣ်

³⁴ လၢအစံးဝဲ, “ကစၢ်ဂဲၤဆၢထၢၣ်သမူထီၣ်က့ၤနီၢ်နီၢ်လီၤ. အဝဲဒၣ်လီၣ်ဖျါထီၣ်တ့ၢ်အသးလၢစီၤၡံမိၣ်လံ,” န့ၣ်လီၤ.

³⁵ တုၤနုၤတစုပှၤခံဂၤန့ၣ်တဲဖျါန့ၢ်အဝဲသ့ၣ်ဘၣ်ဃးတၢ်မၤ အသးဒီးအဝဲသ့ၣ်ဖဲအလဲၤတၢ်လၢကျဲဒီးလၢအဝဲသ့ၣ် သ့ၣ်ညါက့ၤလၢအဝဲဒၣ်မ့ၢ်ကစၢ်ဖဲအစိၢ်ဘျဲးကိၣ်အဂ့ၢ်န့ၣ်လီၤ.

ယ့ၣ်ၡူးလီၣ်ဖျါထီၣ်အသးလၢအပျဲၢ်အဘီၣ်တဖၣ်

³⁶ ဖဲပှၤခံဂၤစံးဘၣ်တဲဘၣ်အဝဲသ့ၣ်လၢတၢ်တမံၤအံၤအဂ့ၢ်န့ၣ်, သတူၢ်ကလာ်, ကစၢ်အနီၢ်ကစၢ်ဒၣ်ဝဲအိၣ်ဆၢထၢၣ်လၢအဝဲသ့ၣ် အသိးအကျါ, ဒီးစံးဘၣ်အဝဲသ့ၣ်, “မ်တၢ်ဃူတၢ်ဖိးအိၣ်ဒီးသုတက့ၢ်.”

³⁷ အဝဲသ့ၣ်ပျံၤတၢ်ဖုးတၢ်ဒိၣ်မးဒီးဆိကမိၣ်ဝဲလၢအထံၣ်ဘၣ်တၢ် တဃၣ်လီၤ.

³⁸ ဘၣ်ဆၣ်ဒီးအဝဲဒၣ်စံးဘၣ်အဝဲသ့ၣ်, “ဘၣ်မနုၤအဃိသုသူၣ်ပျံၤသးဖုးလဲၣ်. ဘၣ်မနုၤအဃိတၢ်သးဒ့ဒီတဖၣ်အံၤဟဲအိၣ်ထီၣ်လၢသုပူၤလဲၣ်.

³⁹ ကွၢ်ယစုယခီၣ်တဖၣ်, ဒ်သိးသုကထံၣ်ဘၣ်လၢအမ့ၢ်ယၤ, ယနီၢ်ကစၢ်ဒၣ်ယဲန့ၣ်တက့ၢ်. ကလၢၢ်ကွၢ်ယၤ, ဒီးသုကသ့ၣ်ညါလီၤ. အဂ့ၢ်ဒ်အံၤ, တၢ်တဃၣ်န့ၣ်, တအိၣ်ဒီးအညၣ်ဒီးအဃံဒ်သုထံၣ်ဘၣ်သုဝဲလၢ အအိၣ်ဒီးယၤအသိးန့ၣ်ဘၣ်.”

⁴⁰ အဝဲဒၣ်စံးတၢ်အံၤဝံၤဒီး, ဒုးနဲၣ်အဝဲသ့ၣ်လၢအစုအခီၣ်တဖၣ်န့ၣ်လီၤ.

⁴¹ အန့ၣ်ဒၣ်လဲာ်, အဝဲသ့ၣ်တနာ်ဝဲဒံးဘၣ်. အဝဲသ့ၣ်လၢပှဲၤဒီးတၢ်သးခုဒီးတၢ်ကမၢကမၣ်န့ၣ်လီၤ. လၢတၢ်န့ၣ်အဃိ, အဝဲဒၣ်သံကွၢ်အဝဲသ့ၣ်, “သုအိၣ်ဒီးတၢ်အီၣ်တၢ်အီဖဲအံၤတမံၤမံၤဧါ.”

⁴² အဝဲသ့ၣ်ဟ့ၣ်အီၤညၣ်အကၣ်တစဲး

⁴³ လၢအဝဲဒၣ်ဟံးန့ၢ်ဒီးအီၣ်ဝဲလၢအဝဲသ့ၣ်အမဲာ်ညါန့ၣ်လီၤ.

⁴⁴ အန့ၣ်ဝံၤဒီး စံးဘၣ်အဝဲသ့ၣ်, “တၢ်သ့ၣ်တဖၣ်အံၤမ့ၢ်ဒၣ်တၢ်တဖၣ်လၢ ယစံးဘၣ်တ့ၢ်သုဖဲယအိၣ်ဒံးယဲဒီးသုအဆၢကတီၢ်န့ၣ်လီၤ. တၢ်ခဲလၢာ်လၢအဘၣ်တၢ်ကွဲးတ့ၢ်အသးလၢယဂ့ၢ်ဖဲစီၤမိၤၡ့အတၢ်သိၣ်တၢ်သီ အလံာ်တဖၣ်အပူၤ, ဝံအတၢ်ကွဲးတဖၣ်, ဒီးလံာ်စံးထီၣ်ပတြၢၤတဖၣ်အပူၤန့ၣ်, ကဘၣ်လၢထီၣ်ပှဲၤထီၣ်ဝဲဒၣ်လီၤ.”

⁴⁵ တုၤနုၤတစုအဝဲဒၣ်အိးထီၣ်အဝဲသ့ၣ်အသးဒ်သိးအကနၢ် ပၢၢ်တၢ်ကွဲးအသးစီဆှံတဖၣ်

⁴⁶ ဒီးစံးဘၣ်အဝဲသ့ၣ်, “တၢ်ကွဲးအသးမ့ၢ်ဝဲ, ခရံာ်ကဘၣ်တူၢ်တၢ်ဒီးဂဲၤဆၢထၢၣ်က့ၤလၢတၢ်သံဖဲသၢသီ တသီအနံၤ,

⁴⁷ ဒီးလၢအဝဲဒၣ်အမံၤန့ၣ်, တၢ်ကစီၣ်ဘၣ်ဃးတၢ်ပီၢ်ယၢ်လီၤသးဒီးတၢ်ပျၢ်တၢ်ဒဲးဘး, ကဘၣ်တၢ်စံၣ်တဲၤတဲလီၤအီၤလၢပှၤကိးကလုာ်ဒဲးအဂီၢ်, အဆိလၢဝ့ၢ်ယရူၤၡလ့ၣ်န့ၣ်လီၤ.

⁴⁸ ဘၣ်ဃးဒီးတၢ်သ့ၣ်တဖၣ်အံၤအဂ့ၢ်န့ၣ်, သုမ့ၢ်ပှၤအုၣ်အသးတဖၣ်လီၤ.

⁴⁹ ဒီးယနီၢ်ကစၢ်ဒၣ်ယဲယကဆှၢလီၤတၢ်လၢယပၢ်စံးပာ်တ့ၢ်ဝဲတမံၤန့ၣ် လၢသုလိၤလီၤ. ဘၣ်ဆၣ်ဒီးသုကဘၣ်အိၣ်ခိးလၢဝ့ၢ်ပူၤ တုၤလၢတၢ်စိတၢ်ကမီၤလၢထးဟဲလီၤလၢသုလိၤတစုလီၤ.

ယ့ၣ်ၡူးဘၣ်တၢ်စိာ်ထီၣ်အီၤဆူမူခိၣ်

⁵⁰ အန့ၣ်ဝံၤအလီၢ်ခံ, အဝဲဒၣ်ဆှၢထီၣ်အဝဲသ့ၣ်ဆူဝ့ၢ်အချၢတုၤလၢဘ့ၤသနံ, ဒီးဖဲန့ၣ်, အဝဲယူာ်ထီၣ်အစုဒီးဆိၣ်ဂ့ၤအဝဲသ့ၣ်လီၤ.

⁵¹ ဖဲအဝဲဒၣ်ဆိၣ်ဂ့ၤအဝဲသ့ၣ်အဖၢမုၢ်န့ၣ်, အဝဲဒၣ်သုးယံၤထီၣ်အသးဒီးအဝဲသ့ၣ်, ဒီးဘၣ်တၢ်စိာ်ထီၣ်အီၤဆူမူခိၣ်လီၤ.

⁵² အဝဲသ့ၣ်ဘူၣ်ထီၣ်ဘါထီၣ်အီၤဒီးက့ၤက့ၤဝဲဆူဝ့ၢ်ယရူၤၡလ့ၣ် ပှဲၤဒီးတၢ်သးခုဖးဒိၣ်,

⁵³ ဒီးအိၣ်ဝဲလၢတၢ်လုၢ်ဟံၣ်အပူၤဒီးစံးဘျုးစံးဖှိၣ်ကစၢ်ယွၤတဘိ ယူၢ်ဃီလီၤ.