လံာ်ယိၤဟၣ် 3 - Sgaw Karen Common Bible

ယ့ၣ်ၡူးဒီးစီၤနံၤကဒ့မူး

¹ ပှၤယူဒၤဖိအခိၣ်လၢအဘၣ်ဃးဒီးပှၤဖၤရံၤၡဲတဖၣ်အိၣ်ဝဲ တဂၤဒီးအမံၤမ့ၢ်ဝဲစီၤနံၤကဒ့မူးန့ၣ်လီၤ.

² ဘၣ်တနၤအဝဲလဲၤဆူယ့ၣ်ၡူးအအိၣ်ဒီးစံးဘၣ်အီၤ, “ရၤဘံဧၢ, ပသ့ၣ်ညါလၢနမ့ၢ်သရၣ်လၢအဟဲလၢ ကစၢ်ယွၤအအိၣ်န့ၣ်လီၤ. အဂ့ၢ်ဒ်အံၤ, တၢ်လီၤလးတဖၣ်လၢနမၤန့ၣ်, ကစၢ်ယွၤအိၣ်တ့ၢ်ဒီးနၤအဃိဒီးနမၤနဲသ့ဝဲန့ၣ်လီၤ.”

³ ယ့ၣ်ၡူးစံးဝဲ, “ယတဲဘၣ်နၤတီတီလိၤလိၤ, ပှၤမ့ၢ်တအိၣ်ဖျဲၣ်ကဒီးတစုဘၣ်ဒီး, ပှၤထံၣ်ဘၣ်ကစၢ်ယွၤအဘီအမုၢ်တသ့ဘၣ်.”

⁴ စီၤနံၤကဒ့မူးသံကွၢ်အီၤ, “ပှၤဒိၣ်တုာ်ခိၣ်ပှဲၤတဂၤအိၣ်ဖျဲၣ်ကဒီး ကသ့ဒ်လဲၣ်. အဝဲကက့ၤနုာ်ဆူအမိၢ်အဟၢဖၢပူၤဒီးအိၣ်ဖျဲၣ်ထီၣ်ခံဘျီ တဘျီန့ၣ်ကသ့ဧါ.”

⁵ ယ့ၣ်ၡူးစံးဆၢဝဲ, “ယတဲဘၣ်နၤတီတီလိၤလိၤ, ပှၤမ့ၢ်တအိၣ်ဖျဲၣ်လၢထံဒီးယွၤအသးန့ၣ်ဘၣ်ဒီးပှၤလဲၤနုာ် ဆူကစၢ်ယွၤအဘီအမုၢ်အပူၤတသ့နီတဂၤဘၣ်.

⁶ ပှၤကညီတဂၤအိၣ်ဖျဲၣ်ထီၣ်ဝဲနီၢ်ခိနီၢ်ခီလၢမိၢ်ပၢ်လၢအအိၣ် ဒီးသွံၣ်ထံဖံးညၣ်လီၤ. ဘၣ်ဆၣ်ဒီး, အဝဲအိၣ်ဖျဲၣ်ထီၣ်လၢသူၣ် လၢသး, လၢယွၤအသးန့ၣ်လီၤ.

⁷ မ့ၢ်လၢယတဲဘၣ်နၤလၢသုဝဲခဲလၢာ်သုကဘၣ်အိၣ်ဖျဲၣ်ကဒီး တစုအဃိဒီး, တဘၣ်ကမၢကမၣ်တဂ့ၤ.

⁸ ကလံၤန့ၣ်ဖဲအမိၣ်အူအသးဒီးအူဝဲလီၤ. နနၢ်ဟူအသီၣ် ဘၣ်ဆၣ်ဟဲလၢလဲၣ်မ့တမ့ၢ်လဲၤဆူလဲၣ်န့ၣ်နတသ့ၣ်ညါဘၣ်. ပှၤကိးဂၤဒဲးလၢအအိၣ်ဖျဲၣ်လၢယွၤအသးန့ၣ်မၤအသးဒ်န့ၣ် အသိးလီၤ.”

⁹ စီၤနံၤကဒ့မူးသံကွၢ်အီၤ, “တၢ်အံၤမၤအသးကသ့ဒ်လဲၣ်.”

¹⁰ ယ့ၣ်ၡူးစံးဆၢအီၤ, “နမ့ၢ်သရၣ်ဖးဒိၣ်တဂၤလၢပှၤအံၣ်စရ့လးဖိ အကျါဒီးနတသ့ၣ်ညါတၢ်အံၤဘၣ်ဧါ.

¹¹ ယတဲဘၣ်နၤတီတီလိၤလိၤ, ပကတိၤတၢ်လၢပသ့ၣ်ညါ ဒီး ပပာ်ဖျါတၢ်လၢပထံၣ်, အန့ၣ်ဒၣ်လဲာ် သုဝဲလၢအသးအိၣ်တူၢ်လိာ်ပတၢ်ကစီၣ်တအိၣ်နီတဂၤဘၣ်.

¹² ယတဲဘၣ်နၤတၢ်တဖၣ်လၢအဘၣ်ဃးဒီးဟီၣ်ခိၣ် ဒီးနတနာ်ယၤဘၣ်. မ့မ့ၢ်ဒ်န့ၣ်ဒီး, ဖဲယတဲဘၣ်နၤတၢ်တဖၣ်လၢအဘၣ်ဃးဒီးမူခိၣ်န့ၣ် နနာ်ယၤကသ့ဒ်လဲၣ်.

¹³ မ့တမ့ၢ်ဘၣ်လၢပှၤကညီဖိခွါယၤအံၤလၢအဟဲလီၤလၢမူခိၣ် ဘၣ်ဒီး, ပှၤတလဲၤထီၣ်ဘၣ်ဆူမူခိၣ်နီတဂၤဒံးဘၣ်.

¹⁴ ဒီးဒ်စီၤမိၤၡ့ယူာ်ထီၣ်ဂုၢ်တိၢ်ဘီလၢနီၣ်ထိးဘိအလိၤလၢပှၢ်မုၢ်ကနၢ အသိးန့ၣ်, ပှၤကညီဖိခွါအံၤကဘၣ်တၢ်ယူာ်ထီၣ်အီၤဒ်န့ၣ်အသိး,

¹⁵ ဒ်သိးကယဲၢ်ပှၤလၢအစူၢ်က့ၤနာ်က့ၤအီၤတဂၤလၢ်လၢ်န့ၣ်, ကန့ၢ်ဘၣ်တၢ်မူအထူအယိာ်န့ၣ်လီၤ.

¹⁶ အဂ့ၢ်ဒ်အံၤ, ကစၢ်ယွၤအဲၣ်ပှၤဟီၣ်ခိၣ်ဖိ တုၤအဟ့ၣ်လီၤကွံာ်အဖိခွါအိၣ်တဂၤဃီ, ဒ်သိးကယဲၢ်ပှၤလၢအစူၢ်က့ၤနာ်က့ၤအီၤတဂၤ လၢ်လၢ်န့ၣ်, အသုတဟးဂီၤတဂ့ၤဒီးကန့ၢ်ဘၣ်တၢ်မူ အထူအယိာ်န့ၣ်လီၤ.

¹⁷ အဂ့ၢ်ဒ်အံၤ, တမ့ၢ်ဘၣ်ကစၢ်ယွၤမၢလီၤအဖိခွါဆူ ဟီၣ်ခိၣ်ချၢလၢအကစံၣ်ညီၣ်ပှၤဟီၣ်ခိၣ်ဖိအဂီၢ်န့ၣ် ဘၣ်. မ့ၢ်ဒ်သိးအကအုၣ်က့ၤခီၣ်က့ၤအီၤတခီန့ၣ်လီၤ.

¹⁸ ပှၤလၢအစူၢ်က့ၤနာ်က့ၤအီၤန့ၣ်ယွၤတစံၣ်ညီၣ်အီၤဘၣ်. မ့မ့ၢ်ပှၤလၢအတစူၢ်တနာ်အီၤန့ၣ်ယွၤစံၣ်ညီၣ်တ့ၢ်လံ အီၤမ့ၢ်လၢအဝဲတစူၢ်တနာ်ဘၣ်ယွၤအဖိခွါထဲတဂၤဧိၤ အဃိလီၤ.

¹⁹ တၢ်စံၣ်ညီၣ်မ့ၢ်ဒ်အံၤလီၤ. တၢ်ကပီၤဟဲနုာ်လီၤဆူဟီၣ်ခိၣ်, ဘၣ်ဆၣ်ပှၤဟီၣ်ခိၣ်ဖိအဲၣ်တၢ်ခံးဒိၣ်န့ၢ်ဒံးအအဲၣ်တၢ်ကပီၤ တက့ၢ်, မ့ၢ်လၢအတၢ်မၤတဖၣ်န့ၣ်အၢဝဲသီဝဲအဃိလီၤ.

²⁰ ပှၤလၢအမၤတၢ်အၢတၢ်သီတဂၤလၢ်လၢ်န့ၣ်သးဟ့တၢ် ကပီၤဒီးတဟဲဆူတၢ်ကပီၤအအိၣ်ဘၣ်. မ့ၢ်လၢအဝဲတအဲၣ်ဒိးအတၢ်မၤအအၢအသီတဖၣ် ကအိၣ်ဖျါထီၣ်ဝဲအဃိလီၤ.

²¹ ဘၣ်ဆၣ်ပှၤလၢအမၤတၢ်မ့ၢ်တၢ်တီတဂၤလၢ်လၢ်န့ၣ်, ဟဲဆူတၢ်ကပီၤအအိၣ်ဒ်သိးတၢ်ကထံၣ်ဘၣ်ဖျါဖျါလၢ အတၢ်မၤတဖၣ်ဘၣ်တၢ်မၤအီၤလၢတၢ်စူၢ်ကစၢ်ယွၤအပူၤ အဂီၢ်န့ၣ်လီၤ.”

ယ့ၣ်ၡူးဒီးစီၤယိၤဟၣ်

²² လၢတၢ်အံၤအလီၢ်ခံ, ယ့ၣ်ၡူးဒီးအပျဲၢ်အဘီၣ်တဖၣ်လဲၤဆူကီၢ် ယူဒၤ, အိၣ်ဒီးအဝဲသ့ၣ်ဖဲန့ၣ် ဒီးဘျၢပှၤလၢထံလီၤ.

²³ စီၤယိၤဟၣ်စ့ၢ်ကီးဘျၢတၢ်ဖဲအဲၤနိၣ်လၢအတယံၤဒီးၡၤလ့ၣ် မ့ၢ်လၢထံအိၣ်အါဝဲဖဲတၢ်လီၢ်န့ၣ်, ဒီးပှၤလဲၤဆူအအိၣ်ဒီး အဝဲဒၣ်ဘျၢပှၤတဖၣ်န့ၣ်လၢထံလီၤ.

²⁴ (အဂ့ၢ်ဒ်အံၤ, စီၤယိၤဟၣ်တဘၣ်တၢ်ဖီၣ်ဒၢနုာ်လီၤအီၤဆူ ဃိာ်ပူၤဒံးဘၣ်.)

²⁵ တၢ်ကတိၤဂ့ၢ်လိာ်အိၣ်ထီၣ်ဝဲလၢစီၤယိၤဟၣ်အပျဲၢ်အဘီၣ်တနီၤ ဒီးပှၤယူဒၤဖိတဂၤအဘၢၣ်စၢၤလၢတၢ်မၤကဆှီအလုၢ်အလၢ် အဂ့ၢ်န့ၣ်လီၤ.

²⁶ လၢတၢ်န့ၣ်အဃိအဝဲသ့ၣ်လဲၤဝဲဆူစီၤယိၤဟၣ်အအိၣ်ဒီး စံးဘၣ်အီၤ, “သရၣ်ဧၢ, ပှၤလၢအအိၣ်ဒီးနၤလၢယၢ်ဒ့ၣ်ဝၢ်ဘးခီ လၢနအုၣ်နသးလၢအဂ့ၢ်တဂၤန့ၣ်, ခဲအံၤဘျၢပှၤလၢထံဒီး ပှၤခဲလၢာ်လဲၤဆူအအိၣ်လီၤ.”

²⁷ စီၤယိၤဟၣ်စံးဆၢတၢ်ဒီးစံး, “ကစၢ်ယွၤမ့ၢ်တဟ့ၣ်လီၤတၢ်လၢအီၤဘၣ်ဒီး ပှၤဒိးန့ၢ်တၢ်တသ့နီတမံၤနီတဂၤဘၣ်.

²⁸ သုကစၢ်ဒၣ်သုဝဲသုမ့ၢ်ယပှၤအုၣ်အသးလၢသုနၢ်ဟူတ့ၢ်လံ လၢယစံး, ‘ယတမ့ၢ်ခရံာ်ဘၣ်. ဘၣ်ဆၣ်ဒီးတၢ်မၢလီၤဆိယၤလၢအဝဲအမဲာ်ညါလီၤ.’

²⁹ ပှၤလၢအဘၣ်ဃးဒီးတလးမူးပိာ်ခွါန့ၣ်မ့ၢ်တလးမူးပိာ်မုၣ်လီၤ. ဘၣ်ဆၣ်ဒီး, တလးမူးပိာ်ခွါအတံၤသကိးလၢအဆၢထၢၣ်ဒီးဒိ ကနၣ်တၢ်တဂၤန့ၣ်, တုၤအနၢ်ဟူတလးမူးပိာ်ခွါအကလုၢ်ဒီး သးခုဒိၣ်မးလီၤ. ယတၢ်သးခုန့ၣ်လၢထီၣ်ပှဲၤထီၣ်လၢကျဲဒ်အံၤလီၤ.

³⁰ အဝဲဒၣ်ကဘၣ်ဒိၣ်ထီၣ်ထီထီၣ်ဝဲ, မ့မ့ၢ်ယဲဒၣ်အံၤယကဘၣ်ဆံးလီၤစှၤလီၤဝဲလီၤ.”

ပှၤလၢအဟဲလၢမူခိၣ်တဂၤ

³¹ “ပှၤလၢအဟဲလၢထးန့ၣ်ဒိၣ်န့ၢ်ပှၤခဲလၢာ်ဒီးအိၣ်လၢတၢ်ခဲလၢာ် အဖီခိၣ်လီၤ. ပှၤလၢအအိၣ်လၢဟီၣ်ခိၣ်ဘၣ်ဃးဒီးဟီၣ်ခိၣ်ဒီး ကတိၤတၢ်ဘၣ်ဃးဒီးဟီၣ်ခိၣ်လီၤ. ပှၤလၢအဟဲလၢမူခိၣ်န့ၣ်, အိၣ်လၢပှၤခဲလၢာ်အဖီခိၣ်လီၤ.

³² တၢ်လၢအဝဲထံၣ်ဒီးနၢ်ဟူဝဲန့ၣ်စံးကတိၤဝဲ, သနာ်က့ပှၤတတူၢ်လိာ်အတၢ်ကစီၣ်နီတဂၤဘၣ်.

³³ ပှၤတဂၤလၢ်လၢ်လၢအအၢၣ်လီၤတူၢ်လိာ်အတၢ်ကစီၣ်န့ၣ်, ပာ်ဂၢၢ်ပာ်ကျၢၤဝဲလီၤတံၢ်လီၤဆဲးလၢကစၢ်ယွၤ န့ၣ်တီဝဲလိၤဝဲလီၤ.

³⁴ ပှၤလၢယွၤမၢလီၤအီၤတဂၤန့ၣ်, ကတိၤကစၢ်ယွၤအကလုၢ် ကထါတဖၣ်မ့ၢ်လၢကစၢ်ယွၤဟ့ၣ်အီၤကစၢ်ယွၤအသး လၢလၢပှဲၤပှဲၤအဃိလီၤ.

³⁵ ပၢ်အဲၣ်အဖိခွါဒီးဟ့ၣ်လီၤတၢ်ခဲလၢာ်လၢအစုပူၤလီၤ.

³⁶ ပှၤလၢအစူၢ်က့ၤနာ်က့ၤဖိခွါန့ၣ်အိၣ်ဒီးတၢ်မူအထူအယိာ် လီၤ. မ့မ့ၢ်ပှၤလၢတဒိကနၣ်ဒီးတစူၢ်တနာ်ဘၣ်ဖိခွါန့ၣ်, တအိၣ်ဒီးတၢ်မူန့ၣ်ဘၣ်. ဒီးကအိၣ်ဒၣ်လၢကစၢ်ယွၤအတၢ် စံၣ်ညီၣ်အဖီလာ်တထံၣ်ဃီန့ၣ်လီၤ.”