လံာ်စီၤယိၤဘး 18 - Sgaw Karen Common Bible

^1-2 ဒီးပှၤရှူၤဃးဖိစီၤဘံးလးစံးဆၢဝဲဒၣ်, စီၤယိၤဘးဧၢ, ပှၤဒ်နၤအသိးတဖၣ်ဆံးယံာ်မးကအိၣ်ဘှီၣ်လဲၣ်. အိၣ်ဒီးတၢ်သးဆးတက့ၢ်. အန့ၣ်ဒီးပကတိၤတၢ်ကသ့လီၤ.

³ ဘၣ်မနုၤလၢပဘၣ်တၢ်ဆိကမိၣ်ပှၤဒ်ဂီၤဖံးအသိးဒီး ပာ်ပှၤဒ်ပှၤအသးတဆးလၢ နတၢ်ထံၣ်အပူၤန့ၣ်လဲၣ်.

⁴ ပှၤလၢအအ့ၣ်ဖှီလီၤအသးလၢအသးထီၣ်အဃိနဲဒၣ်တဂၤဧၢ, မ့ၢ်ဟီၣ်ခိၣ်ကဘၣ်တၢ်လဲၤသဒၣ်အီၤ လၢနဃိစ့ၢ်ကီးဧါ. ဒီးမ့ၢ်လၢၢ်ဧိၤလ့ဧိၤတဖၣ် ကဘၣ်တၢ်သုးကွံာ်အီၤ လၢအလီၢ်န့ၣ်ဧါ.

⁵ မ့ၢ်မးပှၤတတီတလိၤဘၣ်အတၢ်ကပီၤန့ၣ်တၢ်ကမၤလီၤပံာ်ဒံးဒၣ် အီၤ, ဒီးအမ့ၣ်အူလၣ်တကဲၤကပီၤကဒီးလၢၤဘၣ်.

⁶ မ့ၣ်အူဒၢလၢအဝဲအဒဲပူၤကလီၤပံာ်ကွံာ်ဝဲဒၣ်န့ၣ်လီၤ.

⁷ အခီၣ်ခါလၢအဆူၣ်န့ၣ်ကစၢ်လီၤဝဲဒီးအတၢ်ကူၣ်ထီၣ်ဖးလီၤဒၣ်ဝဲ တဖၣ်, န့ၣ်ကဒုးလီၤဃံၤအီၤလီၤ.

⁸ အဂ့ၢ်ဒ်အံၤ, အခီၣ်ဒၣ်ဝဲဆှၢအီၤဆူစၤပူၤဒီးဟးဝ့ၤဝီၤလၢ အမၢသလၢၣ်အပူၤလီၤ.

⁹ ပျံၤသကွီၤန့ၣ်မၤန့ၢ်အခီၣ်နၢၣ်ခံဒီးဟံးဃာ်အီၤန့ၣ်လီၤ.

¹⁰ တ့ၤခီၣ်ပာ်လီၤခူသူၣ်အသးလၢဟီၣ်ခိၣ်လိၤဒီးထုဘၣ်တၢ်ပာ်လီၤ အီၤခီလၢအဂီၢ်လၢအကျဲပူၤန့ၣ်လီၤ.

¹¹ တၢ်မၤပျံၤမၤဖုးတဖၣ်န့ၣ်အိၣ်ခိးဝးတရံးအီၤဒီးပိာ်ထွဲအခီၣ်ခါ ကိးခါဒဲးန့ၣ်လီၤ.

¹² အဝဲထူးတီၤတ့ၢ်ဝဲဘၣ်ဆၣ်ခဲအံၤသၣ်ဝံၤလီၤဒိဝဲလီၤ. ဒီးတၢ်တတၢးတနါအိၣ်ဆၢထၢၣ်ခိးအီၤဖဲအကပၤန့ၣ်လီၤ.

¹³ တၢ်ဆါသံသတြိာ်ကရၤလီၤအသးလၢအနီၢ်ခိအလိၤ ဒီးကမၤကျၣ်ကွံာ်အစုဒုၣ်ဒီးအခီၣ်တဖၣ်န့ၣ်လီၤ.

¹⁴ အဝဲဘၣ်တၢ်ထဲးကွံာ်အီၤလၢဒဲလၢအဝဲအိၣ်ဂၢၢ်ကျၢၤဝဲလၢအပူၤ, ဒီးဘၣ်တၢ်တွံၢ်ထုးထီၣ်အီၤလၢကကွၢ်ဆၢၣ်မဲာ်တၢ်သံအစီၤပၤ အဂီၢ်န့ၣ်လီၤ.

¹⁵ ဖဲကးဘၣ်တၢ်ဖှံလီၤအီၤလၢ ကမၤကဆှီကွံာ်တၢ်ဆူးတၢ်ဆါ အဃၢ်ဝံၤအလီၢ်ခံန့ၣ်, ခဲအံၤပှၤတဂၤဂၤကအိၣ်ဆိးလၢ အဒဲပူၤလီၤ.

¹⁶ အဂံၢ်ဒီးအဒ့တဖၣ်လီၤညွံးဒီးဃ့ထီကွံာ်ဝဲဒၣ်န့ၣ်လီၤ.

¹⁷ တၢ်သ့ၣ်နီၣ်ထီၣ်က့ၤအီၤန့ၣ်ကလီၤမၢ်ကွံာ်လၢဟီၣ်ခိၣ်ချၢ, ဒီးလၢထံကီၢ်ပူၤန့ၣ်အမံၤတအိၣ်နီတတီၤလၢၤဘၣ်.

¹⁸ အဝဲကဘၣ်တၢ်ဟီထီၣ်ကွံာ်အီၤလၢပှၤမူအကီၢ်ဒီးကဘၣ်တၢ် ဟီထီၣ်ကွံာ်အီၤလၢတၢ်ကပီၤဆူတၢ်ခံးတၢ်နၤအပူၤန့ၣ်လီၤ.

¹⁹ အဝဲအဖိအလံၤမ့တမ့ၢ် အစၢၤအသွဲၣ်တဖၣ်တအိၣ် လၢအပှၤဂီၢ်မုၢ်အကျါလၢၤဘၣ်. တၢ်လီၢ်ဖဲတဘျီအဝဲအိၣ်မူတ့ၢ်ဝဲန့ၣ်, ပှၤမူတ့ၢ်ဒံးတအိၣ် နီတဂၤဘၣ်.

²⁰ စးထီၣ်လၢမုၢ်ထီၣ်တုၤဆူ မုၢ်နုာ်န့ၣ်, ပှၤလၢအနၢ်ဟူဘၣ်အဝဲ အတၢ်ဟဲဝံခဲလၢာ်, ကဖံးတကုၣ်ခီတကုၣ်ဒီး ကနိးကစုာ်လၢ တၢ်ပျံၤတၢ်ဖုးအပူၤလီၤ.

²¹ တၢ်အံၤမ့ၢ် ပှၤအၢပှၤသီတဖၣ် အတၢ်ဘူၣ်တၢ်တီၢ် ပှၤတဖၣ်လၢအတပာ်လ့ၢ်ပာ်ကါကစၢ်ယွၤနီတစဲး အတၢ်ဘူၣ်တၢ်တီၢ်န့ၣ်လီၤ.