လံာ်စီၤယိၤၡူ 19 - Sgaw Karen Common Bibleကီၢ်လၢတၢ်နီၤလီၤန့ၢ်ပှၤစူၤမ့းအိၣ်ဖိ 1 တၢ်ဖးခံမံၤတမံၤန့ၣ်ဟဲထီၣ်လၢစူၤမ့းအိၣ်အဒူၣ်အဂီၢ်ဒ်အဒူၣ် ဖိထၢဖိအိၣ်ဝဲအသိးဒီး အတၢ်န့ၢ်သါအဆၢန့ၣ်အိၣ်တုၤလၢယူဒၤ အဒူၣ်အတၢ်န့ၢ်သါအပူၤန့ၣ်လီၤ. 2 ဒီးအတၢ်န့ၢ်သါအံၤပၣ်ဃုာ်ဒီးဘ့ၣ်ၡဘၤ, ၡ့ဘၤ, မိလဒၤ, 3 ဃစၢ်ၡူဧလး, ဘၤလၤ, ဧၤစ့ၣ်, 4 အ့းလတိလး, ဘသူလး, ဃိၢ်မါ, 5 စံကလး, ဘ့ၤသမၢ်ကဘိး, ဃစၢ်စူစၤ, 6 ဘ့ၤသလဘိး, ဒီးၡရူဃ့ၣ်လီၤ. မ့ၢ်ဝဲဝ့ၢ်တဆံသၢဖျၢၣ်ဃုာ်ဒီး ဝ့ၢ်ဖိလၢအအိၣ်ဝးတရံးအီၤတဖၣ်န့ၣ်လီၤ. 7 အိၣ်စ့ၢ်ကီးဒီးဧ့ၣ်, ရံးမိၣ်, ဧ့သ့ၢ်, ဒီးဧၡၣ်လီၤ. မ့ၢ်ဝဲဝ့ၢ်လွံၢ်ဖျၢၣ်ဃုာ်ဒီးဝ့ၢ်ဖိလၢအအိၣ်ဝးတရံးအီၤတဖၣ် န့ၣ်လီၤ. 8 တၢ်အံၤပၣ်ဃုာ်ဒီးဝ့ၢ်ဖိလၢအအိၣ်ဝးတရံးဝ့ၢ်တဖၣ်အံၤ တုၤအတုၤလၢဝ့ၢ်ဘဧၤလးဘ့ၢ် (မ့တမ့ၢ်ရးမါ) လၢကလံၤထံးတခီန့ၣ်လီၤ. ကီၢ်အံၤ မ့ၢ်စူၤမ့းအိၣ်အဒူၣ်ဖိထၢဖိဒိးန့ၢ်ဘၣ်ဝဲ ဒ်အတၢ်န့ၢ်သါအသိးန့ၣ်လီၤ. 9 မ့ၢ်လၢယူဒၤအတၢ်န့ၢ်သါလဲၢ်န့ၢ်ဒံးအလိၣ်ဘၣ်ဝဲအဃိ, စီၤယိၤၡူဟ့ၣ်လီၤအကီၢ်တနီၤဆူစူၤမ့းအိၣ်အဒူၣ်န့ၣ်လီၤ. ကီၢ်လၢတၢ်နီၤလီၤန့ၢ်ပှၤစဘူလိၣ်ဖိ 10 တၢ်ဖးသၢမံၤတမံၤန့ၣ်ဟဲထီၣ်လၢစ ဘူလိၣ်အဒူၣ်အဂီၢ်ဒ်အဒူၣ်ဖိထၢဖိအိၣ်ဝဲအသိးဒီးကီၢ်လၢအန့ၢ်သါဝဲန့ၣ် လဲၤတုၤလၢဝ့ၢ်စၤရံးန့ၣ်လီၤ. 11 ဝံၤဒီးအကီၢ်ဆၢလဲၤဆူမုၢ်နုာ်တုၤလၢဝ့ၢ်မရၤလၤ, ဒီးထိးဘၣ်ဝ့ၢ်ဒးဘးၡ့းဒီးထံကျိဖိလၢ ဝ့ၢ်ယၤကနၣ်အမုၢ်ထီၣ်န့ၣ်လီၤ. 12 ဒီးဃၣ်အသးလၢဝ့ၢ်စၤရံးဆူမုၢ်ထီၣ်ပၢၢ်တုၤလၢဝ့ၢ်ကံးစလိးတၤဘိၢ်အကီၢ်ဆၢ ဒီးဟးထီၣ်ဝဲဆူဝ့ၢ်ဒၤဘြးဒီးလဲၤထီၣ် ဝဲဆူဝ့ၢ်ယၤဖံ, 13 ဒီးလဲၤဝဲဖဲန့ၣ်ဆူမုၢ်ထီၣ်တခီဆူဝ့ၢ်ကံးတၤဃ့ဖ့ၢ်, ဆူဝ့ၢ်ဧးတၤကစံၣ်, ဒီးဟးထီၣ်ဝဲဆူဝ့ၢ်ရံးမိၣ်, ဆူဝ့ၢ်န့ဧၤ, 14 ဒီးကီၢ်အဆၢလၢကလံၤစိးတခီန့ၣ်လဲၤတရံး တၢ်ဆူဝ့ၢ်ဃးနသိၣ်ဒီးကတၢၢ်ဝဲဖဲယံးဖတ့လးအတၢ်ပၢၤခိၣ် ကစၢၢ်ကဆူးန့ၣ်လီၤ. 15 ဒီးကးတး, နဟးလလး, ၡံးမရိၣ်, ယံးဒၤလၤ, ဒီးဘ့ၤသလ့ဃ့ၣ်လၢအအိၣ်လၢကီၢ်ကၤလံၤလါလီၤ. မ့ၢ်ဝဲဝ့ၢ်တဆံခံဖျၢၣ်ဃုာ်ဒီးဝ့ၢ်ဖိလၢအအိၣ်ဝးတရံးအီၤတဖၣ်လီၤ. 16 ဝ့ၢ်တဖၣ်ဒီးဝ့ၢ်ဖိတဖၣ်အံၤအိၣ်လၢကီၢ်လၢစဘူလိၣ်အဒူၣ်ဖိထၢဖိတဖၣ် ဒိးန့ၢ်ဘၣ်ဝဲဒ်အတၢ်န့ၢ်သါအသိးအပူၤန့ၣ်လီၤ. ကီၢ်လၢတၢ်နီၤလီၤန့ၢ်ပှၤယံးစၣ်ကၢ်ဖိ 17 တၢ်ဖးလွံၢ်မံၤတမံၤန့ၣ်ဟဲထီၣ်လၢယံးစၣ် ကၣ်အဒူၣ်အဂီၢ်ဒ်အဒူၣ်ဖိထၢဖိအိၣ်ဝဲအသိးန့ၣ်လီၤ. 18 ဒီးအကီၢ်န့ၣ်ပၣ်ဃုာ်ဒီးယံးစရ့လး, ယံးစူးလိး, ၡူန့ၣ်, 19 ဃဖၢ်ရဲၣ်, ၡံအိၣ်, အနၤဃရး, 20-21 ရးဘံး, ကံးၡယိၣ်, အၤဘ့း, ရ့မ့း, ဧ့ၣ်ကးနံၣ်, ဧ့ၣ်ဃးဒၤ, ဒီးဘ့ၤသပးစ့းန့ၣ်လီၤ. 22 ဒီးအကီၢ်ဆၢထိးဘၣ်စ့ၢ်ကီးတၤဘိၢ်, ၡၤကစံမၤ, ဘ့ၤသၡ့မ့ၣ်, ဒီးလဲၤကတၢၢ်ဝဲဖဲထံကျိယၢ်ဒ့ၣ်န့ၣ်လီၤ. ပၣ်ဃုာ်ဒီးဝ့ၢ်တဆံဃုဖျၢၣ်ဃုာ်ဒီးဝ့ၢ်ဖိလၢအအိၣ်ဝးတရံးအီၤတဖၣ်န့ၣ်လီၤ. 23 ဝ့ၢ်တဖၣ်ဒီးဝ့ၢ်ဖိတဖၣ်အံၤအိၣ်လၢကီၢ်လၢယံးစၣ်ကၢ်အဒူၣ်ဖိထၢဖိတဖၣ် ဒိးန့ၢ်ဘၣ်ဝဲဒ်အတၢ်န့ၢ်သါအသိးအပူၤန့ၣ်လီၤ. ကီၢ်လၢတၢ်နီၤလီၤန့ၢ်ပှၤအၤၡ့ၢ်ဖိ 24 တၢ်ဖးယဲၢ်မံၤတမံၤန့ၣ်ဟဲထီၣ်လၢအၤၡ့ၢ်အဂီၢ်ဒ်အဒူၣ်ဖိထၢဖိ အိၣ်ဝဲအသိးန့ၣ်လီၤ. 25 ဒီးအကီၢ်န့ၣ်ပၣ်ဃုာ်ဒီးဃ့ကလး, ဃလံ, ဘ့တ့ၣ်, အကၡး, 26 အလးမ့လ့း, ဧၤမးဒီးမံၤၡ့လးန့ၣ်လီၤ. လၢမုၢ်နုာ်တခီထိးဘၣ်ကၢ်မ့ၤလးဒီးၡံဃိၢ်လံးဘနးလီၤ. 27 ဒီးဃၣ်အသးဆူမုၢ်ထီၣ်ဒီးကီၢ်ဆၢန့ၣ်လဲၤဆူဘ့ၤသဒၤကိၣ် ဒီးထိးဘၣ်စဘူလိၣ်ဒီးယံးဖတ့လးအတၢ်ပၢၤခိၣ်ကစၢၢ်ကဆူးလၢ ဘ့ၤသဧ့ၤမ့းဒီးနဧ့လးလၢကလံၤစိးတခီ, ဒီးဟးထီၣ်ဝဲဆူကၤ ဘူလးလၢကလံၤစိးတခီ, 28 ဒီးဃ့ဘြိၣ်, ရဃိၣ်, ဃမိၤ, ကါနၤ, ပၢၢ်လၢစံဒိၣ်ဖးဒိၣ်လီၤ. 29 ဝံၤဒီးကီၢ်ဆၢန့ၣ်တရံးအသးဆူရၤမါဒီးလဲၤတုၤလၢဝ့ၢ်ခၢၣ် သနၢၢ်ထါယၢၣ်န့ၣ်လီၤ. ဝံၤဒီးကီၢ်ဆၢန့ၣ်တရံးအသးဆူ ဃိစၤဒီးကတၢၢ်ဝဲဖဲပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်န့ၣ်လီၤ. တၢ်န့ၣ်ပၣ်ဃုာ်ဒီးမၤဃလၤ, အၤကစံာ်, 30 ဧူးမၤ, အဖ့း, ရဃိာ်, ဝ့ၢ်ခဲလၢာ်မ့ၢ်ဝဲခံဆံခံဖျၢၣ်ဃုာ် ဒီးဝ့ၢ်ဖိလၢအအိၣ်ဝးတရံးအီၤတဖၣ်န့ၣ်လီၤ. 31 ဝ့ၢ်ဒီးဝ့ၢ်ဖိတဖၣ်အံၤအိၣ်ဝဲလၢကီၢ်လၢအၤ ၡ့ၢ်အဒူၣ်အထၢတဖၣ်ဒိးန့ၢ်ဘၣ်ဝဲဒ်အတၢ်န့ၢ်သါအသိးအပူၤန့ၣ် လီၤ. ကီၢ်လၢတၢ်နီၤလီၤန့ၢ်ပှၤနးသၤလံဖိ 32 တၢ်ဖးဃုမံၤတမံၤဟဲထီၣ် လၢနးသၤလံအဒူၣ်အဂီၢ်ဒ်အဒူၣ်ဖိထၢဖိအိၣ်ဝဲအသိးန့ၣ်လီၤ. 33 ဒီးအကီၢ်ဆၢန့ၣ်စးထီၣ်လၢတၢ် လီၢ်ယ့လ့ာ်ဒီးလဲၤဆူစဧးနဲၣ်အသ့ထိးဖၣ်အထူၣ်ဒီးအဒၣ်မံၤ, န့က့ာ်, ဒီးဝ့ၢ်ယးဘန့လးပၢၢ်တုၤလၢတၢ်လီၢ်လးကူၣ်ဒီးလဲၤ ကတၢၢ်လၢထံကျိယၢ်ဒ့ၣ်န့ၣ်လီၤ. 34 ဖဲန့ၣ်န့ၣ်အကီၢ်ဆၢလဲၤတရံးအသးဆူမုၢ်နုာ်ဝ့ၢ်အၤစနိး တၤဘိၢ်, ဒီးဆူဝ့ၢ်ဃူးကိးဒီးလဲၤထိးဘၣ်စဘူလိၣ်အကီၢ်ဆၢလၢ ကလံၤထံး, ဒီးအၤၡ့ၢ်အကီၢ်ဆၢလၢမုၢ်နုာ်ဒီးထံကျိယၢ်ဒ့ၣ်လၢမုၢ်ထီၣ်န့ၣ်လီၤ. 35 ဝ့ၢ်အိၣ်ခၢၣ်အနၢၣ်တဖၣ်မ့ၢ်ဝဲစံးဒံၣ်, စ့ၢ်, ဃးမး, ရကး, ကံးနရ့း, 36 အဒၤမၤ, ရၤမါ, ဃါစိၢ်, 37-38 က့ဒ့ၣ်, အ့ဒြံၤ, ဧ့ၣ်ဃစိၢ်, ယံးရိၣ်, မံးကဒၤလ့လး, ဃိးရ့ၣ်, ဘ့ၤသၤနးဒီးဘ့ၤသၡ့ မ့ၣ်န့ၣ်လီၤ. မ့ၢ်ဝ့ၢ်တဆံနွံဖျၢၣ်ဃုာ်ဒီးဝ့ၢ်ဖိလၢအအိၣ်ဝးတရံးအီၤတဖၣ်န့ၣ်လီၤ. 39 ဝ့ၢ်ဒီးဝ့ၢ်ဖိတဖၣ်အံၤအိၣ်လၢကီၢ်လၢ နးသၤလံအဒူၣ်ဖိထၢဖိဒိးန့ၢ်ဘၣ်ဝဲဒ်အတၢ်န့ၣ်သါအသိးအပူၤ န့ၣ်လီၤ. ကီၢ်လၢတၢ်နီၤလီၤန့ၢ်ပှၤဒၣ်ဖိ 40 တၢ်ဖးနွံမံၤတမံၤဟဲထီၣ်လၢဒၣ်အဒူၣ်ဖိထၢအဂီၢ်ဖိဒ်အအိၣ်ဝဲ အသိးန့ၣ်လီၤ. 41 ကီၢ်လၢအန့ၢ်သါဝဲပၣ်ဃုာ်ဒီးစိးရၤ, အ့ၤၡတိလး, ဧံၢ်ၡ့မ့ၣ်, 42 ၡၤလးဘံၣ်, အးယးလိၣ်, ယံးသလၤ, 43 အ့လိၣ်, သံမနၤသၤ, ဧ့ကြိၣ်, 44 အ့လတက့ၤ, ကံးဘသိၣ်, ဘဧၤလဲး, 45 ယဟူး, ဘန့ဘရး, ကၤသးရံးမိၣ်, 46 မ့ယၢ်ကိၣ်, ရးကိၣ်, ဃုာ်ဒီးကီၢ်လၢအအိၣ်သဃီၤလိာ်အသးဒီးဝ့ၢ် ယၤဖိၤန့ၣ်လီၤ. 47 ဖဲပှၤဒၣ်ဖိတဖၣ်အကီၢ်ဘၣ် တၢ်ဒုးဒီးမၤန့ၢ်အီၤန့ၣ်, အဝဲသ့ၣ်လဲၤထီၣ်ဒုးဝ့ၢ်လ့ၡ့ၣ်န့ၣ်လီၤ. ဖဲအဝဲသ့ၣ်မၤန့ၢ်ဝ့ၢ်န့ၣ်, မၤသံအပှၤဝ့ၢ်ဖိဒီးဟံးန့ၢ်အီၤ လၢအဂီၢ်ဒၣ်ဝဲန့ၣ်လီၤ. အဝဲသ့ၣ်အိၣ်ဆိးဖဲန့ၣ်ဒီးလဲလိာ်ကွံာ်အမံၤဆူဒၣ်, ဒ်အပၢ်ဖးဒိၣ်အမံၤအသိးန့ၣ်လီၤ. 48 ဝ့ၢ်ဒီးဝ့ၢ်ဖိတဖၣ်အံၤအိၣ်ဝဲလၢကီၢ်လၢ ဒၣ်အဒူၣ်ဖိထၢဖိတဖၣ်ဒိးန့ၢ်ဘၣ်ဝဲဒ်အတၢ်န့ၢ်သါအသိးအပူၤန့ၣ်လီၤ. တၢ်နီၤလီၤထံကီၢ်လၢခံကတၢၢ် 49 ဖဲပှၤအံၣ်စရ့လးဖိတဖၣ်နီၤဖးလီၤအထံကီၢ်ဒ်အတၢ်န့ၢ်သါအသိးဝံၤဒီး, အဝဲသ့ၣ်ဟ့ၣ်လီၤစီၤနိၣ်အဖိခွါစီၤယိၤၡူအတၢ်န့ၢ်သါလၢအဝဲသ့ၣ်အကျါန့ၣ်လီၤ. 50 ဒ်ယွၤမၤလိာ်တ့ၢ်အသိး, အဝဲသ့ၣ်ဟ့ၣ်လီၤဝ့ၢ်လၢအဃ့ဝဲလၢ အမ့ၢ်တံးမနးစ့ရၤလၢအ့ဖရဲၣ်အကစၢၢ်အလိၤန့ၣ်လီၤ. အဝဲသူၣ်ထီၣ်ကဒါက့ၤဝ့ၢ်ဝံၤဒီးအိၣ်ဝဲဆိးဝဲဖဲန့ၣ်န့ၣ်လီၤ. 51 ပှၤလုၢ်တၢ်အခိၣ်စီၤအလၤဧစၢ်, စီၤနိၣ်အဖိခွါစီၤယိၤၡူ, ဒီးပှၤအံၣ်စရ့လးဖိအဒူၣ်တဖၣ်အခိၣ်အနၢ်တဖၣ်ဖီၣ်တၢ်ဖးဝံၤဒီး နီၤဖးလီၤထံကီၢ်လၢယွၤအမဲာ်ညါဖဲတၢ်ဘူၣ်ထီၣ်ဘါထီၣ်ယွၤ အဒဲအကျဲစၢၤလၢဝ့ၢ်ၡံလိၤန့ၣ်လီၤ. အန့ၣ်ဒီးအဝဲသ့ၣ်နီၤဖးထံကီၢ်ဝံၤဝဲဒၣ်န့ၣ်လီၤ. |
Sgaw Karen Common Bible © Bible Society of Myanmar, 1992.
Bible Society of Myanmar