လံာ်စီၤယိၤဘး 36 - Sgaw Karen Common Bible

^1-2 ဒီးစီၤအလံဟူၤစံးဝဲဒၣ်, ဒ်ကစၢ်ယွၤအခၢၣ်စးအသိးန့ၣ် တၢ်လၢယကဘၣ်စံးအါထီၣ်အိၣ်ဒံးသတးဒီးဝံသးစူၤဒိ ကနၣ်ဆူညါတစဲးတက့ၢ်.

³ ယတၢ်သ့ၣ်ညါနၢ်ပၢၢ်အါဝဲလီၤ. ယကတဲသုတၢ်လၢယသ့ၣ်ညါ, ဒ်သိးယကပာ်ဖျါထီၣ်ကစၢ်ယွၤ, ပှၤလၢအတ့လီၤယၤန့ၣ်တီဝဲလိၤဝဲလီၤ.

⁴ တၢ်လၢယစံးဘၣ်နၤန့ၣ်တမ့ၢ်တၢ်ကဘျံးကဘျၣ်ဘၣ်နီ တမံၤဘၣ်. နထံၣ်ဘၣ်ပှၤကူၣ်သ့နီၢ်နီၢ်တဂၤလၢနမဲာ်ညါလီၤ.

⁵ ကွၢ်ကွၢ်, ကစၢ်ယွၤန့ၣ်ဒိၣ်နီၢ်မးလီၤ. အဝဲတသးဘၣ်အၢဘၣ် ပှၤနီတဂၤဘၣ်. အဝဲဒိၣ်ဝဲဆူၣ်ဝဲဒီးဂၢၢ်ဝဲကျၢၤဝဲလၢအတၢ် တိာ်အပူၤလီၤ.

⁶ တဒုးမူဘၣ်ပှၤတၢ်ဒဲးဘးဖိတဖၣ်ဘၣ်. ဒီးထီဘိစံၣ်ညီၣ် တီပှၤဖှီၣ်ဖိယာ်ဖိန့ၣ်လီၤ.

⁷ ကဟုဘံၣ်ကယာ်ဘၢပှၤအတီအလိၤတဖၣ်, ပျဲအဝဲသ့ၣ်ကပၢ တၢ်ဒ်စီၤပၤတဖၣ်အသိးဒီးပျဲအဘၣ်တၢ်မၤလၤကပီၤအီၤအစိၤ စိၤအဃၣ်ဃၣ်လီၤ.

⁸ ဘၣ်ဆၣ်ဒီးပှၤကညီမ့ၢ်ဘၣ်တၢ်စၢဃံးအီၤလၢတၢ်နးတၢ် ဖှီၣ်အပျံၤတဖၣ်ဒီး,

⁹ ကစၢ်ယွၤဒုးနဲၣ်အီၤလၢအတၢ်ဒဲးဘးတဖၣ်ဒီးအတၢ်ပာ် ထီၣ်ထီအသးန့ၣ်လီၤ.

¹⁰ ဟ့ၣ်လီၤအီၤလၢတၢ်သးအိၣ်ဒိကနၣ်တၢ်သိၣ်ဂ့ၤသီဘၣ်ဒ်သိး ကဃၣ်ကွံာ်အသးလၢတၢ်အၢလီၤ.

¹¹ အဝဲသ့ၣ်မ့ၢ်စူၢ်ကစၢ်ယွၤဒီးမၤအတၢ်န့ၣ်, အမုၢ်နံၤတဖၣ်ကပှဲၤ ဝဲဒီးတၢ်ဃူတၢ်ဖိးဒီးတၢ်ဘီၣ်တၢ်ညီန့ၣ်လီၤ.

¹² မ့ၢ်တစူၢ်ဝဲဒီးအဝဲသ့ၣ်ကဟးဂီၤဝဲလၢနး, ကသံဝဲလၢအတၢ်သ့ၣ် ညါနၢ်ပၢၢ်တအိၣ်ဘၣ်အဃိန့ၣ်လီၤ.

¹³ ပှၤတဖၣ်လၢ အအိၣ်ဒီးသးလၢတစူၢ်တနာ်ယွၤန့ၣ်, သးဒိၣ်ထီၣ်တထံၣ် ဃီဒီးဖဲအဘၣ်တၢ်စံၣ်ညီၣ်အီၤဒၣ်လဲာ်န့ၣ်, တကိးထီၣ်ဝဲလၢ တၢ်မၤစၢၤအဂီၢ်ဘၣ်.

¹⁴ အဝဲသ့ၣ်သံဖဲအသးစၢ်ဒံးအခါ, ဒီးအတၢ်အိၣ်မူလၢာ်ကွံာ်ဝဲ ဒ်ပှၤလီၤသးဘၣ်အၢအိၣ်လၢတၢ်လုၢ်ဟံၣ်ပူၤတဖၣ်အသိးန့ၣ်လီၤ.

¹⁵ ဘၣ်ဆၣ်ဒီးကစၢ်ယွၤသိၣ်လိပှၤကညီခီဖျိတၢ်ဘၣ်နးဘၣ်ဖှီၣ်ဒီး သူဝဲတၢ်ကိၢ်တၢ်ဂီၤလၢ ကအိးထီၣ်အဝဲသ့ၣ် အမဲာ်ချံအဂီၢ်န့ၣ်လီၤ.

¹⁶ စီၤယိၤဘးဧၢ, ကစၢ်ယွၤထုးထီၣ်ကွံာ်နၤလၢတၢ်ကိၢ်တၢ် ဂီၤအပူၤဆူတၢ်လီၢ်အလဲၢ်တတီၤဖဲတၢ်တြီမၤတံာ်တာ်တ အိၣ်ဘၣ်ဒီးနစီၢ်နီၤခိၣ်ဘၣ်တၢ်ကတဲာ်ကတီၤအီၤပှဲၤဝဲဒီး တၢ်အီၣ်အဝံၣ်အဘဲလီၤ.

¹⁷ မ့မ့ၢ်ခဲကနံၣ်အံၤနဘၣ်တၢ်စံၣ်ညီၣ်နၤဒ်နကြၢးဒိးန့ၢ်ဘၣ်ဝဲ အသိးန့ၣ်လီၤ.

¹⁸ ပလီၢ်နသးဒ်သိးတၢ်ထူးတၢ်တီၤသုတကလံာ်န့ၢ်နၤဒီးပျဲ ခိၣ်ဖးလာ်ဆှိးဖးဒိၣ်ဆှၢကမၣ်နကျဲတဂ့ၤ.

¹⁹ နကိးထီၣ်တၢ်လၢတၢ်မၤစၢၤအဂီၢ်သနာ်က့, အဘျုးတအိၣ် နီတမံၤဘၣ်. ကယဲၢ်နဂံၢ်နဘါခဲလၢာ်မၤစၢၤနၤတသ့လၢၤဘၣ်.

²⁰ တဘၣ်ဆူလၢ်ဟူတၢ်ဆၢကတီၢ်ဖဲပှၤဂီၢ်မုၢ်ကဘၣ်တၢ်မၤဟးဂီၤအီၤ, သတူၢ်ကလာ်အမုၢ်တနၤန့ၣ်တဂ့ၤ.

²¹ ပလီၢ်နသးဒ်သိးနသုတဃၣ်နသးဆူတၢ်အၢတၢ်သီတဂ့ၤ. တၢ်ဟ့ၣ်လီၤနၤလၢတၢ်တူၢ်ဘၣ်ခီၣ်ဘၣ်ဒ်သိးကမၤပူၤဖျဲး နၤလၢတၢ်န့ၣ်လီၤ.

²² ကွၢ်ကွၢ်, ယွၤအိၣ်ထီၣ်ထီဝဲလၢအစိကမီၤဒၣ်ဝဲအပူၤလီၤ. အဝဲမ့ၢ်သရၣ်အဒိၣ်ကတၢၢ်လၢပှၤခဲလၢာ်အကျါလီၤ.

²³ တၢ်လၢကစၢ်ယွၤကဘၣ်မၤဝဲမ့ၢ်တၢ်မနုၤဂ့ၤ, ပှၤကဆှိးကမၣ် အီၤလၢအမၤတၢ်အၢတၢ်သီမ့ၢ်ဂ့ၤသ့န့ၣ်တအိၣ်ဘၣ်နီတဂၤဘၣ်.

²⁴ သ့ၣ်နီၣ်ထီၣ်က့ၤလၢနကဘၣ်ပာ်ဒိၣ်အတၢ်မၤလၢပှၤကိးဂၤဒဲး အဂီၢ်ဒီးစံးထီၣ်ပတြၢၤအီၤလၢတၢ်သးဝံၣ်န့ၣ်တက့ၢ်.

²⁵ ပှၤကိးဂၤဒဲးထံၣ်ဘၣ်တ့ၢ်လံတၢ်လၢအမၤတ့ၢ်ဝဲ, ဘၣ်ဆၣ်ဒီး ပှၤနၢ်ပၢၢ်အီၤတသ့ဘၣ်နီတဂၤဘၣ်.

²⁶ ကွၢ်ကွၢ်, ကစၢ်ယွၤမ့ၢ်တၢ်အဒိၣ်အထီ, ဒီးပတသ့ၣ်ညါ ဘၣ်အီၤဘၣ်. ဒီးပဃုကွၢ်အနံၣ်အလါအတၢ်ဂံၢ်တသ့ဘၣ်.

²⁷ အဂ့ၢ်ဒ်အံၤ, ပှၤလၢအထုးထီၣ်ထံလၢဟီၣ်ခိၣ်ချၢဒီးဒုးစူၤ လီၤကဒါက့ၤဝဲဒ်တၢ်စူၤထံအသိးန့ၣ်မ့ၢ်ကစၢ်ယွၤလီၤ.

²⁸ အဝဲမၢတၢ်ဟဲစူၤလီၤလၢတၢ်အၢၣ်တဖၣ်ဒီးဒုးလီၤဘၣ်ဝဲ ဆူကယဲၢ်ပှၤခဲလၢာ်အလိၤန့ၣ်လီၤ.

²⁹ တၢ်အၢၣ်တဖၣ်သုးအလီၢ်ဒ်လဲၣ်မ့ၢ်ဂ့ၤ, လီသီၣ်လၢမူကပိာ် လိၤဖဲကစၢ်ယွၤအိၣ်ဝဲအလီၢ်ဒ်လဲၣ်မ့ၢ်ဂ့ၤပှၤတသ့ၣ်ညါဘၣ် နီတဂၤဘၣ်.

³⁰ ကွၢ်ကွၢ်, ရၤလီၤဝဲအလီဝၢ်ဒံးဝးတရံးအခိၣ်အဃၢၤလၢမူ ကပိာ်လိၤဘၣ်ဆၣ်ပီၣ်လဲၣ်အတၢ်ယိာ်န့ၣ်အိၣ်ခံးသူဝဲလီၤ.

³¹ လၢတၢ်အံၤမ့ၢ်ကစၢ်ယွၤစံၣ်ညီၣ်ပှၤဂီၢ်မုၢ်တဖၣ်ဒီးဟ့ၣ်လီၤ တၢ်အီၣ်တၢ်အီအါအါကလဲာ်ဒ်လဲၣ်န့ၣ်လီၤ.

³² အဝဲဟံးဃာ်လီဝၢ်ဒံးလၢအစုတဖၣ်ဒီးဟ့ၣ်လီၤအကလုၢ်လၢ ကဖျးလီၤတၢ်အလီၢ်ဖဲလဲၣ်န့ၣ်လီၤ.

³³ လီသီၣ်ဘိးဘၣ်သ့ၣ်ညါကလံၤသီၣ်ဂီၤအတၢ်ဟဲသုးဘူး အသးဒီးဂီၤဘုၣ်ဂီၤဖံးဒၣ်လဲာ်သ့ၣ်ညါအတၢ်ဟဲလံန့ၣ်လီၤ. -