လံာ်စီၤယိၤၡူ 11 - Sgaw Karen Common Bible

စီၤယိၤၡူမၤနၢၤစီၤပၤယၤဘံၣ် ဒီးအသကိးတဖၣ်

¹ တုၤဝ့ၢ်ဃါစိၢ်အစီၤပၤယၤဘံၣ်နၢ်ဟူအံၣ်စရ့လးအတၢ်မၤနၢၤအဂ့ၢ်ဒီး, အဝဲဆှၢလီၤတၢ်ကစီၣ်ဆူဝ့ၢ်မၤဒိၣ်အစီၤပၤယိဘာ်အအိၣ်ဒီးဝ့ၢ် ၡံးမရိၣ်ဒီးဝ့ၢ်အးကၡးအစီၤပၤတဖၣ်အအိၣ်,

² ဒီးဆူစီၤပၤတဖၣ်လၢကစၢၢ်ကလိလၢကလံၤစိးတခီ, ယၢ်ဒ့ၣ်တၢ်ပၢၤခိၣ်လၢပီၣ်လဲၣ်ကၤလံၤလါကလံၤထံးတခီ, လၢကစၢၢ်တဖၣ်အဂံၢ်ထံး, ဒီးလၢပီၣ်လဲၣ်ကၢၢ်ခိၣ်ဘူးဒီးဝ့ၢ်ဒိၢ် န့ၣ်လီၤ.

³ အဝဲဆှၢလီၤစ့ၢ်ကီးတၢ်ကစီၣ်ဆူပှၤကနၤဧၣ်ဖိလၢထံကျိယၢ်ဒ့ၣ် ခံကပၤလိာ်, ပှၤအမိၢ်ဖိ, ပှၤဃ့ၤသးဖိ, ပှၤပရးစၤဖိဒီးပှၤယဘူၣ်ဖိလၢကစၢၢ်ကလိအလိၤ, ဒီးဆူပှၤဃံၤဝံဖိလၢအအိၣ်လၢကစၢၢ်ဃ့ရမိၣ်အခီၣ်ထံးလၢကီၢ် မံးစပၤအပူၤအအိၣ်န့ၣ်လီၤ.

⁴ အဝဲသ့ၣ်ဟဲဝဲဒီးအသုးဖိခဲလၢာ်သုးမုၢ်လၢအပှၤကညီအါဝဲဒ် မဲးလၢပီၣ်လဲၣ်နံၤအသိးန့ၣ်လီၤ. အဝဲသ့ၣ်အိၣ်စ့ၢ်ကီးဒီးက သ့ၣ်ဒီးလ့ၣ်ကဟၣ်လၢအအါမးန့ၣ်လီၤ.

⁵ စီၤပၤတဖၣ်အံၤခဲလၢာ်ပာ်ဖှိၣ်အသးဒီးဟဲဝဲဒ်သိးသိးဒီးသူၣ်အ ဒဲဖဲမ့ၤရိၣ်အထံကျိဖိအနံၤလၢကဒုးတၢ်ဒီးအံၣ်စရ့လးအဂီၢ်န့ၣ်လီၤ.

⁶ ယွၤစံးဘၣ်စီၤယိၤၡူ, “တဘၣ်ပျံၤအဝဲသ့ၣ်တဂ့ၤ. အဂ့ၢ်မ့ၢ်လၢခဲမုၢ်ဆ့ၣ်ဒ်သိးအံၤအဆၢကတီၢ်န့ၣ်ယကမၤသံအဝဲ သ့ၣ်ခဲလၢာ်ဒီးဟ့ၣ်လီၤအီၤလၢအံၣ်စရ့လးအစုပူၤအဃိန့ၣ် လီၤ. သုကဘၣ်ကျီတဲာ်အကသ့ၣ်တဖၣ်အခီၣ်ထူၣ်ဒီးဒွဲၣ်အူ ထီၣ်အလ့ၣ်ကဟၣ်တဖၣ်လၢမ့ၣ်အူန့ၣ်လီၤ.”

⁷ အန့ၣ်ဒီးစီၤယိၤၡူဒီးအပှၤခဲလၢာ်ဒုးအဝဲသ့ၣ်သတူၢ်ကလာ်ဖဲ မ့ၤရိၣ်ထံကျိဖိအနံၤန့ၣ်လီၤ.

⁸ ဒီးယွၤဟ့ၣ်လီၤအဝဲသ့ၣ်လၢအံၣ်စရ့လးဖိအစုပူၤဒီးဘၣ်တၢ်ကျီ သံကွံာ်အီၤဒီးလူၤအီၤပၢၢ်တုၤလၢဝ့ၢ်စံဒိၣ်ဖးဒိၣ်ဒီး ဝ့ၢ်မံးစြဖိးမၤယံၣ်လၢကလံၤစိးတကပၤ, ဒီးပၢၢ်တုၤလၢမံးစပၤ တၢ်ပၢၤခိၣ်ကစၢၢ်ကဆူးလၢမုၢ်ထီၣ်တကပၤန့ၣ်လီၤ. တၢ်ဒုးမၤအသးတုၤလၢဒုၣ်ဒါတအိၣ်မူလၢၤနီတဂၤဘၣ်န့ၣ်လီၤ.

⁹ ဒီးစီၤယိၤၡူမၤဒ်ယွၤမၤလိာ်တ့ၢ်အီၤအသိး, ကျီတဲာ်ကွံာ်အဝဲ သ့ၣ်အကသ့ၣ်တဖၣ်အခီၣ်ထူၣ် ဒီးဒွဲၣ်အူထီၣ်ကွံာ်အဝဲသ့ၣ်အလ့ၣ်ကဟၣ်တဖၣ်လၢမ့ၣ်အူန့ၣ်လီၤ.

¹⁰ ဒီးအကတီၢ်ဖဲန့ၣ်စီၤယိၤၡူဃၣ်ကဒီး အသးဆူဝ့ၢ်ဃါစိၢ်ဒီးဒုးန့ၢ်အီၤဝံၤကျီသံကွံာ်အစီၤပၤလၢ နးန့ၣ်လီၤ. (အကတီၢ်ဖဲန့ၣ်ဝ့ၢ်ဃါစိၢ်အစိကမီၤဒိၣ်ကတၢၢ် လၢထံကီၢ်သ့ၣ်တဖၣ်အကျါလီၤ.)

¹¹ အဝဲသ့ၣ်ကျီသံကွံာ်ပှၤဖဲန့ၣ်ခဲလၢာ်လၢနးန့ၣ်လီၤ. ပှၤအိၣ်မူတီၢ်တအိၣ်နီတဂၤဘၣ်ဒီးဘၣ်တၢ်ဒွဲၣ်အူထီၣ်အီၤလၢ မ့ၣ်အူန့ၣ်လီၤ.

¹² စီၤယိၤၡူမၤန့ၢ်ဝ့ၢ်တဖၣ်ဒီးအစီၤပၤတဖၣ်ခဲလၢာ်, ဒီးကျီသံကွံာ်ပှၤကိးဂၤလၢနးဒ်ယွၤအခ့အပှၤစီၤ မိၤၡ့မၤလိာ်တ့ၢ်အဝဲသ့ၣ်အသိးန့ၣ်လီၤ.

¹³ ဘၣ်ဆၣ်ဒီးပှၤအံၣ်စရ့လးဖိတဖၣ်တဒွဲၣ်အူထီၣ်ဝ့ၢ်တဖၣ်လၢ အဘၣ်တၢ်သူၣ်ထီၣ်အီၤလၢတၢ်စိခိၣ်န့ၣ်ဘၣ်. စီၤယိၤၡူဒွဲၣ်ဒၣ်ထဲဝ့ၢ်ဃါစိၢ်တဖျၢၣ်ဧိၤန့ၣ်လီၤ.

¹⁴ ပှၤအံၣ်စရ့လးဖိတဖၣ်ဟံးန့ၢ်တၢ်လုၢ်ဒိၣ်ပှ့ၤဒိၣ်ခဲလၢာ်ဒီးဆၣ်ဖိ ကီၢ်ဖိလၢဝ့ၢ်တဖၣ်အံၤအပူၤဒီးပာ်အီၤလၢအဂီၢ်ဒၣ်ဝဲလီၤ. မ့မ့ၢ်ပှၤကညီန့ၣ်မၤသံကွံာ်ဝဲခဲလၢာ်လၢနးဒီးတပာ်မူတီၢ်ဝဲနီတဂၤဘၣ်န့ၣ်လီၤ.

¹⁵ ဒ်ယွၤမၤလိာ်တ့ၢ်အခ့အပှၤစီၤမိၤၡ့အသိး, စီၤမိၤၡ့မၤလိာ်တ့ၢ်စီၤယိၤၡူဒီးစီၤယိၤၡူမၤဝဲဒ်န့ၣ်အသိးလီၤ. တၢ်လၢယွၤမၤလိာ်တ့ၢ်စီၤမိၤၡ့ခဲလၢာ်န့ၣ်, အဝဲတပာ်လီၤတဲာ်ဝဲနီတမံၤဘၣ်.

ကီၢ်လၢအဘၣ်တၢ်မၤန့ၢ်အီၤလၢစီၤယိၤၡူ

¹⁶ စီၤယိၤၡူမၤန့ၢ်ကီၢ်ခဲလၢာ်, ကီၢ်လၢကစၢၢ်ကလိအလိၤဒီးအဂံၢ်ထံးတဖၣ်, ကီၢ်လၢကလံၤစိးဒီးကလံၤထံး, ကိၡ့ၣ်ဒီကီၢ်ညါဒီးကီၢ်လၢအဃ့ထီလၢအကလံၤထံး, ဃုာ်ဒီးထံကျိယၢ်ဒ့ၣ်အတၢ်ပၢၤခိၣ်န့ၣ်လီၤ.

¹⁷ တၢ်လီၢ်တဖၣ်အံၤစးထီၣ်အသးလၢကစၢၢ်ဃးလးလၢကလံၤထံးဘူးဒီး ကီၢ်စ့အၢ်, ပၢၢ်တုၤလၢဝ့ၢ်ဘဧၤလးကးလၢကလံၤစိးလၢလဘၤနိၣ်တၢ်ပၢၤခိၣ် လၢကစၢၢ်ဃ့ရမိၣ်အကလံၤထံးန့ၣ်လီၤ. ဒီးမၤန့ၢ်အစီၤပၤခဲလၢာ်, ကျီသံကွံာ်အီၤ, ဒီးမၤသံကွံာ်အီၤခဲလၢာ်န့ၣ်လီၤ.

¹⁸ စီၤယိၤၡူဒုးတၢ်ဒီးစီၤပၤတဖၣ်အံၤဖးယံာ်ညါန့ၣ်လီၤ.

¹⁹ ဝ့ၢ်ထဲတဝ့ၢ်ဧိၤလၢအမၤတၢ်ဃူတၢ်ဖိး ဒီးပှၤအံၣ်စရ့လးဖိတဖၣ်န့ၣ်မ့ၢ်ဝ့ၢ်ကံးဘိၣ်, ဖဲပှၤဃံၤဝံဖိတနီၤအိၣ်ဝဲန့ၣ်လီၤ. မ့မ့ၢ်ဝ့ၢ်အဂၤတဖၣ်ဘၣ်တၢ်ဒုးန့ၢ်အီၤခဲလၢာ်န့ၣ်လီၤ.

²⁰ အဂ့ၢ်မ့ၢ်လၢယွၤမၤကိၤထီၣ်အဝဲသ့ၣ်အသးတဖၣ်လၢကဟဲ ထီဒါအံၣ်စရ့လးလၢတၢ်ဒုးအပူၤ, ဒ်သိးအဝဲသ့ၣ်ကဘၣ်တၢ်မၤဟးဂီၤကွံာ်အီၤခဲလၢာ်ဒီးတဒိးန့ၢ်တၢ်သးကညီၤဘၣ်ဒီးကဘၣ်တၢ်မၤ သံကွံာ်အီၤခဲလၢာ်ဒ်ယွၤမၤလိာ်တ့ၢ်စီၤမိၤၡ့အသိးအဃိန့ၣ်လီၤ.

²¹ ဒီးအကတီၢ်ဖဲန့ၣ်စီၤယိၤၡူလဲၤဒီးမၤဟး ဂီၤကွံာ်ပှၤနီၢ်ဒိၣ်တကလုာ်လၢအဘၣ်တၢ်ကိးအီၤလၢပှၤဧနးဖိလၢ အအိၣ်လၢကီၢ်လၢကစၢၢ်ကလိအလိၤလၢအမ့ၢ်ဃ့ဘြိၣ်, ဒဘံၢ်, ဧနး, ဒီးလၢယူဒၤဒီးအံၣ်စရ့လးအကီၢ်လၢကစၢၢ်ကလိအလိၤခဲ လၢာ်န့ၣ်လီၤ.

²² ဒီးလၢပှၤအံၣ်စရ့လးဖိတဖၣ်အကီၢ်ပူၤန့ၣ်, ပှၤဧနးဖိ တအိၣ်လီၤတဲာ်နီတဂၤလၢၤဘၣ်န့ၣ်လီၤ. အိၣ်တီၢ်ဒၣ်စှၤဂၤလၢဝ့ၢ်ဂါစၤ, ဝ့ၢ်ကၤသးဒီးဝ့ၢ်အၤစဒိာ် အပူၤန့ၣ်လီၤ.

²³ အန့ၣ်ဒီးစီၤယိၤၡူမၤန့ၢ်ကီၢ်ဒီ ဘ့ၣ်ညါဒ်ယွၤကတိၤတ့ၢ်တၢ်ဒီးစီၤမိၤၡ့အသိးန့ၣ်လီၤ. ဒီးစီၤယိၤၡူဟ့ၣ်လီၤပှၤအံၣ်စရ့လးဖိ တဖၣ်ဒ်အတၢ်န့ၢ်သါအသိး ဒီးနီၤဖးလီၤဝဲတဒူၣ်ဘၣ်တဒူၣ်အဂီၢ်အတၢ်န့ၢ်သါစုာ်စုာ်န့ၣ်လီၤ. ဒီးပှၤအိၣ်ဘှံးလၢတၢ်ဒုးတၢ်ယၤလီၤ.