လံာ်စီၤယိၤဘး 42 - Sgaw Karen Common Bible

¹ တုၤနုၤတစုစီၤယိၤဘးစံးဆၢက့ၤယွၤ,

² ယွၤဧၢ, ယသ့ၣ်ညါလၢနသ့တၢ်လၢာ်, ဒီးတၢ်တြီနတိာ်တၢ် တသ့ဘၣ်နီတမံၤဘၣ်.

³ နစံးလၢ, ဖဲယတၢ်သ့ၣ်ညါနၢ်ပၢၢ်တအိၣ်ဘၣ်နီတစဲးန့ၣ်ယသံ ကွၢ်နတၢ်ကူၣ်ဘၣ်ကူၣ်သ့ဘူၣ်ဒ်လဲၣ်. ယကတိၤတ့ၢ်တၢ်လၢ ယတနၢ်ပၢၢ်တဖၣ်အဂ့ၢ်, တၢ်လၢအလီၤလးကဲၣ်ဆိးလၢယဂီၢ် ဒ်သိးယကသ့ၣ်ညါအီၤတဖၣ်အဂ့ၢ်လီၤ.

⁴ နစံးဘၣ်တ့ၢ်ယၤလၢဖဲနကတိၤတၢ်အခါန့ၣ်ယကဘၣ်ဒိကနၣ်နၤ, ဒီးဂုာ်ကျဲးစၢစံးဆၢနတၢ်သံကွၢ်တဖၣ်လီၤ.

⁵ လၢအပူၤကွံာ်န့ၣ်ယနၢ်ဟူတ့ၢ်နဂ့ၢ်ထဲဒၣ်လၢယနၢ်လီၤ. မ့မ့ၢ်ခဲကနံၣ်အံၤယထံၣ်ဘၣ်လံနၤလၢယမဲာ်ချံဒၣ်ယဲလံ.

⁶ မၤသးဒ်န့ၣ်, ဒီးယမဲာ်ဆှးလၢကယဲၢ်တၢ်လၢယစံးတ့ၢ်ယဲ ဒီးပီၢ်ယၢ်လီၤက့ၤယသးလၢဟီၣ်ခိၣ်ကမူၣ်ဒီးဖၣ်ဆါအကျါလီၤ.

ကစၢ်ယွၤဒီဒၣ်စီၤယိၤဘးဒီးပာ်တၢ်ကမၣ် လၢအတံၤသကိးတဖၣ်အလိၤ လၢခံကတၢၢ်

⁷ တုၤယွၤကတိၤတၢ်ဒီးစီၤယိၤဘးဝံၤဒီး, စံးဘၣ်ပှၤတ့ၤမၣ်ဖိ စီၤအလံဖးစး, ယသးထီၣ်နၤဒီးနတံၤသကိးခံဂၤန့ၣ်လီၤ. အဂ့ၢ်ဒ်အံၤ, နတစံးကတိၤတၢ်လၢယဂ့ၢ်ယကျိၤလၢအတီအလိၤ ဒ်ယခ့ယပှၤစီၤယိၤဘးစံးတ့ၢ်အသိးန့ၣ်လီၤ.

⁸ ဒီးခဲကနံၣ်အံၤ, ဟံးန့ၢ်ဂီၤဖံးဖါနွံဒုဒီးသိဖါနွံဒုဒီးလဲၤဆူယခ့ ယပှၤစီၤယိၤဘးအအိၣ်ဒီးလုၢ်ထီၣ်တၢ်လုၢ်မ့ၣ်အူလၢသုဂီၢ် တက့ၢ်. စီၤယိၤဘးကဘါထုကဖၣ်တၢ်လၢသုဂီၢ်ဒီးယကစံး ဆၢအတၢ်ထုကဖၣ်လီၤ. ဒီးယတမၤတရီတပါသုဒ်သုကြၢး ဒိးန့ၢ်ဝဲအသိးန့ၣ်ဘၣ်. သုတစံးတၢ်လၢယဂ့ၢ်ယကျိၤလၢ အတီအလိၤဒ်အစံးတ့ၢ်ဝဲအသိးန့ၣ်ဘၣ်.

⁹ ဒီးပှၤတ့ၤမၣ်ဖိစီၤအလံဖးစး, ပှၤရူၤဃးဖိစီၤဘံးလဒးဒီး ပှၤနၤမးဖိစီၤဖိဖၢ်မၤဝဲဒ်ယွၤစံးဘၣ်တ့ၢ်အီၤအသိး, ဒီးယွၤစံးဆၢစီၤယိၤဘးအတၢ်ထုကဖၣ်န့ၣ်လီၤ.

¹⁰ တုၤစီၤယိၤဘးဘါထုကဖၣ်တၢ်လၢအတံၤသကိးသၢဂၤ အဂီၢ်ဝံၤအလီၢ်ခံန့ၣ်, ယွၤမၤဘီၣ်ထီၣ်ညီထီၣ်ကဒါက့ၤကဒီး အီၤ, ဒီးဟ့ၣ်အီၤတၢ်လၢအအိၣ်တ့ၢ်ဒီးအီၤလၢညါခံစးန့ၣ်လီၤ.

¹¹ စီၤယိၤဘးအဒီပုၢ်ဝဲၢ်ခွါဒီးဒီပုၢ်ဝဲၢ်မုၢ်ခဲလၢာ်, ဒီးအတံၤသကိးလၢထံးလၢမကိာ်ခဲလၢာ်န့ၣ်ဟဲဆူအအိၣ်ဒီးအီၣ် တၢ်လၢအဟံၣ်ပူၤလီၤ. အဝဲသ့ၣ်ပာ်ဖျါထီၣ်အတၢ်သးတမုာ် ဒီးမၤမုာ်အီၤလၢကယဲၢ်တၢ်ကိၢ်တၢ်ဂီၤလၢယွၤဟဲစိာ်န့ၢ်လၢ အဖီခိၣ်န့ၣ်လီၤ. အဝဲသ့ၣ်ကိးဂၤဒဲးဟ့ၣ်အီၤလၢစ့တနီၤဒီး ပသံးထူတဘိစုာ်စုာ်န့ၣ်လီၤ.

¹² ဒီးယွၤဆိၣ်ဂ့ၤစီၤယိၤဘးအတၢ်အိၣ်မူလၢခံတပတီၢ်အါန့ၢ် ဒံးအဆိၣ်ဂ့ၤတ့ၢ်အီၤလၢအခီၣ်ထံးန့ၣ်လီၤ. စီၤယိၤဘးအိၣ်ဝဲဒီးသိတကလးလွံၢ်ကထိ, ကီၤလၤအူးဃု ကထိ, ဂီၤဖံးအဆိတကထိဒီးကသ့ၣ်ယီၤမိၢ်တကထိလီၤ.

¹³ ဒီးအဝဲအိၣ်ဒီးအဖိခွါနွံဂၤဒီးအဖိမုၣ်သၢဂၤန့ၣ်လီၤ.

¹⁴ ဒီးအခီၣ်ထံးတဂၤအမံၤန့ၣ်ကိးဝဲလၢနီၢ်ယမံမၤ, ဒီးခံဂၤတဂၤအမံၤမ့ၢ်ဝဲနီၢ်ကစံဧၤ, ဒီးသၢဂၤတဂၤအမံၤမ့ၢ် နီၢ်က့ရၣ်ဟးပူးန့ၣ်လီၤ.

¹⁵ ဒီးပိာ်မုၣ်တဖၣ်လၢအက့ၢ်အဂီၤဂ့ၤဒ်စီၤယိၤဘးအဖိမုၣ်တဖၣ် အသိးလၢကီၢ်ဒီဘ့ၣ်ညါအပူၤန့ၣ်တအိၣ်ဘၣ်. ဒီးအပၢ်ဟ့ၣ် လီၤတၢ်န့ၢ်သါလၢအဝဲသ့ၣ်အဂီၢ်လၢအဒီပုၢ်ဝဲၢ်ပိာ်ခွါအကျါ န့ၣ်လီၤ.

¹⁶ တၢ်န့ၣ်အလီၢ်ခံစီၤယိၤဘးမူဒံးဝဲအနံၣ်တကယၤလွံၢ်ဆံ, ဒီးထံၣ်ဘၣ်အဖိခွါတဖၣ်, ဒီးအဖိခွါတဖၣ်အဖိခွါလွံၢ်စိၤ လီၤ.

¹⁷ ဒီးစီၤယိၤဘးသံဝဲလၢအမှံၤတုာ်ပှၢ်တီၤအကတီၢ်, ပှဲၤဒီးနံၣ်အါလါအါန့ၣ်လီၤ. -