လံာ်သးသယုၢ်တၢ် 2 - Sgaw Karen Common Bible

ယွၤအတၢ်စံၣ်ညီၣ်ဝ့ၢ်ယရူၤၡလ့ၣ်

¹ ယွၤ, လၢအတၢ်သးဒိၣ်အပူၤကးဘၢတ့ၢ်ကစၢၢ်စံယိၣ်လၢတၢ်ခံးတၢ် နၤလီၤ. အတၢ်ကဟုကညီၢ်ဒ်လၢမူခိၣ်အသိးန့ၣ်, ယွၤဘိးဃၣ်ကွံာ်ဝဲဆူတၢ် ဟးဂူာ်ဟးဂီၤတဖၣ်အပူၤလီၤ. လၢအတၢ်သးဒိၣ်အမုၢ်တနံၤန့ၣ်ညိကွံာ်အတၢ်လုၢ်ဟံၣ်ဒၣ်လဲာ်လီၤ.

² ယွၤမၤဟးဂီၤကွံာ်ကယဲၢ်ဒူသဝီလၢကီၢ်ယူဒၤအပူၤလၢတၢ်သး ကညီၤတအိၣ်ဘၣ်အပူၤလီၤ. ဒီးမၤလီၤပှီၢ်ကွံာ်တ့ၢ်တိာ်တဖၣ်လၢအဒီသဒၢတ့ၢ်ထံကီၢ်လီၤ. ဟဲစိာ်ဝဲတၢ်မဲာ်ဆှးဆူဘီမုၢ်န့ၣ်ဒီးအပဒိၣ်ပပှၢ်တဖၣ်အလိၤ လီၤ.

³ လၢအတၢ်သးကဲၤထီၣ်အပူၤဒီၣ်တဲာ်ကွံာ်ဝဲအံၣ်စရ့လးအဂံၢ် အဘါန့ၣ်လီၤ. ဖဲဒုၣ်ဒါတဖၣ်ဟဲန့ၣ်အဝဲဂ့ၢ်လိာ်တ့ၢ်လၢကမၤစၢၤပှၤအဂီၢ်လီၤ. အသးဒိၣ်ကဲၤထီၣ်ထီဒါပှၤဒ်မ့ၣ်အူအသိး, မၤဟးဂီၤကွံာ်တၢ် ခဲလၢာ်န့ၣ်လီၤ.

⁴ ပညိၣ်ဃီၤတ့ၢ်ဝဲအပျၢ်တဖၣ်ဆူပအိၣ်ဒ်ဒုၣ်ဒါတဂၤအသိးလီၤ. မၤသံကွံာ်ဝဲကယဲၢ်ပှၤလၢအမ့ၢ်ပတၢ်သးခုဒီးပတၢ်သးမုာ်တဖၣ် န့ၣ်လီၤ. ဖဲအံၤလၢဝ့ၢ်ယရူၤၡလ့ၣ်အပူၤန့ၣ်ပကလၢၢ်ဘၣ်တ့ၢ်အသးဒိၣ်ကဲၤ ထီၣ်န့ၣ်လီၤ.

⁵ ယွၤ, ဒ်ဒုၣ်ဒါတဂၤအသိးန့ၣ်မၤဟးဂီၤတ့ၢ်အံၣ်စရ့လးလီၤ. ပာ်တ့ၢ်ကွံာ်ဝဲအတိာ်တဖၣ်ဒီးနူၢ်ဧိၤစီၤဧိၤတဖၣ်လၢတၢ်ဟးဂူာ် ဟးဂီၤအပူၤလီၤ. ဟဲစိာ်တ့ၢ်ဝဲတၢ်သးအုးလၢအကတၢၢ်တ အိၣ်ဘၣ်ဆူကီၢ်ယူဒၤအပှၤဂီၢ်မုၢ်အလိၤလီၤ.

⁶ ဒိလီၤသဘှံးကွံာ်ဝဲတၢ်လုၢ်ဟံၣ်ဖဲပဘူၣ်ထီၣ်ဘါထီၣ်တ့ၢ်အီၤ န့ၣ်လီၤ. ဆိကတီၢ်ကွံာ်ဝဲမုၢ်နံၤစီဆှံတဖၣ်ဒီးမုၢ်အိၣ်ဘှံးအနံၤတဖၣ် လီၤ. စီၤပၤဒီးပှၤလုၢ်တၢ်အခိၣ်ကလၢၢ်ဘၣ်အတၢ်သးဒိၣ် အသဟီၣ်ဒ်သိးသိးလီၤ.

⁷ ယွၤစူးကွံာ်ညိကွံာ်အတၢ်လုၢ်လီၢ်ဒီးကွံာ်တ့ၢ်ကွံာ်အတၢ်လုၢ် ဟံၣ်စီဆှံန့ၣ်လီၤ. ပျဲတ့ၢ်ဝဲဒုၣ်ဒါတဖၣ်လၢကဖှီယာ်ကွံာ်အတၢ်ဒူၣ်တဖၣ်လီၤ. အဝဲသ့ၣ်ကိးပသူထီၣ်တ့ၢ်ဝဲလၢတၢ်မၤနၢၤအပူၤဖဲတၢ်လီၢ်လၢ တဘျီပဘူၣ်ထီၣ်ဘါထီၣ်တ့ၢ်တၢ်အိၣ်ဒီးတၢ်သးခုန့ၣ်လီၤ.

⁸ ယွၤပာ်လီၤတ့ၢ်အသးကျၢၤမုဆှု လၢဝ့ၢ်စံယိၣ်အတၢ်ဒူၣ်တဖၣ်ကဘၣ် လီၤပှီၢ်ဝဲအဂီၢ်လီၤ. ထိၣ်နီၣ်တ့ၢ်အီၤခဲလၢာ်ဒ်သိးကမၤဟးဂီၤကွံာ်အီၤလၢာ်လၢာ်ဆ့ ဆ့လီၤတံၢ်လီၤဆဲးအဂီၢ်လီၤ. ဝ့ၢ်ခိၣ်ဒူဒီးအပၢၤတၢ်အလီၢ်တဖၣ်န့ၣ်ခဲအံၤဒါလီၤသကိးအသး လၢတၢ်ဟးဂီၤအပူၤလီၤ.

⁹ ဝ့ၢ်အပဲတြီတဖၣ်ဒါလီၤအသးလီၤဘျၢကွံာ်လၢတၢ်လီၤပှီၢ်လီၤ ကလဲတဖၣ်အဖီလာ်ဒီးအနီၣ်ဘိတဖၣ်ဘၣ်တၢ်ဒိကၢ်လီၤကလဲကွံာ်အီၤ န့ၣ်လီၤ. စီၤပၤဒီးပှၤတူၢ်ဒိၣ်ကီၤဒိၣ်တဖၣ်န့ၣ်ခဲအံၤအိၣ်လၢတၢ်စိာ် မၢကဲကုၢ်အီၤအပူၤလီၤ. ပှၤယူဒၤဖိအတၢ်သိၣ်တၢ်သီန့ၣ်တဘၣ်တၢ်သိၣ်လိသီလိအီလၢၤဘၣ် ဒီးဝံတဖၣ်တန့ၢ်ဘၣ်တၢ်ထံၣ်လၢညါခီလၢယွၤအအိၣ်နီတမံၤလၢၤ ဘၣ်.

¹⁰ ဝ့ၢ်ယရူၤၡလ့ၣ်အပှၤသူၣ်က့သးပှၢ်တဖၣ်ဆ့ၣ်နီၤလၢဟီၣ်ခိၣ်လိၤလၢ တၢ်အိၣ်ဘှီၣ်ကလာ်အပူၤ အိၣ်ဒီးဖၣ်ကမူၣ်လၢအဝဲသ့ၣ်အခိၣ်လိၤဒီးဆ့ကၤထၢၣ် သွ့လၢအနီၢ်ခိအလိၤလီၤ. သးစၢ်ပိာ်မုၣ်ဖိတဖၣ်ဆုးလီၤအခိၣ်ဆူဟီၣ်ခိၣ်လိၤလီၤ.

¹¹ ယမဲာ်ချံတဖၣ်ဃ့ထီဝဲလၢမဲာ်ထံလၢာ်ကွံာ်အဃိဒီးယသးသမူအိၣ် လၢတၢ်ကိၢ်တၢ်ဂီၤအပူၤလီၤ. ယဂံၢ်ယဘါလၢာ်ကွံာ်ဝဲလၢတၢ်သးအုးဖဲယပှၤဂီၢ်မုၢ်ဘၣ်တၢ်မၤဟး ဂီၤကွံာ်အီၤန့ၣ်လီၤ. ဖိသၣ်တဖၣ်ဒီးဖိဆံးအီၣ်နုၢ်တဖၣ်သံတယူာ်ဝဲလၢဝ့ၢ်အကျဲတဖၣ် အပူၤန့ၣ်လီၤ.

¹² ဟီၣ်ပသူထီၣ်ဝဲဆူအမိၢ်တဖၣ်အအိၣ်လၢတၢ်သူၣ်ဝံၤသၣ်စ့ၤဒီးတၢ် သးသူထံအပူၤန့ၣ်လီၤ. အဝဲသ့ၣ်လီၤဃံၤလၢကျဲတဖၣ်အဖီခိၣ်ဒ်ပှၤဘၣ်ဒိဘၣ်ထံးတဖၣ် အသိး ဒီးသံဝဲကယီကယီလၢအမိၢ်တဖၣ်အစုတီၤလိၤန့ၣ်လီၤ.

¹³ ဝ့ၢ်ယရူၤၡလ့ၣ်, ဝ့ၢ်ယရူၤၡလ့ၣ်လၢဘၣ်တၢ်အဲၣ်အီၤဧၢ, ယစံးတၢ်မနုၤကသ့လဲၣ်. ယမၤမုာ်ထီၣ်နၤကသ့ဒ်လဲၣ်. ပှၤတတူၢ်ဘၣ်တၢ်ဒ်သိးအံၤနီတဂၤဘၣ်. နတၢ်နးတၢ်ဖှီၣ်န့ၣ်အကတၢၢ်တအိၣ်ဘၣ်ဒ်ပီၣ်လဲၣ်ဖးဒိၣ်အသိးဒီး တၢ်မုၢ်လၢ်အိၣ်ထီၣ်တသ့ဘၣ်နီတမံၤဘၣ်.

¹⁴ နဝံတဖၣ်န့ၣ်ကတဲနၤတၢ်တအိၣ်ဘၣ်နီတမံၤဘၣ်. မ့မ့ၢ်အိၣ်ထဲတၢ်ကဘျံးကဘျၣ်လီၤ. လၢတၢ်တမၤဖျါထီၣ်နတၢ်ဒဲးဘးအဃိအတၢ်စံၣ်တဲၤတဲ လီၤတဖၣ်လီန့ၢ်နၤလီၤ. အဝဲသ့ၣ်မၤဝဲဒ်သိးနကဆိကမိၣ်လၢတလိၣ်လၢနကဘၣ်ပီၢ်ယၢ်လီၤက့ၤ နသးန့ၣ်ဘၣ်.

¹⁵ ပှၤဂီၢ်မုၢ်လဲၤတြုာ်ဘၣ်ဖဲဝ့ၢ်အဃၢၤတဖၣ်ကွၢ်ဃီၤနၤလၢတၢ်ဒုၣ် ဒွဲၣ်အပူၤလီၤ. အဝဲသ့ၣ်ကျၢၢ်ကျာ်အခိၣ်တဖၣ်ဒီးနံၤဘၣ်ဖၣ်လဲဝ့ၢ်ယရူၤၡလ့ၣ်အတၢ် ဟးဂီၤတဖၣ်ဒီးစံး “တၢ်အံၤမ့ၢ်ဝ့ၢ်အဃံအလၤန့ၣ်ဧါ. တၢ်အံၤမ့ၢ်ဟီၣ်ခိၣ်ချၢ အတၢ်ပာ်ကဖၢလၢသးန့ၣ်ဧါ.”

¹⁶ ကယဲၢ်နဒုၣ်နဒါခဲလၢာ်ဒုၣ်ဒွဲၣ်နၤဒီးကွၢ်ဟ့ကွၢ်ကျိၣ်နၤလၢ တၢ်သးဟ့အပူၤလီၤ. အဝဲသ့ၣ်ဝံာ်နိးဝံၣ်နါ, သံးနိးသံးနါဒီးစံးဝဲ, “ပမၤဟးဂီၤကွံာ်အီၤလံ. အအံၤမ့ၢ်မုၢ်တနံၤလၢပအိၣ်ခိးတ့ၢ်ဝဲလီၤ.”

¹⁷ လၢခံကတၢၢ်န့ၣ်, ယွၤမၤဝံၤတၢ်ဒ်အကတိၤပျံၤကတိၤဖုးဆိပာ်ဝဲ လၢအကမၤတၢ်န့ၣ်လီၤ. အဝဲမၤဟးဂီၤတ့ၢ်ပှၤဒ်အဟ့ၣ်ပလီၢ်တ့ၢ်ပှၤလၢပျၢၤလံၤလံၤအသိး ဒီးတသးကညီၤဘၣ်တၢ်ဘၣ်. ဟ့ၣ်လီၤတၢ်မၤနၢၤလၢပဒုၣ်ပဒါတဖၣ်, ဟ့ၣ်လီၤအီၤလၢတၢ်သးခု လၢပတၢ်လီၤပှီၢ်အဖီခိၣ်န့ၣ်လီၤ.

¹⁸ အိဝ့ၢ်ယရူၤၡလ့ၣ်ဧၢ, မ်နခိၣ်ဒူတဖၣ်ကိးပသူထီၣ်ဆူယွၤအအိၣ် တက့ၢ်. ပျဲနမဲာ်ထံတဖၣ်ယွၤလီၤဝဲဒ်ထံကျိတဖၣ်လၢမုၢ်ဆါဒီးလၢမုၢ် နၤတက့ၢ်. မၤလၢာ်မၤဂီၤကွံာ်နသးလၢတၢ်ဟီၣ်တၢ်ယၢၤဒီးတၢ်သူၣ်အုးသး အုးတက့ၢ်.

¹⁹ လၢမုၢ်နၤခီသီတနၤကျၢၤန့ၣ်ဂဲၤထၢၣ်ဝံၤ, ဂဲၤထၢၣ်ကဒီးခဲအံၤခဲအံၤလၢနကကိးပသူထီၣ်ဆူယွၤအအိၣ် တက့ၢ်. ဂၢ်လီၤနသး, ဒီးဃ့ကညးအီၤလၢကသူၣ်ကညီၤသးကညီၤနဖိတဖၣ်လၢ အသၣ်ဝံၤလီၤဒိတုၤကသံလၢကျဲကိးဘိဒဲးအသနၢၣ်တဖၣ်အဂီၢ်တက့ၢ်.

²⁰ ယွၤဧၢ, ဘၣ်မနုၤနစံၣ်ညီၣ်ပှၤဒ်သိးအံၤလဲၣ်, ကွၢ်ဆိကမိၣ်တၢ်တက့ၢ်. ပိာ်မုၣ်တဖၣ်အီၣ်က့ၤအဖိဆံးတဖၣ်လၢအအဲၣ်ဝဲအဖံးအညၣ်အနီၢ်ခိ ကသ့ဒ်လဲၣ်. ပှၤလုၢ်တၢ်အခိၣ်တဖၣ်ဒီးဝံတဖၣ်ဘၣ်တၢ်မၤသံအီၤလၢတၢ်လုၢ်ဟံၣ် ဒၣ်ဝဲအပူၤကကြၢးဝဲဒ်လဲၣ်.

²¹ ပှၤသးစၢ်ဒီးပှၤသးပှၢ်လီၤဃံၤသံဒ်သိးသိးလၢကျဲတဖၣ် အပူၤလီၤ. ပှၤသးစၢ်ပိာ်ခွါဒီးပိာ်မုၣ်တဖၣ်ဘၣ်တၢ်မၤသံအီၤလၢ ဒုၣ်ဒါအနးတဖၣ်လီၤ. လၢနတၢ်သးထီၣ်အမုၢ်တနံၤန့ၣ်နမၤသံအဝဲသ့ၣ်တအိၣ်ဒီးတၢ်သး ကညီၤဘၣ်.

²² နကွဲမုာ်တ့ၢ်ယဒုၣ်ယဒါတဖၣ်ဒ်သိးကမၤတၢ်လီၤပျံၤလီၤဖုးအမူး ဖးဒိၣ်ဝးတရံးယၤ, ဒီးလၢနတၢ်သးထီၣ်အမုၢ်တနံၤန့ၣ်ပှၤပူၤဖျဲးတန့ၢ်ဘၣ်နီ တဂၤဘၣ်. အဝဲသ့ၣ်မၤသံယဖိတဖၣ်လၢ ယလုၢ်ဒိၣ်ထီၣ်ဒီးအဲၣ်တ့ၢ်အီၤန့ၣ်လီၤ.