လံာ်သးသယုၢ်တၢ် 5 - Sgaw Karen Common Bible

တၢ်ထုကဖၣ်လၢတၢ်သးကညီၤအဂီၢ်

¹ ယွၤဧၢ, သ့ၣ်နီၣ်ထီၣ်တၢ်မၤအသးဒီးပှၤတက့ၢ်. ကွၢ်ဃီၤပှၤဒီးထံၣ်ပတၢ်မဲာ်ဆှးတက့ၢ်.

² ပတၢ်စုလီၢ်ခီၣ်ခိၣ်န့ၣ်အိၣ်လၢပှၤတခီဘီမုၢ်ဖိတဖၣ် အစုပူၤလီၤ. ပှၤတခီဘီမုၢ်ဖိတဖၣ်အိၣ်ဆိးဝဲလၢ ပဟံၣ်တဖၣ်အပူၤလီၤ.

³ ပပၢ်တဖၣ်ဘၣ်တၢ်မၤသံတ့ၢ်အီၤလၢဒုၣ်ဒါန့ၣ်လီၤ. ဒီးခဲအံၤပမိၢ်တဖၣ်မ့ၢ်မုၣ်ကမဲတဖၣ်လီၤ.

⁴ ပကဘၣ်ဟ့ၣ်တၢ်အပှ့ၤလၢထံလၢပအီအီၤအဂီၢ်ဒီး သ့ၣ်မုၣ်လၢပဆူးကဲၤအီၤအဂီၢ်လီၤ.

⁵ ပဘၣ်တၢ်နီၣ်ဆူၣ်ပှၤဒ်ကသ့ၣ်လၤမ့တမ့ၢ်ကီၤလၤအူးတဖၣ် အသိးန့ၣ်လီၤ. တၢ်ဘှံးပသးဘၣ်ဆၣ်ဒီးတၢ်တဒုးအိၣ်ဘှံးပှၤဘၣ်.

⁶ လၢပကန့ၢ်ဘၣ်တၢ်အီၣ်လၢဝဲလၢပကမူအဂီၢ်န့ၣ် ပလဲၤတ့ၢ်ဒီးဃ့အီၣ်တၢ်လၢ ကီၢ်အဲၤကူပတူးဒီးကီၢ်အၤၡူၢ်လီၤ.

⁷ ပမိၢ်ပပၢ်လၢပျၢၤတဖၣ်မၤတ့ၢ်တၢ်ဒဲးဘးဘၣ်ဆၣ်ခဲအံၤအဝဲသ့ၣ် သံလၢာ်လံ. ဒီးပတူၢ်ဘၣ်တၢ်လၢအဝဲသ့ၣ်အတၢ်ဒဲးဘးတဖၣ်အဃိလီၤ.

⁸ ပဘၣ်တၢ်ပၢတ့ၢ်ပှၤလၢ, ပှၤလၢတဂ့ၤန့ၢ်ဘၣ်ကုၢ်တဖၣ် ဒီးပှၤမၤပူၤဖျဲးပှၤလၢအတၢ်စိတၢ်ကမီၤအပူၤသ့ တအိၣ်ဘၣ်နီတဂၤဘၣ်.

⁹ ပှၤမၤသံမၤဝီတၢ်တဖၣ်လဲၤဝ့ၤဝီၤတၢ်လၢထံကီၢ် အခိၣ်အဃၢၤ ဒီးပဘၣ်လိာ်ဒူပသးဖဲပဃ့တၢ်လၢတၢ်အီၣ် အဂီၢ်န့ၣ်လီၤ.

¹⁰ တၢ်သူၣ်ဝံၤသၣ်စ့ၤမၤကိၢ်သွၣ်ကိၢ်ဘီပှၤလၢတၢ်လိၤကိၢ်, တုၤပဖံးန့ၣ်ကိၢ်ထဲသိးဒီးဖၣ်ကွာ်န့ၣ်လီၤ.

¹¹ ပမါတဖၣ်ဘၣ်တၢ်မၤဆူၣ်မၤစိးအီၤလၢကစၢၢ်စံယိၣ်အလိၤဒၣ်ဝဲ, လၢကီၢ်ယူဒၤအဒူသဝီခဲလၢာ်အပူၤ, ဒီးပဖိမုၣ်တဖၣ်ဘၣ်တၢ်မၤ နၢၤတရီတပါအီၤလီၤ.

¹² ပခိၣ်ပနၢ်တဖၣ်ဘၣ်တၢ်မၤန့ၢ်အီၤဒီးစၢသံအီၤ, ဒီးပပှၤသူၣ်က့သးပှၢ်တဖၣ်တဘၣ်တၢ်ပာ်ကဲအီၤဘၣ်.

¹³ ပပှၤသးစၢ်ပိာ်ခွါတဖၣ်ဘၣ်တၢ်မၢဆူၣ်အီၤလၢကဂံာ်ဘုဒ်ကုၢ်တဖၣ် အသိး, ဒီးဖိသၣ်ပိာ်ခွါတဖၣ်လဲၤကနူၤနူၤကပၤပၤလၢ တၢ်ဝံသ့ၣ်မုၣ်ဃၢမးအဃိန့ၣ်လီၤ.

¹⁴ ပှၤသူၣ်က့သးပှၢ်တဖၣ်တဆ့ၣ်နီၤလၢၤဘၣ်လၢ ဝ့ၢ်အတြဲၤ, ဒီးပှၤသးစၢ်တဖၣ်တသူၣ်ဝံၣ်သးဆၢတၢ်လၢၤဘၣ်.

¹⁵ တၢ်သးဖှံလၢာ်ကွံာ်လၢပတၢ်အိၣ်မူတဖၣ်အပူၤ, ဒီးတၢ်သူၣ်အုးသးအုးဟံးန့ၢ်တၢ်လီၢ်လၢ ပတၢ်ဂဲၤကလံာ်အလီၢ်တဖၣ်လီၤ.

¹⁶ ပကပာ်ကဖၢလၢသးအဂီၢ်တၢ်တအိၣ်လီၤတဲာ်တ့ၢ်ဘၣ်နီတမံၤဘၣ်. ပမၤတ့ၢ်တၢ်ဒဲးဘးဒီးခဲအံၤပဘၣ်တၢ်စံၣ်ညီၣ်ဃါမနၤန့ၣ်လီၤ.

¹⁷ ပဆိးက့လၢပသူၣ်ကံၢ်သးလဲနီၢ်နီၢ်ဒီးပမဲာ်ထံတဖၣ် လီၤဆှု တုၤပထံၣ်တၢ်တသ့လၢၤဘၣ်.

¹⁸ အဂ့ၢ်ဒ်အံၤ, ကစၢၢ်စံယိၣ်အိၣ်သယုၢ်ဒီး ဘၣ်တၢ်စူးကွံာ်ညိကွံာ်အီၤလီၤ. ထွံၣ်ဟီၣ်ခိၣ်တဖၣ်လဲၤဝ့ၤဝီၤကစုဒုလၢ အတၢ်လီၤပှီၢ်လီၤဟိတဖၣ်အကျါလီၤ.

¹⁹ မ့မ့ၢ်နဲဒၣ်, ယွၤဧၢ, နမ့ၢ်စီၤပၤအထူအယိာ်, ဒီးကပၢတၢ်အစိၤစိၤအဃၣ်ဃၣ်လီၤ.

²⁰ ဘၣ်မနုၤအဃိလၢနညိကွံာ်ပှၤဖးယံာ်န့ၣ်လဲၣ်. မ့ၢ်နကသ့ၣ်နီၣ်ထီၣ်ပှၤတဘျီဘျီဒံးဧါ.

²¹ ဟဲက့ၤစိာ်က့ၤပှၤဆူနအိၣ်, ယွၤဧၢ, ဟဲက့ၤစိာ်ကဒါက့ၤပှၤတက့ၢ်. မၤအိၣ်ထီၣ်က့ၤပတၢ်လၤကပီၤလၢပျၢၤန့ၣ်တက့ၢ်.

²² မ့တမ့ၢ်ဒီးမ့ၢ်နပာ်ကွံာ်ပှၤလီၤစိၤလီၤထီလံဧါ. နတၢ်သးဒိၣ်အဆၢအဖီတအိၣ်ဘၣ်ဧါ.