လံာ်စီၤယိၤဘး 34 - Sgaw Karen Common Bible

^1-2 ဒီးစီၤအလံဟူၤစံးဝဲဒၣ်, ပှၤလၢအကူၣ်တၢ်သ့သ့ၣ်ဧၢ, ကနၣ်ယတၢ်ကတိၤတက့ၢ်. ဒီးပှၤလၢအသ့ၣ်ညါတၢ်သ့ၣ်ဧၢ, ဒိကနၣ်ယကလုၢ်ကထါတက့ၢ်.

³ တၢ်အီၣ်လၢအဝံၣ်အဘဲန့ၣ်တုၤသုအီၣ်ကွၢ်ဒီးသုသ့ၣ်ညါ အီၤလီၤ. ဘၣ်ဆၣ်ဒီးတၢ်ကူၣ်သ့အတၢ်ကတိၤန့ၣ်တုၤသုနၢ်ဟူ အီၤဒီးသုတသ့ၣ်ညါဘၣ်.

⁴ မ်ပဃုကွၢ်ထံသကိးတၢ်ဂ့ၢ်တၢ်ကျိၤတက့ၢ်. မ်ပစံၣ်ညီၣ်တဲာ်တၢ်အဂ့ၤကတၢၢ်လၢပနီၣ်ကစၢ်ဒၣ်ပဝဲတက့ၢ်.

⁵ စီၤယိၤဘးစံးဝဲဒၣ်လၢအမ့ၢ်ပှၤလၢတၢ်ပာ်တၢ်ကမၣ်လၢ အလိၤအလီၢ်တအိၣ်ဘၣ်လၢအမ့ၢ်ပှၤလၢကစၢ်ယွၤဂ့ၢ်လိာ်လၢ ကဟ့ၣ်အီၤတၢ်စံၣ်ညီၣ်တီန့ၣ်လီၤ.

⁶ အဝဲသံကွၢ်ဝဲ, ယကလီတၢ်ဒီးစံးလၢယမ့ၢ်ပှၤမၤကမၣ်တၢ် န့ၣ်ကသ့ဒ်လဲၣ်. ယတူၢ်ဘၣ်တၢ်မၤဘၣ်ဒိဆါယၤတုၤယ သံသ့ဘၣ်ဆၣ်ယတၢ်ဒဲးဘးတအိၣ်ဘၣ်.

⁷ မ့ၢ်သုထံၣ်ပှၤလီၤဂာ်ဒ်စီၤယိၤဘးတဂၤဂၤစ့ၢ်ကီးဧါ. အဝဲတပာ်ဖျါအတၢ်ယူးယီၣ်ကစၢ်ယွၤနီတဘျီဘၣ်.

⁸ အဝဲအဲၣ်ဒိးပှၤအၢပှၤသီအတၢ်ဒီတံၤဒီသကိးဒီးပိာ်သကိး ကျဲဒီးပှၤတၢ်ဒဲးဘးဖိတဖၣ်လီၤ.

⁹ အဝဲစံးလၢတၢ်ကျဲးစၢးပိာ်ထွဲကစၢ်ယွၤအတၢ်ဘၣ် အသးန့ၣ်အဘျူးတအိၣ်နီတမံၤဘၣ်.

¹⁰ ပှၤလၢအအိၣ်ဒီးတၢ်သူၣ်ဆးသးဆးသ့ၣ်ဧၢ, ဒိကနၣ်ယၤ တက့ၢ်. သ့တၢ်လၢာ်ကစၢ်ယွၤန့ၣ်မ့ၢ်အကမၤတၢ်လၢအကမူၤ ကမၣ်န့ၣ်ဧါ.

¹¹ အဂ့ၢ်ဒ်အံၤ, ကဟ့ၣ်ကၣ်ပှၤကညီတဂၤဒ်အမၤတၢ်အသိး, ဒီးကဒုးထံၣ်န့ၢ်တၢ်လၢပှၤကညီဒ်အကျဲအကပူၤဒၣ်ဝဲတဖၣ် အသိးန့ၣ်လီၤ.

¹² သ့တၢ်လၢာ်ကစၢ်ယွၤတမၤဘၣ်တၢ်အၢတၢ်သီဘၣ်. ဒီးတစံၣ်ညီၣ်တတီဘၣ်ပှၤနီတဂၤနီတစုဘၣ်.

¹³ မ့ၢ်ကစၢ်ယွၤဒိးန့ၢ်ဘၣ်တၢ်စိတၢ်ကမီၤလၢပှၤတဂၤဂၤအအိၣ် န့ၣ်ဧါ. မ့ၢ်ပှၤတဂၤဂၤဟ့ၣ်မူဟ့ၣ်ဒါအီၤလၢကပၢဟီၣ်ခိၣ်န့ၣ်ဧါ.

¹⁴ တုၤမ့ၢ်ကစၢ်ယွၤဟံးန့ၢ်ကဒါက့ၤတၢ်မူအသါဒီး,

¹⁵ ကယဲၢ်ပှၤကိးဂၤဒဲးလၢအမူကသံဝဲဒီးကကဲထီၣ်ကဒါ က့ၤဖၣ်ဆါန့ၣ်လီၤ.

¹⁶ ဒီးသုတၢ်သ့ၣ်ညါနၢ်ပၢၢ်မ့ၢ်အိၣ်ဒီးကနၣ်တၢ်အံၤ, ဒိကနၣ်တၢ်လၢယစံးတက့ၢ်.

¹⁷ ပှၤလၢအသးဟ့တၢ်စံၣ်ညီၣ်တီန့ၣ်ပၢတၢ်ကသ့စ့ၢ်ကီးဧါ. မ့ၢ်သုကစံၣ်ညီၣ်ကစၢ်ယွၤလၢ အစံၣ်ညီၣ်တၢ်တီဒီးဒိၣ်ဝဲ ထီဝဲတဂၤန့ၣ်ဧါ.

¹⁸ ကစၢ်ယွၤစံၣ်ညီၣ်ဃၣ်စီၤပၤတဖၣ်ဒီးပဒိၣ်ဖးဒိၣ်တဖၣ်ဖဲ အဝဲသ့ၣ်အလုၢ်အပှ့ၤတအိၣ်လၢၤမ့ၢ်ဂ့ၤမၤတၢ်အၢတၢ်သီမ့ၢ်ဂ့ၤ န့ၣ်လီၤ.

¹⁹ အဝဲတကွၢ်မဲာ်ဘၣ်ပှၤပၢတၢ်သ့ၣ်တဖၣ်ဒီးတပာ်ဒိၣ်ပာ်ဂ့ၤဘၣ် ပှၤထူးပှၤတီၤလၢပှၤဖီၣ်ဖိယာ်ဖိအဖီခိၣ်န့ၣ်ဘၣ်. အဂ့ၢ်ဒ်အံၤအဝဲတ့လီၤပှၤကိးဂၤဒဲးလီၤ.

²⁰ ပှၤကညီတဂၤကသံဝဲသတူၢ်ကလာ်လၢမုၢ်နၤလီၤ. ကစၢ်ယွၤဆီၣ်လီၤပှၤကညီသ့ၣ်တဖၣ်ဒီးအဝဲသ့ၣ်ဟးဂီၤ ကွံာ်ဝဲလီၤ. ဒီးသုးကွံာ်ပှၤဂံၢ်ဆူၣ်ဘါဆူၣ်တဖၣ်ညီကဒၣ် န့ၣ်လီၤ.

²¹ အဂ့ၢ်ဒ်အံၤ, ယွၤအမဲာ်အိၣ်ဝဲလၢပှၤကညီအကျဲအဖီခိၣ်, ဒီးကယဲၢ်အခီၣ်ခါန့ၣ်ထံၣ်ဝဲလီၤ.

²² တၢ်ခံးဒီးတၢ်ခံးယိာ်လၢတၢ်ပာ်ခူသူၣ်ပှၤတၢ်ဒဲးဘးဖိ ကသ့ဝဲအလီၢ်န့ၣ်တအိၣ်ဘၣ်လၢကစၢ်ယွၤအမဲာ်ညါဘၣ်.

²³ ကစၢ်ယွၤပာ်လီၤတၢ်ဆၢကတီၢ်လၢပှၤကညီကဘၣ်လဲၤဒီး ဒိးဘၣ်တၢ်စံၣ်ညီၣ်လၢအီၤန့ၣ်အလီၢ်တအိၣ်ဘၣ်.

²⁴ လၢကသုးကွံာ်ပှၤခိၣ်ပှၤနၢ်တဖၣ်ဒီး ပာ်လီၤပှၤအဂၤတဖၣ် လၢအဝဲသ့ၣ်အလီၢ်အဂီၢ်န့ၣ်, အလီၢ်တအိၣ်လၢ ကစၢ်ယွၤကသမံသမိးတၢ်ဘၣ်.

²⁵ မ့ၢ်လၢအဝဲသ့ၣ်ညါတၢ်လၢ အဝဲသ့ၣ်မၤဝဲတဖၣ် အဃိအဝဲပာ်လီၤကွံာ်အဝဲသ့ၣ်ဒီး မၤလီၤသဘှံးကွံာ်အီၤလၢ မုၢ်နၤခီန့ၣ်လီၤ.

²⁶ စံၣ်ညီၣ်ပှၤတၢ်ဒဲးဘးဖိတဖၣ်လၢအတၢ်အၢတၢ်သီအဃိဖဲ ပှၤကိးဂၤဒဲးထံၣ်အီၤသ့အလီၢ်န့ၣ်လီၤ.

²⁷ အဂ့ၢ်ဒ်အံၤ, အဝဲသ့ၣ်ဆိကတီၢ်အတၢ်ပိာ်ထွဲအခံဒီးလဲၤကပာ် ကွံာ်ကယဲၢ်အတၢ်မၤလိာ်ခဲလၢာ်န့ၣ်လီၤ.

²⁸ အဝဲသ့ၣ်မၤဆူၣ်ပှၤဖှီၣ်ဖိယာ်ဖိသ့ၣ်တဖၣ်တုၤအကိးထီၣ်ကစၢ်ယွၤ ဒီးအဝဲနၢ်ဟူပှၤဖှီၣ်ဖိယာ်ဖိတဖၣ်အတၢ်ကိးထီၣ်လၢတၢ်မၤစၢၤ အဂီၢ်န့ၣ်လီၤ.

²⁹ တုၤမ့ၢ်ကစၢ်ယွၤပာ်လီၤအသးလၢကအိၣ်ဘှ့ၣ်အိၣ်ဘှီၣ်ဒီး မတၤပာ်တၢ်ကမၣ်လၢအလိၤသ့တဂၤလဲၣ်. တုၤအပာ် သဒၢအမဲာ်ဒီးမတၤထံၣ်အီၤကသ့တဂၤလဲၣ်.

³⁰ လၢပှၤတစူၢ်တနာ်ယွၤအတၢ်ပၢဒီးပျံၤသကွီၤတဖၣ်ကဘၣ် တၢ်တြီအီၤန့ၣ်ပှၤဂီၢ်မုၢ်မၤတၢ်တသ့ဘၣ်နီတမံၤဘၣ်.

³¹ စီၤယိၤဘးဧၢ, မ့ၢ်နတဲလီၤကျဲၤလီၤနတၢ်ကမၣ်တဖၣ်လၢ ကစၢ်ယွၤဒီးအၢၣ်လီၤတ့ၢ်လံနသးလၢနတမၤလၢၤတၢ်ဒဲးဘး န့ၣ်ဘၣ်ဧါ.

³² မ့ၢ်နဃ့တ့ၢ်ကစၢ်ယွၤလၢကဒုးနဲၣ်နၤနတၢ်ကမၣ်တဖၣ်ဒီးမ့ၢ် နအၢၣ်လီၤထွဲလၢနကဆိကတီၢ်တၢ်မၤတၢ်အၢန့ၣ်ဧါ.

³³ မ့ၢ်လၢနဂ့ၢ်လိာ်တၢ်လၢ ကစၢ်ယွၤမၤဝဲအဃိမ့ၢ်နမုၢ်လၢ်လၢ အဝဲကမၤတၢ်လၢနအဲၣ်ဒိးအီၤကသ့ဧါ. ပှၤကဘၣ်စံၣ်ညီၣ်တဲာ်တၢ် မ့ၢ်နၤလီၤ. တမ့ၢ်ယၤဘၣ်. တဲပှၤတၢ်လၢ နဆိကမိၣ်အီၤခဲအံၤတက့ၢ်.

³⁴ သပှၢ်ကတၢၢ်ပှၤလၢအအိၣ်ဒီး တၢ်သ့ၣ်ညါနၢ်ပၢၢ်တဖၣ်ကအၢၣ်လီၤဒီး, ပှၤကူၣ်သ့တဖၣ်လၢ အနၢ်ဟူယတၢ်ကတိၤကစံးဝဲလၢ,

³⁵ စီၤယိၤဘးကတိၤတၢ်လၢတၢ်သ့ၣ်ညါနၢ်ပၢၢ်တအိၣ်ဘၣ်အပူၤ, ဒီးအတၢ်ကတိၤတဖၣ်န့ၣ်အခီပညီတအိၣ်ဘၣ်.

³⁶ ကြၢးလၢစီၤယိၤဘးဘၣ်တၢ်မၤကွၢ်အီၤတုၤအလၢာ်အခၢးလီၤ. အဂ့ၢ်ဒ်အံၤအဝဲကတိၤဆၢတၢ်ဒ်ပှၤအအၢအသီတဂၤအသိးန့ၣ်လီၤ.

³⁷ အဝဲပာ်ဖှိၣ်တၢ်ပူထီၣ်လၢအတၢ်ဒဲးဘးတဖၣ်အဖီခိၣ်, ဒဲအစုလၢပကျါလၢတၢ်ဒုၣ်ဒွဲၣ်အပူၤ, ဒီးမၤအါထီၣ်အတၢ် ကတိၤတဖၣ်ထီဒါကစၢ်ယွၤလီၤ.