လံာ်စီၤယိၤဘး 17 - Sgaw Karen Common Bible

¹ ယဂံၢ်ယဘါလၢာ်လံ. ယတၢ်အိၣ်မူကကတၢၢ်ဘူးထီၣ်လံ. ယသူၣ်လီၤဘှံးသးလီၤတီၤလီၤ. တၢ်သွၣ်ခိၣ်အိၣ်ကတဲာ်ကတီၤအသးလၢယဂီၢ်လီၤ.

² ပှၤကိးဂၤဒဲးဒုၣ်ဒွဲၣ်ယၤဒီးယထံၣ်ဘၣ်အဝဲသ့ၣ်အတၢ်မၤကိၢ်မၤ ဂီၤယၤန့ၣ်လီၤ.

³ ကစၢ်ယွၤဧၢ, ယမၤတၢ်တီတီလိၤလိၤလီၤ. တူၢ်လိာ်ယတၢ်ကတိၤ တက့ၢ်, ပှၤအဂၤလၢအကဆီၣ်ထွဲတၢ်လၢယစံးတအိၣ်နီတဂၤဘၣ်.

⁴ အဂ့ၢ်ဒ်အံၤ, နကးတံာ်ကွံာ်အဝဲသ့ၣ်အသးအတၢ် ကူၣ်တၢ်ဆးသတးဒီးပျဲအဝဲသ့ၣ်မၤနၢၤယၤခဲအံၤတဂ့ၤ.

⁵ တၢ်ကတိၤဒိလၢပျၢၤစံးဝဲလၢ, ပှၤလၢအဟ့ၣ်လီၤကွံာ်အတံၤသကိးတဖၣ်လၢကဒိးန့ၢ်ဘၣ်စ့ အဂီၢ်န့ၣ်, အဖိအလံၤတဖၣ်ကတူၢ်ဘၣ်က့ၤတၢ်လၢတၢ်န့ၣ် အဃိလီၤ.

⁶ ဒီးခဲအံၤပှၤဂီၢ်မုၢ်သူတၢ်ကတိၤဒိအံၤထီဒါယၤ, ဒီးယကဲထီၣ်ပှၤလၢအမဲာ်ဘၣ်တၢ်ထူးပှဲာ်အီၤလီၤ.

⁷ ယမဲာ်ယုာ်ကွံာ်တ့ၢ်လံလၢယတၢ်နးတၢ်ဖှီၣ်အဃိဒီး ယစုယခီၣ်တဖၣ်ဖှံၣ်လီၤဃဲၤလီၤကွံာ်ဒ်တၢ်ကဒုအသိးလီၤ.

⁸ ပှၤလၢအစံးလီၤအသးလၢ ပှၤတီပှၤလိၤတဖၣ် ကမၢကမၣ်လၢတၢ်အံၤအဃိဒီးအဝဲသ့ၣ်ခဲလၢာ်စံၣ်ညီၣ် ဃၣ်ယၤဒီးစံးဝဲလၢယတနာ်ယွၤဘၣ်လီၤ.

⁹ အန့ၣ်ဒၣ်လဲာ်ပှၤအတီအလိၤကဟံးဃာ်အကျဲ, ဒီးပှၤလၢအစု ကဆှီန့ၣ်အဂံၢ်အဘါဒံးယံာ်ကဒံးဆူၣ်ထီၣ်လီၤ.

¹⁰ ဘၣ်ဆၣ်သုဝဲခဲလၢာ်ဟဲဆၢထၢၣ်လၢယမဲာ်ညါတက့ၢ်. တမ့ၢ်လၢယကထံၣ်န့ၢ်ပှၤကူၣ်သ့လၢအကျါနီတဂၤဘၣ်.

¹¹ ယမုၢ်နံၤမုၢ်သီတဖၣ်လဲၤပူၤကွံာ်ဝဲ, ယတၢ်ကူၣ်ထီၣ်ဖးလီၤတဖၣ် တကဲထီၣ်လိၣ်ထီၣ်ဘၣ်. ယတၢ်မုၢ်လၢ်လၢာ်ကွံာ်လံ.

¹² ဘၣ်ဆၣ်ယတံၤသကိးသ့ၣ်တဖၣ်စံးဝဲလၢမုၢ်နၤန့ၣ်မ့ၢ်မုၢ်ဆါ အတၢ်ကပီၤဒီးအဝဲသ့ၣ်စံးလၢတၢ်ကပီၤဟဲ ဘူးထီၣ်လံန့ၣ်လီၤ. မ့မ့ၢ်ယသ့ၣ်ညါလၢ ယအိၣ်ဒၣ်လၢတၢ်ခံးတၢ်နၤအပူၤန့ၣ်လီၤ.

¹³ ယတၢ်မုၢ်လၢ်ထဲတမံၤဧိၤမ့ၢ်ဒၣ်ပျူၤပူၤဖဲယကမံလီၤဒ်သိး ယကမံလၢတၢ်ခံးကျါအဂီၢ်န့ၣ်လီၤ.

¹⁴ ယကကိးတၢ်သွၣ်ခိၣ်လၢယပၢ်, လၢၣ်ဧိၤဆှးဧိၤတဖၣ်လၢ အအီၣ်ယၤန့ၣ်လၢယမိၢ်မ့တမ့ၢ်ယဒီပုၢ်ဝဲၢ်မုၣ်တဖၣ်လီၤ.

¹⁵ ယတၢ်မုၢ်လၢ်တမံၤမံၤကအိၣ်ဖဲလဲၣ်. မတၤကထံၣ်ယတၢ်မုၢ်လၢ်တမံၤ မံၤန့ၣ်လဲၣ်.

¹⁶ တုၤယလဲၤလီၤဆူပျူၤပူၤန့ၣ်, တၢ်မုၢ်လၢ်တမ့ၢ်ကလဲၤဃုာ် တၢ်ဒီးယၤဘၣ်.