လံာ်ယိၤဟၣ် 6 - Sgaw Karen Common Bible

ယ့ၣ်ၡူးလုၢ်အီၣ်ပှၤအဂၤယဲၢ်ကထိ

¹ တၢ်အံၤဝံၤဒီး, ယ့ၣ်ၡူးခီဂာ်ပီၣ်လဲၣ်ကၤလံၤလါ (လၢအဘၣ်တၢ်ကိးစ့ၢ်ကီးအီၤလၢပီၣ်လဲၣ်တံၤဘ့ၤရံ) ဆူဝၢ်ဘးခီန့ၣ်လီၤ.

² ပှၤဂီၢ်မုၢ်ဖးဒိၣ်ပိာ်ထီၣ်အခံ, မ့ၢ်လၢအဝဲသ့ၣ်ထံၣ်ဘၣ်တ့ၢ်အတၢ်မၤလီၤလးတဖၣ် ခီဖျိအတၢ်မၤဘျါက့ၤပှၤဆူးပှၤဆါတဖၣ်အဃိလီၤ.

³ ယ့ၣ်ၡူးလဲၤထီၣ်ဆူတၢ်လူၢ်ဒီခိၣ် ဒီးဆ့ၣ်နီၤသကိးဒီးအပျဲၢ်အဘီၣ်တဖၣ်န့ၣ်လီၤ.

⁴ အကတီၢ်ဖဲန့ၣ်ပှၤယူဒၤဖိတဖၣ်အဘူၣ်လဲၤကပာ် ကဘၣ်ဝဲဘူးထီၣ်လံန့ၣ်လီၤ.

⁵ ယ့ၣ်ၡူးကွၢ်တရံးတၢ်ဝးဝးဒီးထံၣ်ဘၣ်ပှၤဂီၢ်မုၢ်ဖးဒိၣ် ဟဲဆူအအိၣ်ဒီးစံးဘၣ်စီၤဖံလံးပူး, “တၢ်အီၣ်လၢအကလၢဝဲလၢပှၤဂီၢ်မုၢ်ခဲလၢာ်အံၤအဂီၢ်န့ၣ် ပပှ့ၤကန့ၢ်ဖဲလဲၣ်.”

⁶ (အဝဲစံးတၢ်အံၤမ့ၢ်ဒၣ်လၢကမၤကွၢ်စီၤဖံလံးပူးအဂီၢ်န့ၣ်လီၤ. နီၢ်နီၢ်တခီအဝဲကမၤဝဲဒ်လဲၣ်န့ၣ်, အကစၢ်ဒၣ်ဝဲသ့ၣ်ညါပာ်စၢၤဝဲန့ၣ်လီၤ.)

⁷ စီၤဖံလံးပူးစံးဆၢအီၤ, “လၢပှၤခဲလၢာ်ကအီၣ်ဘၣ်တၢ်ထဲ တဂၤတစဲးဖိဒၣ်လဲာ်, စ့ကလၢာ်အါန့ၢ်ဒံးဒန့ၤရံခံကယၤ လၢတၢ်ပှ့ၤန့ၢ်ကိၣ်အဂီၢ်လီၤ.

⁸ အပျဲၢ်အဘီၣ်အဂၤတဂၤလၢအမ့ၢ်စီၤၡံမိၣ်ပ့းတရူးအဒီပုၢ်ဝဲၢ် စီၤအၣ်ဒရ့းစံးဘၣ်ယ့ၣ်ၡူး,

⁹ “ပိာ်ခွါဖိသၣ်အိၣ်ဖဲအံၤတဂၤ, အကိၣ်အိၣ်ယဲၢ်ဖျၢၣ်ဒီးအညၣ် အိၣ်ခံဘ့ၣ်လီၤ. ဘၣ်ဆၣ်တၢ်သ့ၣ်တဖၣ်အံၤကလၢဝဲလၢပှၤခဲလၢာ်အဂီၢ်ဒ်လဲၣ်.”

¹⁰ ယ့ၣ်ၡူးစံးဘၣ်အပျဲၢ်အဘီၣ်တဖၣ်, “မၢပှၤသ့ၣ်တဖၣ်ဆ့ၣ်နီၤ တက့ၢ်.” (အဂ့ၢ်ဒ်အံၤ, ဖဲတၢ်လီၢ်န့ၣ်တပံၢ်အိၣ်အါမးလီၤ.) အန့ၣ်ဒီး, ပှၤခဲလၢာ်ဆ့ၣ်နီၤဝဲဒီးအနီၣ်ဂံၢ်ထဲပိာ်ခွါန့ၣ်အိၣ်ဝဲ အဂၤယဲၢ်ကထိဃၣ်ဃၣ်န့ၣ်လီၤ.

¹¹ ယ့ၣ်ၡူးဟံးန့ၢ်ကိၣ်, စံးထီၣ်ပတြၢၤကစၢ်ယွၤအဘျုးအဖှိၣ်ဝံၤဒီး ဟ့ၣ်နီၤလီၤဝဲပှၤလၢအဆ့ၣ်နီၤဖဲန့ၣ်တဖၣ်လီၤ. ဟံးန့ၢ်စ့ၢ်ကီးညၣ်ဒီးမၤဝဲဒ်န့ၣ်အသိး, ဒီးပှၤခဲလၢာ်အီၣ်ဘၣ်ဝဲ လၢအီၣ်လၢအီန့ၣ်လီၤ.

¹² တုၤအဝဲသ့ၣ်အီၣ်တၢ်ဘျဲးအီၣ်န့ၣ်, ယ့ၣ်ၡူးစံးဘၣ်အပျဲၢ်အဘီၣ် တဖၣ်, “ထၢဖှိၣ်က့ၤတၢ်အဘျဲၣ်အစဲၢ်တဖၣ်တက့ၢ်. တဘၣ်ပျဲလၢာ်ဂီၤကလီတၢ်နီတစဲးတဂ့ၤ.”

¹³ အန့ၣ်ဒီး, အဝဲသ့ၣ်ထၢဖှိၣ်က့ၤကိၣ်လၢအအိၣ်ဘျဲၣ်တ့ၢ် တဖၣ်, ဒီးကိၣ်ယဲၢ်ဖျၢၣ်လၢပှၤဂီၢ်မုၢ်အီၣ်ဝဲဒၣ်န့ၣ် အိၣ်ဘျဲၣ်တ့ၢ်ပှဲၤကုတဆံခံဒုန့ၣ်လီၤ.

¹⁴ ပှၤဂီၢ်မုၢ်ဖဲန့ၣ်တဖၣ်ထံၣ်ဘၣ်ယ့ၣ်ၡူးမၤတၢ်လီၤလးအံၤသတး ဒီးစံးဝဲ, “အဝဲဒၣ်အံၤမ့ၢ်နီၢ်နီၢ်ဝံလၢအကဟဲဆူဟီၣ်ခိၣ် တဂၤန့ၣ်လီၤ.”

¹⁵ ယ့ၣ်ၡူးသ့ၣ်ညါလၢအဝဲသ့ၣ်ကဟဲဟံးန့ၢ်ဆူၣ်အီၤဒ် သိးအကဒုးကဲအီၤလၢစီၤပၤအဃိ, အဝဲဟးထီၣ်ကဒီးဆူကစၢၢ်ကလိအကျါထဲတဂၤ ဧိၤန့ၣ်လီၤ.

ယ့ၣ်ၡူးဟးလၢထံဖံးခိၣ်

¹⁶ တုၤမုၢ်ဟါလီၤဒီး, ယ့ၣ်ၡူးအပျဲၢ်အဘီၣ်တဖၣ်လဲၤဆူပီၣ်လဲၣ် ကၢၢ်နံၤ,

¹⁷ ဒီးလဲၤနုာ်ဃီၤဝဲဆူချံတဘ့ၣ်အပူၤဒီးက့ၤခီကဒါက့ၤပီၣ်လဲၣ်ဆူဝ့ၢ် ကပ့းရနီၣ်န့ၣ်လီၤ. အခါဖဲန့ၣ်, တၢ်ခံးလီၤလံ ဒီးယ့ၣ်ၡူးဟဲတတုၤဒံးဘၣ်ဆူအဝဲသ့ၣ်အအိၣ်ဘၣ်.

¹⁸ အကတီၢ်ဖဲန့ၣ်, ကလံၤအူတၢ်ဆူၣ်ဒိၣ်မးဒီးလပီတဖၣ် စံၣ်စုးထီၣ်ဝဲဒိၣ်မးန့ၣ်လီၤ.

¹⁹ ဖဲအပျဲၢ်အဘီၣ်တဖၣ်ဝၢ်တ့ၢ်အချံကလဲၤသၢမံးလးလွံၢ်မံးလး ဃၣ်ဃၣ်န့ၣ်, အဝဲသ့ၣ်ထံၣ်ဘၣ်ယ့ၣ်ၡူးဟးလၢထံဖံးခိၣ်, ဟဲဘူးထီၣ်ဒီးအချံဒီးအဝဲသ့ၣ်ပျံၤတၢ်ဖုးတၢ်ဒိၣ်မးန့ၣ်လီၤ.

²⁰ ယ့ၣ်ၡူးစံးဘၣ်အဝဲသ့ၣ်, “ပျံၤတၢ်တဂ့ၤ, မ့ၢ်ယၤလီၤ.”

²¹ ထဲန့ၣ်ဒီး, အဝဲသ့ၣ်လၢတၢ်သူၣ်ခုသးခုအပူၤကိးနုာ်ယ့ၣ်ၡူး ဆူချံအပူၤဒီးတကီၢ်ခါချံန့ၣ်တုၤဃီၤလၢခိဖဲတၢ်လီၢ်လၢ အဝဲသ့ၣ်ဆၢလဲၤတုၤဝဲန့ၣ်လီၤ.

ပှၤဂီၢ်မုၢ်ဃုထံၣ်ယ့ၣ်ၡူး

²² လၢခံတနံၤ, ပှၤဂီၢ်မုၢ်လၢအအိၣ်တီၢ်လၢပီၣ်လဲၣ်အဝၢ်ဘးခီ တဖၣ်သ့ၣ်ညါဝဲလၢဖဲတၢ်လီၢ်န့ၣ်ချံအိၣ်ဒၣ်ထဲတဘ့ၣ်ဧိၤ န့ၣ်လီၤ. အဝဲသ့ၣ်သ့ၣ်ညါဝဲလၢယ့ၣ်ၡူးတလဲၤဒိးဃုာ်ချံအံၤဒီး အပျဲၢ်အဘီၣ်တဖၣ်ဘၣ်ဒီးအပျဲၢ်အဘီၣ်တဖၣ်ဟးထီၣ်ထဲ အဝဲသ့ၣ်ဧိၤန့ၣ်လီၤ.

²³ ချံအဂၤတဖၣ်ဟဲလၢဝ့ၢ်တံၤဘ့ၤရံဒီးဟဲတိၢ်ထီၣ်အသးဘူး ဒီးတၢ်လီၢ်ဖဲယ့ၣ်ၡူးစံးဘျုးယွၤဝံၤအလီၢ်ခံပှၤဂီၢ်မုၢ်အီၣ် တ့ၢ်ကိၣ်န့ၣ်လီၤ.

²⁴ ဖဲပှၤဂီၢ်မုၢ်ထံၣ်လၢယ့ၣ်ၡူးဒီးအပျဲၢ်အဘီၣ်တဖၣ် တအိၣ်လၢၤဖဲန့ၣ်ဘၣ်ဒီး, အဝဲသ့ၣ်ဒိးထီၣ်အချံတဖၣ်ဒီး လဲၤဆူဝ့ၢ်ကပ့းရနီၣ်လၢအကဃုထံၣ်န့ၢ်အီၤအဂီၢ်လီၤ.

ယ့ၣ်ၡူးမ့ၢ်တၢ်မူအကိၣ်

²⁵ တုၤပှၤဂီၢ်မုၢ်ထံၣ်ယ့ၣ်ၡူးလၢပီၣ်လဲၣ်အဝၢ်ဘးခီဒီး, အဝဲသ့ၣ် စံးဘၣ်အီၤ, “သရၣ်ဧၢ, နဟဲတုၤဖဲအံၤအခါဖဲလဲၣ်.”

²⁶ ယ့ၣ်ၡူးစံးဆၢတၢ်ဒီးစံးဝဲ, “ယစံးဘၣ်တဲဘၣ်သုတၢ်မ့ၢ် တၢ်တီလီၤ. သုဃုယၤမ့ၢ်ဒၣ်လၢသုအီၣ်ဘၣ်ကိၣ်ဘျဲးအီၣ် ဘျဲးအီအဃိဒီးတမ့ၢ်လၢသုနၢ်ပၢၢ် ယတၢ်မၤလီၤလးတဖၣ်အခီပညီအဃိန့ၣ်ဘၣ်.

²⁷ တဘၣ်မၤတၢ်လၢတၢ်အီၣ်လၢအဟးဂီၤသ့အဂီၢ် တဂ့ၤ. မ့မ့ၢ်မၤတၢ်လၢတၢ်အီၣ်လၢအအိၣ်ဂၢၢ်ကျၢၤ လၢတၢ်မူအထူအယိာ်အဂီၢ်န့ၣ်တက့ၢ်. တၢ်အံၤမ့ၢ်တၢ်အီၣ်လၢပှၤကညီဖိခွါကဟ့ၣ်သု, မ့ၢ်လၢပၢ်ကစၢ်ယွၤစဲပနီၣ်ဃာ်အီၤလၢတၢ်ပနီၣ်လၢ အပာ်ဖျါအတၢ်ဘၣ်အသးလၢအီၤအဃိန့ၣ်လီၤ.”

²⁸ မၤသးဒ်န့ၣ်ဒီးအဝဲသ့ၣ်သံကွၢ်အီၤ, “ဒ်သိးပကမၤတၢ်လၢ ကစၢ်ယွၤဘၣ်အသးလၢပကမၤန့ၣ်, ပမၤမနုၤကသ့လဲၣ်.”

²⁹ ယ့ၣ်ၡူးစံးဆၢတၢ်ဒီးစံးဝဲ, “တၢ်လၢကစၢ်ယွၤဘၣ်အသး လၢသုကမၤန့ၣ်, မ့ၢ်တၢ်စူၢ်က့ၤနာ်က့ၤပှၤလၢအဝဲမၢလီၤဝဲ တဂၤန့ၣ်လီၤ.”

³⁰ အဝဲသ့ၣ်စံးဆၢဝဲ, “ဒ်သိးပကထံၣ်ဘၣ်ဒီးစူၢ်က့ၤနာ်က့ၤနၤ အဂီၢ်န့ၣ်, နကမၤတၢ်လီၤလးမနုၤတမံၤလဲၣ်. နကမၤတၢ်မနုၤလဲၣ်.

³¹ ပမိၢ်ပၢ်ဖံဖုလၢပျၢၤတဖၣ်အီၣ်ကိၣ်မၤနၤလၢပှၢ်မုၢ်ကနၢ, ဒ်တၢ်ကွဲးအသးစံးဝဲအသိး, ‘အဝဲဟ့ၣ်အီၣ်ပှၤသ့ၣ်တဖၣ် န့ၣ်လၢကိၣ်ဟဲလီၤလၢမူခိၣ်န့ၣ်လီၤ’ ” (စံး. ၇၈:၂၄).

³² ယ့ၣ်ၡူးစံးဘၣ်အဝဲသ့ၣ်, “ယစံးဘၣ်တဲဘၣ်သုတၢ်မ့ၢ်တၢ် တီလီၤ. စီၤမိၤၡ့တဟ့ၣ်အီၣ်သုကိၣ်လၢအဟဲလီၤလၢမူခိၣ်ဘၣ်. ပှၤလၢအဟ့ၣ်အီၣ်သုကိၣ်နီၢ်နီၢ်လၢအဟဲလီၤလၢမူခိၣ်န့ၣ် မ့ၢ်ယပၢ်န့ၣ်လီၤ.

³³ အဂ့ၢ်ဒ်အံၤ, ကိၣ်လၢကစၢ်ယွၤဟ့ၣ်လီၤဝဲန့ၣ်ဟဲလီၤလၢမူခိၣ်, ဒီးဟ့ၣ်ပှၤဟီၣ်ခိၣ်ဖိလၢတၢ်မူန့ၣ်လီၤ.”

³⁴ အဝဲသ့ၣ်သံကွၢ်အီၤဒီးစံး, “ကစၢ်ဧၢ, ဟ့ၣ်ပှၤကိၣ်အံၤထီဘိတထံၣ်ဃီတက့ၢ်.”

³⁵ ယ့ၣ်ၡူးစံးဘၣ်တဲဘၣ်အဝဲသ့ၣ်, “ယဲဒၣ်အံၤယမ့ၢ်တၢ်မူ အကိၣ်န့ၣ်လီၤ. ပှၤလၢအဟဲဆူယအိၣ်န့ၣ် တၢ်တသၣ်ဝံၤလၢၤဘၣ်အသးနီတဘျီဘၣ်. ပှၤလၢ အစူၢ်က့ၤနာ်က့ၤယၤန့ၣ်တၢ်တသူလၢၤဘၣ်အသးလၢ ထံနီတဘျီဘၣ်.

³⁶ ယစံးဘၣ်တ့ၢ်သုလၢသုထံၣ်ဘၣ်လံယၤလံ. ဘၣ်ဆၣ်ဒီးသုတနာ်ယၤဘၣ်.

³⁷ ကယဲၢ်ပှၤလၢယပၢ်ဟ့ၣ်လီၤယၤတဖၣ်န့ၣ်ကဟဲဆူယအိၣ် လီၤ. ဒီးပှၤလၢအဟဲဆူယအိၣ်တဖၣ်န့ၣ်ယတဟီထီၣ်ကွံာ် အီၤနီတဂၤဘၣ်.

³⁸ အဂ့ၢ်ဒ်လဲၣ်န့ၣ်, ယဟဲလီၤလၢမူခိၣ် ဒ်သိးယကမၤပှၤလၢအမၢလီၤယၤတဂၤအတၢ်ဘၣ်အသး ဒီးတမ့ၢ်တၢ်ဘၣ်ယသးဒၣ်ယဲအဂီၢ်န့ၣ်ဘၣ်.

³⁹ ဒီးပှၤလၢအမၢလီၤယၤတဂၤဘၣ်အသးလၢယကမၤဒ်သိး ပှၤလၢအဝဲဟ့ၣ်လီၤယၤတဖၣ်အသုတလီၤမၢ်ကွံာ်နီတဂၤ တဂ့ၤ. ဒီးလၢယကဒုးဂဲၤဆၢထၢၣ်က့ၤအဝဲသ့ၣ်ခဲလၢာ်ဆူ တၢ်မူလၢမုၢ်နံၤခံကတၢၢ်န့ၣ်လီၤ.

⁴⁰ အဂ့ၢ်ဒ်အံၤ, ယပၢ်အတၢ်ဘၣ်အသးမ့ၢ်ဒ်သိးကယဲၢ်ပှၤလၢ အထံၣ်ဖိခွါဒီးစူၢ်က့ၤနာ်က့ၤအီၤတဂၤလၢ်လၢ် ကဒိးန့ၢ်ဘၣ်တၢ်မူအထူအယိာ်န့ၣ်လီၤ. ဒီးယကဒုးဂဲၤဆၢထၢၣ်က့ၤအဝဲသ့ၣ်ဆူတၢ်မူလၢ မုၢ်နံၤခံကတၢၢ်န့ၣ်လီၤ.”

⁴¹ မ့ၢ်လၢအစံးဝဲ, “ယဲဒၣ်အံၤယမ့ၢ်တၢ်မူအကိၣ်လၢအဟဲ လီၤလၢမူခိၣ်” အဃိဒီး, ပှၤယူဒၤဖိတဖၣ်ကဒူးကဒ့ၣ်တၢ်လၢ အလိၤလီၤ.

⁴² အဝဲသ့ၣ်စံးဝဲ, “ပှၤတဂၤအံၤမ့ၢ်စီၤယိၤသးအဖိခွါယ့ၣ်ၡူး, တမ့ၢ်ဘၣ်ဧါ. ပသ့ၣ်ညါအမိၢ်ဒီးအပၢ်လီၤ. မ့မ့ၢ်ဒ်န့ၣ်ဒီး, ဘၣ်မနုၤအဃိအဝဲစံးဝဲခဲအံၤလၢအဟဲလီၤလၢမူခိၣ်န့ၣ်လဲၣ်.”

⁴³ ယ့ၣ်ၡူးစံးဆၢအဝဲသ့ၣ်, “တဘၣ်ကဒူးကဒ့ၣ်တၢ်လၢၤ တဂ့ၤ.

⁴⁴ မ့တမ့ၢ်ဘၣ်လၢပၢ်လၢအမၢလီၤယၤတဂၤဒုးဟဲအီၤဆူယအိၣ် ဘၣ်ဒီး, ပှၤဟဲဆူယအိၣ်တသ့နီတဂၤဘၣ်. ဒီးယကဒုးဂဲၤဆၢထၢၣ်က့ၤအီၤဆူတၢ်မူလၢမုၢ်နံၤခံကတၢၢ် န့ၣ်လီၤ.

⁴⁵ ဝံတဖၣ်ကွဲးတ့ၢ်ဝဲ, ‘ပှၤခဲလၢာ်ကဘၣ်တၢ်သိၣ်လိအီၤလၢ ကစၢ်ယွၤလီၤ’ (ၡါ. ၅၄:၁၃). ကယဲၢ်ပှၤတဂၤလၢ်လၢ်လၢ အနၢ်ဟူပၢ်အတၢ်သိၣ်လိသီလိအီၤဒီးမၤလိတၢ်လၢ အီၤန့ၣ်, ဟဲဆူယအိၣ်လီၤ.

⁴⁶ ဒီးတၢ်အံၤအခီပညီတမ့ၢ်လၢပှၤထံၣ်ဘၣ်လံပၢ်န့ၣ် ဘၣ်. ပှၤလၢအဟဲလၢကစၢ်ယွၤအအိၣ်န့ၣ်, မ့ၢ်ပှၤထဲတဂၤဧိၤလၢအထံၣ်ဘၣ်ပၢ်န့ၣ်လီၤ.

⁴⁷ ယစံးဘၣ်တဲဘၣ်သုတၢ်မ့ၢ်တၢ်တီလီၤ. ပှၤလၢအစူၢ်က့ၤနာ် က့ၤတၢ်န့ၣ်အိၣ်ဒီးတၢ်မူအထူအယိာ်လီၤ.

⁴⁸ ယဲဒၣ်အံၤယမ့ၢ်တၢ်မူအကိၣ်လီၤ.

⁴⁹ သုမိၢ်ပၢ်ဖံဖုလၢပျၢၤတဖၣ်အီၣ်ကိၣ်မၤနၤလၢပှၢ်လၢ်ကျါ ဘၣ်ဆၣ်ဒီးအဝဲသ့ၣ်သံဝဲလီၤ.

⁵⁰ အအံၤမ့ၢ်ကိၣ်လၢအဟဲလီၤလၢမူခိၣ်ဒီးပှၤလၢအအီၣ်ဘၣ်အီၤ တဂၤလၢ်လၢ်န့ၣ်တသံလၢၤဘၣ်.

⁵¹ ယဲဒၣ်အံၤယမ့ၢ်ကိၣ်မူလၢအဟဲလီၤလၢမူခိၣ် န့ၣ်လီၤ. ပှၤတဂၤလၢ်လၢ်လၢအအီၣ်ကိၣ်အံၤန့ၣ်, ကမူဝဲလီၤထူလီၤယိာ်န့ၣ်လီၤ. ကိၣ်လၢယကဟ့ၣ်လီၤအီၤ န့ၣ်, မ့ၢ်ယညၣ်လၢယဟ့ၣ်လီၤလၢပှၤဟီၣ်ခိၣ်ဖိကမူဝဲအဂီၢ် န့ၣ်လီၤ.”

⁵² တၢ်ဂ့ၢ်အံၤဒုးအိၣ်ထီၣ်တၢ်ဂ့ၢ်လိာ်ဘှီလိာ်ဖးဒိၣ်လၢပှၤယူဒၤဖိတဖၣ် အကျါန့ၣ်လီၤ. အဝဲသ့ၣ်သံကွၢ်တၢ်ဒီးစံး, “ပှၤတဂၤအံၤဟ့ၣ်အီၣ်ပှၤလၢအညၣ်ကသ့ဒ်လဲၣ်.”

⁵³ ယ့ၣ်ၡူးစံးဘၣ်အဝဲသ့ၣ်, “ယစံးဘၣ်တဲဘၣ်သုတၢ်မ့ၢ်တၢ် တီလီၤ. သုမ့ၢ်တအီၣ်ဘၣ်ပှၤကညီဖိခွါအညၣ်ဒီးအီဘၣ် အသွံၣ်န့ၣ်, တၢ်မူတအိၣ်ဘၣ်လၢသုပူၤဘၣ်.

⁵⁴ ပှၤတဂၤလၢ်လၢ်လၢအအီၣ်ယညၣ်ဒီးအီယသွံၣ်န့ၣ်, အိၣ်ဒီးတၢ်မူအထူအယိာ်, ဒီးယကဒုးဂဲၤဆၢထၢၣ်က့ၤ အီၤဆူတၢ်မူလၢမုၢ်နံၤခံကတၢၢ်န့ၣ်လီၤ.

⁵⁵ အဂ့ၢ်ဒ်အံၤ, ယညၣ်မ့ၢ်တၢ်အီၣ်နီၢ်နီၢ်, ဒီးယသွံၣ်မ့ၢ်တၢ်အီ နီၢ်နီၢ်လီၤ.

⁵⁶ ပှၤတဂၤလၢ်လၢ်လၢအအီၣ်ယညၣ်ဒီးအီယသွံၣ်န့ၣ်မူလၢယပူၤ, ဒီးယမူလၢအပူၤလီၤ.

⁵⁷ ပၢ်လၢအမူဝဲတဂၤမၢလီၤယၤ, ဒီးလၢအဝဲဒၣ်အဃိယမူယဲစ့ၢ် ကီးလီၤ. ဒ်န့ၣ်အသိး, ပှၤတဂၤလၢ်လၢ်လၢအအီၣ်ယၤန့ၣ်ကမူ ဝဲလၢယဃိန့ၣ်လီၤ.

⁵⁸ အအံၤ, မ့ၢ်ကိၣ်လၢအဟဲလီၤလၢမူခိၣ်န့ၣ်လီၤ. တမ့ၢ်ဘၣ်ဒ်ကိၣ်လၢသုမိၢ်ပၢ်ဖံဖုလၢပျၢၤအီၣ်ဝဲဒီး လၢခံသံဝဲအသိးန့ၣ်ဘၣ်. ပှၤတဂၤလၢ်လၢ်လၢအအီၣ် ကိၣ်အံၤကမူဝဲလီၤထူလီၤယိာ်လီၤ.”

⁵⁹ ယ့ၣ်ၡူးစံးတၢ်တဖၣ်အံၤဖဲအဝဲသိၣ်လီၤသီလီၤတၢ်လၢ ဘူၣ်ဘျီၣ်လၢအမ့ၢ်တၢ်ဘါလီၢ်အပူၤဖဲဝ့ၢ်ကပ့းရနီၣ် န့ၣ်လီၤ.

တၢ်မူအထူအယိာ်အတၢ်ကတိၤတဖၣ်

⁶⁰ အပျဲၢ်အဘီၣ်အါဂၤနၢ်ဟူတၢ်အံၤဒီးစံးဝဲ, “တၢ်သိၣ်လိသီလိအံၤတလၢကွံာ်အခၢးလီၤ. မ့ၢ်မတၤတူၢ်လိာ်အီၤကသ့တဂၤလဲၣ်.”

⁶¹ ဘၣ်ဆၣ်ယ့ၣ်ၡူးသ့ၣ်ညါလၢအသးဒၣ်ဝဲလၢအပျဲၢ် အဘီၣ်သ့ၣ်တဖၣ်ကဒူးကဒ့ၣ်တၢ်လၢတၢ်ဂ့ၢ်အံၤ, သတးဒီးစံးဘၣ်အဝဲသ့ၣ်, “တၢ်အံၤမၤတံာ်တာ်သု သးဧါ.

⁶² သုမ့ၢ်ထံၣ်ဘၣ်ပှၤကညီဖိခွါအံၤက့ၤထီၣ်ဆူအလီၢ် လၢအအိၣ်တ့ၢ်ဝဲလၢအခီၣ်ထံးန့ၣ်ဒီး, သုသးကမၤ အသးဒ်လဲၣ်.

⁶³ တၢ်လၢအဟ့ၣ်တၢ်မူန့ၣ်မ့ၢ်ကစၢ်ယွၤအသး လီၤ. ပှၤကညီအစိအကမီၤဟ့ၣ်တၢ်အံၤတသ့ ဘၣ်. တၢ်ကတိၤတဖၣ်လၢယစံးဘၣ်တဲဘၣ်သုန့ၣ်, ဟ့ၣ်သုလၢကစၢ်ယွၤအသးလၢအဒုးမူပှၤန့ၣ်လီၤ.

⁶⁴ သုဝဲတနီၤနီၤသုတနာ်ယၤဘၣ်.” (ပှၤတဖၣ်လၢ အတစူၢ်က့ၤနာ်က့ၤတၢ်ဘၣ်ဒီးပှၤတဂၤလၢအကဟ့ၣ် လီၤကွံာ်အီၤန့ၣ်, ယ့ၣ်ၡူးသ့ၣ်ညါဝဲလၢအခီၣ်ထံးလံၤလံၤလီၤ.)

⁶⁵ ဒီးစံးအါထီၣ်ကဒီးဝဲ, “လၢတၢ်န့ၣ်အဃိယစံးဘၣ်တ့ၢ်လံ သုလၢ, မ့တမ့ၢ်ဘၣ်လၢပၢ်ဟ့ၣ်တၢ်ပျဲဘၣ်ဒီးပှၤဟဲဆူယအိၣ် တသ့နီတဂၤဘၣ်.”

⁶⁶ လၢတၢ်အံၤအဃိ, ယ့ၣ်ၡူးအပျဲၢ်အဘီၣ်အါဂၤက့ၤကဒါ က့ၤဒီးတပိာ်လၢၤအခံဘၣ်န့ၣ်လီၤ.

⁶⁷ မၤသးဒ်န့ၣ်ဒီးယ့ၣ်ၡူးသံကွၢ်အပျဲၢ်အဘီၣ်တဆံခံဂၤ, “သုဝဲသ့ၣ်လဲၣ်, သုကက့ၤကဒါက့ၤစ့ၢ်ကီးဧါ.”

⁶⁸ စီၤၡံမိၣ်ပ့းတရူးစံးဆၢတၢ်ဒီးစံးဝဲ, “ကစၢ်ဧၢ, ပကလဲၤဆူမတၤတဂၤအအိၣ်လဲၣ်. နအိၣ်ဒီးတၢ်ကတိၤတဖၣ်လၢအဟ့ၣ်တၢ်မူအထူ အယိာ်လီၤ.

⁶⁹ ဒီးခဲအံၤပနာ်ဒီးသ့ၣ်ညါလၢနမ့ၢ်ပှၤစီဆှံတဂၤ လၢအဟဲလၢကစၢ်ယွၤအအိၣ်န့ၣ်လီၤ.”

⁷⁰ ယ့ၣ်ၡူးစံးဆၢအဝဲသ့ၣ်, “ယဃုထၢသုဝဲတဆံခံဂၤ တမ့ၢ်ဘၣ်ဧါ. အန့ၣ်ဒၣ်လဲာ်ပှၤလၢသုကျါတဂၤန့ၣ်မ့ၢ် မုၣ်ကီၤလံၢ်လီၤ.”

⁷¹ ယ့ၣ်ၡူးကတိၤတၢ်အံၤဘၣ်ဃးစီၤၡံမိၣ်အံၣ်စကၤရံၤအိာ် အဖိခွါစီၤယူဒၤန့ၣ်လီၤ. အဝဲမ့ၢ်အပျဲၢ်အဘီၣ်တဆံခံဂၤ အကျါတဂၤသနာ်က့, ကသမၢယ့ၣ်ၡူးဒီးဟ့ၣ်လီၤကွံာ်အီၤ န့ၣ်လီၤ.