လံာ်စီၤယိၤဘး 30 - Sgaw Karen Common Bible

¹ မ့မ့ၢ်ခဲကနံၣ်အံၤပှၤလၢအသးစၢ်န့ၢ်ယၤတဖၣ်နံၤဘၣ်ဖၣ်လဲ ယၤလီၤ. အဝဲသ့ၣ်အပၢ်တဖၣ်အလုၢ်အပှ့ၤတအိၣ်တုၤဒၣ်လဲာ် ယသးတအိၣ်လၢယကပျဲအမၤစၢၤယထွံၣ်လၢအကွၢ်ထွဲ ယသိတဖၣ်န့ၣ်ဘၣ်.

² အဝဲသ့ၣ်တဖၣ်မ့ၢ်ပှၤတဖုလၢအဂံၢ်အဘါလၢာ်ကွံာ်လံဒီးကမၤ ယတၢ်မၤတမံၤမံၤအဂီၢ်ဒၣ်လဲာ်န့ၣ်အဂံၢ်အဘါစၢ်ကဲၣ်ဆိးလီၤ.

³ အဝဲသ့ၣ်တဖၣ်န့ၣ်ဖှီၣ်ယာ်ဝဲဒီးတၢ်သၣ်ဝံၤအသးဒိၣ်မးတုၤဒၣ် လဲာ်ကအ့ၣ်အီၣ်သ့ၣ်ဂံၢ်ဃ့တဖၣ်လၢတၢ်လီၢ်လီၤဃီအပူၤဖဲ မုၢ်နၤအခါန့ၣ်လီၤ.

⁴ အဝဲသ့ၣ်ထဲးထီၣ်မဲးမုၢ်ခိၣ်အတၢ်မုၢ်တၢ်ဘိဒီးအီၣ်ဝဲ, ပထိးသ့ၣ်ရီသ့ၣ်အဂံၢ်လၢအတဝံာ်တဘဲဒၣ်လဲာ်န့ၣ်အီၣ်ဝဲဒၣ်လီၤ.

⁵ ပှၤကိးဂၤဒဲးကိးပသူဟီထီၣ်ကွံာ်အီၤဒ်အကိးပသူဟီထီၣ်ကွံာ် တၢ်ဘျၣ်တဖၣ်အသိးန့ၣ်လီၤ.

⁶ အဝဲသ့ၣ်ဘၣ်အိၣ်ဝဲလၢလၢၢ်ကအိတဖၣ်အပူၤဒီးတၢ်ပူၤလၢ အဘၣ်တၢ်ခူၣ်အီၤလၢလၢၢ်ခိၣ်လ့ကျါန့ၣ်လီၤ.

⁷ အဝဲသ့ၣ်ကိးထီၣ်ဝဲဒ်ဒၣ်ဆၣ်ဖိကီၢ်ဖိအသိးလၢတၢ်လီၢ်အိၣ် သယုၢ်အပူၤဒီးဖိးဟုလိာ်အသးလၢတၤဆှုၣ်တၤမဲအဖီ လာ်ဒ်သိးကမၤလၢၤအသးအဂီၢ်န့ၣ်လီၤ.

⁸ အဝဲသ့ၣ်မ့ၢ်ပှၤဟးဂီၤဖိအဖိ, ပှၤလၢအမံၤတအိၣ်ဘၣ်အဖိဒီး မ့ၢ်ပှၤလၢအဘၣ်တၢ်ဟီထီၣ်ကွံာ်အီၤလၢကီၢ်ပူၤန့ၣ်လီၤ.

⁹ ခဲကနံၣ်အံၤအဝဲသ့ၣ်ဟဲဒီးနံၤဘၣ်ယၤလီၤ. ယတမ့ၢ်တၢ်နီတမံၤဘၣ်. မ့မ့ၢ်ယမ့ၢ်ဒၣ်တၢ်လီၤနံၤတမံၤလၢအဝဲသ့ၣ်အဂီၢ်န့ၣ်လီၤ.

¹⁰ အဝဲသ့ၣ်ပာ်ယၤဒ် တၢ်လီၤသးဘၣ်အၢ အလီၢ်န့ၣ်လီၤ. အဝဲသ့ၣ် ဆိကမိၣ်ဝဲလၢ အဂ့ၤကဲာ်ဆိးလၢ ယဂီၢ်, ဒီးဟဲဒီးထူးပှဲာ်ယမဲာ်ဒၣ်လဲာ်န့ၣ်လီၤ.

¹¹ မ့ၢ်လၢကစၢ်ယွၤမၤလီၤစၢ်တ့ၢ်လံယဂံၢ်ယဘါဒီးပှၤမၤစၢၤယၤ တအိၣ်ဘၣ်အဃိအဝဲသ့ၣ်ထီဒါယၤလၢအတၢ်သးထီၣ်အပူၤန့ၣ်လီၤ.

¹² ပှၤတဖုအံၤထီဒါယၤလီၤ, ဒုးဃ့ၢ်ကွံာ်ယၤဒီးကတဲာ်ကတီၤ အတၢ်ထီဒါယၤလၢခံကတၢၢ်ဒ်သိးအကမၤသံယၤန့ၣ်လီၤ.

¹³ အဝဲသ့ၣ်မၤတံာ်တာ်ယတၢ်ထူၣ်ဖျဲးထီၣ်အကျဲစၢၤဒ်သိးကမၤဟးဂီၤ ယၤလီၤ. ဒီးပှၤလၢအကတြီအဝဲသ့ၣ်တအိၣ်နီတဂၤဘၣ်.

¹⁴ အဝဲသ့ၣ် ဟဲနုာ်သဖှိဃီၤဆူ ယတိာ်တဖၣ်အပူၤဒီး ဟဲတလ့ၣ်လီၤအသးလၢ ယလိၤလီၤ.

¹⁵ ယဘၣ်တၢ်မၤနၢၤယၤလၢတၢ်ပျံၤတၢ်ဖုး, ယလၤယကပီၤ လီၤမၢ်ကွံာ်ဒ်ကလံၤအူဒံကွံာ်ဖ့အသိးဒီးယတၢ်အိၣ်ဘီၣ်အိၣ် ညီဟးမၢ်ကွံာ်ဒ်တၢ်အၢၣ်အသိးန့ၣ်လီၤ.

¹⁶ ဒီးခဲကနံၣ်အံၤယကသံယဲလီၤ. တၢ်လၢအကမၤမုာ်ထီၣ်က့ၤ ယၤလၢတၢ်နးတၢ်ဖှီၣ်တအိၣ်ဘၣ်နီတမံၤဘၣ်.

¹⁷ လၢမုၢ်နၤန့ၣ်ကယဲၢ်ယဃံယကွဲတဖၣ်ဆါဝဲ, ဒီးတၢ်ဆါလၢအအ့ၣ် ထုးယၤန့ၣ်တဆိကတီၢ်နီတဘျီဘၣ်.

¹⁸ ကစၢ်ယွၤစှီၤယၤလၢယဆ့ကၤအကိာ်လၣ်ဒီးထုးဆ့ဆိယကူ ယသိးတဖၣ်တုၤအက့ၢ်အဂီၤတအိၣ်လၢၤဘၣ်န့ၣ်လီၤ.

¹⁹ အဝဲဒၣ်ကွံာ်လီၤယၤဆူကပံာ်အကျါ, ဒီးယကဲထီၣ်ဟီၣ်ခိၣ် ကမူၣ်ဒီးဖၣ်ဆါန့ၣ်လီၤ.

²⁰ ကစၢ်ယွၤဧၢ, တုၤယကိးထီၣ်နၤန့ၣ်ဒီးနတစံးဆၢယၤနီတဘျီ ဘၣ်. ဒီးတုၤယဃ့ဘါထုကဖၣ်နၤန့ၣ်ဒီးနတဒိကနၣ်ယၤဘၣ်.

²¹ နမၤယၤအၢအၢသီသီဒီးနမၤနးမၤဖှီၣ်ယၤတုၤနဂံၢ်နဘါအလၢာ် န့ၣ်လီၤ.

²² နပျဲကလံၤအူဖျိးကွံာ်ယၤဒီးနထုးဆှဲးဆှိးယၤလၢကလံၤမုၢ် ဒိၣ်အပူၤန့ၣ်လီၤ.

²³ ယသ့ၣ်ညါလၢနကစိာ်လီၤယၤဆူတၢ်သံဒီးဆူတၢ်လီၢ်လၢ အဘၣ်တၢ်တိာ်ပာ်အီၤလၢ ပှၤကိးဂၤဒဲးအဂီၢ်န့ၣ်လီၤ.

²⁴ ပှၤလၢအသးဟးဂီၤတ့ၢ်လံ, ပှၤလၢအမၤတၢ်တသ့ဘၣ်နီတမံၤ, မ့မ့ၢ်ထဲအဃ့တၢ်သးကညီၤတဂၤန့ၣ်ဘၣ်မနုၤလၢနထီဒါအီၤ န့ၣ်လဲၣ်.

²⁵ မ့ၢ်ယတဟီၣ်ဃုာ်ဒီးပှၤဘၣ်တၢ်ကိၢ်တၢ်ဂီၤဒီးသးအုးဃုာ်ဒီး ပှၤလၢအလိၣ်ဘၣ်တၢ်မၤစၢၤတဖၣ်ဘၣ်န့ၣ်ဧါ.

²⁶ တုၤယကွၢ်လၢ်တၢ်ဂ့ၤအကျဲဒီးတၢ်အၢဟဲဘၣ်ယၤဒီးတုၤယမုၢ် လၢ်တၢ်ကပီၤဒီးတၢ်ခံးန့ၢ်ယၤလီၤ.

²⁷ ယသးသူၣ်ကိၢ်သးဂီၤဒီးတဂၢၢ်တကျၢၤဘၣ်နီတစုဘၣ်. ဒီးတၢ်နးတၢ်ဖှီၣ်အမုၢ်နံၤတဖၣ်ချုးန့ၢ်ယၤလီၤ.

²⁸ ယလဲၤတၢ်လၢတၢ်ခံးတၢ်နၤအပူၤဒီးမုၢ်အတၢ်ကပီၤတအိၣ်ဘၣ် ဒီးယၤဘၣ်. ယဆၢထၢၣ်ဃ့တၢ်မၤစၢၤလၢပှၤဂီၢ်မုၢ်အကျါန့ၣ်လီၤ.

²⁹ ယကလုၢ်လီၤဂာ်ဒ်ထွံၣ်ဟီၣ်ခိၣ်မ့ၢ်ဂ့ၤ, ထိၣ်ကီၤလၤအူးမ့ၢ်ဂ့ၤ ကိးထီၣ်ဝဲလၢတၢ်သးအုးဒီးတၢ်သယုၢ်သညိအပူၤအသိးန့ၣ်လီၤ.

³⁰ ယဖံးထီၣ်သူဝဲဒီးယလိၤကိၢ်ကဖးလၢတၢ်လိၤကိၢ်အဃိ န့ၣ်လီၤ.

³¹ တၢ်လီၢ်ဖဲတဘျီယနၢ်ဟူတၢ်သူၣ်ဖှံသးညီအတၢ်သးဝံၣ်န့ၣ် ခဲကနံၣ်အံၤယနၢ်ဟူထဲတၢ်သူၣ်အုးသးအုးဒီးတၢ်ဟီၣ်တၢ် ယၢၤန့ၣ်လီၤ.