လံာ်စီၤယိၤၡူ 21 - Sgaw Karen Common Bible

ပှၤလ့ၤဝံဖိအဝ့ၢ်တဖၣ်

¹ ပှၤလ့ၤဝံဖိအဒူၣ်ဖိထၢဖိအခိၣ်တဖၣ် လဲၤဆူပှၤလုၢ်တၢ်အခိၣ်စီၤအလၤဧစၢ်, ဒီးစီၤနိၣ်အဖိခွါစီၤယိၤၡူ, ဒီးပှၤအံၣ်စရ့လးဖိ အဒူၣ်ခဲလၢာ်, အဒူၣ်ဖိထၢဖိအခိၣ်တဖၣ်အအိၣ်,

² ဒီးဖဲဝ့ၢ်ၡံလိၤလၢကီၢ်ကနၤဧၣ်အပူၤန့ၣ်, ဒီးစံးဘၣ်အဝဲသ့ၣ်, “ယွၤမၤလိာ်တ့ၢ်တၢ်ခီဖျိ စီၤမိၤၡ့လၢပကဘၣ်တၢ်ဟ့ၣ်ပှၤဝ့ၢ်တဖၣ်လၢပကအိၣ်ကဆိးအဂီၢ်, ဃုာ်ဒီးတၢ်အီၣ်ဆၣ်အလီၢ်လၢပဆၣ်ဖိကီၢ်ဖိတဖၣ်အဂီၢ်န့ၣ်လီၤ.

³ သတးဒီးဒ်ယွၤမၤလိာ်တ့ၢ်အသိး, ပှၤအံၣ်စရ့လးဖိတဖၣ်ဟ့ၣ်လီၤပှၤလ့ၤဝံဖိတဖၣ်လၢဝ့ၢ်လၢလာ်တဖၣ်အံၤ ဃုာ်ဒီးတၢ်အီၣ်ဆၣ်အလီၢ်လၢအဝဲသ့ၣ်အတၢ်န့ၢ်သါအပူၤန့ၣ်လီၤ.

⁴ တၢ်ဖးလီၤဘၣ်အဆိကတၢၢ်လၢပှၤကဃးဖိတဖၣ်အဒူၣ်ဖိထၢဖိတဖၣ်အဂီၢ်န့ၣ်လီၤ. သတးဒီး, ပှၤလ့ၤဝံဖိတဖၣ်လၢအလီၤစၢၤလၢပှၤလုၢ်တၢ်အခိၣ်စီၤအၤဟရိၣ်န့ၣ်, ခီဖျိတၢ်ဖးအဝဲသ့ၣ် ဒိးန့ၢ်ဘၣ်ဝဲဝ့ၢ်တဆံသၢဝ့ၢ်လၢယူဒၤအဒူၣ်, စူၤမ့းအိၣ်အဒူၣ်, ဒီးဘံၣ်ယၤမံၣ်အဒူၣ်တဖၣ်အအိၣ်န့ၣ်လီၤ.

⁵ ဒီးပှၤကဃးဖိလၢအအိၣ်လီၤတဲာ်တဖၣ်န့ၣ်, ခီဖျိတၢ်ဖးအဝဲသ့ၣ်ဒိးန့ၢ်ဘၣ်ဝဲဝ့ၢ်အဖျၢၣ်တဆံလၢအ့ဖရဲၣ်အဒူၣ် ဒီးလၢဒၣ်အဒူၣ်ဒီးမနၤၡ့ၤအဒူၣ်တဝာ်အဒူၣ်ဖိထၢဖိတဖၣ်အအိၣ်န့ၣ်လီၤ.

⁶ ဒီးပှၤက့ရၡိၣ်ဖိတဖၣ်, ခီဖျိတၢ်ဖးန့ၣ်, ဒိးန့ၢ်ဘၣ်ဝဲဝ့ၢ်တဆံသၢဖျၢၣ်လၢပှၤယံးစၣ်ကၢ်အဒူၣ်, လၢပှၤအၤၡ့ၢ်အဒူၣ်, လၢပှၤနးသၤလံအဒူၣ်, ဒီးလၢပှၤမနၤၡ့ၤအဒူၣ်တဝာ်လၢကီၢ်ဘၤၡၣ်အပူၤ, အဒူၣ်ဖိထၢဖိတဖၣ်အအိၣ်န့ၣ်လီၤ.

⁷ ဒီးပှၤမရၤရံၤဖိဒ်အဒူၣ်ဖိထၢဖိအိၣ်ဝဲအသိးဒိးန့ၢ်ဘၣ်ဝဲ ဝ့ၢ်တဆံခံဖျၢၣ်လၢပှၤရူၤဘ့ၣ်ဖိအဒူၣ်, ပှၤကးဖိအဒူၣ်ဒီးပှၤစဘူလိၣ်ဖိအဒူၣ်အအိၣ်န့ၣ်လီၤ.

⁸ ဝ့ၢ်တဖၣ်အံၤဒီးတၢ်အီၣ်ဆၣ်အလီၢ်တဖၣ်, ခီဖျိတၢ်ဖးန့ၣ်, ပှၤအံၣ်စရ့လးဖိဟ့ၣ်လီၤဝဲဆူပှၤလ့ၤဝံဖိ ဒ်ယွၤမၤလိာ်တ့ၢ်ခီဖျိစီၤမိၤၡ့အိၣ်ဝဲအသိးန့ၣ်လီၤ.

⁹ လၢပှၤယူဒၤဖိအဒူၣ်အကျါဒီး ပှၤစူၤမ့းအိၣ်ဖိအဒူၣ်အကျါအဝဲသ့ၣ်ဟ့ၣ်လီၤဝဲဝ့ၢ်လၢလာ်တဖၣ်အံၤဒ်အမံၤအိၣ်ဝဲအသိး,

¹⁰ ဆူစီၤအၤဟရိၣ်အစၢၤအသွဲၣ်တဖၣ်, ဒူၣ်ဖိထၢဖိတဒူၣ်လၢအမ့ၢ်ပှၤကဃးဖိအဒူၣ်လၢအဘၣ်ဃးဒီး ပှၤလ့ၤဝံအဒူၣ်ဒ်တၢ်ဖးလီၤဘၣ်အီၤအဆိကတၢၢ်အသိးန့ၣ်လီၤ.

¹¹ အဝဲသ့ၣ်ဘၣ်တၢ်ဟ့ၣ်လီၤအီၤလၢဝ့ၢ် အၢ်ဘၤ (အၢ်ဘၤမ့ၢ်စီၤဧနးအပၢ်) လၢအခဲအံၤဘၣ်တၢ်ကိးအီၤလၢဃ့ဘြိၣ် လၢယူဒၤကစၢၢ်အလိၤဃုာ်ဒီးတၢ်အီၣ်ဆၣ်အလီၢ်ဝးတရံးအီၤန့ၣ်လီၤ.

¹² နာ်သက့, ဝ့ၢ်အပျီတဖၣ်ဃုာ်ဒီးအဝ့ၢ်ဖိတဖၣ်န့ၣ်ဘၣ်တၢ်ဟ့ၣ်လီၤတ့ၢ်လံအီၤဆူ စီၤယဖူန့ၤအဖိခွါစီၤကၤလ့းဒ်အတၢ်န့ၢ်သါအသိးန့ၣ်လီၤ.

¹³ လၢဝ့ၢ်ဃ့ဘြိၣ် (တၢ်ပူၤဖျဲးအဝ့ၢ်အကျါတဝ့ၢ်) အမဲာ်ညါ, ဝ့ၢ်လၢလာ်တဖၣ်အံၤဘၣ်တၢ်ဟ့ၣ်လီၤတ့ၢ်အီၤဆူပှၤလုၢ်တၢ်အခိၣ် စီၤအၤဟရိၣ်အစၢၤအသွဲၣ်တဖၣ်န့ၣ်လီၤ. လံးဘနၤ,

^14-16 ယးတံၢ်, အ့ၤၡတမိ, ဟိလိၣ်, ဒဘံၢ်, ဧ့ၣ်, ယူးတၤ, ဒီးဘ့ၤသၡ့မ့ၣ်ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ. မ့ၢ်ဝ့ၢ်ခွံဝ့ၢ်လၢယူဒၤဒီးစူၤမ့းအိၣ်အဒူၣ်တဖၣ်အပူၤန့ၣ်လီၤ.

¹⁷ ဒီးလၢဘံၣ်ယၤမံၣ်အဒူၣ်အကျါ, အဝဲသ့ၣ်ဘၣ်တၢ်ဟ့ၣ်လီၤအီၤဝ့ၢ်လွံၢ်ဖျၢၣ်လၢအမ့ၢ်ဝဲကံးဘိၣ်, က့ဘၤ,

¹⁸ ဧၤနသိး, ဒီးဧၤလမိၣ်ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ.

¹⁹ ဝ့ၢ်ခဲလၢာ်တဆံသၢဖျၢၣ်ဃုာ်ဒီးအတၢ်အီၣ်ဆၣ်အလီၢ်တဖၣ်ဘၣ်တၢ်ဟ့ၣ်လီၤတ့ၢ်အီၤဆူ ပှၤလုၢ်တၢ်အခိၣ်တဖၣ်လၢအလီၤစၢၤလၢစီၤအၤဟရိၣ် အအိၣ်န့ၣ်လီၤ.

²⁰ ဒူၣ်ဖိထၢဖိအဂၤတဖၣ်လၢလ့ၤဝံအဒူၣ် ထၢလၢအလီၤစၢၤလၢပှၤကဃးဖိအဒူၣ်န့ၣ်, ဘၣ်တၢ်ဟ့ၣ်လီၤအီၤလၢဝ့ၢ်တနီၤလၢအ့ဖရဲၣ်အကီၢ်ပူၤန့ၣ်လီၤ.

²¹ အဝဲသ့ၣ်ဘၣ်တၢ်ဟ့ၣ်လီၤအီၤလၢဝ့ၢ်လွံၢ်ဖျၢၣ်လၢအမ့ၢ်ဝဲ ၡက့ၣ်ဒီးအတၢ်အီၣ်ဆၣ်အလီၢ်လၢအ့ဖရဲၣ်ကစၢၢ်အလိၤ (တၢ်ပူၤဖျဲးအဝ့ၢ်) အကျါတဝ့ၢ်, က့စ့ၢ်,

²² ကံးဘစဲၣ်, ဒီးဘ့ၤသဃိရိၣ်, ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ.

²³ ဒီးလၢဒၣ်အကီၢ်တခီ, အဝဲသ့ၣ်ဘၣ်တၢ်ဟ့ၣ်လီၤအီၤလၢဝ့ၢ်လွံၢ်ဖျၢၣ်လၢအမ့ၢ်ဝဲအ့လတက့ၤ, ကံးဘသိၣ်,

²⁴ အးယၤလိၣ်, ဒီးကၤသးရံးမိၣ်, ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ.

²⁵ လၢမုၢ်နုာ်မနၤၡ့ၤအကီၢ်တခီအဝဲသ့ၣ်ဘၣ်တၢ်ဟ့ၣ်လီၤအီၤ ဝ့ၢ်ခံဖျၢၣ်လၢအမ့ၢ်ဝဲ တၤနး ဒီးကၤသးရံးမိၣ်, ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ.

²⁶ ဒူၣ်ဖိထၢဖိတဖၣ်အံၤလၢပှၤကဃးဖိ အဒူၣ်ထၢတခီဒိးန့ၢ်ဘၣ်ဝ့ၢ်ခဲလၢာ်အဖျၢၣ်တဆံဃုာ်ဒီးအတၢ်အီၣ်ဆၣ်အလီၢ် တဖၣ်န့ၣ်လီၤ.

²⁷ ဒီးပှၤက့ရၡိၣ်ဖိတဖၣ်, လၢအမ့ၢ်ပှၤလ့ၤဝံဖိအဒူၣ်ဖိထၢဖိအကျါတဒူၣ်, ဒိးန့ၢ်ဘၣ်ဝဲဝ့ၢ်ခံဝ့ၢ်လၢအမ့ၢ်ဝဲကိလၣ်လၢကီၢ်ဘၤၡၣ်အပူၤ (တၢ်ပူၤဖျဲးအဝ့ၢ်အကျါတဝ့ၢ်) ဒီးဘဧ့ၡတရၤဃုာ်ဒီးအတၢ်အီၣ်ဆၣ်အလီၢ်တဖၣ်လၢမုၢ်ထီၣ်မနၤၡ့ၤ အကီၢ်ပူၤတခီန့ၣ်လီၤ.

²⁸ လၢပှၤယံးစၣ်ကၢ်အကီၢ်တခီ, အဝဲသ့ၣ်ဒိးန့ၢ်ဘၣ်ဝဲဝ့ၢ်လွံၢ်ဖျၢၣ်လၢအမ့ၢ်ဝဲကံၡိၣ်, ဒၤဘြး,

²⁹ ယၢ်မူသး, ဒီးဧ့ၣ်ကးနံၣ်, ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ် လီၤ.

³⁰ လၢပှၤအၤၡ့ၢ်အကီၢ်တခီ, အဝဲသ့ၣ်ဒိးန့ၢ်ဘၣ်ဝဲဝ့ၢ်လွံၢ်ဖျၢၣ် လၢအမ့ၢ်ဝဲမံၤၡ့လး, ဧၤဘဒိၣ်,

³¹ ဃ့လကး, ဒီးရဃိာ်, ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ.

³² လၢပှၤနးသၤလံအကီၢ်တခီ, အဝဲသ့ၣ်ဒိးန့ၢ်ဘၣ်ဝဲဝ့ၢ်သၢဖျၢၣ်လၢအမ့ၢ်ဝဲက့ဒ့ၣ်လၢကီၢ် ကၤလံၤလါ (တၢ်ပူၤဖျဲးအဝ့ၢ်အကျါတဝ့ၢ်,) ဃၤမိးဒိၣ်ဒီးကၢ်တၢ်, ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ.

³³ ပှၤက့ရၡိၣ်အဒူၣ်ထၢအဒူၣ်ဖိထၢဖိတဖၣ်ဒိးန့ၢ်ဘၣ်ဝ့ၢ်ခဲလၢာ် တဆံသၢဖျၢၣ်ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ.

³⁴ လၢပှၤမရၤရံၤဖိအဒူၣ်ထၢ, ပှၤလ့ၤဝံဖိလၢအအိၣ်လီၤတဲာ်တဖၣ်အကျါ, ဒိးန့ၢ်ဘၣ်ဝဲဝ့ၢ်လွံၢ်ဖျၢၣ်လၢပှၤစဘူလိၣ်ဖိအကီၢ်လၢအမ့ၢ်ဝဲယးနၣ်, ကၢ်တၤ,

³⁵ ဒံးမနၤ, ဒီးနဟးလလး, ဃုာ်ဒီးအတၢ်အီၣ်ဆၣ်အလီၢ် တဖၣ်န့ၣ်လီၤ.

³⁶ လၢရူၤဘ့ၣ်အကီၢ်တခီအဝဲသ့ၣ်ဒိးန့ၢ်ဘၣ်ဝဲဝ့ၢ်လွံၢ်ဖျၢၣ်လၢအ မ့ၢ်ဝဲဘ့စ့ၢ်, ယးဟစၢ်,

³⁷ ကဒ့မိး, ဒီးမ့ဖၤ, ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ.

³⁸ လၢကးအဒူၣ်အဝဲသ့ၣ်ဒိးန့ၢ်ဘၣ်ဝဲဝ့ၢ်လွံၢ်ဖျၢၣ်လၢအမ့ၢ်ဝဲ ရၤမိးလၢကီၢ်ကံးလဧးအပူၤ, ဃုာ်ဒီးအတၢ်အီၣ်ဆၣ်အလီၢ်တဖၣ် (တၢ်ပူၤဖျဲးအဝ့ၢ်အကျါတဝ့ၢ်,) မၤဃန့ၤ,

³⁹ ဃ့ၡဘိၣ်, ဒီးယၤစ့ၢ်, ဃုာ်ဒီးအတၢ်အီၣ်ဆၣ်အလီၢ်တဖၣ်န့ၣ်လီၤ.

⁴⁰ သတးဒီးပှၤမရၤရံၤဖိအဒူၣ်ထၢတဖၣ်ဘၣ်တၢ်ဟ့ၣ်လီၤအီၤဝ့ၢ်ခဲလၢာ် တဆံခံဝ့ၢ်န့ၣ်လီၤ.

⁴¹ လၢထံကီၢ်လၢပှၤအံၣ်စရ့လးဖိတဖၣ်မၤန့ၢ်ဝဲအကျါန့ၣ်, ဝ့ၢ်ခဲလၢာ်လွံၢ်ဆံဃိးဝ့ၢ်ဃုာ်ဒီးအတၢ်အီၣ်ဆၣ်အလီၢ်ဝးတရံးအီၤတဖၣ်န့ၣ်,

⁴² ဘၣ်တၢ်ဟ့ၣ်လီၤအီၤဆူပှၤလ့ၤဝံဖိတဖၣ်အအိၣ်န့ၣ်လီၤ.

အံၣ်စရ့လးမၤန့ၢ်ကီၢ်ဒီဘ့ၣ်

⁴³ သတးဒီးယွၤဟ့ၣ်လီၤပှၤအံၣ်စရ့လးဖိလၢထံကီၢ်ခဲလၢာ်ဒ်အအၢၣ် လီၤတ့ၢ်ဝဲလၢအကဟ့ၣ်အမိၢ်ပၢ်ဖံဖုလၢပျၢၤတဖၣ်အသိးန့ၣ်လီၤ. ဖဲအဝဲသ့ၣ်မၤန့ၢ်ထံကီၢ်ခဲလၢာ်လံဒီးအဝဲသ့ၣ်အိၣ်ဝဲ ဆိးဝဲဖဲန့ၣ်န့ၣ်လီၤ.

⁴⁴ ယွၤဟ့ၣ်အဝဲသ့ၣ်လၢတၢ်ဃူတၢ်ဖိးလၢထံကီၢ်ဒီကီၢ်ညါ, ဒ်အအၢၣ်လီၤတ့ၢ်အမိၢ်ပၢ်ဖံဖုလၢပျၢၤတဖၣ်အသိးန့ၣ်လီၤ. ဒီးလၢအဒုၣ်အဒါခဲလၢာ်အကျါန့ၣ်, ပှၤဆၢထၢၣ်ထီဒါအဝဲသ့ၣ်တသ့နီတဂၤဘၣ်, မ့ၢ်လၢယွၤဟ့ၣ်ပှၤအံၣ်စရ့လးဖိတဖၣ် တၢ်မၤနၢၤလၢအဒုၣ်အဒါခဲလၢာ်အဖီခိၣ်အဃိန့ၣ်လီၤ.

⁴⁵ ယွၤဟံးဃာ်ဂၢၢ်ကျၢၤအတၢ်အၢၣ်လီၤအီလီၤကိးမံၤဒဲးလၢအမၤဝဲဒီးပှၤအံၣ်စရ့လးဖိတဖၣ်န့ၣ်လီၤ.