လံာ်စီၤယိၤၡူ 8 - Sgaw Karen Common Bible

တၢ်ဒုးန့ၢ်ဒီးမၤဟးဂီၤဝ့ၢ်ဂဲ

¹ ယွၤစံးဘၣ်စီၤယိၤၡူ, “ဟံးန့ၢ်ပှၤသုးဖိခဲလၢာ်ဒီးနၤဒီးလဲၤထီၣ်ဆူဝ့ၢ်ဂဲတ က့ၢ်. တဘၣ်ပျံၤတၢ်တဂ့ၤ, တဘၣ်သးဟးဂီၤတဂ့ၤ. ယကဟ့ၣ်နၤတၢ်မၤနၢၤလၢဝ့ၢ်ဂဲအစီၤပၤအဖီ ခိၣ်န့ၣ်လီၤ. အပှၤဂီၢ်မုၢ်, အဝ့ၢ်ဒီးအကီၢ်ကကဲထီၣ်နတၢ်လီၤ.

² နကဘၣ်မၤဝ့ၢ်ဂဲဒီးအစီၤပၤဒ်နမၤဝ့ၢ်ယရံၤဃိဒီးအစီၤ ပၤအသိးန့ၣ်လီၤ. ဘၣ်ဆၣ်ဒီးတဘျီအံၤသုကဟံးန့ၢ်အတၢ်ဖိတၢ်လံၤဒီးအဆၣ်ဖိကီၢ် ဖိတဖၣ်လၢသုဂီၢ်ဒၣ်သုဝဲန့ၣ်လီၤ. ကတဲာ်ကတီၤသုသးလၢတၢ်ခူသူၣ်အပူၤလၢသုကဒုးဝ့ၢ်အံၤလၢအလီၢ် ခံတက့ၢ်.”

³ အန့ၣ်ဒီးစီၤယိၤၡူကတဲာ်ကတီၤအသးလၢက လဲၤဆူဝ့ၢ်ဂဲဃုာ်ဒီးအသုးဖိခဲလၢာ်န့ၣ်လီၤ. အဝဲဃုထၢထီၣ်အပှၤသုးဖိအဂ့ၤက တၢၢ်အဂၤသၢကလးဒီးဆှၢထီၣ်အဝဲသ့ၣ်လၢမုၢ်နၤခီ

⁴ ဒီးမၤလိာ်ဝဲ, “အိၣ်ခူသူၣ်လၢဝ့ၢ်အလီၢ်ခံဘၣ်ဆၣ်ဒီးအိၣ်ယံၤကဲၣ်ဆိးတဂ့ၤ, ဒီးအိၣ်ကတဲာ်ကတီၤသုသးလၢသုကဒုးတၢ်အဂီၢ်တက့ၢ်.

⁵ ယၤဒီးယပှၤတဖၣ်ကသုးဘူးအသးဆူဝ့ၢ်ဒီးဖဲပှၤ ဝ့ၢ်ဂဲဖိတဖၣ်ဟဲထီၣ်ထီဒါပှၤဒီး, ပကဃၣ်တရံး ဒီးဃ့ၢ်လၢအမဲာ်ညါဒ်ပမၤတ့ၢ်အခီၣ်ထံးတဘျီအသိးန့ၣ်လီၤ.

⁶ အဝဲသ့ၣ်ကလူၤပှၤတုၤပဆှၢပူၤထီၣ်ကွံာ်အဝဲသ့ၣ်လၢဝ့ၢ်န့ၣ်လီၤ. အဝဲသ့ၣ်ကဆိကမိၣ်ဝဲလၢပထွးထီၣ်ဃ့ၢ်ကွံာ်လၢအအိၣ်, ဒ်ပမၤတ့ၢ်လၢအပူၤကွံာ်တဘျီအသိးန့ၣ်လီၤ.

⁷ အန့ၣ်ဒီး, သုကဟဲထီၣ်လၢသုအိၣ်ခူသူၣ်အလီၢ် ဒီးဒုးန့ၢ်ဝ့ၢ်န့ၣ်လီၤ. ယွၤသုကစၢ်ယွၤကဟ့ၣ်လီၤအီၤလၢသုစုပူၤန့ၣ်လီၤ.

⁸ သုဒုးန့ၢ်ဝ့ၢ်ဝံၤဒီး, ဒွဲၣ်အူထီၣ်အီၤလၢမ့ၣ်အူဒ်ယွၤမၤလိာ်တ့ၢ်သုအသိးန့ၣ်တက့ၢ်. အအံၤမ့ၢ်တၢ်မၤလိာ်တဖၣ်လၢသုဂီၢ်န့ၣ်လီၤ.”

⁹ အန့ၣ်ဒီး, စီၤယိၤၡူမၢလီၤအဝဲသ့ၣ်, ဒီးအဝဲသ့ၣ်လဲၤဝဲဆူအ တၢ်အိၣ်ခူသူၣ်အလီၢ်ဒီးအိၣ်ခိးတၢ်ဖဲန့ၣ်ဖဲဝ့ၢ်ဂဲအမုၢ်နုာ်လၢဝ့ၢ်ဂဲ ဒီးဝ့ၢ်ဘ့ၤသ့လးအဘၢၣ်စၢၤန့ၣ်လီၤ. စီၤယိၤၡူအိၣ်သီတနၤကျၢၤဖဲပှၤသူၣ်ဒဲအလီၢ်န့ၣ်လီၤ.

¹⁰ လၢဂီၤခီဂီၤဂီၤန့ၣ်, စီၤယိၤၡူဂဲၤဆၢထၢၣ်ဒီးကိးဖှိၣ်အသုးဖိ တပူၤဃီလီၤ. ဝံၤဒီးအဝဲဒီးပှၤအံၣ်စရ့လးဖိအခိၣ်အနၢ်တဖၣ်ဆှၢအဝဲသ့ၣ်ဆူ ဝ့ၢ်ဂဲန့ၣ်လီၤ.

¹¹ သုးဖိလၢအအိၣ်ဒီးအီၤတဖၣ်လဲၤဝဲဆူကျဲစၢၤလၢအလဲၤနုာ်ဆူ ဝ့ၢ်ပူၤဒီးသူၣ်ဒဲလၢဝ့ၢ်ဂဲအကလံၤစိးဒီးတၢ်ပၢၤခိၣ်လၢကစၢၢ် ကဆူးအိၣ်လၢအဝဲသ့ၣ်ဒီးဝ့ၢ်ဂဲအဘၢၣ်စၢၤန့ၣ်လီၤ.

¹² အဝဲဟံးန့ၢ်ပှၤသုးဖိယဲၢ်ကထိဒီးပာ်ခူသူၣ်အ ဝဲသ့ၣ်လၢဝ့ၢ်အမုၢ်နုာ်လၢဝ့ၢ်ဂဲဒီးဝ့ၢ်ဘ့ၤသ့လးအဘၢၣ်စၢၤ န့ၣ်လီၤ.

¹³ သုးဖိတဖၣ်ဘၣ်တၢ်ကျဲၤလီၤအီၤလၢတၢ်ဒုးအဂီၢ်ဒီးသုးအ မိၢ်ပှၢ်တဖုဘၣ်တၢ်ပာ်လီၤအီၤလၢဝ့ၢ်ဂဲအကလံၤစိး, ဒီးသုးဖိလၢအအိၣ်တီၢ်တဖၣ်လၢဝ့ၢ်အမုၢ်နုာ်တကပၤန့ၣ်လီၤ. စီၤယိၤၡူအိၣ်သီတနၤကျၢၤဖဲယၤဒ့ၣ်တၢ်ပၢၤခိၣ်န့ၣ်လီၤ.

¹⁴ ဖဲဝ့ၢ်ဂဲအစီၤပၤထံၣ်စီၤယိၤၡူအသုးဖိတဖၣ်ဒီးအဝဲမၤဝဲချ့ချ့လီၤ. အဝဲဒီးအပှၤခဲလၢာ်လဲၤဝဲဆူတၢ်ပၢၤခိၣ်လၢကစၢၢ်ကဆူးဖဲယၤ ဒ့ၣ်, လၢအကဒုးပှၤအံၣ်စရ့လးဖိတဖၣ်လၢတၢ်လီၢ်တတီၤဃီဒ်လၢညါအ သိး, ဒီးတသ့ၣ်ညါဝဲလၢအဝဲကဘၣ်တၢ်ဒုးအီၤလၢဝ့ၢ်အလီၢ်ခံတကပၤန့ၣ် ဘၣ်.

¹⁵ စီၤယိၤၡူဒီးအပှၤခဲလၢာ်ပာ်မၤအသးဒ်အဂုၤက့ၤအလီၢ်ခံအသိး, ဒီးဃ့ၢ်ဝဲဆူပှၢ်မုၢ်ကနၢန့ၣ်လီၤ.

¹⁶ အန့ၣ်ဒီး, ပှၤလၢဝ့ၢ်ပူၤခဲလၢာ်ဘၣ်တၢ်ကိးဖှိၣ်အီၤလၢအကလူၤ အဝဲသ့ၣ်, ဒီးတုၤအလူၤစီၤယိၤၡူန့ၣ်, အဝဲသ့ၣ်ယံၤထီၣ်ယံၤထီၣ်ဒီးဝ့ၢ် န့ၣ်လီၤ.

¹⁷ ပှၤလၢဝ့ၢ်ဂဲဒီးဝ့ၢ်ဘ့ၤသ့လးအပူၤခဲလၢာ်ထွးထီၣ်လူၤ ပှၤအံၣ်စရ့လးဖိတဖၣ်, ဒီးဝ့ၢ်န့ၣ်ဘၣ်တၢ်ပာ်တီၢ်အီၤအီကဘီဒီးပှၤလၢအကအိၣ်ခိးတြီ ဆၢတၢ်တအိၣ်နီတဂၤဘၣ်န့ၣ်လီၤ.

¹⁸ အန့ၣ်ဒီးယွၤစံးဘၣ်စီၤယိၤၡူ, “ယူာ်ထီၣ်ဘီလၢအအိၣ်လၢနစုပူၤတဘိဆူဝ့ၢ်ဂဲန့ၣ်တက့ၢ်. ယကဟ့ၣ်လီၤအီၤလၢနစုပူၤလီၤ.” ဒီးစီၤယိၤၡူမၤဝဲဒ်တၢ်စံးဘၣ်အီၤအသိးန့ၣ်လီၤ.

¹⁹ ဒီးတဘျီဃီဖဲအဝဲယူာ်ထီၣ်အစုန့ၣ်, ပှၤလၢအအိၣ်ခူသူၣ်တဖၣ်ဆၢထၢၣ်ဝဲချ့ချ့, ဃ့ၢ်နုာ်ဆူဝ့ၢ်ပူၤဒီးမၤန့ၢ်ဝဲဒီးတဘျီဃီဒွဲၣ်အူထီၣ်ဝ့ၢ် န့ၣ်လၢမ့ၣ်အူန့ၣ်လီၤ.

²⁰ ဖဲပှၤဝ့ၢ်ဂဲဖိတဖၣ်ကွၢ်ကဒါက့ၤတၢ်ဒီး, ထံၣ်ဘၣ်ဝဲလၢမ့ၣ်အူလုၣ်ခုၣ်ထီၣ်ဝဲဆူမူခိၣ်န့ၣ်လီၤ. အဝဲသ့ၣ်ကဃ့ၢ်ပူၤဖျဲးအဂီၢ်ကျဲတအိၣ်လၢၤဘၣ်. အဂ့ၢ်ဒ်လဲၣ်န့ၣ်, ပှၤအံၣ်စရ့လးဖိလၢအဃ့ၢ်ဆူ ပှၢ်မုၢ်ကနၢတဖၣ်ဃၣ်ကဒါက့ၤအသးလၢ ကဒုးအဝဲသ့ၣ်အဂီၢ်န့ၣ်လီၤ.

²¹ ဖဲစီၤယိၤၡူဒီးအပှၤတဖၣ်ထံၣ် ဝဲလၢအပှၤလၢအခိးခူသူၣ်တၢ်တဖၣ်မၤန့ၢ်ဝ့ၢ် ဒီးဒွဲၣ်အူထီၣ်ဝဲလၢမ့ၣ်အူလံသတးဒီး, အဝဲသ့ၣ်ဃၣ်ကဒါက့ၤအသးဒီးမၤသံကွံာ်ပှၤဝ့ၢ်ဂဲဖိတဖၣ်န့ၣ်လီၤ.

²² ပှၤအံၣ်စရ့လးဖိလၢဝ့ၢ်ပူၤတဖၣ်ဟးထီၣ်ဒီးဒုးတၢ်စ့ၢ်ကီးန့ၣ်လီၤ. သတးဒီးပှၤဝ့ၢ်ဂဲဖိတဖၣ်ထံၣ်ဘၣ်ဝဲလၢအဘၣ်တၢ်ကဝီၤဃာ်အီၤလၢ ပှၤအံၣ်စရ့လးဖိတဖၣ်ဒီးအဝဲသ့ၣ်ဘၣ်တၢ်မၤသံကွံာ်အီၤခဲလၢာ် န့ၣ်လီၤ. ပှၤတပူၤဖျဲးနီတဂၤဒီးပှၤတအိၣ်လီၤတဲာ်နီတဂၤဘၣ်န့ၣ်လီၤ.

²³ မ့မ့ၢ်, ဝ့ၢ်ဂဲအစီၤပၤဘၣ်တၢ်ဖီၣ်န့ၢ်အီၤမူဒံး, ဒီးဘၣ်တၢ်ဟဲ စိာ်အီၤဆူစီၤယိၤၡူအအိၣ်န့ၣ်လီၤ.

²⁴ ပှၤအံၣ်စရ့လးဖိတဖၣ်မၤသံကွံာ်အဒုၣ်အဒါ ခဲလၢာ်ဖဲတၢ်လီၢ်လီၤပျီလၢအဝဲသ့ၣ်လူၤဝဲအလီၢ်န့ၣ်လီၤ. ဝံၤဒီး, အဝဲသ့ၣ်က့ၤကဒါက့ၤဆူဝ့ၢ်ဂဲဒီးမၤသံပှၤဖဲန့ၣ် ခဲလၢာ်လီၤ.

²⁵ ဒီးနံၤအဝဲန့ၣ်ပှၤဝ့ၢ်ဂဲဖိလၢအသံခဲလၢာ်, မုၣ်မုၣ်ခွါခွါမ့ၢ်ဝဲပှၤအ ဂၤတကလးခံကထိန့ၣ်လီၤ.

²⁶ စီၤယိၤၡူယူာ်ဃီၤအဘီဆူဝ့ၢ်ဂဲဒီးတချုးလၢပှၤဖဲန့ၣ်သံခဲလၢာ်ဒံးဘၣ်ဒီး, အဝဲတပာ်လီၤအဘီဘၣ်.

²⁷ ပှၤအံၣ်စရ့လးဖိဟံးန့ၢ်ဆၣ်ဖိကီၢ်ဖိဒီးတၢ်ဖိတၢ်လံၤတဖၣ်လၢ အမၤန့ၢ်ဝဲလၢဝ့ၢ်ပူၤလၢအဂီၢ်ဒၣ်ဝဲဒ်ယွၤစံးဘၣ်စီၤယိၤၡူအသိးန့ၣ်လီၤ.

²⁸ စီၤယိၤၡူဒွဲၣ်အူထီၣ်ဝ့ၢ်ဂဲဒီးပာ်တီၢ်အီၤလၢတၢ်ဟးဂီၤဖးဒိၣ်အပူၤန့ၣ်လီၤ. အိၣ်ဒၣ်ဒ်န့ၣ်တုၤလီၤလၢမုၢ်မဆါတနံၤအံၤန့ၣ်လီၤ.

²⁹ ဒီးအဝဲစၢသံဝ့ၢ်ဂဲအစီၤပၤလၢသ့ၣ်တထူၣ်အလိၤဒီးပာ်အစိၣ် ဒ်န့ၣ်တုၤမုၢ်ဟါလီၤန့ၣ်လီၤ. တုၤမုၢ်လီၤနုာ်ဒီးစီၤယိၤၡူဟ့ၣ်လီၤအကလုၢ်လၢအစိၣ်ကဘၣ်တၢ်သုးကွံာ် အီၤဒီးအစိၣ်ဘၣ်တၢ်ကွံာ်လီၤကွံာ်အီၤဖဲဝ့ၢ်အတြဲၤအခီၣ်ထံး ဒီးဘၣ်တၢ်မၤဘၢအီၤလၢလၢၢ်ကိၢ်လိၢ်ဖးဒိၣ်တဖၣ်ဒီးအိၣ်ဝဲတုၤမုၢ်မဆါတနံၤအံၤန့ၣ်လီၤ.

တၢ်သိၣ်တၢ်သီဘၣ်တၢ်ဖးအီၤ ဖဲကစၢၢ်ဧ့ၤဘါလး

³⁰ တုၤနုၤတစုစီၤယိၤၡူမၤထီၣ်တၢ်လုၢ်လီၢ်လၢ ယွၤအံၣ်စရ့လးအကစၢ်ယွၤအဂီၢ်လၢကစၢၢ်ဧ့ၤဘါလးအလိၤန့ၣ်လီၤ.

³¹ အဝဲမၤတၢ်အံၤဒ်ယွၤအခ့အပှၤစီၤမိၤၡ့မၤလိာ်ပှၤအံၣ်စရ့လးဖိတဖၣ်လၢစီၤမိၤၡ့အလံာ်တၢ်သိၣ်တၢ်သီအပူၤအသိးလၢအစံးဝဲ, တၢ်လုၢ်လီၢ်လၢအဘၣ်တၢ်မၤအီၤလၢလၢၢ်တဖၣ်လၢအတဘၣ်တၢ်ဒီၣ်တဲာ် အီၤလၢထး” န့ၣ်လီၤ. ဒီးလၢတၢ်လုၢ်လီၢ်အံၤန့ၣ်အဝဲသ့ၣ်လုၢ်တၢ်လုၢ်မ့ၣ် အူလၢယွၤအဂီၢ်ဒီးလုၢ်တၢ်လုၢ်မၤဃူမၤဖိးတၢ်တဖၣ်လီၤ.

³² ဒီးဖဲန့ၣ်, ဖဲပှၤအံၣ်စရ့လးဖိတဖၣ်အမဲာ်ညါန့ၣ်, စီၤယိၤၡူကွဲးလီၤစီၤမိၤၡ့အတၢ်သိၣ်တၢ်သီလၢလၢၢ်တဖၣ်အလိၤ တၢ်သိၣ်တၢ်သီလၢစီၤမိၤၡ့အကစၢ်ဒၣ်ဝဲကွဲးတ့ၢ်ဝဲန့ၣ်လီၤ.

³³ ပှၤအံၣ်စရ့လးဖိတဖၣ်, ဃုာ်ဒီးအခိၣ်အနၢ်တဖၣ်, အသုးခိၣ်သုးနၢ်တဖၣ်, ဒီးစံၣ်ညီၣ်ကွီၢ်တဖၣ်, ဃုာ်ဒီးပှၤတခီဘီမုၢ်ဖိလၢအကျါတဖၣ်, ဆၢထၢၣ်လၢယွၤအတၢ်အၢၣ်လီၤအီလီၤအတလါအကပၤခံကပၤလိာ်ဒီး ကွၢ်ဃီၤတၢ်ဆူပှၤလ့ၤဝံဖိပှၤလုၢ်တၢ်အခိၣ်တဖၣ်လၢအစိာ်တလါ အအိၣ်န့ၣ်လီၤ. ပှၤတဝာ်ဆၢထၢၣ်ဝဲဒီးဒီအချၢဆူကစၢၢ်ကရံးစံၣ်ဒီး အဂၤတဝာ်ဒီအချၢဆူကစၢၢ်ဧ့ၤဘါလးန့ၣ်လီၤ. ယွၤအခ့အပှၤစီၤမိၤၡ့မၤလိာ်တ့ၢ်အဝဲသ့ၣ်လၢကမၤတၢ်အံၤဖဲ တၢ်ဆၢကတီၢ်တုၤဃီၤဝဲလၢအဝဲသ့ၣ်ကဒိးန့ၢ်ဘၣ်တၢ်ဆိၣ်ဂ့ၤအဂီၢ် န့ၣ်လီၤ.

³⁴ ဝံၤဒီးစီၤယိၤၡူဖးထီၣ်တၢ်သိၣ်တၢ်သီခဲလၢာ်, လၢအပၣ် ဃုာ်ဒီးတၢ်ဆိၣ်ဂ့ၤဒီးတၢ်ဆိၣ်အၢတဖၣ်, ဒ်အဘၣ်တၢ်ကွဲးဃာ်အီၤ လၢလံာ်တၢ်သိၣ်တၢ်သီအပူၤအသိးန့ၣ်လီၤ.

³⁵ စီၤယိၤၡူဖးထီၣ်စီၤမိၤၡ့အတၢ်မၤလိာ်ကိးထံၣ်ကိးဘီဒဲး လၢပှၤလၢအပာ်ဖှိၣ်သးခဲလၢာ်အမဲာ်ညါ, လၢအပၣ်ဃုာ်ဒီးပိာ်မုၣ်တဖၣ်ဒီးဖိသၣ်တဖၣ်, ဃုာ်ဒီးပှၤတခီဘီမုၢ်ဖိတဖၣ်လၢအအိၣ်လၢအဝဲသ့ၣ်အကျါန့ၣ်လီၤ.