လံာ်စီၤယိၤဘး 35 - Sgaw Karen Common Bible

^1-2 ဒီးစီၤအလံဟူၤစံးဝဲဒၣ်, စီၤယိၤဘးဧၢ, နစံးလၢနမ့ၢ်ပှၤလၢတၢ်ပာ်တၢ်ကမၣ်အီၤအလီၢ် တအိၣ်ဘၣ်လၢကစၢ်ယွၤအမဲာ်ညါန့ၣ်, တဘၣ်ဘၣ်.

³ ဒီးနတၢ်သံကွၢ်ကစၢ်ယွၤ, ယတၢ်ဒဲးဘးမၤဘၣ်ဒိဘၣ်ထံး နၤဒ်လဲၣ်. ယမ့ၢ်တမၤဘၣ်တၢ်ဒဲးဘးဒီးယကဘၣ်ဘျုး မနုၤလဲၣ်န့ၣ်, တဘၣ်ဘၣ်.

⁴ ယကစံးဆၢနၤဒီးနတံၤသကိးတဖၣ်စ့ၢ်ကီးလီၤ.

⁵ ကွၢ်ထီၣ်ဆူမူခိၣ်တက့ၢ်. ကွၢ်တၢ်အၢၣ်တဖၣ်လၢအိၣ်ထီၣ် ထီလၢနဖီခိၣ်န့ၣ်တက့ၢ်.

⁶ နမ့ၢ်မၤတၢ်ဒဲးဘးဒီးတမၤဆါဘၣ်ကစၢ်ယွၤနီတမံၤဘၣ်. နမ့ၢ်မၤတၢ်ကမၣ်အဘျီတဖၣ်အဘျီဒၣ်လဲာ်တၢ်န့ၣ်မ့ၢ် အမၤဘၣ်ဒိဘၣ်ထံးအီၤဧါ.

⁷ နတီနလိၤထဲန့ၣ်အဃိဒီးနမၤဘျုးကစၢ်ယွၤဧါ. မ့ၢ်နမၤဘၣ်ကစၢ်ယွၤလၢနတၢ်မ့ၢ်ပှၤတီပှၤလိၤအဃိ ဧါ. ကစၢ်ယွၤတလိၣ်ဘၣ်တၢ်လၢနအိၣ်နီတမံၤဘၣ်.

⁸ လၢနတၢ်ဒဲးဘးတဖၣ်အဃိဒီးပှၤကညီကဒဲကဒဲဒ်နၤတူၢ်ဘၣ်တၢ်, ဒီးတၢ်အဂ့ၤလၢနမၤန့ၣ်, မၤစၢၤအီၤလီၤ.

⁹ တုၤပှၤကညီဘၣ်တၢ်မၤအၢမၤနးအီၤဒီးအဝဲသ့ၣ်ကအု ကစွါထီၣ်ဝဲ, ဒီးကိးထီၣ်ပှၤတဂၤဂၤလၢကအုၣ်က့ၤခီၣ်က့ၤအီၤ န့ၣ်လီၤ.

¹⁰ ဘၣ်ဆၣ်အဝဲသ့ၣ်တဃၣ်က့ၤအသးဆူကစၢ်ယွၤ, ပှၤလၢအတ့လီၤအီၤ, ပှၤလၢအဟ့ၣ်လီၤအဝဲသ့ၣ်တၢ်မုၢ်လၢ်ဖဲတၢ်ခံးတၢ်နၤအကတီၢ် တဂၤအအိၣ်န့ၣ်ဘၣ်.

¹¹ အဝဲသ့ၣ်တဃၣ်က့ၤအသးဆူကစၢ်ယွၤလၢအဒုးကူၣ်ဘၣ်ကူၣ် သ့ပှၤဒိၣ်န့ၢ်ဒံးဆၣ်ဖိကီၢ်ဖိမ့ၢ်ဂ့ၤထိၣ်ဧိၤလံာ်ဧိၤမ့ၢ်ဂ့ၤ, အအိၣ်န့ၣ်ဘၣ်.

¹² အဝဲသ့ၣ်ကိးထီၣ်လၢတၢ်မၤစၢၤအဂီၢ်ဘၣ်ဆၣ်ကစၢ်ယွၤတစံးဆၢ တၢ်ဘၣ်. အဂ့ၢ်ဒ်အံၤအဝဲသ့ၣ်မ့ၢ်ပှၤပာ်ထီၣ်ထီအသး ဒီးပှၤအၢပှၤသီလီၤ.

¹³ အဂ့ၢ်ဒ်အံၤ, အဝဲသ့ၣ်အတၢ်ကိးထီၣ်န့ၣ်မ့ၢ်တၢ်ကလီကလီလီၤ. သ့တၢ်လၢာ်ကစၢ်ယွၤတထံၣ်ဒီးတနၢ်ဟူအဝဲသ့ၣ်ဘၣ်.

¹⁴ စီၤယိၤဘးဧၢ, နစံးတၢ်လၢနထံၣ်ကစၢ်ယွၤတသ့ဘၣ်လီၤ. ဘၣ်ဆၣ်အိၣ်ခိးလၢတၢ်သးစူၤအပူၤတက့ၢ်. နတၢ်ဂ့ၢ်အိၣ် လၢအမဲာ်ညါလီၤ.

¹⁵ နဆိကမိၣ်လၢကစၢ်ယွၤတစံၣ်ညီၣ်တၢ်ဘၣ်, ဒီးတကနၣ် ဃုာ်ဘၣ်တၢ်ဒဲးဘးဘၣ်.

¹⁶ နကတိၤတၢ်ဆူညါန့ၣ်အဘျုးတအိၣ်လၢနဂီၢ်ဘၣ်. အိၣ်ဖျါလၢ နတနၢ်ပၢၢ်တၢ်လၢနကတိၤအီၤန့ၣ်ဘၣ်.