လံာ်တၢ်ဘူၣ်ထီၣ်ဘါထီၣ် 21 - Sgaw Karen Common Bible

ပှၤလုၢ်တၢ်အခိၣ်အတၢ်စီတၢ်ဆှံ

¹ ဒီးယွၤမၤလိာ်စီၤမိၤၡ့လၢကတဲဘၣ်ပှၤလုၢ်တၢ်အခိၣ်တဖၣ်လၢအလီၤစၢၤလၢစီၤအၤဟရိၣ်လၢ, “ပှၤလုၢ်တၢ်အခိၣ်တဘၣ်မၤတကဆှီအသးနီတဂၤဒ်တၢ်ဘူၣ်တၢ် ဘါအလုၢ်အလၢ်အိၣ်ဝဲအသိးလၢတၢ်မၤတၢ်တမံၤမံၤဖဲအဘူး အတံၢ်တဂၤအတၢ်သံအမူးအပူၤ,

² မ့တမ့ၢ်ဘၣ်လၢတၢ်န့ၣ်မ့ၢ်အဝဲအမိၢ်, အပၢ်, အဖိခွါ, အဖိမုၣ်, အဒီပုၢ်ဝဲၢ်ခွါ,

³ မ့တမ့ၢ်အဒီပုၢ်ဝဲၢ်မုၣ်လၢအအိၣ်ဆိးသဘျ့လၢအဝဲအဟံၣ်ပူၤအဃိဘၣ်န့ၣ်လီၤ.

⁴ အဝဲတဘၣ်မၤတကဆှီဘၣ်အသးဖဲပှၤတဖၣ်လၢအဒီဘူး ဒီးအီၤခီဖျိတၢ်တ့တၢ်ဖျီ, သံဝဲန့ၣ်ဘၣ်.

⁵ ပှၤလုၢ်တၢ်အခိၣ်မ်အသုတလူၤအခိၣ်မ့ၢ်ဂ့ၤ, တံာ်တဲာ်အခၣ်ဆူၣ်မ့ၢ်ဂ့ၤ, ဂဲာ်အဖံးအညၣ်မ့ၢ်ဂ့ၤလၢကပာ်ဖျါတၢ်သးအုးအပနီၣ်နီတဂၤန့ၣ်တဂ့ၤ.

⁶ ဒီးကဘၣ်စီဆှံဝဲဒီးတဘၣ်မၤတရီတပါယမံၤဘၣ်. အဂ့ၢ်ဒ်အံၤ, လုၢ်ထီၣ်တၢ်လုၢ်မ့ၣ်အူဆူယအိၣ်အဃိ ဒီးအဝဲကဘၣ်စီဆှံဝဲဒၣ်န့ၣ်လီၤ.

⁷ ပှၤလုၢ်တၢ်အခိၣ်တဂၤန့ၣ်တဘၣ်ဒိးတ့ဒိးဖျီအသးဒီးပိာ်မုၣ်တ ဂၤလၢအကဲတ့ၢ်ဃဲသဲမုၣ်မ့ၢ်ဂ့ၤ, ပိာ်မုၣ်လၢအတမ့ၢ်မုၣ်ကနီၤဆှံဆှံဘၣ်မ့ၢ်ဂ့ၤ, ပိာ်မုၣ်လၢအလီၤဖးဒီးအဝၤမ့ၢ်ဂ့ၤန့ၣ်ဘၣ်. အဂ့ၢ်ဒ်အံၤအဝဲမ့ၢ်ပှၤစီဆှံန့ၣ်လီၤ.

⁸ ပှၤဂီၢ်မုၢ်ကဘၣ်ပာ်ပှၤလုၢ်တၢ်အခိၣ်ဒ်အမ့ၢ်ပှၤစီဆှံလီၤ. အဂ့ၢ်ဒ်အံၤ, လုၢ်ထီၣ်တၢ်လုၢ်မ့ၣ်အူဆူယအိၣ်လီၤ. ယမ့ၢ်ယွၤ, ယစီဆှံယဲဒီးယမၤစီဆှံယပှၤဂီၢ်မုၢ်န့ၣ်လီၤ.

⁹ ဒီးပှၤလုၢ်တၢ်အခိၣ်တဂၤအဖိမုၣ်မ့ၢ်ကဲထီၣ်ဃဲသဲမုၣ်န့ၣ်ဒီးမ့ၢ်အ မၤမဲာ်ဆှးအပၢ်လီၤ. ဒီးကဘၣ်တၢ်ဆိၣ်ထီၣ်ကွံာ်အီၤလၢမ့ၣ်အူန့ၣ်လီၤ.

¹⁰ ပှၤလုၢ်တၢ်အခိၣ်အဒိၣ်ကတၢၢ်လၢအဘၣ်တၢ်ဖှူအခိၣ်လၢသိ ဒီးဘၣ်တၢ်ပာ်စီဆှံထီၣ်အီၤလၢကသိးပှၤလုၢ်တၢ်အခိၣ် အကူအသိးန့ၣ်, တဘၣ်ပာ်အခိၣ်တဖုတရုဘၣ်မ့ၢ်ဂ့ၤ, တဘၣ်ဖှီအဆ့လၢကပာ်ဖျါအတၢ်အိၣ်လၢတၢ်သးအုးအပူၤအဂီၢ်မ့ၢ်ဂ့ၤန့ၣ်ဘၣ်.

¹¹ ဒီးတဘၣ်လဲၤဆူတၢ်သံစိၣ်အဃၢၤမ့ၢ်ဂ့ၤ, တဘၣ်မၤဘၣ်အၢအသးလၢ အပၢ်မ့ၢ်ဂ့ၤအမိၢ်မ့ၢ်ဂ့ၤအဃိဒၣ်လဲာ်န့ၣ်ဘၣ်.

¹² တဘၣ်ဟးထီၣ်စ့ၢ်ကီးဝဲဆူတၢ်ဘူၣ်ထီၣ်ဘါထီၣ်ယွၤအဒဲအချၢမ့ၢ် ဂ့ၤ, တဘၣ်မၤဘၣ်အၢအကစၢ်ယွၤအတၢ်လီၢ်စီဆှံမ့ၢ်ဂ့ၤန့ၣ်ဘၣ်. အဂ့ၢ်ဒ်အံၤ, အကစၢ်ယွၤအသိဖှူတၢ်အိၣ်ဝဲလၢအလိၤအဃိလီၤ. ယဲဒၣ်အံၤယမ့ၢ်ယွၤလီၤ.

¹³ ကဘၣ်ဒိးတ့ဒိးဖျီအသးလၢမုၣ်ကနီၤဆှံဆှံန့ၣ်လီၤ.

¹⁴ ဒီးတဘၣ်မ့ၢ်မုၣ်ကမဲမ့ၢ်ဂ့ၤ, ပိာ်မုၣ်လၢအလီၤဖှၣ်ဒီးအဝၤမ့ၢ်ဂ့ၤ, ပိာ်မုၣ်လၢအဟးဂီၤမ့ၢ်ဂ့ၤ, ပှၤဃဲသဲမုၣ်မ့ၢ်ဂ့ၤန့ၣ်ဘၣ်. ကဘၣ်ဒိးတ့ဒိးဖျီအသးဒီးမုၣ်ကနီၤဆှံဆှံလၢအဒူၣ်ဒၣ်ဝဲအကျါန့ၣ်လီၤ.

¹⁵ မ့တမ့ၢ်ဘၣ်န့ၣ်, အဝဲအဖိတဖၣ်လၢကြၢးမ့ၢ်တၢ်စီတၢ်ဆှံ, ကတကဆှီဘၣ်ဒ်တၢ်ဘူၣ်တၢ်ဘါအလုၢ်အလၢ်အသိးလီၤ. ယမ့ၢ်ယွၤဒီးယပာ်လီၤဆီအီၤဒ်ပှၤလုၢ်တၢ်အခိၣ်အဒိၣ်န့ၣ်လီၤ.”

^16-17 ဒီးယွၤမၤလိာ်စီၤမိၤၡ့, ဒီးစံးဝဲဒၣ်, ကတိၤတၢ်ဒီးစီၤအၤဟရိၣ်, ဒီးစံး, “ပှၤလၢနစၢၤနသွဲၣ်အကျါလၢအအိၣ်ဒီးနီၢ်ခိအတၢ်လီၤ တူာ်လီၤကာ်န့ၣ်မ်အသုတလုၢ်ထီၣ်အကစၢ်အတၢ်အီၣ်နီတဂၤတဂ့ၤ.

¹⁸ အဂ့ၢ်ဒ်အံၤ, ပှၤလၢအိၣ်ဒီးနီၢ်ခိက့ၢ်ဂီၤအတၢ်လီၤတူာ်လီၤကာ်တဖၣ်န့ၣ်တဘၣ်လုၢ်ထီၣ်ပာ်ထီၣ်တၢ်ဘၣ်. ပှၤတဖၣ်အံၤမ့ၢ်ဝဲပှၤမဲာ်ဘျီၣ်, ပှၤလၢအက့ၢ်အဂီၤတလၢပှဲၤ, ပှၤလၢအက့ၢ်အဂီၤတဂ့ၤ,

^19-20 ပှၤလၢအစုကၢ်, ပှၤလၢအခီၣ်ကၢ်, ပှၤလၢအပျိၢ်သကူး, ပှၤလၢအနီၢ်ဖုၣ်, ပှၤလၢအအိၣ်ဒီးမဲာ်ချံတၢ် ဆါ, ပှၤလၢအအိၣ်ဒီးတၢ်လိၤတဂ့ၤတၢ်ဆါ, ဒီးပှၤလၢအအိၣ်ဒီးအဒံၣ်ချံသဘှံးတဖၣ်န့ၣ်လီၤ.

²¹ ပှၤလုၢ်တၢ်အခိၣ်စီၤအၤဟရိၣ်အစၢၤအသွဲၣ်လၢအအိၣ်ဒီးနီၢ်ခိ အက့ၢ်အဂီၤအတၢ်လီၤတူာ်လီၤကာ်တဖၣ်န့ၣ်တဘၣ်လုၢ်ထီၣ်တၢ်လုၢ်မ့ၣ်အူဘၣ်.

²² ဒီးအဝဲကအီၣ်ဘၣ်တၢ်အီၣ်လၢအဘၣ်တၢ်လုၢ်ထီၣ်အီၤဆူယအိၣ်, တၢ်အီၣ်လၢအစီအဆှံဒီးအစီဆှံကတၢၢ်န့ၣ်လီၤ.

²³ ဘၣ်ဆၣ်ဒီးမ့ၢ်လၢအအိၣ်ဒီးနီၢ်ခိက့ၢ်ဂီၤအတၢ်လီၤတူာ် လီၤကာ်အဃိဒီး, အဝဲတဘၣ်ဟဲဘူးဆူယၣ်ဘျးတဒၢစီဆှံမ့ၢ်ဂ့ၤ, တၢ်လုၢ်လီၢ်မ့ၢ်ဂ့ၤန့ၣ်ဘၣ်. အဝဲတဘၣ်မၤဘၣ်အၢတၢ်စီဆှံတဖၣ်အံၤဘၣ်. အဂ့ၢ်ဒ်အံၤ, ယမ့ၢ်ယွၤ, ဒီးယမၤစီဆှံတၢ်တဖၣ်အံၤလီၤ.”

²⁴ ဒီးတၢ်အံၤမ့ၢ်တၢ်လၢစီၤမိၤၡ့စံးဘၣ်စီၤအၤဟရိၣ်ဒီးအဖိခွါတဖၣ်ဒီး အံၣ်စရ့လးဖိခဲလၢာ်န့ၣ်လီၤ.