လံာ်စီၤယိၤဘး 32 - Sgaw Karen Common Bible

စီၤအလံဟူၤအတၢ်ကတိၤတဖၣ်

¹ မ့ၢ်လၢစီၤယိၤဘးဆိကမိၣ်ဝဲလၢအတီဝဲလိၤဝဲလၢအမဲာ်ညါ ဒၣ်ဝဲဒ်အံၤသတးဒီး, ပှၤသၢဂၤန့ၣ်ဆိကတီၢ်အတၢ်ကျဲးစၢးကတိၤဆၢ စီၤယိၤဘးန့ၣ်လီၤ.

² ဘၣ်ဆၣ်ဒီးပှၤဘူစးဖိဘၣ်ဃးဒီးစီၤရၣ်အဒူၣ်ဖိထၢဖိစီၤဘၤ ရက့လးအဖိခွါစီၤအလံဟူၤလၢအဆၢထၢၣ်ဖဲ တၢ်ကပၤန့ၣ် ပၢၤဃာ်အသးတန့ၢ်လၢၤဘၣ်. အဝဲအသးထီၣ်စီၤယိၤဘးမ့ၢ်လၢစီၤယိၤဘးပာ်တီပာ်လိၤအသး ဒိၣ်န့ၢ်ကစၢ်ယွၤအဃိန့ၣ်လီၤ.

³ အဝဲအသးထီၣ်စ့ၢ်ကီးစီၤယိၤဘးအတံၤသကိးသၢဂၤန့ၣ်လီၤ. အဝဲသ့ၣ်တထံၣ်န့ၢ်ကျဲ နီတဘိလၢ ကစံးဆၢစီၤယိၤဘးအဂီၢ်ဘၣ် ဒီး တၢ်အံၤဖျါမၤအသးဒ်သိး ကစၢ်ယွၤမၤကမၣ်တၢ်န့ၣ်လီၤ.

⁴ မ့ၢ်လၢစီၤအလံဟူၤမ့ၢ်ပှၤသးစၢ်ကတၢၢ်အဃိအဝဲအိၣ်ခိးတ့ၢ် ဝဲတုၤပှၤကိးဂၤဒဲးစံးကတိၤတၢ်ဝံၤဝဲန့ၣ်လီၤ.

⁵ ဒီးတုၤအထံၣ်ဝဲလၢပှၤသၢဂၤကတိၤဆၢက့ၤစီၤယိၤဘးတသ့ ဘၣ်န့ၣ်ဒီးအဝဲအသးဒိၣ်ထီၣ်ဝဲ,

⁶ ဒီးစးထီၣ်ကတိၤတၢ်န့ၣ်လီၤ. ယသးစၢ်ဒံးဒီးသုဝဲသ့ၣ်သုသး ပှၢ်တ့ၢ်လံ. လၢတၢ်န့ၣ်အဃိယအိၣ်ဒီးတၢ်ဘၣ်ယိာ်လၢယကတဲ သုယတၢ်ဆိကမိၣ်န့ၣ်လီၤ.

⁷ ယဆိကမိၣ်လၢသုကြၢးစံးကတိၤတၢ်, ဒီးသုဝဲပှၤသးပှၢ် တဖၣ်ကြၢးနီၤလီၤသုတၢ်ကူၣ်သ့န့ၣ်လီၤ.

⁸ ဘၣ်ဆၣ်တၢ်အံၤမ့ၢ်ယွၤသ့တၢ်လၢာ်ကစၢ်အသးလၢအဟဲ ဆူပှၤကညီတဖၣ်အအိၣ်ဒီးဟ့ၣ်အီၤလၢတၢ်ကူၣ်သ့န့ၣ်လီၤ.

⁹ တမ့ၢ်ထဲပှၤသးပှၢ်တဖၣ်မ့ၢ်ပှၤအကူၣ်တၢ်သ့ဒီးပှၤအနံၣ်အါ လါအါတဖၣ်ဧိၤနၢ်ပၢၢ်တၢ်အဘၣ်န့ၣ်ဘၣ်.

¹⁰ မၤသးဒ်န့ၣ်ဒီးခဲကနံၣ်အံၤယစံး, ဒိကနၣ်ယၤဒီးပျဲယတဲ သုလၢယတၢ်ဆိကမိၣ်စ့ၢ်ကီးတက့ၢ်.

¹¹ ဖဲသုကတိၤတၢ်န့ၣ်ယဒိကနၣ်လၢတၢ်သူၣ်စူၤသးစူၤအပူၤဒီး ဖဲသုဃုတၢ်ကူၣ်သ့အတၢ်ကတိၤအကတီၢ်န့ၣ်ယအိၣ်ခိးယဲလီၤ.

¹² ယဒိကနၣ်သုတၢ်ကတိၤလီၤတံၢ်လီၤဆဲးန့ၣ်လီၤ. ဘၣ်ဆၣ်ဒီး, ပှၤလၢသုကျါလၢအဒုးနဲၣ်ဖျါထီၣ်စီၤယိၤဘး အတၢ်ကမၣ်မ့ၢ်ဂ့ၤ, ပှၤလၢအကတိၤဆၢက့ၤစီၤယိၤဘး အတၢ်ကတိၤမ့ၢ်ဂ့ၤတအိၣ်ဘၣ်နီတဂၤဘၣ်.

¹³ သုစံးလီၤသုသးလၢ သုထံၣ်န့ၢ်တၢ်ကူၣ်သ့, ကသ့ဒ်လဲၣ်. ကစၢ်ယွၤကဘၣ်စံးဆၢ စီၤယိၤဘး, မ့ၢ်လၢသုမၤတသ့ဘၣ်အဃိန့ၣ်လီၤ.

¹⁴ စီၤယိၤဘးတပညိၣ်ဃီၤအတၢ်ကတိၤထီဒါတဖၣ်ဆူယအိၣ်ဘၣ်. မ့ၢ်ဆူသုအိၣ်န့ၣ်လီၤ. ဒီးယတကတိၤဆၢဘၣ်အီၤဒ်သုတၢ်ကတိၤတဖၣ်အသိးန့ၣ်ဘၣ်.

¹⁵ စီၤယိၤဘးဧၢ, အဝဲသ့ၣ်တဖၣ်အသးလီၤကတုၤဒီးကတိၤ ဆၢနၤတဘၣ်လၢၤဘၣ်. အဝဲသ့ၣ်အတၢ်ကတိၤတအိၣ်လၢၤဘၣ် လၢကကတိၤတၢ်အဂီၢ်ဘၣ်.

¹⁶ မ့ၢ်ယကဘၣ်အိၣ်ခိးဒံးယဲဖဲအဝဲသ့ၣ်အိၣ်ဘှီၣ်အခါန့ၣ်ဧါ. အဝဲသ့ၣ်ဂဲၤဆၢထၢၣ်ဖဲန့ၣ်ဒီးတကတိၤလၢၤတၢ်နီတမံၤဘၣ်.

¹⁷ ယကဟ့ၣ်စ့ၢ်ကီးယတၢ်ကတိၤခဲအံၤဒီးယကတဲနၤယတၢ် ဆိကမိၣ်န့ၣ်လီၤ.

¹⁸ အဂ့ၢ်ဒ်အံၤ, တၢ်ကတိၤတဖၣ်အိၣ်ပှဲၤလၢယပူၤ, ဒီးသးလၢယပူၤ မၤဆူၣ်ယၤလီၤ.

¹⁹ ယမ့ၢ်တန့ၢ်ဘၣ်တၢ်ခွဲးတၢ်ယာ်လၢယကကတိၤဘၣ်တၢ်န့ၣ်ဒီး ယကပိၢ်ဖးကွံာ်ဝဲဒ်ထၢၣ်တၢ်ဖံးတဖျၢၣ်လၢအပှဲၤဝဲဒီးစပံးထံအ သီအသိးန့ၣ်လီၤ.

²⁰ ယကဘၣ်ကတိၤတၢ်ဒ်သိးယကထံၣ်န့ၢ်တၢ်မၤမုာ်ယၤ, ယကဘၣ်အိးထီၣ်ယနိးဖံးဒီးကတိၤဆၢတၢ်န့ၣ်လီၤ.

²¹ ယတပာ်ဖျါထီၣ်တၢ်ကွၢ်မဲာ်ဆူပှၤတဂၤဂၤမ့ၢ်ဂ့ၤ, စံးထီၣ်ပတြၢၤထးခိၣ်ဖံးလာ်ပှၤတဂၤဂၤမ့ၢ်ဂ့ၤန့ၣ်ဘၣ်.

²² အဂ့ၢ်ဒ်အံၤ, ယမ့ၢ်အိၣ်ဒီး တၢ်သ့တၢ်ဘၣ်လၢ တၢ်စံးထီၣ်ပတြၢၤထးခိၣ်ဖံးလာ်ပှၤအဂၤန့ၣ်, ပှၤတ့လီၤယၤကစိာ်ထီၣ်ကွံာ်ယၤချ့သဒံးန့ၣ်လီၤ.