လံာ်စီၤယိၤဘး 31 - Sgaw Karen Common Bible

¹ ယမၤတ့ၢ်လံတၢ်အၢၣ်လီၤအီလီၤလၢယတကွၢ်မုၣ်လိၣ်ဘိ လၢတၢ်သးကတၢအပူၤနီတဘျီလၢၤဘၣ်.

² သ့တၢ်လၢာ်ကစၢ်ယွၤမၤတၢ်မနုၤလၢပဂီၢ်လဲၣ်. ပကန့ၢ်သါတၢ်မနုၤလၢအအိၣ်လဲၣ်.

³ အဝဲဒုးလီၤဘၣ်တၢ်တတၢးတနါဒီးတၢ်ဟးဂူာ်ဟးဂီၤဆူပှၤ မၤတၢ်ကမၣ်တၢ်တဖၣ်အလိၤန့ၣ်လီၤ.

⁴ ကစၢ်ယွၤသ့ၣ်ညါယတၢ်မၤကိးမံၤဒဲးဒီးထံၣ်ဝဲယခီၣ်ခါကိးကါ ဒဲးန့ၣ်လီၤ.

⁵ ယဆိၣ်လီၤယသးလၢယတမၤလၢၤတၢ်အၢတၢ်သီနီတဘျီဒီး ယတကျဲးစၢးလၢၤနီတဘျီလၢယကလီန့ၢ်ပှၤဂၤဘၣ်.

⁶ မ်ကစၢ်ယွၤစီၤယၤလၢစီၤပီၢ်တီအပူၤတက့ၢ်. ဒီးအဝဲကထံၣ်န့ၢ် လၢယမ့ၢ်ပှၤအလၢအပှဲၤတဂၤဒ်လဲၣ်န့ၣ်လီၤ.

⁷ ယခီၣ်ခါမ့ၢ်ဃၣ်ကွံာ်အသးလၢကျဲအတီဒီးယသးမ့ၢ်ကတၢ ထွဲယမဲာ်ချံအတၢ်ထံၣ်ဒီးယစုမ့ၢ်ဘၣ်အၢလၢတၢ်ဒဲးဘးန့ၣ်ဒီး,

⁸ မ်ပှၤဂၤအီၣ်တၢ်လၢယဖှံဒီးတၢ်လၢယသူၣ်လီၤဖျးလီၤန့ၣ်ဘၣ် တၢ်ထဲးထီၣ်ကွံာ်အီၤတက့ၢ်.

⁹ ယသးမ့ၢ်ဘၣ်တၢ်ကလံာ်န့ၢ်အီၤလၢပှၤလၢယဃၢၤအမါဒီး ယမ့ၢ်ခိးခူသူၣ်တၢ်လၢအတြဲၤခီၣ်ထံးန့ၣ်ဒီး,

¹⁰ မ်ယမါမၤဒုးအီၣ်ဒုးအီပှၤအဂၤတဂၤဒီးမံဃုာ်ဒီးအီၤတ က့ၢ်.

¹¹ တၢ်ဒဲးဘးဒိၣ်ထဲအံၤန့ၣ်ကြၢးဘၣ်တၢ်စံၣ်ညီၣ်သံအီၤလီၤ.

¹² တၢ်အံၤကမ့ၢ်မ့ၣ်အူလၢအအီၣ်တၢ်တုၤလၢပှၤသံတဖၣ်အလီၢ် ဒီးအီၣ်ကွံာ်ကယဲၢ်တၢ်အိၣ်ဒီးယၤခဲလၢာ်န့ၣ်လီၤ.

¹³ တုၤယကုၢ်အကျါတဂၤ ကဒူးကဒ့ၣ်တၢ်ထီဒါယၤန့ၣ်, ယဒိကနၣ်ဒီး မၤအီၤတီတီလိၤလိၤလီၤ.

¹⁴ ယမ့ၢ်တမၤဒ်န့ၣ်ဘၣ်ဒီး ယကွၢ်ဆၢၣ်မဲာ်ကစၢ်ယွၤ ကသ့ဒ်လဲၣ်. ဖဲကစၢ်ယွၤဟဲလၢ ကစံၣ်ညီၣ်ယၤအဂီၢ်ဒီး, ယစံးတၢ်မနုၤကသ့လဲၣ်.

¹⁵ ကစၢ်ယွၤတဂၤဃီလၢအတ့လီၤတ့ၢ်ယၤအံၤတ့လီၤစ့ၢ်ကီးယကုၢ် တဖၣ်န့ၣ်လီၤ.

¹⁶ ယတဂ့ၢ်လိာ်လၢယကမၤစၢၤပှၤဖှီၣ်ဖိယာ်ဖိမ့ၢ်ဂ့ၤ, ယတပျဲပှၤ မုၣ်ကမဲတဖၣ်အိၣ်လၢတၢ်သူၣ်ဟးဂူာ်သးဟးဂီၤအပူၤမ့ၢ်ဂ့ၤနီ တဘျီဘၣ်.

¹⁷ ဒီးယတပျဲပှၤဖိၣ်ဃဲတဖၣ်သၣ်ဝံၤလီၤဒိဖဲယအီၣ်တၢ်အခါန့ၣ်ဘၣ်.

¹⁸ ယအံးထွဲကွၢ်ထွဲပှၤဖိၣ်ဃဲတဖၣ်ဒ်ပၢ်တဂၤအသိးတစိၤဒၣ်ယၤ ဒီးပၢဆှၢတ့ၢ်ပှၤမုၣ်ကမဲတဖၣ်လၢယအိၣ်ဖျဲၣ်ထီၣ်လံၤလံၤန့ၣ်လီၤ.

¹⁹ တုၤယထံၣ်ဘၣ်ပှၤတဂၤဂၤလၢအလိၣ်ဘၣ်တၢ်မၤစၢၤ, ဒီးဖှီၣ်ဝဲယာ်ဝဲတုၤအကူအသိးလၢကမၤလၢၤအီၤတအိၣ်ဘၣ်ဒီး,

²⁰ ယကဟ့ၣ်အီၤတၢ်ကူတၢ်သိးလၢအဘၣ်တၢ်မၤအီၤလၢ သိအဆူၣ်လၢအဟဲထီၣ်လၢယသိဒၣ်ယဲတဖုအပူၤန့ၣ်လီၤ. အန့ၣ်ဒီးအဝဲဒၣ်ကစံးထီၣ်ပတြၢၤယၤလၢ အသးဒီဖျၢၣ်ညါန့ၣ်လီၤ.

²¹ ယသ့ၣ်ညါလၢယကမၤနၢၤတၢ်လၢကွီၢ်ဘျီၣ်ပူၤသတးဒီး ယမ့ၢ်လီန့ၢ်ပှၤဖိၣ်ဃဲတဂၤ, တစုစုဒီး,

²² မ်ယစုဒုၣ်စုတီၤဘၣ်တၢ်မၤကၢ်ကွံာ်အီၤဒီးမၤလီၤဖျူကွံာ်အီၤ လၢယဖံဘၣ်ခိၣ်န့ၣ်တက့ၢ်.

²³ အဂ့ၢ်ဒ်အံၤယပျံၤကစၢ်ယွၤအတၢ်စံၣ်ညီၣ်သတးဒီး, တၢ်မၤဒ်သိးအံၤန့ၣ်ယမၤတဘူၣ်နီတဘျီဘၣ်.

²⁴ ယတသန့ၤတ့ၢ်ယသးလၢတၢ်ထူးတၢ်တီၤအပူၤမ့ၢ်ဂ့ၤ,

²⁵ ဒီးယတပာ်ကဖၢလၢယသးလၢယတၢ်စုလီၢ်ခီၣ်ခိၣ်အဃိ မ့ၢ်ဂ့ၤနီတဘျီဘၣ်.

²⁶ ယတဘူၣ်ထီၣ်ဘါထီၣ်တ့ၢ်မုၢ်လၢအတၢ်ကပြုၢ်ကပြီၤအဃိ န့ၣ်မ့ၢ်ဂ့ၤဒီးလါလၢကယဲၢ်အတၢ်ဃံတၢ်လၤအဃိန့ၣ်မ့ၢ်ဂ့ၤ နီတဘျီဘၣ်.

²⁷ ယတဘၣ်တၢ်လ့ပစီယၤလၢယကဘါထီၣ်တၢ်တဖၣ်န့ၣ်လၢ တၢ်ခူသူၣ်အပူၤဒီးယတဖှိၣ်ထီၣ်ယစုလၢတၢ်ယူးယီၣ်အီၤဘၣ်.

²⁸ တၢ်ကမၣ်ဒ်သိးအံၤန့ၣ်ကြၢးဘၣ်တၢ်စံၣ်ညီၣ်သံအီၤန့ၣ်လီၤ. တၢ်အံၤမ့ၢ်တၢ်သမၢသ့တၢ်လၢာ်ကစၢ်ယွၤန့ၣ်လီၤ.

²⁹ ယတသူၣ်ခုသးခုဘၣ်ဖဲယဒုၣ်ယဒါသ့ၣ်တဖၣ်တူၢ်ဘၣ်ခီၣ်ဘၣ်တၢ် မ့ၢ်ဂ့ၤ, ယတသူၣ်မံသးမံဘၣ်ဖဲအဝဲသ့ၣ်ဘၣ်ကွၢ်ဆၢၣ်မဲာ်ဒီးတၢ် ဟးဂူာ်ဟးဂီၤမ့ၢ်ဂ့ၤနီတဘျီန့ၣ်ဘၣ်.

³⁰ ယတမၤတၢ်ဒဲးဘးနီတဘျီခီဖျိတၢ်ထုကဖၣ်လၢအဝဲသ့ၣ် အတၢ်သံအဂီၢ်ဘၣ်.

³¹ ကယဲၢ်ယပှၤမၤတၢ်ဖိခဲလၢာ်သ့ၣ်ညါလၢယတူၢ်လိာ်တ့ၢ် ပှၤသမှံၤတဖၣ်ထီဘိန့ၣ်လီၤ.

³² ယကွဲမုာ်တ့ၢ်ပှၤလဲၤတၢ်ဖိသ့ၣ်တဖၣ်ဆူဟံၣ်ပူၤဒီးတပျဲဘၣ် အဝဲသ့ၣ်ကမံလၢကျဲခိၣ်နီတဘျီဘၣ်.

³³ ပှၤအဂၤကျဲးစၢးမၤဘၢအတၢ်ကမၣ်တဖၣ်ဘၣ်ဆၣ်ဒီးယတပာ် တဒၢတ့ၢ်ယတၢ်ကမၣ်နီတဘျီဘၣ်.

³⁴ ယတပျံၤဘၣ်တၢ်လၢပှၤကသီၣ်ဝံသဲကလၤလၢယဂ့ၢ်နီတဘျီဘၣ်. ယတအိၣ်ဃိကလာ်ဒီးအိၣ်လၢဟံၣ်ပူၤလၢတၢ်ပျံၤဘၣ်အဝဲသ့ၣ်အတၢ် ဒုၣ်ဒွဲၣ်စံးအၢယၤအဃိန့ၣ်နီတဘျီဘၣ်.

³⁵ ပှၤတအိၣ်နီတဂၤလၢကဒိကနၣ်ယတၢ်ကတိၤဘၣ်ဧါ. ယဆိၣ်လီၤယသးလၢတၢ်လၢယစံးယဲကိးဘီဒဲးန့ၣ်မ့ၢ်အမ့ၢ် အတီလီၤ. မ်သ့တၢ်လၢာ်ကစၢ်ယွၤစံးဆၢယၤန့ၣ်တက့ၢ်. ယဒုၣ်ယဒါတဖၣ်မ့ၢ်ဟဲစိာ်အတၢ်ကွဲးထီဒါယၤဒ်သိးယကထံၣ် ဘၣ်အီၤဒီး,

³⁶ ယကသိးထီၣ်အီၤလၢယဖံဘၣ်ခိၣ်အလိၤလၢတၢ်ပာ်ကဖၢ လၢယသးပူၤ, ဒီးကုာ်ထီၣ်အီၤလၢယခိၣ်လိၤဒ်ခိၣ်ကွီၤအသိးန့ၣ် လီၤ.

³⁷ ယကတဲကစၢ်ယွၤလၢတၢ်ခဲလၢာ်လၢယမၤတ့ၢ်လံယဲ တဖၣ်ဒီးယကသုးဘူးယသးဆူအမဲာ်ညါဒ်စီၤပၤဖိခွါတဂၤအသိး န့ၣ်လီၤ.

³⁸ ယမ့ၢ်ဟုၣ်န့ၢ်ဟီၣ်ခိၣ်လၢယသူၣ်လီၤဖျးလီၤတ့ၢ်အီၤဒီးဟံးန့ၢ် ကွံာ်အီၤလၢလၢအကစၢ်နီၢ်နီၢ်တဖၣ်အအိၣ်,

³⁹ ယမ့ၢ်အီၣ်တ့ၢ်တၢ်အီၣ်လၢအမဲထီၣ်တ့ၢ်ဖဲန့ၣ်, ဒီးပျဲပှၤထဲၣ်တၢ် တဖၣ်သၣ်ဝံၤလီၤဒိန့ၣ်ဒီး,

⁴⁰ လၢဘုကၠူၣ်ဒီးဘုမုယီၤအလီၢ်န့ၣ်မ်တၤဆှုၣ်တၤမဲဒီးနီၣ် ဧိၤမံၤဧိၤမဲထီၣ်တက့ၢ်. စီၤယိၤဘးအတၢ်ကတိၤတဖၣ်လၢာ်လံ