လံာ်စီၤယိၤဘး 19 - Sgaw Karen Common Bible

^1-2 ဒီးစီၤယိၤဘးစံးဆၢဝဲဒၣ်, “သုကမၤနးမၤဖှီၣ်ယၤဒီးမၤ လီၤသဘှံးယၤလၢတၢ်ကတိၤတဖၣ်န့ၣ်ဆံးယံာ်လဲၣ်.”

³ သုကတိၤတရီတပါယၤတဘျီဝံၤတဘျီဒီးမ့ၢ်သုတမဲာ်ဆှးဘၣ် လၢသုမၤကမၣ်ယၤအဃိဘၣ်န့ၣ်ဧါ.

⁴ ယမ့ၢ်မၤကမၣ်တ့ၢ်တၢ်ဒၣ်လဲၣ်, တၢ်န့ၣ်မၤဆါသုဒ်လဲၣ်.

⁵ သုဆိကမိၣ်လၢသုဂ့ၤန့ၢ်ယၤဒီးပာ်ယတၢ်ကိၢ်တၢ်ဂီၤတဖၣ်ဒ် တၢ်အုၣ်သးအသးလၢယတၢ်ကမၣ်အဂီၢ်န့ၣ်လီၤ.

⁶ မ့ၢ်သုတထံၣ်လၢကစၢ်ယွၤမၤတ့ၢ်တၢ်အံၤန့ၣ်ဘၣ်ဧါ. အဝဲပာ်လီၤပျံၤသကွီၤလၢကဖီၣ်န့ၢ်ယၤလီၤ.

⁷ ကွၢ်ကွၢ်ယကိးထီၣ်လၢတၢ်မၤဆူၣ်အဃိ, ဒီးတၢ်တကနၣ် ဘၣ်ယကလုၢ်ဘၣ်. ယတၢ်ကိးထီၣ်လၢတၢ်စံၣ်ညီၣ်တီအဂီၢ် န့ၣ်ပှၤတနၢ်ဟူနီတဂၤဘၣ်.

⁸ ကစၢ်ယွၤတြီဃာ်ယကျဲဒီးယလဲၤတၢ်တသ့ဘၣ်. အဝဲပာ်လီၤတၢ်ခံးလၢယကျဲအဖီခိၣ်န့ၣ်လီၤ.

⁹ အဝဲဟံးထီၣ်ကွံာ်ယတၢ်ထူးတၢ်တီၤခဲလၢာ်ဒီးဘ့ၣ်ကွံာ်ယလၤ ကပီၤန့ၣ်လီၤ.

¹⁰ အဝဲတီၢ်ပကူၣ်လီၤသဘှံးယၤဝးတရံးန့ၣ်လီၤ. အဝဲထဲးထီၣ်ကွံာ် ယတၢ်မုၢ်လၢ်ဒီးပာ်တီၢ်ယၤဒ်သိးယကလီၤညွံးဒီးသံကွံာ်န့ၣ်လီၤ.

¹¹ ဒီးကစၢ်ယွၤအသးထီၣ်ကဲၤထီၣ်ထီဒါယၤဒီးပာ်ယၤလၢအဒုၣ်အဒါ တဂၤလီၤ.

¹² အဝဲဆှၢလီၤအသုးမုၢ်သံၣ်ဘိဒ်သိးအကဒုးတၢ်ထီဒါယၤဒီးစူၣ် လီၤတၢ်ကျိၤဒီးပာ်လီၤပှၤသုးဖိလၢ ကဝီၤဃာ်ယဒဲအဂီၢ်လီၤ.

¹³ ကစၢ်ယွၤဒုးညိကွံာ်ယဒီပုၢ်ဝဲၢ်ခွါတဖၣ်ယံၤဒီးယၤ မ့ၢ်ပှၤသမှံၤလၢ ပှၤလၢအသ့ၣ်ညါတ့ၢ်ယၤတဖၣ်အဂီၢ်လီၤ.

¹⁴ ယဘူးယတံၢ်ဒီးယတံၤသကိးသ့ၣ်တဖၣ်ညိကွံာ်တ့ၢ်ယၤလံ.

¹⁵ ပှၤလၢအကဲတ့ၢ်ယပှၤသမှံၤတဖၣ်သးပ့ၤနီၣ်ကွံာ်ယၤဒီးယကုၢ် ပိာ်မုၣ်တဖၣ်ပာ်ယၤဒ်ပှၤသမှံၤလၢလီၢ်ဂၤအသိးန့ၣ်လီၤ. ယကဲထီၣ်ပှၤတခီထံတခီကီၢ်ဖိတဂၤလၢအဝဲသ့ၣ်အမဲာ်ညါလီၤ.

¹⁶ ဖဲယကိးနုာ်ယခ့ယပှၤတဂၤဒီးဖဲယဃ့ကညးအီၤလၢယထးခိၣ်ဒၣ်လဲာ် န့ၣ်အဝဲတစံးဆၢတၢ်ဘၣ်.

¹⁷ ယတၢ်သါမ့ၢ်တၢ်သးဘၣ်အၢလၢယမါအဂီၢ်ဒီးအဒီပုၢ်ဝဲၢ်ခွါဒၣ်ယဲ တဖၣ်ဒၣ်လဲာ်အသးတအိၣ်ယၤဘၣ်

¹⁸ ဖိဒံဖိသၣ်တဖၣ်ဒၣ်လဲာ်မၤတရီတပါယၤဒီးနံၤဘၣ်ဖၣ်လဲယၤ ဖဲအထံၣ်ယၤန့ၣ်လီၤ.

¹⁹ ကယဲၢ်ယတံၤသကိးတံၢ်နီၣ်တဖၣ်သးဘၣ်အၢယၤဒီးပှၤလၢ ယအဲၣ်အီၤဒိၣ်မးတဖၣ်ဃၣ်ကွံာ်အသးထီဒါယၤလီၤ.

²⁰ ယဖံးယညၣ်စဲဘူးဒီးယဃံ, ဒီးအိၣ်တ့ၢ်ဒၣ်ထဲယမဲအကူၤ ဧိၤန့ၣ်လီၤ.

²¹ အိယတံၤသကိးသုဝဲသ့ၣ်ဧၢ, သူၣ်ကညီၤသးကညီၤယၤ, သူၣ်ကညီၤသးကညီၤယၤတက့ၢ်. အဂ့ၢ်ဒ်အံၤကစၢ်ယွၤ အစုဆီၣ်လီၤယၤလံ.

²² သုမၤအၢမၤနးယၤဒ်ကစၢ်ယွၤမၤဝဲအသိးန့ၣ်မ့ၢ်အဘၣ်မနုၤလဲၣ်. ဆါထဲယဖံးယညၣ်ဧိၤန့ၣ်သုတသးမံဒံးဘၣ်ဧါ.

²³ မ်ယတၢ်ကတိၤတဖၣ်ဘၣ်တၢ်ကွဲးလီၤအီၤန့ၣ်တက့ၢ်. မ်အဘၣ်တၢ်ကွဲးနီၣ်အီၤလၢလံာ်အပူၤန့ၣ်တက့ၢ်.

²⁴ မ်အဘၣ်တၢ်စိးပျၤအီၤဒီးထးပျၤ, ကွဲးအီၤဒီးစၢၢ်ထံလၢ လၢၢ်အလိၤဒ်သိးကအိၣ်ဂၢၢ်ကျၢၤလီၤထူလီၤယိာ်တက့ၢ်.

²⁵ အဂ့ၢ်ဒ်အံၤ, ယသ့ၣ်ညါလၢယပှၤပှ့ၤက့ၤယၤတဂၤမူဝဲ, ဒီးလၢခံကတၢၢ်န့ၣ်ကဂဲၤဆၢထၢၣ်အုၣ်အသးလၢယဂီၢ်လၢ ဟီၣ်ခိၣ်အံၤန့ၣ်လီၤ.

²⁶ တၢ်ဆူးတၢ်ဆါမ့ၢ်အီၣ်ကွံာ်ယဖံးဒၣ်လဲာ်, ဖဲယအိၣ်ဒံးဒီးနီၢ် ခိအံၤန့ၣ်ယကထံၣ်ဘၣ်ကစၢ်ယွၤလီၤ.

²⁷ ယကထံၣ်အီၤလၢယမဲာ်ချံဒၣ်ယဲဒီးအဝဲတမ့ၢ်ပှၤသမှံၤဘၣ်. ယသးလီၤဘှါလၢယပူၤ, မ့ၢ်လၢသုစံး,

²⁸ ပမၤနးမၤဖှီၣ်အီၤကသ့ဒ်လဲၣ်. အတၢ်ကီတၢ်ခဲအခီၣ်ထံးခီၣ်ဘိန့ၣ်မ့ၢ်ဒၣ်အကစၢ်ဒၣ်ဝဲအဃိန့ၣ် လီၤ.

²⁹ မ့မ့ၢ်ခဲကနံၣ်အံၤ, ပျံၤနးဧိၤဘီဧိၤတက့ၢ်. နးဧိၤဘီဧိၤလၢအဟဲ စိာ်ကစၢ်ယွၤအတၢ်သးထီၣ်လၢတၢ်ဒဲးဘးအဖီခိၣ်, ဒ်သိးသု ကသ့ၣ်ညါလၢပှၤအိၣ်ဝဲတဂၤလၢအစံၣ်ညီၣ်တၢ်န့ၣ်လီၤ.