လံာ်စီၤယိၤၡူ 16 - Sgaw Karen Common Bible

ကီၢ်လၢတၢ်နီၤလီၤန့ၢ်အ့ဖရဲၣ် ဒီးမနၤၡ့ၤအဒူၣ်လၢထံကျိ ယၢ်ဒ့ၣ်အမုၢ်နုာ်

¹ စီၤယိၤသးအစၢၤအသွဲၣ်တဖၣ်အဂီၢ်တၢ်လီၢ်လၢတၢ်နီၤလီၤန့ၢ်အီၤန့ၣ် စးထီၣ်လၢထံကျိယၢ်ဒ့ၣ်ဖဲဝ့ၢ်ယရံၤဃိအဃၢၤ, ယရံၤဃိ အထံမူကျိအမုၢ်ထီၣ်တခီပၢၢ်တုၤလၢပှၢ်မုၢ်ကနၢ လၢအလဲၤထီၣ်လၢဝ့ၢ်ယရံၤဃိပၢၢ်တုၤလၢကစၢၢ်ကလိအကျါလၢ ဝ့ၢ်ဘ့ၤသ့လး,

² ဝံၤဒီးလဲၤထီၣ်လၢဝ့ၢ်ဘ့ၤသ့လးဆူဝ့ၢ်လူးစးဒီးလဲၤတုၤ လၢဧးတၤရိးလၢအမ့ၢ်ပှၤအၢ်ကံဖိအကီၢ်,

³ ဝံၤဒီးလဲၤလီၤလၢမုၢ်နုာ်တကပၤဆူ ပှၤယးဖလ့တံၤဖိအကီၢ်တုၤလီၤလၢဝ့ၢ်ဘ့ၤသဃိရိၣ်လၢလာ်ခီ, ဝံၤဒီးဆူဝ့ၢ်က့စ့ၢ်ဒီးလဲၤကတၢၢ်လၢပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်န့ၣ်လီၤ.

⁴ စီၤယိၤသးအစၢၤအသွဲၣ်တဖၣ်လၢအမ့ၢ်အ့ဖရဲၣ် အဒူၣ်ဒီးမုၢ်နုာ်မနၤၡ့ၤအဒူၣ်န့ၣ်ဒိးန့ၢ်ဘၣ်ကီၢ်အံၤဒ် အတၢ်န့ၢ်သါလီၤ.

အ့ဖရဲၣ်

⁵ အအံၤမ့ၢ်ပှၤအ့ဖရဲၣ်ဖိအဒူၣ်ဖိထၢဖိတဖၣ်အထံကီၢ် န့ၣ်လီၤ. အကီၢ်ဆၢစးထီၣ်အသးဖဲဝ့ၢ်ဧးတၤရိးအးဒၤလၢမုၢ်ထီၣ်တခီတုၤ ဆူဝ့ၢ်ဘ့ၤသဃိရိၣ်လၢထးခီ,

⁶ ဒီးကီၢ်ဆၢန့ၣ်လဲၤဆူပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်န့ၣ်လီၤ. ဝ့ၢ်မံးကမသၤအိၣ်လၢအဝဲသ့ၣ်အကလံၤစိးန့ၣ်လီၤ. ဒီးလၢမုၢ်ထီၣ်တခီကီၢ်ဆၢလဲၤတရံးကဒါဆူဝ့ၢ်တၤနး ၡံလိၤဒီးလဲၤပူၤကွံာ်လၢမုၢ်ထီၣ်တခီဆူဝ့ၢ်ယၤနိဃၤန့ၣ်လီၤ.

⁷ ဝံၤဒီးလဲၤလီၤလၢဝ့ၢ်ယၤနိဃၤဆူဝ့ၢ်ဧးတၤရိး ဒီးဆူဝ့ၢ်နၤရးတုၤလၢဝ့ၢ်ယရံၤဃိဒီးလဲၤကတၢၢ်လၢထံကျိယၢ်ဒ့ၣ်လီၤ.

⁸ ကီၢ်ဆၢလဲၤဆူမုၢ်နုာ်လၢဝ့ၢ်တးပူၤဆူထံကျိ ဖိကါနၤဒီးလဲၤကတၢၢ်လၢပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ် န့ၣ်လီၤ. အဝဲအံၤမ့ၢ်အ့ဖရဲၣ်အဒူၣ်, အဒူၣ်ဖိထၢဖိတဖၣ်အတၢ်န့ၢ်သါ,

⁹ ဃုာ်ဒီးဝ့ၢ်ဒီးဝ့ၢ်ဖိခဲလၢာ် လၢအဘၣ်တၢ်ပာ်လီၤဆီန့ၢ်လၢ အ့ဖရဲၣ်ဖိတဖၣ်အဂီၢ်လၢပှၤမနၤၡ့ၤဖိတဖၣ်အတၢ်န့ၢ်သါအပူၤန့ၣ်လီၤ.

¹⁰ နာ်က့ဒီး, အဝဲသ့ၣ်တဟီထီၣ် ကွံာ်ပှၤကနၤဧၣ်ဖိလၢဝ့ၢ်က့စ့ၢ်န့ၣ်ဘၣ်. အဃိသတးဒီးပှၤကနၤဧၣ်ဖိတဖၣ် အိၣ်ဆိးလၢပှၤအ့ဖရဲၣ်အသိးအကျါတုၤလီၤလၢမုၢ် မဆါတနံၤအံၤဘၣ်ဆၣ်ဒီးအဝဲသ့ၣ် ဘၣ်တၢ်မၤဆူၣ်အီၤလၢကမၤတၢ်ဒ်ကုၢ်တဖၣ်အသိးန့ၣ်လီၤ.