လံာ်လူၤကၣ် 22 - Sgaw Karen Common Bible

တၢ်ကူၣ်အၢထီဒါယ့ၣ်ၡူး

¹ ဘူၣ်ကိၣ်တအိၣ်ဒီးကိၣ်မံၣ်လၢတၢ်ကိးအီၤလၢဘူၣ်လဲၤကပာ်န့ၣ်, အဆၢကတီၢ်ဘူးထီၣ်ဝဲဒၣ်လီၤ.

² ပှၤလုၢ်တၢ်အခိၣ်အဒိၣ်တဖၣ်ဒီးပှၤသ့တၢ်ဘူၣ်တၢ်ဘါအတၢ် သိၣ်တၢ်သီတဖၣ်ဂုာ်ကျဲးစၢးဃုဝဲကျဲတဘိဘိလၢအကမၤသံ ယ့ၣ်ၡူးလၢတၢ်ခူသူၣ်လီၤ. အဂ့ၢ်မ့ၢ်လၢအဝဲသ့ၣ်ပျံၤပှၤဂီၢ်မုၢ်အဃိလီၤ.

စီၤယူဒၤအၢၣ်လီၤလၢအကဟ့ၣ်လီၤကွံာ်ယ့ၣ်ၡူး

³ အန့ၣ်ဝံၤအလီၢ်ခံ, မုၣ်ကီၤလံၢ်လဲၤနုာ်လီၤဆူစီၤယူဒၤ, လၢတၢ်ကိးအီၤလၢအံၣ်စကၤရံၤအိာ်လၢအမ့ၢ်ပှၤတၢ်မၢဖိ တဆံခံဂၤအကျါတဂၤန့ၣ်အပူၤလီၤ.

⁴ လၢတၢ်န့ၣ်အဃိ, စီၤယူဒၤဟးထီၣ်ဒီးကတိၤတၢ်ဒီးပှၤလုၢ်တၢ် အခိၣ်အဒိၣ်တဖၣ်ဒီးတၢ်လုၢ်ဟံၣ်အပှၤခိးတၢ်ဖိအခိၣ်အနၢ်တဖၣ် ဘၣ်ဃးလၢအကဟ့ၣ်လီၤကွံာ်ယ့ၣ်ၡူးဒ်လဲၣ်ဒ်လဲၣ်အဂ့ၢ်န့ၣ်လီၤ.

⁵ အဝဲသ့ၣ်အသူၣ်ခုအသးခု, ဒီးအၢၣ်လီၤအီလီၤလၢအကဟ့ၣ်အီၤစ့လီၤ.

⁶ စီၤယူဒၤအၢၣ်လီၤတူၢ်လိာ်ဝဲ, ဒီးဃုခွဲးဂ့ၤယာ်ဘၣ်လၢအကဟ့ၣ်လီၤကွံာ်ယ့ၣ်ၡူးဆူအဝဲသ့ၣ် အစုပူၤဖဲပှၤဂီၢ်မုၢ်တသ့ၣ်ညါဝဲအဆၢကတီၢ်န့ၣ်လီၤ.

တၢ်ကတဲာ်ကတီၤဘူၣ်လဲၤကပာ်အတၢ်အီၣ်

⁷ မုၢ်နံၤမုၢ်သီဟဲတုၤအိၣ်ဝဲဒၣ်ဖဲဘူၣ်ကိၣ်တအိၣ်ဒီးကိၣ်မံၣ်အဆၢ ကတီၢ်, လၢသိဖိတဖၣ်ကဘၣ်တၢ်မၤသံအီၤလၢဘူၣ်လဲၤကပာ် အတၢ်အီၣ်အဂီၢ်လီၤ.

⁸ ယ့ၣ်ၡူးမၢလီၤစီၤပ့းတရူးဒီးစီၤယိၤဟၣ်ဒီးမၤလိာ်အဝဲသ့ၣ်ဒ်အံၤ, “လဲၤဒီးကတဲာ်ကတီၤပာ်ပဘူၣ်လဲၤကပာ်အတၢ်အီၣ်လၢ ပကအီၣ်အီၤအဂီၢ်န့ၣ်တက့ၢ်.”

⁹ အဝဲသ့ၣ်သံကွၢ်အီၤ, “နအဲၣ်ဒိးပကတဲာ်ကတီၤပာ်အီၤဖဲတၢ်လီၢ်မတၤတပူၤလဲၣ်.”

¹⁰ အဝဲဒၣ်စံးဝဲ, “ဒိကနၣ်တက့ၢ်. ဖဲသုလဲၤနုာ်ဆူဝ့ၢ်ပူၤန့ၣ်, ပှၤပိာ်ခွါတဂၤလၢအစိာ်ထံလၢသပၢၤထံတဖျၢၣ်အပူၤကသဂၢၢ်သုလီၤ. နုာ်လီၤပိာ်အခံဆူဟံၣ်လၢအဝဲနုာ်လီၤလၢအပူၤ

¹¹ ဒီးစံးဘၣ်ဟံၣ်ကစၢ်န့ၣ်, ‘သရၣ်စံးဘၣ်နၤ, ဒၢးလၢယပျဲၢ်ယဘီၣ်ဒီးယၤ ပကအီၣ်ဘူၣ်လဲၤကပာ်အတၢ်အီၣ်အဂီၢ်န့ၣ်, အိၣ်ဖဲလဲၣ်.’

¹² အဝဲဒၣ်ကဒုးနဲၣ်သုဒၢးဖးဒိၣ်လၢတၢ်ဖီခိၣ်တဒၢးအိၣ် ကတဲာ်ကတီၤပာ်အသးဂ့ၤဂ့ၤဘၣ်ဘၣ်ဒီးသုကဘၣ်ကတဲာ် ကတီၤတၢ်ခဲလၢာ်ခဲဆ့ဖဲန့ၣ်လီၤ.”

¹³ အဝဲသ့ၣ်ဟးထီၣ်ဒီးထံၣ်တၢ်ခဲလၢာ်ခဲဆ့ဒ်ယ့ၣ်ၡူးစံးဘၣ်တ့ၢ်အီၤ အသိး, ဒီးကတဲာ်ကတီၤပာ်ဘူၣ်လဲၤကပာ်အတၢ်အီၣ်န့ၣ်လီၤ.

ကစၢ်အတၢ်အီၣ်လၢဟါ

¹⁴ ဖဲဆၢကတီၢ်နၣ်ရံၣ်တုၤဃီၤန့ၣ်, ယ့ၣ်ၡူးဟံးန့ၢ်အလီၢ်ဖဲစီၢ်နီၤခိၣ်, ဃုာ်ဒီးတၢ်မၢဖိတဖၣ်န့ၣ်လီၤ.

¹⁵ အဝဲဒၣ်စံးဘၣ်အဝဲသ့ၣ်, “ယသးအိၣ်တ့ၢ်ယဲအဒိၣ်အအါလၢယကအီၣ်ဘၣ် ဘူၣ်လဲၤကပာ်အတၢ်အီၣ်တဘျီညါအံၤတပူၤဃီဒီးသု, တချုးယတူၢ်ဘၣ်တၢ်ဒံးဘၣ်န့ၣ်လီၤ.

¹⁶ အဂ့ၢ်ဒ်အံၤ, ယစံးဘၣ်တဲဘၣ်သု, တချုးဘူၣ်လဲၤကပာ်အတၢ်အီၣ်အဝဲအံၤ ဘၣ်တၢ်ပာ်ဖျါထီၣ်အခီပညီလၢလၢပှဲၤပှဲၤလၢကစၢ်ယွၤအဘီအမုၢ် အပူၤဒံးဘၣ်န့ၣ်, ယတအီၣ်လၢၤအီၤနီတစုဘၣ်.”

¹⁷ အန့ၣ်ဝံၤဒီးယ့ၣ်ၡူးဟံးထီၣ်လီခီ, စံးဘျုးစံးဖှိၣ်ကစၢ်ယွၤဒီးစံးဝဲ, “ဟံးန့ၢ်တၢ်အဝဲအံၤ, ဒီးနီၤလီၤအီၤလၢသုသိးသုကျါန့ၣ်တက့ၢ်.

¹⁸ အဂ့ၢ်ဒ်အံၤ, ယစံးဘၣ်တဲဘၣ်သုလၢ, စးထီၣ်ခဲအံၤဒီးတုၤလီၤလၢယွၤ အဘီအမုၢ်ဟဲဝဲတစုန့ၣ်, ယတအီလၢၤဘၣ်စပံးထံအံၤဘၣ်.”

¹⁹ အဝဲန့ၣ်ဝံၤအလီၢ်ခံ, အဝဲဒၣ်ဟံးန့ၢ်ကိၣ်, စံးဘျုးစံးဖှိၣ်ကစၢ်ယွၤ, စိၢ်ဘျဲးဝဲ, ဒီးဟ့ၣ်လီၤအီၤဆူအဝဲသ့ၣ်အအိၣ်ဒီးစံးဝဲ, “အဝဲအံၤမ့ၢ်ယနီၢ်ခိလၢအဘၣ်တၢ်ဟ့ၣ်လီၤအီၤလၢသုဂီၢ်လီၤ. မၤတၢ်အဝဲအံၤလၢတၢ်သ့ၣ်နီၣ်ထီၣ်က့ၤယၤအဂီၢ်န့ၣ်တက့ၢ်.”

²⁰ ဒ်န့ၣ်အသိး, ဖဲအအီၣ်တၢ်လၢဟါအီၣ်ဝံၤန့ၣ်, အဝဲဒၣ်ဟ့ၣ်လီၤအဝဲသ့ၣ်လၢလီခီဒီးစံးဝဲ, “လီခီအံၤမ့ၢ်ကစၢ်ယွၤအတၢ်အၢၣ်လီၤအီလီၤအသီလၢ အဘၣ်တၢ်စဲပနီၣ်ဃာ်အီၤလၢယသွံၣ်, လၢအဘၣ်တၢ်လူလီၤဂၢ်လီၤအီၤလၢသုဂီၢ်န့ၣ်လီၤ.

²¹ ဘၣ်ဆၣ်ဒီးကွၢ်တက့ၢ်. ပှၤလၢအကဟ့ၣ်လီၤကွံာ်ယၤတဂၤန့ၣ်, အိၣ်ဒီးယၤလၢစီၢ်နီၤခိၣ်ဖဲအံၤလီၤ.

²² အဂ့ၢ်မ့ၢ်လၢပှၤကညီဖိခွါကသံဝဲဒ်ကစၢ်ယွၤတိာ်ပာ်တ့ၢ်ဝဲအသိးန့ၣ်လီၤ. ဘၣ်ဆၣ်ဒီး ပှၤလၢအကဟ့ၣ်လီၤကွံာ်အီၤတဂၤန့ၣ်, ဘၣ်အဖှီၣ်ဆံးဒိၣ်လဲၣ်.

²³ တုၤနုၤတစုအဝဲသ့ၣ်သံကွၢ်လိာ်အသးတဂၤဒီးတဂၤ, လၢအဝဲသ့ၣ်အကျါမ့ၢ်မတၤတဂၤကဟ့ၣ်လီၤကွံာ်အီၤလဲၣ်န့ၣ်လီၤ.

တၢ်ဂ့ၢ်လိာ်ဘှီလိာ်ဘၣ်ဃး တၢ်ဒိၣ်တၢ်မုၢ်အဂ့ၢ်

²⁴ တၢ်ဂ့ၢ်လိာ်ဘှီလိာ်အိၣ်ထီၣ်ဝဲလၢအပျဲၢ်အဘီၣ်သ့ၣ်တဖၣ် အကျါဘၣ်ဃးဒီးမတၤတဂၤကြၢးဘၣ်တၢ်ပာ်ကဲအီၤဒ် ပှၤအဒိၣ်ကတၢၢ်တဂၤလဲၣ်န့ၣ်လီၤ.

²⁵ ယ့ၣ်ၡူးစံးဘၣ်အဝဲသ့ၣ်, “ပှၤကလုာ်ဂၤအစီၤပၤတဖၣ်အိၣ်ဒီးအစိ ကမီၤလၢအပှၤဂီၢ်မုၢ်တဖၣ်အဖီခိၣ်, ဒီးပှၤပၢတၢ်ပြးတၢ်တဖၣ် ဘၣ်တၢ်ကိးအီၤလၢပှၤမၤဘျုးတၢ်တဖၣ်လီၤ.

²⁶ ဘၣ်ဆၣ်ဒီးသုဝဲသ့ၣ်တဖၣ်, သုတမ့ၢ်ဒ်န့ၣ်အသိးဘၣ်. မ့မ့ၢ်, ပှၤအဒိၣ်ကတၢၢ်လၢသုကျါကဘၣ်မ့ၢ်ဝဲဒ်ပှၤအဆံးကတၢၢ်တဂၤ အသိး, ဒီးပှၤအခိၣ်ကဘၣ်မ့ၢ်ဝဲဒ်တၢ်ခ့တၢ်ပှၤတဂၤအသိးန့ၣ်လီၤ.

²⁷ မတၤဒိၣ်လဲၣ်. ပှၤတဂၤလၢအဆ့ၣ်နီၤအီၣ်တၢ်ဧါ. မ့တမ့ၢ်ပှၤတဂၤလၢအမၤတၢ်ခ့တၢ်ပှၤအတၢ်မၤလၢ ပှၤဆ့ၣ်နီၤအီၣ်တၢ်အဂီၢ်န့ၣ်လဲၣ်. သပှၢ်ကတၢၢ်, ပှၤလၢအဆ့ၣ်နီၤအီၣ်တၢ်န့ၣ်လီၤ. ဘၣ်ဆၣ်ဒီးယအိၣ်လၢသုသိးသုကျါ ဒ်ပှၤလၢအမၤတၢ်ခ့တၢ်ပှၤအတၢ်မၤတဂၤအသိးလီၤ.

²⁸ လၢတၢ်မၤကွၢ်လၢအဟဲဘၣ်ယၤဒီဆၢဒီကတီၢ်အပူၤန့ၣ်, သုဝဲသ့ၣ်တဖၣ်သုအိၣ်ဒံးသုဝဲဒီးယၤလီၤ.

²⁹ ဒီးဒ်ယပၢ်ဟ့ၣ်စိဟ့ၣ်ကမီၤယၤလၢယကပၢဘၣ်တၢ်အသိးန့ၣ်, ယကဟ့ၣ်သုတၢ်တမံၤဃီန့ၣ်လီၤ.

³⁰ သုကအီၣ်တၢ်အီတၢ်လၢယစီၢ်နီၤခိၣ်လၢယဘီယမုၢ်အပူၤ, ဒီးသုကဆ့ၣ်နီၤလၢလီၢ်ပစိာ်အဖီခိၣ်ဒ်သိးသုကပၢပှၤ အံၣ်စရ့လးဖိတဆံခံဒူၣ်န့ၣ်လီၤ.

ယ့ၣ်ၡူးကတိၤဆိပာ်စၢၤတၢ်ဘၣ်ဃး စီၤပ့းတရူးအတၢ်သမၢအီၤ

³¹ စီၤၡံမိၣ်ဧၢ, စီၤၡံမိၣ်ဧၢ, ဒိကနၣ်တက့ၢ်. မုၣ်ကီၤလံၢ်ဒိးန့ၢ်လံတၢ်ပျဲလၢအကမၤကွၢ်သုဝဲကိးဂၤဒဲး, လၢအကနီၤဖးတၢ်ဂ့ၤဒီးတၢ်အၢ, ဒ်ပှၤထူစံာ်ဖိတဂၤဂုၤဘုအသိးန့ၣ်လီၤ.

³² ဘၣ်ဆၣ်ဒီးယဃ့ဘါထုကဖၣ်တ့ၢ်ယဲလၢနဂီၢ်, စီၤၡံမိၣ်ဧၢ, ဒ်သိးနတၢ်စူၢ်တၢ်နာ်သုတဟးဂီၤတဂ့ၤအဂီၢ်လီၤ. ဒီးဖဲနဃၣ်ကဒါက့ၤနသးဆူယအိၣ်န့ၣ်, နကဘၣ်ဟ့ၣ်ဂံၢ်ဟ့ၣ်ဘါနဒီပုၢ်ဝဲၢ်တဖၣ်လီၤ.”

³³ စီၤပ့းတရူးစံးဆၢဝဲ, “ကစၢ်ဧၢ, ယအိၣ်ကတဲာ်ကတီၤယသးလၢယကလဲၤဆူဃိာ်ပူၤဒီးနၤ ဒီးယကသံဃုာ်ဒီးနၤန့ၣ်လီၤ.”

³⁴ ယ့ၣ်ၡူးစံးဆၢဝဲ, “ယစံးဘၣ်နၤ, စီၤပ့းတရူးဧၢ, တနၤအံၤ, နတချုးသမၢဒံးယၤသၢစုဒံးဘၣ်ဒီး ဆီဖါကီၢ်တအိၣ်အိဘၣ်ဝဲဘၣ်.”

စ့ထၢၣ်, တၢ်အီၣ်အထၢၣ်, ဒီးနး

³⁵ အန့ၣ်ဝံၤအလီၢ်ခံ, ယ့ၣ်ၡူးစံးဘၣ်အဝဲသ့ၣ်, “တဘျီဖဲယမၢလီၤသု, တအိၣ်ဒီးစ့ထၢၣ်မ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, ခီၣ်ဖံးမ့ၢ်ဂ့ၤန့ၣ်, တၢ်တလၢတပှဲၤလၢသုဂီၢ်အိၣ်ဝဲတမံၤမံၤဒံးဧါ.”

³⁶ အဝဲသ့ၣ်စံးဆၢဝဲ, “တအိၣ်နီတမံၤဘၣ်.” “ဘၣ်ဆၣ်ဒီးခဲကနံၣ်အံၤ,” ယ့ၣ်ၡူးစံးဆၢဝဲ, “ပှၤတဂၤလၢ်လၢ်လၢအအိၣ်ဒီးစ့ထၢၣ်တဖျၢၣ်မ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, မ်အကဟံးန့ၢ်အီၤတက့ၢ်. ဒီးပှၤတဂၤဂၤလၢအတအိၣ်ဒီးနးတဘ့ၣ်န့ၣ် မ်အကဆါကွံာ်အဆ့ကၤဖီခိၣ်ဒီးပှ့ၤန့ၢ်အီၤတက့ၢ်.

³⁷ အဂ့ၢ်ဒ်အံၤ, ယစံးဘၣ်တဲဘၣ်သုတၢ်တမံၤအံၤ, တၢ်ကွဲးအသးလၢအစံးဝဲ, ‘အဝဲဘၣ်တၢ်ဂံၢ်ဃုာ်အီၤလၢပှၤလုၣ်သ့ၣ်ခါပတာ်ထံကီၢ် အတၢ်သိၣ်တၢ်သီတဖၣ်အသိးအကျါ,’ တတီၤန့ၣ်, ကဘၣ်ဟဲလၢထီၣ်ပှဲၤထီၣ်ဝဲလၢယၤလီၤ. အဂ့ၢ်ဒ်အံၤ, တၢ်လၢအဘၣ်တၢ်ကွဲးတ့ၢ်အီၤလၢယဂ့ၢ်န့ၣ် ဟဲလၢထီၣ်ပှဲၤထီၣ်ဝဲဒၣ်လီၤ.”

³⁸ အပျဲၢ်အဘီၣ်တဖၣ်စံးဝဲ, “ကွၢ်လၢအံၤ, ကစၢ်ဧၢ, နးအိၣ်ဝဲဒၣ်ဖဲအံၤခံဘ့ၣ်လီၤ.” ဒီးအဝဲဒၣ်စံးဝဲ, “ဘၣ်လံ.”

ယ့ၣ်ၡူးဃ့ဘါထုကဖၣ်တၢ်လၢကစၢၢ်သ့ၣ်စၤယံး အဒီခိၣ်

³⁹ ယ့ၣ်ၡူးဟးထီၣ်လၢဝ့ၢ်ပူၤဒီးလဲၤဝဲဒ်အညီနုၢ်အသိးဆူကစၢၢ်သ့ၣ်စၤယံး, ဒီးအပျဲၢ်အဘီၣ်တဖၣ်လဲၤဃုာ်ဒီးအီၤလီၤ.

⁴⁰ ဖဲအဝဲဒၣ်ဟဲတုၤတၢ်လီၢ်အဝဲန့ၣ်, စံးဘၣ်အဝဲသ့ၣ်, “ဃ့ဘါထုကဖၣ်ဒ်သိး သုသုတလီၤနုာ်ဆူတၢ်လ့ပစီအပူၤတဂ့ၤ န့ၣ်တက့ၢ်.”

⁴¹ အန့ၣ်ဝံၤဒီးအဝဲဒၣ်ဟးစီၤစုၤဒီးအဝဲသ့ၣ်ကဘၣ်တကွံာ်လၢၢ်, ဒီးတီၤလီၤဒီးဃ့ဘါထုကဖၣ်တၢ်လီၤ.

⁴² “ပၢ်ဧၢ,” အဝဲဒၣ်စံးဝဲ, “မ့ၢ်ဘၣ်နသးဒီးထုးကွံာ်လၢ်လီခီအံၤလၢယအိၣ်တက့ၢ်. ဘၣ်ဆၣ်ဒီး, တမ့ၢ်ဖဲဒၣ်ယသးဘၣ်. မ်နတၢ်ဘၣ်နသးဘၣ်တၢ်မၤလၢထီၣ်ပှဲၤထီၣ်အီၤတက့ၢ်.”

⁴³ ကလူးလၢမူခိၣ်တဂၤဟဲလီၣ်ဖျါထီၣ်အသးလၢအီၤ, ဒီးဟ့ၣ်ဂံၢ်ဟ့ၣ်ဘါအီၤလီၤ.

⁴⁴ လၢတၢ်သူၣ်ကိၢ်သးဂီၤဖးဒိၣ်အပူၤ, အဝဲဃ့ဘါထုကဖၣ်တၢ်လၢတၢ်ပာ်အသးသပှၢ်ပှၢ်အပူၤ, ဒိၣ်န့ၢ်အလီၢ်လီၤ. အဝဲဒၣ်အကပၢၤယွၤလီၤဒ်တၢ်သွံၣ်အလီၤစီၤ တဖၣ်အသိး, လၢဟီၣ်ခိၣ်လိၤလီၤ.

⁴⁵ ဖဲအဝဲဒၣ်ဃ့ဘါထုကဖၣ်တၢ်ဝံၤ, ဂဲၤဆၢထၢၣ်ဒီးက့ၤက့ၤဆူအပျဲၢ်အဘီၣ်တဖၣ်အအိၣ်န့ၣ်, ထံၣ်ဝဲလၢအမံဘၣ်အသး, မ့ၢ်လၢအလီၤဘှံးလီၤတီၤလၢအတၢ်သူၣ်အုးသးအုးအဃိလီၤ.

⁴⁶ ဒီးအဝဲဒၣ်စံးဘၣ်အဝဲသ့ၣ်, “ဘၣ်မနုၤအဃိသုမံလဲၣ်. ဂဲၤဆၢထၢၣ်ဒီးဃ့ဘါထုကဖၣ်ဒ်သိး သုသုတလီၤနုာ်ဆူတၢ်လ့ပစီအပူၤတဂ့ၤန့ၣ်တက့ၢ်.”

တၢ်ဖီၣ်ယ့ၣ်ၡူး

⁴⁷ ဖဲယ့ၣ်ၡူးကတိၤဒံးတၢ်အဖၢမုၢ်န့ၣ်, ပှၤဂီၢ်မုၢ်တဖုဟဲတုၤဝဲဒၣ်လီၤ. စီၤယူဒၤလၢအမ့ၢ်ပှၤတၢ်မၢဖိတဆံခံဂၤအကျါတဂၤန့ၣ်ဆှၢအဝဲသ့ၣ်, ဒီးအဝဲဒၣ်ဟဲထီၣ်ဆူယ့ၣ်ၡူးအအိၣ်ဒ်သိးအကနၢမူအီၤလီၤ.

⁴⁸ ဘၣ်ဆၣ်ဒီးယ့ၣ်ၡူးစံးဝဲဒၣ်, “စီၤယူဒၤဧၢ, မ့ၢ်နဟ့ၣ်လီၤကွံာ်ပှၤကညီဖိခွါလၢတၢ်နၢမူတဘီန့ၣ်ဧါ.”

⁴⁹ ဖဲအပျဲၢ်အဘီၣ်လၢအအိၣ်ဒီးယ့ၣ်ၡူးတဖၣ်ထံၣ်တၢ်လၢအကမၤ အသးန့ၣ်အဝဲသ့ၣ်စံးဝဲ, “ကစၢ်ဧၢမ့ၢ်ပကဘၣ်ကျီလၢပနးတဖၣ်န့ၣ်ဧါ.”

⁵⁰ ဒီးအဝဲသ့ၣ်အကျါတဂၤကျီပှၤလုၢ်တၢ်အခိၣ်အဒိၣ်ကတၢၢ်အကုၢ်, ဒီးအနၢ်လၢအထွဲတခီတဲာ်ကွံာ်ဝဲဒၣ်လီၤ.

⁵¹ ဘၣ်ဆၣ်ဒီးယ့ၣ်ၡူးစံးဝဲ, “ထဲန့ၣ်ဘၣ်လံ” အဝဲဒၣ်ထိးပှၤတဂၤန့ၣ်အနၢ်ဒီးမၤဘျါက့ၤအီၤလီၤ.

⁵² တုၤနုၤတစုယ့ၣ်ၡူးစံးဘၣ်ပှၤလုၢ်တၢ်အခိၣ်အဒိၣ်တဖၣ် ဒီးတၢ်လုၢ်ဟံၣ်အပှၤခိးတၢ်ဖိအခိၣ်အနၢ်တဖၣ်ဒီးပှၤ ယူဒၤဖိကရၢအခိၣ်အနၢ်တဖၣ်လၢအဟဲတ့ၢ်ဝဲဖဲန့ၣ်ဒ်သိးအကဖီၣ်အီၤန့ၣ်, “မ့ၢ်သုဘၣ်ဟဲလၢနးဒီးနီၣ်တီၢ်, မၤမးအသးဒ်ယမ့ၢ်ပှၤလၢ အလုၣ်သ့ၣ်ခါပတာ်ထံကီၢ်အတၢ်သိၣ်တၢ်သီတဂၤအသိးန့ၣ်ဧါ.

⁵³ ယအိၣ်ဒီးသုလၢတၢ်လုၢ်ဟံၣ်ပူၤကိးနံၤဒဲး, ဒီးသုတဂုာ်ကျဲးစၢးဖီၣ်ယၤဘၣ်. ဘၣ်ဆၣ်ဒီးအဝဲအံၤမ့ၢ်ဆၢကတီၢ်နၣ်ရံၣ်လၢ သုကမၤတၢ်တမံၤအံၤအဂီၢ်, ဖဲတၢ်ခံးတၢ်နၤအစိကမီၤပၢတၢ်န့ၣ်လီၤ.

စီၤပ့းတရူးသမၢယ့ၣ်ၡူး

⁵⁴ တုၤနုၤတစုအဝဲသ့ၣ်ဖီၣ်ယ့ၣ်ၡူးဒီးစိာ်ကွံာ်အီၤဆူပှၤလုၢ်တၢ် အခိၣ်အဒိၣ်ကတၢၢ်အဟံၣ်ပူၤ, ဒီးစီၤပ့းတရူးပိာ်ထီၣ်သကွ့ၤအခံလီၤ.

⁵⁵ ပှၤမၤကဲၤထီၣ်မ့ၣ်အူလၢကွီၢ်ဘျီၣ်အဂၢၤအခၢၣ်သး, ဒီးစီၤပ့းတရူးလဲၤဆ့ၣ်နီၤဃုာ်ဒီးပှၤလၢအဆ့ၣ်နီၤဝးတရံးမ့ၣ်အူ တဖၣ်န့ၣ်လီၤ.

⁵⁶ ဖဲတၢ်ခ့တၢ်ပှၤပိာ်မုၣ်အကျါတဂၤထံၣ်အဝဲဒၣ်ဆ့ၣ်နီၤဖဲမ့ၣ်အူ အမဲာ်ညါန့ၣ်, အဝဲဒၣ်ကွၢ်ဃီၤအီၤလိၤလိၤဒီးစံးဝဲ, “ပှၤတဂၤအံၤစ့ၢ်ကီးပိာ်ယ့ၣ်ၡူးအခံလီၤ.”

⁵⁷ ဘၣ်ဆၣ်ဒီး, စီၤပ့းတရူးသမၢဝဲဒီးစံး, “ပိာ်မုၣ်ဧၢ, ယတသ့ၣ်ညါဒၣ်လဲာ်အီၤဘၣ်.”

⁵⁸ တစိၢ်ဖိအလီၢ်ခံန့ၣ်ပှၤပိာ်ခွါတဂၤပာ်သူၣ်ပာ်သးလၢအီၤဒီးစံး, “နမ့ၢ်အဝဲသ့ၣ်အကျါတဂၤစ့ၢ်ကီးလီၤ.” ဘၣ်ဆၣ်ဒီးစီၤပ့းတရူးစံးဆၢဝဲ, “ပှၤတဂၤဧၢ, ယတမ့ၢ်ဘၣ်.”

⁵⁹ ဒီးကဘၣ်တနၣ်ရံၣ်ဝံၤအလီၢ်ခံန့ၣ်ပှၤအဂၤတဂၤစံးဝဲသပှၢ်ပှၢ်, လၢအကလုၢ်ဆူၣ်ဆူၣ်အပူၤ, “တၢ်သးဒ့ဒီအလီၢ်တအိၣ်ဝဲနီတစဲးလၢပှၤတဂၤအံၤ ပိာ်ယ့ၣ်ၡူးအခံန့ၣ်ဘၣ်. အဂ့ၢ်ဒ်အံၤ, အဝဲဒၣ်စ့ၢ်ကီးမ့ၢ်ပှၤကၤလံၤလါဖိတဂၤန့ၣ်လီၤ.”

⁶⁰ ဘၣ်ဆၣ်ဒီးစီၤပ့းတရူးစံးဆၢဝဲ, “ပှၤတဂၤဧၢ, နတဲတၢ်မနုၤလဲၣ်န့ၣ်ယတသ့ၣ်ညါဘၣ်.” တဘျီဃီဖဲအဝဲဒၣ်ကတိၤဒံးတၢ်အဖၢမုၢ်န့ၣ်, ဆီဖါကီၢ်တဘ့ၣ်အိၣ်အိထီၣ်ဝဲန့ၣ်လီၤ.

⁶¹ ကစၢ်ဃၣ်တရံးအသးဒီးကွၢ်ဃီၤတၢ်လိၤလိၤဆူစီၤပ့းတရူးအအိၣ်, ဒီးစီၤပ့းတရူးသ့ၣ်နီၣ်ထီၣ်ကစၢ်အတၢ်ကတိၤလၢအစံးဘၣ်တ့ၢ်အီၤ, “တနၤအံၤတချုးဆီဖါကီၢ်အိၣ်အိထီၣ်န့ၣ်, နကသမၢယၤသၢစုန့ၣ်လီၤ.”

⁶² စီၤပ့းတရူးဟးထီၣ်, ဒီးဟီၣ်ဝဲဒၣ်နးနးကလဲာ်လီၤ.

ယ့ၣ်ၡူးဘၣ်တၢ်ဒုၣ်ဒွဲၣ်ဒီးဘၣ်တၢ်တီၢ်အီၤ

⁶³ ပှၤလၢအအိၣ်ခိးကွၢ်ဟုၣ်ယ့ၣ်ၡူးတဖၣ်မၤအီၤကလိာ်ကလာ် ဒီးတီၢ်အီၤလီၤ.

⁶⁴ အဝဲသ့ၣ်ဘိၣ်ဘၢဃာ်ဝဲအမဲာ်ဒီးသံကွၢ်အီၤ, “မတၤတီၢ်နၤလဲၣ်. တယာ်ဒီးတဲတက့ၢ်.”

⁶⁵ ဒီးအဝဲသ့ၣ်ကတိၤဒုၣ်ဒွဲၣ်ကတိၤဆါအီၤလၢတၢ်ကတိၤအဂၤ အါထံၣ်လီၤ.

ယ့ၣ်ၡူးလၢပှၤယူဒၤဖိအကီၣ်ကးအမဲာ်ညါ

⁶⁶ ဖဲမုၢ်ဆ့ၣ်ဝါထီၣ်န့ၣ်, ပှၤယူဒၤဖိကရၢအခိၣ်အနၢ်တဖၣ်, ပှၤလုၢ်တၢ်အခိၣ်အဒိၣ်တဖၣ်, ဒီးပှၤသ့တၢ်ဘူၣ်တၢ်ဘါ အတၢ်သိၣ်တၢ်သီတဖၣ်ပာ်ဖှိၣ်ထီၣ်အသးတပူၤဃီ, ဒီးယ့ၣ်ၡူးဘၣ်တၢ်ဟဲစိာ်ထီၣ်အီၤဆူအဝဲသ့ၣ်အကီၣ်ကးန့ၣ်လီၤ.

⁶⁷ အဝဲသ့ၣ်စံးဝဲ, “စံးဘၣ်ပှၤတက့ၢ်နမ့ၢ်ခရံာ်န့ၣ်ဧါ.” အဝဲဒၣ်စံးဆၢဝဲ, “ယမ့ၢ်စံးဘၣ်သုဒီးသုတနာ်ယၤဘၣ်.

⁶⁸ ဒီးယမ့ၢ်သံကွၢ်သုတၢ်သံကွၢ်တထံၣ်န့ၣ်သုတစံးဆၢယၤဘၣ်.

⁶⁹ ဘၣ်ဆၣ်ဒီးစးထီၣ်ခဲကနံၣ်အံၤဒီးဆူညါန့ၣ်, ပှၤကညီဖိခွါအံၤကဘၣ်တၢ်ဒုးဆ့ၣ်နီၤအီၤဖဲ ကစၢ်ယွၤသ့တၢ်လၢာ်တဂၤအစုထွဲတကပၤလီၤ.”

⁷⁰ အဝဲသ့ၣ်ကိးဂၤဒဲးစံးဝဲ, “မ့မ့ၢ်ဒ်န့ၣ်ဒီး, နမ့ၢ်နဲကစၢ်ယွၤအဖိခွါဧါ.” အဝဲဒၣ်စံးဆၢအဝဲသ့ၣ်, “သုစံးလၢယမ့ၢ်လီၤ.”

⁷¹ အဝဲသ့ၣ်စံးဝဲ, “ပတလိၣ်ဘၣ်ပှၤအုၣ်အသးနီတဂၤဘၣ်. ပနီၢ်ကစၢ်ဒၣ်ပဝဲ ပနၢ်ဟူဘၣ်လံအဝဲအတၢ်ကတိၤဒၣ်ဝဲတဖၣ်လံ.”