လံာ်ယိၤအ့လး 3 - Sgaw Karen Common Bible

ကစၢ်ယွၤကစံၣ်ညီၣ်ပှၤကလုာ်တဖၣ်

¹ ဒီးယွၤစံးဝဲဒၣ်, လၢအဆၢကတီၢ်ဖဲန့ၣ်, ယကဒုးအီၣ်ကုးအီပှဲၤက့ၤကီၢ်ယူဒၤဒီး ဝ့ၢ်ယရူၤၡလ့ၣ်န့ၣ်လီၤ.

² ယကပာ်ဖှိၣ်ပှၤကလုာ်ခဲလၢာ်, ဒီးဟဲစိာ်အီၤဆူတၢ်စံၣ်ညီၣ်အတြီၤပူၤန့ၣ်လီၤ. ဖဲန့ၣ်ယကစံၣ်ညီၣ်အဝဲသ့ၣ် မ့ၢ်လၢအမၤလီၤပြံလီၤပြါယပှၤဂီၢ်မုၢ်အဃိန့ၣ်လီၤ. အဝဲသ့ၣ်မၤလီၤပြံလီၤပြါပှၤအံၣ်စရ့လးဖိလၢတခီထံတခီ ကီၢ်တဖၣ်အပူၤ, ဒီးနီၤဖးကွံာ်ယထံယကီၢ်, ကီၢ်အံၣ်စရ့လးန့ၣ်လီၤ.

³ အဝဲသ့ၣ်ဖီၣ်တၢ်ဖးလၢ မတၤကမၤန့ၢ်ပှၤဘၣ်တၢ်စိာ်မၢကဲကုၢ်အီၤတဖၣ်လဲၣ်န့ၣ်လီၤ. အဝဲသ့ၣ်ဆါကွံာ်တ့ၢ်ဖိသၣ်ပိာ်ခွါဒီးဖိသၣ်ပိာ်မုၣ်တဖၣ်ဆူ ကုၢ်အလီၢ်ဒ်သိးကဟ့ၣ်တၢ်အပှ့ၤလၢပိာ်မုၣ်ဟးဂီၤတဖၣ် ဒီးစပံးထံအဂီၢ်န့ၣ်လီၤ.

⁴ ဝ့ၢ်ထါယၢၣ်, ဝ့ၢ်စံဒိၣ်ဒီးကယဲၢ်လီၢ်ကဝီၤလၢကီၢ်ဖလ့ၡသးသ့ၣ်ဧၢ, သုကမၤယၤဒ်လဲၣ်. သုကျဲးစၢးလၢသုကမၤဆၢကဒါက့ၤယၤလၢ တၢ်တမံၤမံၤအဂီၢ်န့ၣ်ဧါ. သုမ့ၢ်မၤဒီး, ယကမၤဆၢကဒါက့ၤသုချ့ချ့ ကလဲာ်လီၤ.

⁵ သုစိာ်ကွံာ်ယစ့ညၣ်, ယထူဒီးယတၢ်ထူးတၢ်တီၤဆူသုတၢ်လုၢ်ဟံၣ် တဖၣ်အပူၤလီၤ.

⁶ သုစိာ်ထီၣ်ကွံာ်ဒီးဆါကွံာ်ကီၢ်ယူဒၤဒီး ဝ့ၢ်ယရူၤၡလ့ၣ်အပှၤဂီၢ်မုၢ်ဆူပှၤကြံးခ်ဖိတဖၣ်အအိၣ်လီၤ.

⁷ ဒီးခဲကနံၣ်အံၤ, ယကဟဲက့ၤစိာ်ကဒါက့ၤအဝဲသ့ၣ်လၢသုဆါကွံာ်အီၤအလီၢ်တဖၣ်အ ပူၤ, ဒီးယကမၤသုဒ်သုမၤတ့ၢ်အဝဲသ့ၣ်အသိးန့ၣ်လီၤ.

⁸ ဒီးယကဆါကွံာ်သုဖိခွါဒီးသုဖိမုၣ်တဖၣ်ဆူပှၤယူဒၤဖိအစုပူၤ, ဒီးအဝဲသ့ၣ်ကဆါကွံာ်ကဒီးအီၤဆူပှၤစဘၤဖိလၢအအိၣ်ဝဲ လၢတၢ်လီၢ်အယံၤန့ၣ်လီၤ. ယၤ, ယွၤ, ကတိၤလံတၢ်လံန့ၣ်လီၤ.

⁹ ဘိးဘၣ်သ့ၣ်ညါတၢ်အံၤဆူပှၤကလုာ်တဖၣ်အကျါ, ကတဲာ်ကတီၤတၢ်လၢတၢ်ဒုးတၢ်ယၤအဂီၢ်, ကိးထီၣ်သုပှၤသုးဖိအဆူၣ်တဖၣ်, ကရၢကရိထီၣ်သုသုးဖိသံၣ်ဖိခဲလၢာ်ဒီးလဲၤထီၣ်ဒုးတၢ်တက့ၢ်.

¹⁰ ပိာ်က့ၤသုထဲၣ်ကနၣ်ဆူနးတဖၣ်, ဒီးသုဒီပဲာ်ပျီတၢ်ဆူဘီတဖၣ်တက့ၢ်. ပှၤဂံၢ်စၢ်ဘါစၢ်ဒၣ်လဲာ်ကဘၣ်ဒုးတၢ်လီၤ.

¹¹ သုဝဲပှၤကလုာ်အိၣ်ဝးတရံးခဲလၢာ်သ့ၣ်ဧၢ, မၤချ့ချ့ဒီးဟဲတက့ၢ်. ဒီးပာ်ဖှိၣ်သုသးလၢတၢ်တြီၤပူၤတက့ၢ်.” ယွၤဧၢ, မၢလီၤနသုးမုၢ်သံၣ်ဘိလၢကဒုးအဝဲသ့ၣ် န့ၣ်တက့ၢ်.

¹² ပှၤကလုာ်တဖၣ်ကဘၣ်အိၣ်ကတဲာ်ကတီၤအသး ဒီးဟဲဆူတၢ်စံၣ်ညီၣ်အတြီၤပူၤန့ၣ်လီၤ. ဖဲန့ၣ်, ယၤ, ယွၤကဆ့ၣ်နီၤဒ်သိးကစံၣ်ညီၣ်ပှၤ ကလုာ်အိၣ်ဝးတရံးခဲလၢာ်န့ၣ်လီၤ.

¹³ ဒီၣ်တဲာ်ကွံာ်အီၤဒ်ဘုဧိၤဟုဧိၤလၢကူးဘု အကတီၢ်အသိး, ဒီးမၤသဘှံးကွံာ်အဝဲသ့ၣ်ဒ်စပံးသၣ်လၢတၢ်ဂံာ်စပံးထံ အဆၢၣ်အပူၤအသိး, တုၤစပံးထံပှဲၤလုာ်ကွံာ်န့ၣ်တက့ၢ်. အဂ့ၢ်ဒ်အံၤအဝဲသ့ၣ်အၢဝဲသီဝဲဒိၣ်မးလီၤ.

¹⁴ ပှၤအကထိဒီးအကထိတဖၣ် အိၣ်ဝဲလၢတၢ်စံၣ်ညီၣ်အတြီၤပူၤန့ၣ်လီၤ. အဂ့ၢ်ဒ်အံၤ, ယွၤအမုၢ်နံၤကဟဲတုၤဝဲဖဲန့ၣ်ဘူးထီၣ်လံန့ၣ်လီၤ.

¹⁵ မုၢ်ဧိၤလါဧိၤခံးလီၤဝဲဒီးဆၣ်ဧိၤဖီဧိၤတကပီၤထီၣ်လၢၤဘၣ်န့ၣ်လီၤ.

ကစၢ်ယွၤကဆိၣ်ဂ့ၤအပှၤဂီၢ်မုၢ်

¹⁶ ယွၤထုထီၣ်အကလုၢ်လၢကစၢၢ်စံယိၣ်အလိၤ, အကလုၢ်သီၣ်ဒ်လီသီၣ်, သီၣ်ထီၣ်ဝဲလၢဝ့ၢ်ယရူၤၡလ့ၣ်, ဟီၣ်ခိၣ်ဒီးမူကပိာ်လိၤန့ၣ်ဟူးဝးဆှဲးဆှိးဝဲလီၤ. ဘၣ်ဆၣ်, အဝဲကဒီသဒၢအပှၤဂီၢ်မုၢ်န့ၣ်လီၤ.

¹⁷ တုၤနုၤတစု, ပှၤအံၣ်စရ့လးဖိသ့ၣ်ဧၢ, သုကသ့ၣ်ညါလၢယမ့ၢ် ယွၤ, သုကစၢ်ယွၤန့ၣ်လီၤ. ယအိၣ်လၢကစၢၢ်စံယိၣ်, ယကစၢၢ်စီဆှံအလိၤန့ၣ်လီၤ. ဝ့ၢ်ယရူၤၡလ့ၣ်ကမ့ၢ်ဝ့ၢ်စီဆှံတဖျၢၣ် ဒီးပှၤတခီဘီမုၢ်တဖၣ်တမၤနၢၤမၤဃၣ်ကဒီး အီၤလၢၤဘၣ်.

¹⁸ လၢအဆၢကတီၢ်ဖဲန့ၣ်, ကစၢၢ်ကလိတဖၣ်ကပှဲၤဝဲဒီးစပံးလီၢ်တဖၣ်, ဒီးဂီၤဘုၣ်ဂီၤဖံးတဖၣ်ကဘၣ်တၢ်ထံၣ်န့ၢ်အီၤလၢကစၢၢ်ကိးဖျၢၣ်ဒဲးအလိၤ, ဒီးထံကယွၤလီၤဝဲအါအါဂီၢ်ဂီၢ်လၢကီၢ်ယူဒၤအထံ ဖိကျိခဲလၢာ်အပူၤန့ၣ်လီၤ. ဒီးထံထီၣ်ပၢၢ်တပူၤကယွၤလီၤဝဲလၢယွၤအတၢ်လုၢ်ဟံၣ် ဒီးကမၤဘၣ်စီၣ်ကီၢ်အဃါယၤအတၢ်တြီၤန့ၣ်လီၤ.

¹⁹ ကီၢ်အဲၤကူပတူးကကဲထီၣ်တၢ်ဃ့ထီအလီၢ်တတီၤ, ဒီးကီၢ်အဒိၣ်ကကဲထီၣ်တၢ်ဟးဂီၤအလီၢ်တပူၤန့ၣ်လီၤ. အဂ့ၢ်ဒ်အံၤ, အဝဲသ့ၣ်ထီဒါကီၢ်ယူဒၤဒီးမၤသံ အပှၤဂီၢ်မုၢ်လၢအတၢ်ဒဲးဘးတအိၣ်ဘၣ်န့ၣ်လီၤ.

²⁰ ယကမၤကၣ်တၢ်လၢပှၤလၢအဘၣ်တၢ် မၤသံကွံာ်လံအီၤတဖၣ်အဂီၢ်, ယတပာ်ကီၤဃာ်ဘၣ်ပှၤလၢအတၢ်ကမၣ်အိၣ်န့ၣ်ဘၣ်.

²¹ မ့မ့ၢ်ကီၢ်ယူဒၤဒီးဝ့ၢ်ယရူၤၡလ့ၣ်န့ၣ်ကမ့ၢ်တၢ်အိၣ် တၢ်ဆိးအလီၢ်အစိၤစိၤအဃၣ်ဃၣ်, ဒီးယၤ, ယွၤကအိၣ်ဝဲဆိးဝဲလၢကစၢၢ်စံယိၣ်အလိၤန့ၣ်လီၤ.