လံာ်တၢ်ဘူၣ်ထီၣ်ဘါထီၣ် 9 - Sgaw Karen Common Bible

စီၤအၤဟရိၣ်ဒီးအဖိခွါတဖၣ် စးထီၣ်လုၢ်တၢ်ပာ်တၢ်

¹ တၢ်ဒိးပာ်စုပှၤလုၢ်တၢ်အခိၣ်တဖၣ်ဝံၤဝဲအလီၢ်ခံလၢမုၢ်ဃိး နံၤတနံၤန့ၣ်, စီၤမိၤၡ့ကိးဖှိၣ်ဝဲစီၤအၤဟရိၣ်ဒီးအဖိခွါတဖၣ်, ဒီးပှၤအံၣ်စရ့လးဖိအခိၣ်အနၢ်တဖၣ်လီၤ.

² ဒီးစီၤမိၤၡ့စံးဘၣ်စီၤအၤဟရိၣ်, “ဟံးန့ၢ်ဂီၤဖံးဖါဖိတဒုဒီးသိဖါဖိတဒုလၢမဲၣ်သူမဲၣ် ဂီၤတအိၣ်ဘၣ်ဒီးလုၢ်ထီၣ်အီၤဆူယွၤအအိၣ်တက့ၢ်. ဂီၤဖံးဖါဖိတဒုန့ၣ်လၢတၢ်လုၢ်တၢ်ပျၢ်တၢ်ဒဲးဘးအဂီၢ်ဒီးသိ ဖါဖိန့ၣ်လၢတၢ်လုၢ်မ့ၣ်အူအဂီၢ်န့ၣ်တက့ၢ်.

³ ဒီးစံးဘၣ်ပှၤအံၣ်စရ့လးဖိတဖၣ်လၢကဟဲစိာ်ဝဲမဲာ်တဲးလဲး ဖါတဒုလၢတၢ်လုၢ်တၢ်ပျၢ်တၢ်ဒဲးဘးအဂီၢ်, ဒီးဂီၤဖံးတနံၣ်ဖိတဒု, ဒီးသိတနံၣ်ဖိတဒုလၢမဲၣ်သူမဲၣ်ဂီၤတအိၣ်ဘၣ်လၢတၢ်လုၢ်မ့ၣ်အူအဂီၢ်,

⁴ ဒီးဂီၤဖံးဖါတဒုဒီးသိဖါတဒုလၢတၢ်လုၢ်မၤဃူမၤဖိးအဂီၢ်, လၢကလုၢ်ထီၣ်ဝဲဆူယွၤအအိၣ်ဃုာ်ဒီးတၢ်လုၢ်ဘုဧိၤဟုဧိၤဃါ ဃုာ်ဒီးသိန့ၣ်တက့ၢ်. ဒီးကဘၣ်မၤဝဲတနံၤအံၤမ့ၢ်လၢယွၤကလီၣ်ဖျါထီၣ်အသးဆူအဝဲ သ့ၣ်အအိၣ်အဃိန့ၣ်လီၤ.”

⁵ အဝဲသ့ၣ်ဟဲစိာ်တၢ်လၢစီၤမိၤၡ့မၤလိာ်ဝဲခဲလၢာ်ဆူတၢ်ဘူၣ်ထီၣ်ဘါ ထီၣ်ယွၤအဒဲအမဲာ်ညါလီၤ. ဒီးပှၤဂီၢ်မုၢ်ခဲလၢာ်ပာ်ဖှိၣ်ထီၣ်အသးဖဲန့ၣ်လၢတၢ်ဘူၣ်ထီၣ် ဘါထီၣ်ယွၤအဂီၢ်လီၤ.

⁶ ဒီးစီၤမိၤၡ့စံးဝဲဒၣ်, “ယွၤမၤလိာ်တၢ်ခဲလၢာ်အံၤ, ဒ်သိးကဒုးနဲၣ်ဖျါထီၣ်အလၤကပီၤလၢသုလီၤ.”

⁷ ဒီးစီၤမိၤၡ့စံးဘၣ်စီၤအၤဟရိၣ်, “လဲၤဆူတၢ်လုၢ်လီၢ်ဒီးလုၢ်ထီၣ်တၢ်ပျၢ်တၢ်ဒဲးဘးဒီးတၢ်လုၢ် မ့ၣ်အူလၢကစိာ်ကွံာ်နတၢ်ဒဲးဘးတဖၣ်ဒီးပှၤဂီၢ်မုၢ်အတၢ်ဒဲးဘး အဂီၢ်န့ၣ်တက့ၢ်. လုၢ်ထီၣ်တၢ်လုၢ်တဖၣ်အံၤလၢကစိာ် ကွံာ်ပှၤဂီၢ်မုၢ်အတၢ်ဒဲးဘးတဖၣ်ဒ်ယွၤမၤလိာ်ဝဲအသိးန့ၣ်တက့ၢ်.”

⁸ ဒီးစီၤအၤဟရိၣ်လဲၤဆူတၢ်လုၢ်လီၢ်ဒီး မၤသံဝဲဂီၤဖံးဖါဖိလၢကလုၢ်ထီၣ်တၢ်လုၢ်တၢ်ပျၢ်တၢ်ဒဲးဘးလၢအကစၢ်ဒၣ်ဝဲအဂီၢ်လီၤ.

⁹ ဒီးစီၤအၤဟရိၣ်အဖိခွါတဖၣ်ဟဲစိာ်န့ၢ်အီၤလၢတၢ်သွံၣ် ဒီးအဝဲဘျၢလီၤအစုမုၢ်ဆူတၢ်သွံၣ်, ဒီးပာ်ထီၣ်အီၤလၢတၢ်လုၢ်လီၢ် အနၢၤတဖၣ်အလိၤလီၤ. ဒီးတၢ်သွံၣ်အိၣ်လီၤတဲာ်တဖၣ်န့ၣ်လူလီၤဝဲ လၢတၢ်လုၢ်လီၢ်အခီၣ်ထံးန့ၣ်လီၤ.

¹⁰ ဒီးအဝဲဆူးကဲၤထီၣ်တၢ်အသိ, အကလ့ၢ်ဒီးအသူၣ်အဂ့ၤတခီ လၢတၢ်လုၢ်လီၢ်အဖီခိၣ်ဒ်ယွၤမၤလိာ်တ့ၢ်စီၤမိၤၡ့အသိးန့ၣ်လီၤ.

¹¹ မ့မ့ၢ်အညၣ်ဒီးအဖံးတဖၣ်န့ၣ်ဆူးကဲၤဝဲလၢဒဲအချၢန့ၣ်လီၤ.

¹² ဒီးစီၤအၤဟရိၣ်မၤသံဆၣ်ဖိကီၢ်ဖိလၢတၢ်လုၢ်မ့ၣ်အူလၢအနီၢ် ကစၢ်ဒၣ်ဝဲအဂီၢ်န့ၣ်လီၤ. ဒီးအဖိခွါတဖၣ်ဟဲစိာ်န့ၢ်အီၤတၢ်သွံၣ်ဒီး အဝဲဂၢ်လီၤဝဲဝးတရံးတၢ်လုၢ်လီၢ်န့ၣ်လီၤ.

¹³ ဒီးအဝဲသ့ၣ်ဟ့ၣ်အီၤလၢဆၣ်ဖိကီၢ်ဖိတဒုန့ၣ်အခိၣ်, ဒီးအညၣ်တကူာ်ဘၣ်တကူာ်, ဒီးဆူးကဲၤထီၣ်ဝဲလၢတၢ်လုၢ်လီၢ်အဖီခိၣ်န့ၣ်လီၤ.

¹⁴ အန့ၣ်ဝံၤဒီးသ့စီကွံာ်ဝဲအပှံာ်အကဖုဒီးအခီၣ်တဖၣ်, ဒီးဆူးကဲၤထီၣ်ဝဲဃုာ်ဒီးတၢ်လုၢ်မ့ၣ်အူလၢတၢ်လုၢ်လီၢ်အဖီခိၣ်န့ၣ်လီၤ.

¹⁵ မၤကဒီးတစု, စီၤအၤဟရိၣ်လုၢ်ထီၣ်ပှၤဂီၢ်မုၢ်အတၢ်လုၢ်တဖၣ်န့ၣ်လီၤ. အဝဲဟံးန့ၢ်မဲာ်တဲးလဲးလၢကဘၣ်တၢ်လုၢ်ထီၣ်အီၤလၢပှၤဂီၢ်မုၢ်အတၢ်ဒဲးဘးအဂီၢ်, ဒီးမၤသံဝဲဒီးလုၢ်ထီၣ်ဝဲဒ်အမၤဝဲလၢအနီၢ်ကစၢ်ဒၣ်ဝဲအတၢ်လုၢ် တၢ်ပျၢ်တၢ်ဒဲဘးအဂီၢ်အသိးန့ၣ်လီၤ.

¹⁶ ဒီးဟဲစိာ်ထီၣ်ဝဲဆၣ်ဖိကီၢ်ဖိလၢတၢ်လုၢ်မ့ၣ် အူအဂီၢ်ဒီးလုၢ်ထီၣ်ဝဲဒ်တၢ်သိၣ်တၢ်ဘျၢတဖၣ်အိၣ်ဝဲအသိးန့ၣ်လီၤ.

¹⁷ ဒီးလုၢ်ထီၣ်ဝဲတၢ်လုၢ်ဘုဧိၤဟုဧိၤ, ဒီးဟံးန့ၢ်ကိၣ်ကမူၣ်တစှီၤဒီးဆူးကဲၤထီၣ်ဝဲလၢတၢ်လုၢ်လီၢ်န့ၣ်လီၤ. (အအံၤမ့ၢ်တၢ်လုၢ်အါထီၣ်တမံၤလၢတၢ်လုၢ်မ့ၣ်အူလၢ အဘၣ်တၢ်လုၢ်အီၤကိးမုၢ်နံၤဒဲးအမဲာ်ညါန့ၣ်လီၤ.)

¹⁸ ဒီးမၤသံဝဲဂီၤဖံးဖါတဒုဒီးသိဖါတဒုလၢတၢ်လုၢ်မၤဃူမၤဖိးလၢပှၤဂီၢ်မုၢ်အဂီၢ်န့ၣ်လီၤ. အဖိခွါတဖၣ်ဟဲစိာ်န့ၢ်အီၤလၢတၢ်သွံၣ်ဒီးလူလီၤဝဲဝးတရံးတၢ်လုၢ်လီၢ်န့ၣ်လီၤ.

¹⁹ ဒီးစီၤအၤဟရိၣ်ပာ်ဂီၤဖံးဖါဒီးသိဖါအသိ,

²⁰ လၢဆၣ်ဖိကီၢ်ဖိတဖၣ်န့ၣ်အသးနါပှၢ်အလိၤဒီးလဲၤစိာ်ဝဲခဲလၢာ်ဆူတၢ်လုၢ်လီၢ်, ဒီးဆူးကဲၤထီၣ်ဝဲအသိတဖၣ်လၢတၢ်လုၢ်လီၢ်ဖီခိၣ်,

²¹ ဒီးလုၢ်ထီၣ်ဝဲအသးနါပှၢ်ဒီးအခီၣ်ထွဲတဖၣ်ဒ်တၢ်ဟ့ၣ်လီၤဆီတမံၤဆူ ယွၤအအိၣ်လၢပှၤလုၢ်တၢ်အခိၣ်တဖၣ်အဂီၢ်, ဒ်စီၤမိၤၡ့မၤလိာ်ဝဲအသိးန့ၣ်လီၤ.

²² ဒီးဖဲစီၤအၤဟရိၣ်မၤတၢ်လုၢ်တၢ်ပာ်ခဲ လၢာ်ဝံၤဒီးယူာ်ထီၣ်အစုလၢပှၤဂီၢ်မုၢ်အဖီခိၣ်ဒီးဆိၣ်ဂ့ၤအဝဲသ့ၣ်, ဒီးဟဲက့ၤလီၤဝဲဒၣ်န့ၣ်လီၤ.

²³ ဒီးစီၤမိၤၡ့ဒီးစီၤအၤဟရိၣ်လဲၤနုာ်ဆူတၢ်ဘူၣ်ထီၣ်ဘါထီၣ်ယွၤအဒဲပူၤ, ဒီးဖဲအဝဲသ့ၣ်ဟဲက့ၤထီၣ်ဝဲန့ၣ်ဆိၣ်ဂ့ၤဝဲပှၤဂီၢ်မုၢ်ခဲလၢာ်လီၤ. ဒီးယွၤအိၣ်ဖျါထီၣ်ဝဲဆူပှၤဂီၢ်မုၢ်ခဲလၢာ်န့ၣ်လီၤ.

²⁴ ဒီးယွၤဆှၢလီၤမ့ၣ်အူသတူၢ်ကလာ်ဒီးအီၣ်ကွံာ်တၢ်လုၢ်မ့ၣ်အူ ဒီးအသိတဖၣ်လၢတၢ်လုၢ်လီၢ်အဖီခိၣ်န့ၣ်လီၤ. ဒီးဖဲပှၤဂီၢ်မုၢ် ထံၣ်ဘၣ်တၢ်န့ၣ်, အဝဲသ့ၣ်ခဲလၢာ်ကိးသတြီထီၣ်ဒီးထိၣ်လီၤပှီၤအသးလီၤ.