လံာ်စီၤယိၤဘး 23 - Sgaw Karen Common Bible

^1-2 ဒီးစီၤယိၤဘးစံးဆၢဝဲဒၣ်, ယကဒူးကဒ့ၣ်ဒံးတၢ်ထီဒါ ကစၢ်ယွၤန့ၣ်လီၤ. ယဆိကတီၢ်လၢယတၢ်ကအုကစွါတန့ၢ်ဘၣ်.

³ ယဆၢလၢယကသ့ၣ်ညါတၢ်ထံၣ်န့ၢ်အီၤအလီၢ်ဒီးသ့ၣ်ညါ ကျဲလဲၤဆူအအိၣ်တၢ်အလီၢ်န့ၣ်လီၤ.

⁴ ယကပာ်ဖျါထီၣ်ယတၢ်ဂ့ၢ်တၢ်ကျိၤလၢအမဲာ်ညါ, ဒီးယကမၤပှဲၤယထးခိၣ်ဒီးတၢ်ဂ့ၢ်လိာ်ဘှီလိာ်အတၢ်ကတိၤ န့ၣ်လီၤ.

⁵ ယအဲၣ်ဒိးသ့ၣ်ညါလၢအဝဲကစံးတၢ်မနုၤလဲၣ်ဒီးအဝဲကစံးဆၢယၤ ဒ်လဲၣ်န့ၣ်လီၤ.

⁶ မ့ၢ်ကစၢ်ယွၤကသူအဂံၢ်အဘါခဲလၢာ်လၢကထီဒါယၤအဂီၢ် န့ၣ်ဧါ. တမ့ၢ်ဘၣ်. အဝဲကဒိကနၣ်ယၤဒ်ယစံးယဲအသိးန့ၣ်လီၤ.

⁷ ယတီယဲလိၤယဲ, ယဂ့ၢ်လိာ်ဘှီလိာ်ဒီးကစၢ်ယွၤသ့ဝဲ, ဒီး အဝဲကတဲဖျါထီၣ်ဝဲလၢယမ့ၢ်ပှၤလၢတၢ်ပာ်တၢ်ကမၣ်အလိၤ အလီၢ်တအိၣ်တစိၤဒၣ်ယၤန့ၣ်လီၤ.

⁸ ယဃုတ့ၢ်လံယဲလၢမုၢ်ထီၣ်ဘၣ်ဆၣ်ကစၢ်ယွၤတအိၣ်ဖဲန့ၣ်ဘၣ်. ဒီးဖဲယဃုအီၤလၢမုၢ်နုာ်န့ၣ်ယတထံၣ်န့ၢ်အီၤဘၣ်.

⁹ ကစၢ်ယွၤမၤတ့ၢ်လံတၢ်လၢကလံၤထံးဒီးကလံၤစိးန့ၣ်လီၤ. ဘၣ်ဆၣ်ယတထံၣ်န့ၢ်ဒံးဘၣ်အီၤဘၣ်.

¹⁰ ကစၢ်ယွၤသ့ၣ်ညါယခီၣ်ကါကိးခါဒဲးလီၤ. အဝဲမ့ၢ်မၤကွၢ် ယၤဒီးအဝဲကထံၣ်လၢယကဆှီယဲဒ်ထူအသိးန့ၣ်လီၤ.

¹¹ ယခီၣ်ဟံးဃးအခီၣ်လီၢ်တဖၣ်, ယပိာ်အကျဲဒီးယတဟးဖး ဒီးအကျဲန့ၣ်ဘၣ်.

¹² တၢ်လၢကစၢ်ယွၤမၤလိာ်ဝဲတဖၣ်န့ၣ်ယမၤယဲထီဘိလီၤ. ယပိာ်ထွဲယဲတၢ်ဘၣ်အသး, တမ့ၢ်ဘၣ်ယသးအတၢ်ဆၢန့ၢ် တဖၣ်န့ၣ်ဘၣ်.

¹³ အဝဲတလဲလိာ်အသးနီတစုဘၣ်. ပှၤထီဒါအီၤမ့ၢ်ဂ့ၤ တြီအီၤမ့ၢ်ဂ့ၤ လၢကမၤတၢ်လၢအအဲၣ်ဒိးမၤဝဲ တသ့နီတဂၤဘၣ်.

¹⁴ အဂ့ၢ်ဒ်အံၤ, အဝဲကမၤလၢထီၣ်ပှဲၤထီၣ်အတၢ်တိာ်ပာ်လၢယဂီၢ်, ဒီးတၢ်တိာ်ပာ်ဒ်န့ၣ်အသိးတဖၣ်အိၣ်ဝဲအါမးလၢအသးပူၤန့ၣ် လီၤ.

¹⁵ မၤသးဒ်န့ၣ်ဒီး, ယပျံၤတၢ်ဖုးတၢ်လၢအမဲာ်ညါ, ဒီးတုၤယဆိကမိၣ်တၢ်ဒီးယကနိးကစုာ်ယဲလီၤ.

¹⁶ သ့တၢ်လၢာ်ကစၢ်ယွၤမၤဟးဂီၤကွံာ်ယတၢ်သူၣ်ဒူသးဒူတဖၣ် န့ၣ်လံ.

¹⁷ တၢ်ခံးသူမ့ၢ်မၤဘျီၣ်ကွံာ်ယမဲာ်ဒၣ်လဲာ်န့ၣ်ပှၤလၢအမၤ ပျံၤယၤန့ၣ်တမ့ၢ်တၢ်ခံးတၢ်နၤဘၣ်. မ့ၢ်ဒၣ်ကစၢ်ယွၤန့ၣ်လီၤ.