လံာ်ယိၤဟၣ် 8 - Sgaw Karen Common Bibleပိာ်မုၣ်လၢအအဲၣ်ဘၢအဝၤတဂၤ 1 [ဒီးလၢမုၢ်ဆ့ၣ်ထီၣ်ဂီၤဂီၤန့ၣ်, ယ့ၣ်ၡူးက့ၤကဒါက့ၤဆူ တၢ်လုၢ်ဟံၣ်အပူၤန့ၣ်လီၤ. 2 ပှၤဂီၢ်မုၢ်ခဲလၢာ်ဟဲအိၣ်ဝးတရံးအီၤ, ဒီးအဝဲဆ့ၣ်နီၤဒီးသိၣ်လီၤသီလီၤအဝဲသ့ၣ်န့ၣ်လီၤ. 3 ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ် ဒီးပှၤဖၤရံၤၡဲတဖၣ်ဟဲဆှၢနုာ်ပိာ်မုၣ်တဂၤလၢ အဘၣ်တၢ်ဖီၣ်န့ၢ်အီၤဖဲအအဲၣ်ဘၢတၢ်အဖၢမုၢ်, ဒီးအဝဲသ့ၣ်မၢပိာ်မုၣ်တဂၤအံၤဆၢထၢၣ်လၢပှၤ ခဲလၢာ်အမဲာ်ညါလီၤ. 4 အဝဲသ့ၣ်စံးဘၣ်ယ့ၣ်ၡူး, “သရၣ်ဧၢ, ပိာ်မုၣ်တဂၤအံၤဘၣ်တၢ်ဖီၣ်န့ၢ်အီၤဖဲအအဲၣ်ဘၢတၢ်အခါ ဒၣ်လဲာ်လီၤ. 5 လၢပတၢ်သိၣ်တၢ်သီအပူၤ, စီၤမိၤၡ့မၤလိာ်ဝဲလၢပိာ်မုၣ်ဒ်သိးအံၤ တဂၤကဘၣ်တၢ်ကွံာ်သံအီၤလၢလၢၢ်လီၤ. ခဲအံၤ, နကစံးဒ်လဲၣ်.” 6 အဝဲသ့ၣ်စံးတၢ်ဒ်အံၤမ့ၢ်ဒ်သိးကဖီၣ်န့ၢ်ယ့ၣ်ၡူးလၢအတၢ်ကတိၤ ဒၣ်ဝဲ, ဒီးပာ်တၢ်ကမၣ်လၢအလိၤကသ့အဂီၢ်လီၤ. ဘၣ်ဆၣ်ယ့ၣ်ၡူးသကူးလီၤအသးဝံၤဒီးကွဲးလံာ်လၢဟီၣ်ခိၣ်လိၤ လၢအစုမုၢ်စုနၢန့ၣ်လီၤ. 7 ဖဲအဝဲသ့ၣ်ဆၢထၢၣ်ဖဲန့ၣ်ဒီးသံကွၢ်အီၤတၢ်သံကွၢ်တဖၣ် အခါန့ၣ်, ယ့ၣ်ၡူးဝံၢ်ထီၣ်က့ၤအသးဒီးစံးဘၣ်အဝဲသ့ၣ်, “လၢသုဝဲအကျါတဂၤဂၤမ့ၢ်တမၤတၢ်ဒဲးဘးနီတမံၤဘၣ်ဒီး, မ်အကကွံာ်ဆိပိာ်မုၣ်အံၤလၢလၢၢ်တဖျၢၣ်တက့ၢ်.” 8 အန့ၣ်ဝံၤ, ယ့ၣ်ၡူးသကူးလီၤကဒီးအသးဒီးကွဲးလံာ်လၢဟီၣ်ခိၣ်လိၤန့ၣ် လီၤ. 9 ဖဲအဝဲသ့ၣ်နၢ်ဟူတၢ်အံၤဝံၤဒီးဟးထီၣ်ကွံာ်ဝဲတဂၤဘၣ်တဂၤ, ပှၤလၢအသးပှၢ်တဖၣ်ဟးထီၣ်လၢညါန့ၣ်လီၤ. ယ့ၣ်ၡူးအိၣ်တီၢ်ထဲတဂၤဧိၤဒီးပိာ်မုၣ်န့ၣ်အိၣ်ဆၢထၢၣ်ဒံးဒၣ် ဖဲန့ၣ်လီၤ. 10 ယ့ၣ်ၡူးဝံၢ်ထီၣ်အသးဒီးစံးဘၣ်ပိာ်မုၣ်န့ၣ်, “နီၢ်ဧၢ, အဝဲသ့ၣ်အိၣ်ဖဲလဲၣ်. ပှၤလၢအကစံၣ်ညီၣ်နၤတအိၣ်တီၢ်နီ တဂၤလၢၤဘၣ်ဧါ.” 11 ပိာ်မုၣ်န့ၣ်စံးဆၢအီၤ, “ကစၢ်ဧၢ, တအိၣ်နီတဂၤလၢၤဘၣ်.” ဒီးယ့ၣ်ၡူးစံးဘၣ်အီၤ, “မ့မ့ၢ်ဒ်န့ၣ်ဒီးယတစံၣ်ညီၣ်နၤစ့ၢ်ကီး ဘၣ်. က့ၤက့ၤဒီးတဘၣ်မၤလၢၤတၢ်ဒဲးဘးတဂ့ၤ.”] ယ့ၣ်ၡူး, ဟီၣ်ခိၣ်အတၢ်ကပီၤ 12 ယ့ၣ်ၡူးကတိၤကဒီးတၢ်ဒီးပှၤဖၤရံၤၡဲတဖၣ်ဒီးစံးဝဲ, “ယဲဒၣ်အံၤယမ့ၢ်ဟီၣ်ခိၣ်အတၢ်ကပီၤလီၤ. ပှၤလၢအပိာ်ယခံ တဂၤလၢ်လၢ်ကအိၣ်ဒီးတၢ်မူအတၢ်ကပီၤဒီးတဟးဘၣ်ဝဲ လၢတၢ်ခံးကျါနီတဘျီဘၣ်.” 13 အန့ၣ်ဒီးပှၤဖၤရံၤၡဲတဖၣ်စံးဘၣ်အီၤ, “ခဲအံၤနအုၣ်နသးလၢနကစၢ်ဒၣ်နဲအဂ့ၢ်လီၤ. ဒီးတၢ်လၢနစံးန့ၣ်, တၢ်တူၢ်လိာ်အီၤဒ်တၢ်အုၣ်အသးနီၢ်နီၢ်တသ့ဘၣ်.” 14 ယ့ၣ်ၡူးစံးဆၢအဝဲသ့ၣ်, “ယအုၣ်ယသးလၢယကစၢ်ဒၣ်ယဲအဂီၢ် သနာ်က့, တၢ်လၢယစံးန့ၣ်မ့ၢ်ဝဲတီဝဲလီၤ. အဂ့ၢ်ဒ်လဲၣ်န့ၣ်, ယသ့ၣ်ညါယဟဲလၢလဲၣ်ဒီးယကလဲၤဆူလဲၣ်န့ၣ်လီၤ. မ့မ့ၢ်သုဝဲသ့ၣ်အံၤသုတသ့ၣ်ညါယဟဲလၢလဲၣ်ဒီးယကလဲၤဆူလဲၣ် န့ၣ်ဘၣ်. 15 သုစံၣ်ညီၣ်တၢ်ဒ်ပှၤဟီၣ်ခိၣ်ဖိအကျဲအသိးလီၤ. ယဲ, ယတစံၣ်ညီၣ်ပှၤနီတဂၤဘၣ်. 16 ဘၣ်ဆၣ်ယမ့ၢ်ဘၣ်စံၣ်ညီၣ်တၢ်ဒီး, ယတၢ်စံၣ်ညီၣ်ကမ့ၢ်ဝဲတီဝဲလီၤ. အဂ့ၢ်မ့ၢ်လၢယတစံၣ်ညီၣ်တၢ်ထဲတဂၤဧိၤဘၣ်ဒီးပၢ်လၢအမၢလီၤ ယၤအံၤအိၣ်ဒီးယၤအဃိလီၤ. 17 တၢ်ကွဲးအသးလၢသုတၢ်သိၣ်တၢ်သီအပူၤ, ဖဲပှၤခံဂၤအတၢ်အုၣ်အသးဃူဃီၣ်လီၤပလိာ်ဝဲန့ၣ်, တၢ်လၢအဝဲသ့ၣ်စံးန့ၣ်, မ့ၢ်ဝဲတီဝဲလီၤ (သိၣ်သီ ၁၉:၁၅). 18 ယအုၣ်ယသးလၢယကစၢ်ဒၣ်ယဲအဂီၢ်, ဒီးပၢ်လၢအမၢလီၤယၤန့ၣ်, အုၣ်စ့ၢ်ကီးအသးလၢယဂီၢ်လီၤ.” 19 အဝဲသ့ၣ်သံကွၢ်အီၤ, “နပၢ်အိၣ်ဖဲလဲၣ်.” ယ့ၣ်ၡူးစံးဆၢတၢ်ဒီးစံးဝဲ, “သုတသ့ၣ်ညါယၤမ့ၢ်ဂ့ၤယပၢ်မ့ၢ်ဂ့ၤန့ၣ်ဘၣ်. သုမ့ၢ်သ့ၣ်ညါယၤန့ၣ် သုကသ့ၣ်ညါယပၢ်စ့ၢ်ကီးလီၤ.” 20 ယ့ၣ်ၡူးစံးတၢ်တဖၣ်အံၤဖဲအသိၣ်လီၤသီလီၤတၢ်လၢ တၢ်လုၢ်ဟံၣ်ပူၤဖဲတၢ်ပာ်ဖှိၣ်စ့အလီၢ်ဒီးမ့ၢ်လၢအဆၢ ကတီၢ်နၣ်ရံၣ်တဘၣ်ဒံးဘၣ်အဃိ, ပှၤတဟဲဟံးဃာ်အီၤနီ တဂၤန့ၣ်ဘၣ်. တၢ်လီၢ်လၢယလဲၤန့ၣ်သုလဲၤတသ့ဘၣ် 21 ယ့ၣ်ၡူးစံးဘၣ်ကဒီးအဝဲသ့ၣ်, “ယကဟးထီၣ်လဲၤတၢ်, ဒီးသုကဃုယၤဘၣ်ဆၣ်သုကသံလၢသုတၢ်ဒဲးဘးတဖၣ် အပူၤလီၤ. တၢ်လီၢ်လၢယလဲၤန့ၣ်သုလဲၤတသ့ဘၣ်.” 22 မၤသးဒ်န့ၣ်ဒီးပှၤယူဒၤဖိအခိၣ်အနၢ်တဖၣ်စံးဝဲ, “အဝဲစံးလၢတၢ်လီၢ်လၢအလဲၤဝဲန့ၣ်, ပလဲၤတသ့ဘၣ်. တၢ်အံၤအခီပညီမ့ၢ်အဝဲကမၤသံလီၤအသးန့ၣ်ဧါ.” 23 ယ့ၣ်ၡူးစံးဆၢအဝဲသ့ၣ်, “သုဘၣ်ဃးဒီးတၢ်လၢလာ်အံၤ, မ့မ့ၢ်ယဲယဘၣ်ဃးဒီးတၢ်လၢထးလီၤ. သုဘၣ်ဃးဒီးဟီၣ်ခိၣ်အံၤ, မ့မ့ၢ်ယဲယတဘၣ်ဃးဒီးဟီၣ်ခိၣ်အံၤဘၣ်. 24 လၢတၢ်န့ၣ်အဃိ, ယစံးဘၣ်သုလၢသုကသံလၢသုတၢ်ဒဲးဘးတဖၣ် အပူၤလီၤ. ဒီးသုမ့ၢ်တနာ်လၢ ‘ယမ့ၢ်တၢ်လၢယမ့ၢ်’ ဘၣ်ဒီး သုကသံလၢသုတၢ်ဒဲးဘးတဖၣ်အပူၤလီၤ.” 25 အဝဲသ့ၣ်သံကွၢ်အီၤ, “နမ့ၢ်မတၤလဲၣ်.” ယ့ၣ်ၡူးစံးဆၢ အဝဲသ့ၣ်, “မ့ၢ်ဒ်ယစံးတ့ၢ်သုလၢအခီၣ်ထံးလံၤလံၤအသိးန့ၣ်လီၤ. 26 ယကတိၤတၢ်လၢသုဂ့ၢ်ဒီးယစံၣ်ညီၣ်တၢ်လၢသုဂ့ၢ်အလီၢ် အိၣ်အါမးလီၤ. မ့မ့ၢ်ပှၤလၢအမၢလီၤယၤတဂၤမ့ၢ်ပှၤအတီအလိၤ ဒီးယစံးဘၣ်တဲဘၣ်ပှၤဟီၣ်ခိၣ်ဖိထဲဒၣ်တၢ်လၢယနၢ်ဟူဘၣ် တ့ၢ်လၢအအိၣ်လီၤ.” 27 အဝဲသ့ၣ်တနၢ်ပၢၢ်ဝဲဒၣ်လၢယ့ၣ်ၡူးကတိၤတၢ်ဒီးအဝဲသ့ၣ်ဘၣ်ဃးဒီးပၢ် အဂ့ၢ်န့ၣ်ဘၣ်. 28 မၤသးဒ်န့ၣ်ဒီးယ့ၣ်ၡူးစံးဘၣ်အဝဲသ့ၣ်, “တုၤသုယူာ်ထီၣ် ပှၤကညီဖိခွါအံၤဒီး, သုကသ့ၣ်ညါလၢ ‘ယမ့ၢ်တၢ်လၢယမ့ၢ်’ လီၤ. တုၤနုၤတစုသုကသ့ၣ်ညါလၢယတမၤတၢ်လၢယစိ ကမီၤဒၣ်ယဲနီတမံၤဘၣ်. မ့မ့ၢ်တခီ, ယစံးကတိၤထဲတၢ်လၢ ယပၢ်သိၣ်လိယၤလၢယကစံးကတိၤအီၤတဖၣ်ဧိၤန့ၣ်လီၤ. 29 ဒီးပှၤလၢအမၢလီၤယၤတဂၤန့ၣ်, အိၣ်ဒီးယၤလီၤ. အဝဲတပာ်တ့ၢ်ယၤထဲတဂၤဧိၤဘၣ်. အဂ့ၢ်မ့ၢ်လၢယမၤအတၢ်ဘၣ်အသးထီဘိတထံၣ်ဃီအဃိလီၤ.” 30 ပှၤအါဂၤလၢအနၢ်ဟူယ့ၣ်ၡူးစံးကတိၤတၢ်တဖၣ်အံၤန့ၣ်, စူၢ်က့ၤနာ်က့ၤအီၤလီၤ. ပှၤသဘျ့ဒီးပှၤကုၢ်ဖိတဖၣ် 31 မၤသးဒ်န့ၣ်ဒီး, ယ့ၣ်ၡူးစံးဘၣ်ပှၤယူဒၤဖိလၢအစူၢ်က့ၤနာ်က့ၤအီၤ တဖၣ်, “သုမ့ၢ်စူၢ်ယတၢ်သိၣ်လိသီလိဒီးသုမ့ၢ်နီၢ်နီၢ်ယပျဲၢ် ယဘီၣ်တဖၣ်လီၤ. 32 သုကသ့ၣ်ညါတၢ်မ့ၢ်တၢ်တီ, ဒီးတၢ်မ့ၢ်တၢ်တီန့ၣ်ကမၤထူၣ်ဖျဲးသုလီၤ.” 33 အဝဲသ့ၣ်စံးဆၢအီၤ, “ပမ့ၢ်စီၤအၤဘြၤဟၣ်အစၢၤအသွဲၣ်တဖၣ် ဒီးပတကဲပှၤဂၤအကုၢ်နီတဘျီဒံးဘၣ်ဒီးနစံးလၢ ‘တၢ်ကမၤထူၣ်ဖျဲးသု’ န့ၣ်, နပာ်နဲအခီပညီဒ်လဲၣ်.” 34 ယ့ၣ်ၡူးစံးဘၣ်အဝဲသ့ၣ်, “ယစံးဘၣ်သုတီတီလိၤလိၤလီၤ. ပှၤတဂၤလၢ်လၢ်လၢအမၤတၢ်ဒဲးဘးန့ၣ်, မ့ၢ်တၢ်ဒဲးဘးအကုၢ် အပှၤလီၤ.” 35 ဒီးကုၢ်န့ၣ်တဘၣ်ဃးဒီးဒူၣ်ဖိထၢဖိတဒူၣ်ထီဘိတထံၣ် ဃီဘၣ်. မ့မ့ၢ်ဖိခွါတဂၤန့ၣ်, ဘၣ်ဃးဖဲန့ၣ်လီၤစိၤလီၤထီလီၤ. 36 ဖိခွါမ့ၢ်မၤထူၣ်ဖျဲးသုဒီးသုကထူၣ်ဖျဲးနီၢ်နီၢ်လီၤ. 37 ယသ့ၣ်ညါလၢသုမ့ၢ်စီၤအၤဘြၤဟၣ်အစၢၤအသွဲၣ်တဖၣ် လီၤ. အန့ၣ်ဒၣ်လဲာ်သုဂုာ်ကျဲးစၢးမၤသံယၤအဂ့ၢ်မ့ၢ်လၢ သုတတူၢ်လိာ်ယတၢ်သိၣ်လိသီလိအဃိလီၤ. 38 ယကတိၤတၢ်ဘၣ်ဃးတၢ်လၢယပၢ်ဒုးနဲၣ်တ့ၢ်ယၤ, မ့မ့ၢ်သုမၤတၢ်လၢသုပၢ်စံးဘၣ်တ့ၢ်သုန့ၣ်လီၤ.” 39 အဝဲသ့ၣ်စံးဆၢအီၤ, “ပပၢ်မ့ၢ်စီၤအၤဘြၤဟၣ်လီၤ.” ဒီးယ့ၣ်ၡူးစံးဘၣ်အီၤ, “သုမ့မ့ၢ်နီၢ်နီၢ်စီၤအၤဘြၤဟၣ် အဖိတဖၣ်ဒီးသုကမၤတၢ်တမံၤဃီလၢအဝဲမၤတ့ၢ်ဝဲတဖၣ်လီၤ. 40 တၢ်လၢယမၤန့ၣ်, မ့ၢ်တၢ်စံးဘၣ်တဲဘၣ်သုတၢ်မ့ၢ်တၢ်တီလၢ ယနၢ်ဟူလၢကစၢ်ယွၤအအိၣ်န့ၣ်လီၤ. အန့ၣ်ဒၣ်လဲာ်, သုဂုာ်ကျဲးစၢးမၤသံယၤလီၤ. စီၤအၤဘြၤဟၣ်တမၤတၢ်ဒ်သိး အံၤန့ၣ်ဘၣ်. 41 သုမၤတၢ်လၢသုပၢ်မၤတ့ၢ်လံဝဲန့ၣ်လီၤ.” အဝဲသ့ၣ်စံးဆၢတၢ်ဒီးစံးဝဲ, “ပအိၣ်ဒီးပပၢ်ထဲတဂၤဧိၤလၢအမ့ၢ် ကစၢ်ယွၤအကစၢ်ဒၣ်ဝဲဒီးပမ့ၢ်အဖိနီၢ်နီၢ်တဖၣ်န့ၣ်လီၤ.” 42 ယ့ၣ်ၡူးစံးဘၣ်အဝဲသ့ၣ်, “ကစၢ်ယွၤမ့မ့ၢ်သုပၢ်နီၢ်နီၢ်ဒီးသု ကအဲၣ်ယၤလီၤ. အဂ့ၢ်မ့ၢ်လၢယဟဲလၢကစၢ်ယွၤအအိၣ်ဒီး ခဲအံၤယအိၣ်ဖဲအံၤလီၤ. ယတဟဲဖဲယသးဒၣ်ယဲဘၣ်. မ့မ့ၢ်အဝဲမၢလီၤယၤလီၤ. 43 ဘၣ်မနုၤအဃိသုတနၢ်ပၢၢ်တၢ်လၢယစံးကတိၤန့ၣ်လဲၣ်. တၢ်အဝဲအံၤမ့ၢ်ဒၣ်လၢတၢ်လၢယစံးဘၣ်တဲဘၣ်သုန့ၣ်, သုတူၢ်အီၤတပှဲၤဘၣ်အဃိလီၤ. 44 သုမ့ၢ်သုပၢ်မုၣ်ကီၤလံၢ်အဖိတဖၣ်ဒီးသုသးအိၣ်မၤအတၢ်ဘၣ် အသးန့ၣ်လီၤ. လၢအခီၣ်ထံးလံၤလံၤန့ၣ်, အဝဲမ့ၢ်ပှၤမၤသံပှၤကညီဒီးတဆၢထၢၣ်လၢ တၢ်မ့ၢ်တၢ်တီအဂီၢ်နီတဘျီဘၣ်, အဂ့ၢ်မ့ၢ်လၢ တၢ်မ့ၢ်တၢ်တီတအိၣ်ဘၣ်လၢအပူၤအဃိလီၤ. တုၤအဝဲကတိၤတၢ်ကဘျံးကဘျၣ်ဒီးမ့ၢ်ဒၣ်အဝဲမၤတၢ်လၢ အဝဲမၤညီနုၢ်ဝဲန့ၣ်လီၤ. အဂ့ၢ်မ့ၢ်လၢအဝဲမ့ၢ်ပှၤကတိၤကဘျံး ကဘျၣ်တၢ်တဂၤဒီးမ့ၢ်တၢ်ကဘျံးကဘျၣ်ခဲလၢာ်အပၢ်အဃိလီၤ. 45 ဘၣ်ဆၣ်မ့ၢ်ယစံးဘၣ်တဲဘၣ်သုတၢ်မ့ၢ်တၢ်တီအဃိသတး ဒီး, သုတစူၢ်က့ၤနာ်က့ၤယၤဘၣ်. 46 မတၤတဂၤလၢသုကျါအုၣ်အသးလၢယမၤတၢ်ဒဲးဘးကသ့ န့ၣ်လဲၣ်. ယမ့ၢ်ကတိၤတၢ်မ့ၢ်တၢ်တီဒီး, ဘၣ်မနုၤအဃိလၢသုတစူၢ်က့ၤနာ်က့ၤယၤန့ၣ်လဲၣ်. 47 ပှၤလၢအဟဲလၢကစၢ်ယွၤအအိၣ်န့ၣ်, ဒိကနၣ်ကစၢ်ယွၤကလုၢ် ကထါတဖၣ်လီၤ. မ့မ့ၢ်သုဝဲတခီ, သုတဟဲလၢကစၢ်ယွၤအအိၣ်ဘၣ်အဃိသတးဒီး, သုတဒိကနၣ်တၢ်ဘၣ်.” ယ့ၣ်ၡူးဒီးစီၤအၤဘြၤဟၣ် 48 ပှၤယူဒၤဖိတဖၣ်စံးဆၢတၢ်ဒီးစံးဘၣ်အီၤ, “ပစံးလၢနမ့ၢ် ပှၤၡၤမရံဖိတဂၤဒီးတၢ်နါအိၣ်လၢနပူၤန့ၣ်, မ့ၢ်အတဘၣ် ဘၣ်ဧါ.” 49 ယ့ၣ်ၡူးစံးဆၢဝဲ, “တၢ်နါတအိၣ်လၢယပူၤဘၣ်. ယယူးယီၣ်ယပၢ်, ဘၣ်ဆၣ်သုတယူးယီၣ်ယၤဘၣ်. 50 ယတဃုတၢ်လၤကပီၤလၢယဂီၢ်ဒၣ်ယဲဘၣ်. ဘၣ်ဆၣ်ပှၤလၢအဃုတၢ်အံၤဒီးစံၣ်ညီၣ်အိၣ်ပှိၤယၤန့ၣ် အိၣ်ဝဲတဂၤလီၤ. 51 ယစံးဘၣ်တဲဘၣ်သုတီတီလိၤလိၤ, ပှၤလၢအတိၢ်န့ၢ်ယကလုၢ်ကထါတဂၤလၢ်လၢ်န့ၣ် တသံနီတဘျီဘၣ်.” 52 အဝဲသ့ၣ်စံးဘၣ်အီၤ, “ခဲအံၤပသ့ၣ်ညါလီၤတံၢ်လၢတၢ်နါ အိၣ်လၢနပူၤလီၤ. စီၤအၤဘြၤဟၣ်သံလံ, ဒီးဝံတဖၣ်သံလံ. အန့ၣ်ဒၣ်လဲာ် နစံးလၢ ‘ပှၤလၢအတိၢ်န့ၢ်ယကလုၢ်ကထါန့ၣ် တသံနီတဘျီဘၣ်.’ 53 ပပၢ်စီၤအၤဘြၤဟၣ်သံဝဲလံ. မ့ၢ်နစံးလီၤနသးလၢနဒိၣ်န့ၢ် စီၤအၤဘြၤဟၣ်န့ၣ်ဧါ. ဒီးဝံသ့ၣ်တဖၣ်သံဝဲစ့ၢ်ကီးလံ. နစံးလီၤနသးလၢနမ့ၢ်မတၤတဂၤလဲၣ်.” 54 ယ့ၣ်ၡူးစံးဆၢတၢ်ဒီးစံးဝဲ, “ယမ့ၢ်ဘၣ်မၤလၤကပီၤလီၤ ယသးဒၣ်ယဲဒီး, တၢ်လၤကပီၤအဝဲန့ၣ်တမ့ၢ်လၢအလုၢ်အပှ့ၤ ကအိၣ်ဘၣ်. ပှၤလၢအမၤလၤကပီၤယၤတဂၤန့ၣ်မ့ၢ်ယပၢ်, ပှၤတဂၤဃီလၢသုစံးလၢအမ့ၢ်သုကစၢ်ယွၤန့ၣ်လီၤ. 55 သုတသ့ၣ်ညါတ့ၢ်အီၤနီတစုဘၣ်. မ့မ့ၢ်ယဲဒၣ်ယသ့ၣ်ညါ အီၤလီၤ. ယမ့ၢ်စံးလၢယတသ့ၣ်ညါအီၤဘၣ်ဒီး, ယကကဲထီၣ်ပှၤလီတၢ်ဒ်သုဝဲအသိးလီၤ. ဘၣ်ဆၣ်ယသ့ၣ်ညါ အီၤဒီးယဒိကနၣ်အကလုၢ်ကထါလီၤ. 56 သုပၢ်စီၤအၤဘြၤဟၣ်သူၣ်ခုသးခုလၢအကထံၣ်ဘၣ်ယတၢ်ဟဲ အဆၢကတီၢ်, ဒီးထံၣ်ဘၣ်ဝဲဒီးသူၣ်ခုသးခုဝဲလီၤ.” 57 ပှၤယူဒၤဖိတဖၣ်စံးဘၣ်အီၤ, “နသးတအိၣ်အနံၣ်ယဲၢ်ဆံဒံးဘၣ်ဒီး မ့ၢ်နထံၣ်ဘၣ်စီၤအၤဘြၤဟၣ်လံဧါ.” 58 ယ့ၣ်ၡူးစံးဆၢတၢ်ဒီးစံးဝဲ, “ယစံးဘၣ်တဲဘၣ်သုတီတီလိၤ လိၤ, တချုးလၢစီၤအၤဘြၤဟၣ်အိၣ်ဖျဲၣ်ထီၣ်ဒံးဘၣ်ဒီးယမ့ၢ် တၢ်လၢယမ့ၢ်လီၤ.” 59 ထဲန့ၣ်ဒီး, အဝဲသ့ၣ်ထၢထီၣ်လၢၢ်တဖၣ်လၢကကွံာ်အီၤ အဂီၢ်, ဘၣ်ဆၣ်ယ့ၣ်ၡူးပာ်ခူသူၣ်အသးဒီး ဟးထီၣ်ကွံာ်လၢတၢ်လုၢ်ဟံၣ်အပူၤန့ၣ်လီၤ. |
Sgaw Karen Common Bible © Bible Society of Myanmar, 1992.
Bible Society of Myanmar