လံာ်စီၤယိၤဘး 37 - Sgaw Karen Common Bible

¹ ကလံၤမုၢ်မၤစံၣ်ယသးတုၤယသူၣ်ကနိးသးကနိးန့ၣ်လီၤ.

² သုဝဲခဲလၢာ်ဒိကနၣ်ကစၢ်ယွၤအကလုၢ်, အထးခိၣ်အကလုၢ်လၢအဟဲလၢလီအသီၣ်န့ၣ်တက့ၢ်.

³ အဝဲပျဲလီၤပျၢ်လီၤလီဝၢ်ဒံးလၢမူခိၣ်, ဆူဟီၣ်ခိၣ်အက တၢၢ်လၢအံၤတုၤလၢဘးခီအကတၢၢ်တစုန့ၣ်လီၤ.

⁴ အန့ၣ်တစုကစၢ်ယွၤအကလုၢ်သီၣ်လီၤကညီၢ်န့ၣ်ဟူထီၣ်ဒ် လီသီၣ်ထီၣ်ကဟုကညီၢ်အသိး, ဒီးအကတီၢ်ဖဲန့ၣ်လီဝၢ် အဒံးတထံၣ်ဃီလီၤ.

⁵ ဖဲကစၢ်ယွၤဟ့ၣ်လီၤအကလုၢ်န့ၣ်တၢ်လီၤလးသ့ၣ်တဖၣ်မၤ အသး, တၢ်လီၤကမၢကမၣ်လၢပနၢ်ပၢၢ်အီၤတသ့သ့ၣ်တဖၣ်န့ၣ်လီၤ.

⁶ ကစၢ်ယွၤမၤလိာ်မူခိၣ်ဖီလၢကလီၤဝဲဆူဟီၣ်ခိၣ်လိၤ, ဒီးဒုးဟဲစူၤလီၤတၢ်ဆူၣ်ဆူၣ်ကလဲာ်လီၤ.

⁷ အဝဲဒုးဆိကတီၢ်ကွံာ်ပှၤကညီအတၢ်မၤဒီးဒုးနဲၣ်အဝဲ သ့ၣ်တၢ်လၢအမၤဝဲသ့န့ၣ်လီၤ.

⁸ ဆၣ်ဖိကီၢ်ဖိလၢအမံၤသ့ၣ်တဖၣ်လဲၤဝဲဆူအတဝၢတဖၣ် အပူၤလီၤ.

⁹ ကလံၤတဝံးဟဲဝဲလၢကလံၤထံးဒီးတၢ်ခုၣ်တကံဟဲဝဲလၢ ကလံၤစိးန့ၣ်လီၤ.

¹⁰ ကစၢ်ယွၤအတၢ်သါဒုးလီၤသကၤထံဒီးဒုးကဲထီၣ်ဝဲဆူထံလီၤ သကၤကိၢ်လိၢ်န့ၣ်လီၤ.

¹¹ လီဝၢ်ဒံးဆဲးကပြူၢ်ထီၣ်လၢတၢ်အၢၣ်တဖၣ်အကျါ,

¹² ဒီးသုးအသးဒ်ကစၢ်ယွၤအတၢ်ဘၣ်သးအသိးန့ၣ်လီၤ. အဝဲသ့ၣ်မၤတၢ်ကိးမံၤဒဲးဒ်ယွၤမၤလိာ်တၢ်အသိး, လၢတၢ်လီၢ် ကိးပူၤဒဲးသကုၤဟီၣ်ခိၣ်ဒီဘ့ၣ်ညါန့ၣ်လီၤ.

¹³ ကစၢ်ယွၤဆှၢလီၤတၢ်စူၤထံဒ်သိးကမၤဘၣ်စီၣ်ဟီၣ်ခိၣ်န့ၣ်လီၤ. ဒီးလၢတၢ်သိၣ်ဃီၣ်ပှၤကညီမ့ၢ်ဂ့ၤ, တၢ်ဒုးထံၣ်အီၤလၢအတၢ် ဘၣ်အသးမ့ၢ်ဂ့ၤအဝဲကဆှၢလီၤဝဲလီၤ.

¹⁴ စီၤယိၤဘးဧၢ, ဆိကတီၢ်တစိၢ်ဖိဒီးကနၣ်တက့ၢ်. ဒီးဆိကမိၣ်ထီၣ်တၢ်လီၤလးတဖၣ်လၢကစၢ်ယွၤမၤဝဲဒၣ်န့ၣ်တက့ၢ်.

¹⁵ မ့ၢ်နသ့ၣ်ညါလၢကစၢ်ယွၤဟ့ၣ်လီၤအကလုၢ်ဒီးဒုးဆဲးကပြုၢ် လီဝၢ်ဒံးလၢတၢ်အၢၣ်တဖၣ်န့ၣ်ဧါ.

¹⁶ ကစၢ်ယွၤအတၢ်သ့တၢ်ဘၣ်လီၤလိၢ်လီၤလးလၢအဒုးဟဲထီၣ် တၢ်အၢၣ်လၢမူခိၣ်န့ၣ်မ့ၢ်နသ့ၣ်ညါကစီဒီဧါ.

¹⁷ နတသ့ၣ်ညါဘၣ်. နကကလၢၢ်ဘၣ်ထဲဒၣ်, တုၤကလံၤကိၢ်လၢကလံၤထံးဟဲအူဘၣ်နၤဒီးနတၢ် ကူတၢ်သိးတဖၣ်တဒုးတူၢ်ဘၣ်နၤလၢတၢ်ကိၢ် တၢ်ကဲၤဘၣ်န့ၣ်လီၤ.

¹⁸ မ့ၢ်နမၤစၢၤကစၢ်ယွၤအတၢ်သလၣ်ထီၣ်မူခိၣ်ဒီးဒုးကျၢၤ အီၤဒ်မဲာ်ထံကလၤတဘ့ၣ်သိအသးအသိးဘၣ်ကသ့ဧါ.

¹⁹ သိၣ်လိပှၤတၢ်လၢပကစံးဘၣ်ကစၢ်ယွၤတက့ၢ်. ပသးပတၢ်ဆိကမိၣ်တဖၣ်လီၤဟိလီၤဃီဝဲဒီးပကစံးတၢ်တအိၣ်နီ တမံၤလၢၤဘၣ်.

²⁰ ယတဃ့လၢယကကတိၤဘၣ်တၢ်ဒီးကစၢ်ယွၤဘၣ်. ဘၣ်မနုၤလၢယကဟ့ၣ်အီၤတၢ်ခွဲးတၢ်ယာ်လၢကမၤဟးဂီၤ ယၤန့ၣ်လဲၣ်.

²¹ ဒီးခဲကနံၣ်အံၤတၢ်ကပီၤလၢမူခိၣ်န့ၣ်ကပြုၢ်ကပြီၤဝဲဒီး ကပီၤဆှုၣ်တုၤဒၣ်လဲာ်ပကွၢ်ထီၣ်တန့ၢ်ဘၣ်. ကလံၤမၤပျီကွံာ်တ့ၢ်လံမူခိၣ်လံ.

²² တၢ်ကပီၤအယဲၤထူအိၣ်ဖျါထီၣ်လၢကလံၤစိးဒီးကစၢ်ယွၤ အလၤကပီၤမၤပှဲၤယသးဒီးတၢ်ယူးယီၣ်အီၤန့ၣ်လီၤ.

²³ ကစၢ်ယွၤအစိအကမီၤန့ၣ်ဒိၣ်ဝဲတုၤဒၣ်လဲာ်ပဟဲဘူးဒီးအီၤ တန့ၢ်ဘၣ်. အဝဲတီဝဲလိၤဝဲဒီးစံၣ်ညီၣ်တၢ်တီလၢအတၢ်ဘၣ် ထွဲဒီးပှၤကညီန့ၣ်လီၤ.

²⁴ မၤသးဒ်န့ၣ်ဒီးပှၤကိးဂၤဒဲးဆၢထၢၣ်လၢတၢ်ပျံၤတၢ်ယူး ယီၣ်အီၤအပူၤ, ဒီးတကနၣ်ဃုာ်ဝဲပှၤသ့ၣ်တဖၣ်လၢအစံးလီၤ အသးလၢအအိၣ်ဒီးတၢ်ကူၣ်သ့န့ၣ်ဘၣ်လီၤ.