လံာ်စီၤယိၤၡူ 22 - Sgaw Karen Common Bible

စီၤယိၤၡူဒုးက့ၤပှၤကီၢ်မုၢ်ထီၣ် အဒူၣ်တဖၣ်ဆူဟံၣ်

¹ အန့ၣ်ဒီး, စီၤယိၤၡူမၤလိာ်ပှၤရူၤဘ့ၣ်ဖိတဖၣ်, ဒီးပှၤကးဖိတဖၣ်, ဒီးပှၤမနၤၡ့ၤအဒူၣ်တဝာ်,

² ဒီးစံးဘၣ်အဝဲသ့ၣ်, “သုတိၢ်န့ၢ်ယွၤအခ့အပှၤစီၤမိၤၡ့အတၢ် မၤလိာ်တ့ၢ်သုဒီးဒိကနၣ်ယကလုၢ်လၢတၢ်လၢယမၤလိာ်တ့ၢ်သု ခဲလၢာ်န့ၣ်လီၤ.

³ ဒီကတီၢ်ညါအံၤသုတလဲၤသဒၣ်သုဒီပုၢ်ဝဲၢ်ပှၤအံၣ်စရ့လးဖိတဖၣ် နီတစုဘၣ်န့ၣ်လီၤ. သုပာ်သူၣ်ပာ်သးလၢသုကဒိကနၣ်ယွၤသုက စၢ်အတၢ်မၤလိာ်တဖၣ်န့ၣ်လီၤ.

⁴ အခဲအံၤ, ယွၤသုကစၢ်ဟ့ၣ်လီၤသုဒီပုၢ်ဝဲၢ်ပှၤအံၣ်စရ့လးဖိတဖၣ် လၢတၢ်ဃူတၢ်ဖိးဒ်အအၢၣ်လီၤတ့ၢ်ဝဲအသိးန့ၣ်လီၤ. လၢတၢ်န့ၣ်အဃိ, က့ၤသုဝဲဆူကီၢ်လၢအမ့ၢ်သုတၢ်န့ၢ်သါ, ကီၢ်လၢထံကျိယၢ်ဒ့ၣ်အမုၢ်ထီၣ်တကပၤလၢယွၤအခ့အပှၤ စီၤမိၤၡ့ဟ့ၣ်လီၤသုန့ၣ်တက့ၢ်.

⁵ ပာ်သူၣ်ပာ်သးလီၤတံၢ်လီၤဆဲးလၢသုကဒိကနၣ် တၢ်သိၣ်တၢ်သီလၢယွၤအခ့အပှၤစီၤမိၤၡ့မၤလိာ်တ့ၢ်သုလၢအမ့ၢ်ဝဲ, အဲၣ်ယွၤသုကစၢ်, မၤအတၢ်ဘၣ်အသး, ဒိကနၣ်အတၢ်မၤလိာ်တဖၣ်, တီဒီးအီၤ, ဒီးမၤအတၢ်လၢသုသးဒီဖျၢၣ်ညါဒီးသုသူၣ်ကံၢ်သးလဲန့ၣ်တက့ၢ်.”

^6-8 အန့ၣ်ဒီးစီၤယိၤၡူဆိၣ်ဂ့ၤအဝဲသ့ၣ်ဒီးပျၢ်အီၤဒီးအဝဲသ့ၣ်က့ၤက့ၤ ဝဲဆူအဟံၣ်ဒၣ်ဝဲန့ၣ်လီၤ. ဒီးအခဲအံၤလၢပှၤမ နၤၡ့ၤအဒူၣ်တဝာ်အဂီၢ် စီၤမိၤၡ့ဟ့ၣ်လီၤအလီၢ်လၢကီၢ်ဘၤၡၣ်အပူၤ, ဘၣ်ဆၣ်လၢအဒူၣ်တဝာ်အဂီၢ်တခီ စီၤယိၤၡူဟ့ၣ်လီၤတ့ၢ်အီၤတၢ်လီၢ်လၢအဒီပုၢ်ဝဲၢ်တဖၣ်အကပၤ လၢထံကျိယၢ်ဒ့ၣ်အမုၢ်နုာ်န့ၣ်လီၤ. ဒီးဖဲစီၤယိၤၡူပျၢ်ကွံာ် အဝဲသ့ၣ်ဆူအဟံၣ်ဒီးဆိၣ်ဂ့ၤအဝဲသ့ၣ်န့ၣ်, အဝဲစံးဘၣ်အဝဲသ့ၣ်, “က့ၤက့ၤဆူသုဟံၣ်အိၣ်ဒီးတၢ်ထူးတၢ် တီၤလၢအအါ, ဃုာ်ဒီးဆၣ်ဖိကီၢ်ဖိလၢအအါ, ဃုာ်ဒီးစ့, ထူ, တိၢ်ဘီ, ဒီးထး, ဃုာ်ဒီးတၢ်ကူတၢ်ကၤလၢအအါ, ဒီးနီၤဖးလီၤန့ၢ်သုဒီပုၢ်ဝဲၢ်တဖၣ်တၢ်ဂုာ်န့ၢ်လၢသုမၤန့ၢ်လၢသုဒုၣ်သုဒါတဖၣ်အအိၣ် န့ၣ်တက့ၢ်.”

⁹ အန့ၣ်ဒီး, ပှၤရူၤဘ့ၣ်ဖိတဖၣ်, ပှၤကးဖိတဖၣ်, ဒီးပှၤမနၤၡ့ၤ အဒူၣ်တဝာ်က့ၤက့ၤဆူအဟံၣ်ဒၣ်ဝဲန့ၣ်လီၤ. အဝဲသ့ၣ်ဟးဖးဒီး ပှၤအံၣ်စရ့လးဖိတဖၣ်လၢအအိၣ်လီၤတဲာ်တဖၣ် ဖဲၡံလိၤလၢကီၢ် ကနၤဧၣ်အပူၤဝံၤဒီးလဲၤထီၣ်ဆူအကီၢ်ဒၣ်ဝဲ, ကီၢ်ကံးလဧး, လၢအဝဲသ့ၣ်ဒိးန့ၢ်ဘၣ်ဝဲဒ်ယွၤမၤလိာ်တ့ၢ်အဝဲသ့ၣ်ခီဖျိစီၤမိၤၡ့အသိးန့ၣ်လီၤ.

တၢ်လုၢ်လီၢ်ဖဲထံကျိယၢ်ဒ့ၣ်

¹⁰ ဒီးဖဲအဝဲသ့ၣ်ဟဲက့ၤလၢထံကျိယၢ်ဒ့ၣ်အခိၣ်အဃၢၤလၢကီၢ်က နၤဧၣ်အပူၤန့ၣ်ဒီး, ပှၤရူၤဘ့ၣ်ဖိတဖၣ်, ပှၤကးဖိတဖၣ်, ဒီးပှၤမနၤၡ့ၤဖိအဒူၣ်တဝာ်, ဘှီထီၣ်တၢ်လုၢ်လီၢ်လၢအဒိၣ်နီၢ်မးတဖျၢၣ်ဖဲထံကျိယၢ်ဒ့ၣ်အက ပၤန့ၣ်လီၤ.

¹¹ ပှၤအံၣ်စရ့လးဖိလၢအအိၣ်လီၤတဲာ်တဖၣ်ဘၣ်တၢ်စံးဘၣ်အီၤ, “ဒိကနၣ်တက့ၢ်. ပှၤရူၤဘ့ၣ်ဖိတဖၣ်, ပှၤကးဖိတဖၣ်, ဒီးပှၤ မုၢ်ထီၣ်မနၤၡ့ၤဖိအဒူၣ်တဖၣ်ဘှီထီၣ်လံတၢ်လုၢ်လီၢ်ဖဲတၢ်လီၢ်လၢ ပအိၣ်တၢ်တကပၤဖဲထံကျိယၢ်ဒ့ၣ်န့ၣ်လီၤ.”

¹² ဖဲပှၤအံၣ်စရ့လးဖိတဖၣ်နၢ်ဟူဘၣ်တၢ်အံၤဒီးပှၤဂီၢ်မုၢ်ခဲလၢာ်ဟဲ ဖှိၣ်အသးဖဲၡံလိၤလၢကဒုးတၢ်ဒီးပှၤအဒူၣ်တဖၣ်လၢမုၢ်ထီၣ်တခီန့ၣ်လီၤ.

¹³ အန့ၣ်ဒီး, ပှၤအံၣ်စရ့လးဖိတဖၣ်မၢလီၤပှၤလုၢ်တၢ်အခိၣ် စီၤအလၤဧစၢ်အဖိခွါစီၤဖံၤနဃၣ်ဆူပှၤရူၤဘ့ၣ်ဖိ, ပှၤကးဖိ, ဒီးပှၤမုၢ်ထီၣ်မနၤၡ့ၤဖိအဒူၣ်တဖၣ်အအိၣ်လၢကီၢ်ကံးလဧးန့ၣ်လီၤ.

¹⁴ ပှၤအခိၣ်အဂၤတဆံလဲၤဃုာ်တၢ်ဒီးစီၤဖံၤနဃၣ်ပှၤတဒူၣ်တဂၤစုာ်စုာ်လၢမုၢ်နုာ်အဒူၣ်တဖၣ်အပူၤ ဒီးတဂၤဘၣ်တဂၤန့ၣ်မ့ၢ်ဝဲအဒူၣ် ဖိထၢဖိတဖၣ်အခိၣ်န့ၣ်လီၤ.

¹⁵ အဝဲသ့ၣ်ဟဲတုၤဝဲလၢကီၢ်ကံးလဧးလၢပှၤရူၤဘ့ၣ်ဖိ, ပှၤကးဖိ, ဒီးပှၤမုၢ်ထီၣ်မနၤၡ့ၤဖိအအိၣ်

¹⁶ ဒီးကတိၤတၢ်လၢယွၤအပှၤဂီၢ်မုၢ်ခဲလၢာ်အခၢၣ်စးဒီးစံးဝဲဒၣ်, “ဘၣ်မနုၤအဃိသုမၤတၢ်အၢတမံၤအံၤထီဒါအံၣ်စရ့လး အကစၢ်ယွၤန့ၣ်လဲၣ်. သုပူထီၣ်ယွၤခီဖျိသုဘှီထီၣ်တၢ်လုၢ်လီၢ်အံၤလၢ သုဂီၢ်ဒၣ်ဝဲန့ၣ်လီၤ. သုတပိာ်လၢၤအခံဘၣ်န့ၣ်လီၤ.

¹⁷ သ့ၣ်နီၣ်ထီၣ်က့ၤပတၢ်ဒဲးဘးဖဲကစၢၢ်ပဧိၢ်, ဖဲယွၤစံၣ်ညီၣ်အပှၤဒၣ်ဝဲလၢတၢ်သံသတြိာ်န့ၣ်တက့ၢ်. လၢတၢ်အဝဲန့ၣ်အဃိ, ပတူၢ်ဘၣ်ဒံးတၢ်အဖၢမုၢ်န့ၣ်လီၤ. တၢ်အဝဲန့ၣ်, တမ့ၢ်ဒံးတၢ်ဒဲးဘးဘၣ်ဧါ.

¹⁸ မ့ၢ်သုသါတတူၢ်လိာ်တၢ်ပိာ်ယွၤအခံခဲအံၤဘၣ်ဧါ. သုမ့ၢ်ပူထီၣ်ထီဒါယွၤလၢမုၢ်မဆါတနံၤအံၤဒီး, ခဲမုၢ်ဆ့ၣ်အဝဲအသးကဒိၣ်ပှၤခဲလၢာ်လၢအံၣ်စရ့လးအပူၤန့ၣ်လီၤ.

¹⁹ မ့မ့ၢ်ဒ်န့ၣ်ဒီးခဲအံၤ, သုကီၢ်မ့ၢ်တကြၢးလၢတၢ်ဘူၣ်ထီၣ်ဘါ ထီၣ်အဂီၢ်ဘၣ်ဒီး, ဟဲခီဂာ်ဆူယွၤအကီၢ်ပူၤဖဲအဒဲအိၣ်ဝဲအလီၢ် န့ၣ်တက့ၢ်. ဃ့မၤန့ၢ်ကီၢ်လၢပကျါတနီၤတက့ၢ်. ဘၣ်ဆၣ်ဒီးတဘၣ်ပူထီၣ်ထီဒါယွၤမ့တမ့ၢ် တဘၣ်ဒုးကဲထီၣ်ပှၤလၢပှၤပူထီၣ်တၢ်ဖိခီဖျိတၢ်ဘှီထီၣ် တၢ်လုၢ်လီၢ်လၢယွၤပကစၢ်ယွၤ အတၢ်လုၢ်လီၢ်အမဲာ်ညါအဃိန့ၣ်တဂ့ၤ.

²⁰ သ့ၣ်နီၣ်ထီၣ်က့ၤစီၤစ့ရၤအဖိခွါစီၤဧၤကၣ်အတၢ်တဒိ ကနၣ်တၢ်မၤလိာ်ဘၣ်ဃးတၢ်သ့ၣ်တဖၣ်လၢတၢ်ကဘၣ်မၤဟးဂီၤအီၤခဲ လၢာ်အဂ့ၢ်န့ၣ်တက့ၢ်. အံၣ်စရ့လးခဲလၢာ်ဘၣ်တၢ်စံၣ်ညီၣ်အီၤ လၢတၢ်ဂ့ၢ်အဝဲန့ၣ်အဃိလီၤ. စီၤဧၤကၣ်တမ့ၢ်ပှၤထဲတဂၤဧိၤလၢ အသံလၢအတၢ်ဒဲးဘးအဃိန့ၣ်ဘၣ်.”

²¹ အန့ၣ်ဒီးပှၤရူၤဘ့ၣ်ဖိ, ပှၤကးဖိ, ဒီးပှၤမနၤၡ့ၤဖိအဒူၣ်တဝာ်စံး ဆၢပှၤမုၢ်နုာ်ဖိအဒူၣ်တဖၣ်, အဒူၣ်ဖိထၢဖိအခိၣ်တဖၣ်ဒီးစံးဝဲ,

²² တၢ်စိတၢ်ကမီၤတဂၤမ့ၢ်ကစၢ်ယွၤလီၤ. အဝဲဒၣ်မ့ၢ်ယွၤလီၤ. တၢ်စိတၢ်ကမီၤတဂၤမ့ၢ်ကစၢ်ယွၤလီၤ. အဝဲဒၣ်မ့ၢ်ယွၤလီၤ. ပမၤတၢ်အံၤလၢမနုၤအဃိလဲၣ်န့ၣ်အဝဲဒၣ်သ့ၣ်ညါ ဝဲဒီးပသးအိၣ်လၢသုကသ့ၣ်ညါစ့ၢ်ကီးလီၤ. ပမ့ၢ်ပူထီၣ်တၢ်ဒီးပမ့ၢ်တပာ်ပတၢ် နာ်လၢယွၤဘၣ်ဒီး, တဘၣ်ပျဲပအိၣ်မူယံာ်ထီၣ်လၢၤတဂ့ၤ.

²³ ပမ့ၢ်တဒိကနၣ်ယွၤဒီးဘှီထီၣ်ပတၢ်လုၢ်လီၢ်လၢပကလုၢ်ထီၣ်တၢ် လုၢ်မ့ၣ်အူအဂီၢ်မ့ၢ်ဂ့ၤ, သူအီၤလၢပကလုၢ်ထီၣ်တၢ်အီၣ်တၢ်အီ မ့ၢ်ဂ့ၤ, တၢ်လုၢ်မၤဃူမၤဖိးတၢ်မ့ၢ်ဂ့ၤန့ၣ်ဒီး, မ်ယွၤအကစၢ် ဒၣ်ဝဲစံၣ်ညီၣ်ပှၤတက့ၢ်.

²⁴ တမ့ၢ်ဒ်န့ၣ်ဘၣ်. ပမၤတ့ၢ်တၢ်အံၤမ့ၢ်လၢပပျံၤလၢ, လၢခံလၢ လာ်န့ၣ်သုစၢၤသုသွဲၣ်တဖၣ်ကစံးဘၣ်ပစၢၤပသွဲၣ်တဖၣ်, “သုဘၣ်ဃးဒီးယွၤအံၣ်စရ့လးအကစၢ်ယွၤဒ်လဲၣ်.

²⁵ အဝဲဒၣ်ဒုးကဲထီၣ်ထံကျိယၢ်ဒ့ၣ်လၢထံဆၢကီၢ်ဆၢလၢပဝဲဒၣ်ဒီး သုဝဲပှၤရူၤဘ့ၣ်ဖိဒီးပှၤကးဖိအဘၢၣ်စၢၤန့ၣ်လီၤ. သုတဘၣ်ဃး ဒီးယွၤနီတမံၤဘၣ်. အန့ၣ်ဒီး, သုစၢၤသုသွဲၣ်တဖၣ်ကမၤဝဲဒ်သိး ပစၢၤပသွဲၣ်တဖၣ်ကဆိကတီၢ်တၢ်ဘူၣ်ထီၣ်ဘါထီၣ်ယွၤန့ၣ်လီၤ.

²⁶ လၢတၢ်န့ၣ်အဃိ, ပဘှီထီၣ်တၢ်လုၢ်လီၢ်တမ့ၢ်လၢပကလုၢ်ထီၣ် တၢ်လုၢ်မ့ၣ်အူမ့တမ့ၢ်မၤဘူၣ်မၤတီၢ်တၢ်အဂီၢ်န့ၣ်ဘၣ်.

²⁷ မ့မ့ၢ်တခီ, မ့ၢ်တၢ်ပနီၣ်တမံၤလၢပဝဲဒီးသုအဘၢၣ်စၢၤ, ဒီးပှၤတစိၤဘၣ်တစိၤလၢပလီၢ်ခံတဖၣ်အဂီၢ်, လၢပမ့ၢ်ပှၤဘူၣ်ထီၣ်ဘါထီၣ်ယွၤနီၢ်နီၢ် လၢအဒဲစီဆှံအမဲာ်ညါဃုာ်ဒီးပတၢ်လုၢ်တဖၣ်လၢတၢ်လုၢ်မ့ၣ်အူ အဂီၢ်, ဃုာ်ဒီးတၢ်လုၢ်တဖၣ်ဒီးတၢ်လုၢ်မၤဃူမၤဖိးတဖၣ်န့ၣ်လီၤ. အဝဲအံၤမ့ၢ်ဒ်သိးသုစၢၤသုသွဲၣ်တဖၣ်အသုတစံးဘၣ် ပှၤလၢပတၢ်လုၢ်တဖၣ်တဘၣ်ဃးဒီးယွၤဘၣ်တဂ့ၤန့ၣ်လီၤ.

²⁸ မ့ၢ်ပတၢ်ဆိကမိၣ်လၢ, တၢ်ဒ်သိးအံၤမ့ၢ်မၤအသးဒီး, ပစၢၤပသွဲၣ်တဖၣ်ကသ့စံးဝဲ, “ကွၢ်တက့ၢ်. ပမိၢ်ပၢ်ဖံဖုလၢပျၢၤတဖၣ်မၤထီၣ်တၢ်လုၢ်လီၢ်ဒ်ယွၤအတၢ်လုၢ်လီၢ်အသိးန့ၣ်လီၤ. တမ့ၢ်လၢတၢ်လုၢ်မ့ၣ်အူအဂီၢ်မ့ၢ်ဂ့ၤ, တၢ်လုၢ်တၢ်ပာ် အဂီၢ်မ့ၢ်ဂ့ၤန့ၣ်ဘၣ်. မ့ၢ်တၢ်အုၣ်အသးလၢသုဝဲဒီးပဝဲအဘၢၣ် စၢၤန့ၣ်လီၤ.”

²⁹ ပတပူထီၣ်ယွၤမ့တမ့ၢ်ဆိကတီၢ်ပတၢ်ပိာ်အခံခဲအံၤခီဖျိလၢပဘှီထီၣ်တၢ်လုၢ်လီၢ်လၢ တၢ်လုၢ်မ့ၣ်အူအဂီၢ်မ့ၢ်ဂ့ၤ, လၢပကလုၢ်ထီၣ်တၢ်အီၣ်တၢ်အီအဂီၢ်မ့ၢ်ဂ့ၤ, တၢ်လုၢ်မၤဃူမၤဖိးအဂီၢ်မ့ၢ်ဂ့ၤန့ၣ်ဘၣ်. ပတဘှီထီၣ်တၢ်လုၢ်လီၢ်အဂၤနီတခါလၢယွၤပကစၢ်ယွၤ အတၢ်လုၢ်လီၢ်လၢအအိၣ် ဆၢထၢၣ်ဝဲလၢယွၤအတၢ်အိၣ်ဆိးအလီၢ်အမဲာ်ညါန့ၣ်ဘၣ်.”

³⁰ ပှၤလုၢ်တၢ်အခိၣ်စီၤဖံၤနဃၣ်ဒီးပှၤအခိၣ်အဂၤတဆံ လၢအလဲၤဃုာ်တ့ၢ်တၢ်ဒီးအီၤလၢအမ့ၢ်ဝဲပှၤမုၢ်နုာ်အဒူၣ်တဖၣ်, အဒူၣ်ဖိထၢဖိအခိၣ်တဖၣ်န့ၣ်, နၢ်ဟူဘၣ်ဝဲတၢ်လၢပှၤရူၤဘ့ၣ်ဖိ, ပှၤကးဖိ, ဒီးပှၤမုၢ်ထီၣ်မနၤၡ့ၤဖိအဒူၣ်တဖၣ်စံးတ့ၢ်ဝဲန့ၣ်ဒီး, အဝဲသ့ၣ်သးမံဝဲလီၤ.

³¹ ပှၤလုၢ်တၢ်အခိၣ်စီၤအလၤဧစၢ်အဖိခွါစီၤဖံၤနဃၣ်စံးဘၣ်အဝဲသ့ၣ်, “အခဲအံၤပသ့ၣ်ညါလၢယွၤအိၣ်ဒီးပှၤလီၤ. တမ့ၢ်သုပူထီၣ်တၢ်ထီဒါအီၤန့ၣ်ဘၣ်. လၢတၢ်န့ၣ်အဃိသုအုၣ်က့ၤခီၣ်က့ၤတ့ၢ် ပှၤအံၣ်စရ့လးဖိတဖၣ်လၢယွၤအတၢ်စံၣ်ညီၣ်န့ၣ်လီၤ.

³² အန့ၣ်ဒီးစီၤဖံၤနဃၣ်ဒီးပှၤအခိၣ်တဖၣ်ပာ်တီၢ်ပှၤရူၤဘ့ၣ်တဖၣ်ဒီး ပှၤကးဖိတဖၣ်လၢကီၢ်ကံးလဧးဒီးက့ၤကဒါက့ၤဆူ ကီၢ်ကနၤဧၣ်ဆူပှၤအံၣ်စရ့လးဖိတဖၣ်အအိၣ်ဒီးပာ်ဖျါ က့ၤတၢ်ဂ့ၢ်တၢ်ကျိၤန့ၣ်လီၤ.

³³ ပှၤအံၣ်စရ့လးဖိတဖၣ်အသးမံဝဲဒၣ်ဒီးစံးထီၣ်ပတြၢၤကစၢ်ယွၤ လီၤ. လၢအဝဲသ့ၣ်ကလဲၤဒီးဒုးဟးဂီၤကီၢ်လၢပှၤရူၤဘ့ၣ်ဖိဒီးပှၤကးဖိ အိၣ်ဆိးဝဲအဂ့ၢ်န့ၣ်, အဝဲသ့ၣ်တစံးကတိၤဝဲလၢၤဘၣ်န့ၣ်လီၤ.

³⁴ ပှၤရူၤဘ့ၣ်ဖိဒီးပှၤကးဖိတဖၣ်စံးဝဲဒၣ်, “တၢ်လုၢ်လီၢ်အံၤမ့ၢ်တၢ်အုၣ်အသးလၢပဝဲခဲလၢာ်အဂီၢ်လၢယွၤမ့ၢ်ပကစၢ်ယွၤန့ၣ်လီၤ.” အန့ၣ်ဒီးအဝဲသ့ၣ်ယုၢ်အမံၤလၢဧ့ဒး အခီပညီမ့ၢ်တၢ်အုၣ်သးန့ၣ်လီၤ.