လံာ်ယံးရမံယၤ 46 - Sgaw Karen Common Bible

ကီၢ်အဲၤကူပတူးအတၢ်ဃၣ်ကွံာ် ဖဲဝ့ၢ်ကၢ်ကမံၣ်

¹ ယွၤကတိၤတၢ်ဒီး ယၤဘၣ်ဃးဒီးပှၤကလုာ်တဖၣ်အဂ့ၢ်,

² စးထီၣ်ဝဲဒီး ကီၢ်အဲၤကူပတူးအဂ့ၢ်န့ၣ်လီၤ. တၢ်အံၤမ့ၢ် တၢ်လၢအဝဲစံးဝဲဘၣ်ဃးဒီးကီၢ်အဲၤကူပတူးအစီၤပၤ နကိၤအသုးမုၢ်လၢ ကီၢ်ဘၤဘူၤလိၣ် အစီၤပၤနဘူၤကးန့စၢ် မၤနၢၤမၤဃၣ်အီၤဖဲ ဝ့ၢ်ကၢ်ကမံၣ်ဘူးဒီး ထံကျိဖရၤသး, ဖဲကီၢ်ယူဒၤအစီၤပၤ ယဟိၤယါကံၣ်ပၢတၢ်လွံၢ်နံၣ်တနံၣ် အပူၤန့ၣ်လီၤ.

³ “ကီၢ်အဲၤကူပတူး အသုးခိၣ်တဖၣ်ကိးထီၣ်ဝဲ, ‘ကတဲာ်ကတီၤသုကတီၤတဖၣ် ဒီးလဲၤထီၣ်ဆူတၢ်ဒုးအပူၤတက့ၢ်.

⁴ ဂီၤကၢ်ထီၣ်သုကသ့ၣ်တဖၣ် ဒီးဒိးထီၣ်အီၤတက့ၢ်. ဆၢထၢၣ်တဂ့ၢ်တဂ့ၢ်ဒီး ကုာ်ထီၣ်သုခိၣ်ကုာ်သုးတဖၣ်တက့ၢ်. ကျ့သုဘီဧိၤနးဧိၤဒီးသိးထီၣ်သုသဃိးကတီၤတဖၣ်တက့ၢ်.’

⁵ ယွၤသံကွၢ်ဝဲ, ဘၣ်ဆၣ်ဒီး ယထံၣ်ဘၣ်တၢ်မနုၤလဲၣ်. အဝဲသ့ၣ် ဃၣ်ကဒါက့ၤအသးလၢ တၢ်ပျံၤတၢ်ဖုးအပူၤလီၤ. အသုးဖိတဖၣ် ဘၣ်တၢ်မၤဃၣ်ကွံာ်အီၤ, တၢ်ပျံၤတၢ်ဖုးလုၣ်ဘၢကွံာ်အီၤလီၤ. အဝဲသ့ၣ်ဃ့ၢ်တချ့ဖဲအချ့ ဒီးတကွၢ်ကဒါက့ၤအလီၢ်ခံလၢၤဘၣ်.

⁶ ပှၤလၢအဃ့ၢ်ချ့တဖၣ်, ဃ့ၢ်တပူၤဘၣ်. ပှၤသုးဖိတဖၣ် ဃ့ၢ်ပူၤဖျဲးဝဲတသ့ၣ်ဘၣ်. လၢကလံၤစိးတကပၤ, လၢထံကျိဖရၤသးအဃၢၤန့ၣ် အဝဲသ့ၣ် အခီၣ်ဘၣ်တိၢ်ဒီး လီၤဃံၤဝဲလီၤ.

⁷ ပှၤလၢအဟဲထီၣ်ဝဲဒ် ထံကျိနံၤလါအသိး, ဒ်ထံကျိတဘိလၢ အလုၣ်ဘၢထံကၢၢ်နံၤအသိးအံၤ, မ့ၢ်မတၤတဂၤလဲၣ်.

⁸ တၢ်န့ၣ်မ့ၢ်ကီၢ်အဲၤကူပတူးလၢ အဟဲထီၣ်ဝဲဒ်ထံကျိနံၤ လါအသိး, ဒ်ထံကျိအထံလုၣ်ဘၢထံကၢၢ်နံၤအသိးန့ၣ်လီၤ. ကီၢ်အဲၤကူပတူးစံးဝဲဒၣ်, ‘ယကဟဲထီၣ်ဒီး လုၣ်ဘၢဟီၣ်ခိၣ်လီၤ. ယကမၤဟးဂီၤ ဝ့ၢ်တဖၣ်ဒီး ပှၤဂီၢ်မုၢ်လၢ အအိၣ်ဆိးဖဲန့ၣ်တဖၣ်လီၤ.

⁹ ဟ့ၣ်လီၤတၢ်ကလုၢ်လၢ ကသ့ၣ်တဖၣ်လၢ ကလဲၤတၢ်ဒီး ပှၤနီၣ်လ့ၣ်ကဟၣ်ကနီၣ်တၢ်ဆူၣ်ဆူၣ် အဂီၢ်တက့ၢ်. ဆှၢထီၣ်သုးဖိတဖၣ် လၢအစိာ်ကတီၤတဖၣ်လၢ ကီၢ်ကူၤၡးဒီး လံးဘယၢ် ဃုာ်ဒီး ပှၤခးချံၣ်စဲၣ်နီးတဖၣ်လၢ ကီၢ်လူၤဒံန့ၣ်တက့ၢ်.’ ”

¹⁰ အအံၤတနံၤအံၤ မ့ၢ်ယွၤသ့တၢ်လၢာ်ဒီး ပၢဘၣ် တၢ်ခဲလၢာ်ကစၢ် တဂၤအမုၢ်နံၤလီၤ. တနံၤအံၤ အဝဲကဟ့ၣ်ကၣ်တၢ်န့ၣ်လီၤ. တနံၤအံၤ အဝဲကစံၣ်ညီၣ်အဒုၣ်အဒါတဖၣ်န့ၣ်လီၤ. အနးကအီၣ် အဝဲသ့ၣ် တုၤအီၣ်ဘျဲးအီၣ်ဒီး အီအဝဲသ့ၣ် အသွံၣ်တုၤအသးမံဝဲတစုလီၤ. တနံၤအံၤ, ယွၤသ့တၢ်လၢာ်လုၢ်ထီၣ်ပာ်ထီၣ်ပှၤလၢ အမၤနၢၤဝဲတဖၣ် ဖဲထံကျိဖရၤသးအနံၤလၢ ကီၢ်ကလံၤစိးန့ၣ်လီၤ.

¹¹ ကီၢ်အဲၤကူပတူး အပှၤဂီၢ်မုၢ်သ့ၣ်ဧၢ, လဲၤဆူကီၢ်ကံးလဧး, ဒီးကွၢ်ဃုကသံၣ်ဖီၣ်ကသီဖီၣ်တက့ၢ်. သုကသံၣ်ကသီခဲလၢာ်အံၤ အဘျုးတအိၣ်ဘၣ်. တၢ်လၢအမၤဘျါက့ၤ သုသ့တအိၣ်နီတမံၤဘၣ်.

¹² ပှၤကလုာ်တဖၣ် နၢ်ဟူဘၣ်သုတၢ်ဘၣ်မဲာ်ဆှးအဂ့ၢ်ဒီး ပှၤကိးဂၤဒဲးနၢ်ဟူဘၣ်သုတၢ်ဟီၣ်တၢ်ယၢၤန့ၣ်လီၤ. သုးဖိတဂၤထွဲဘၣ်အဂၤဂၤ, ဒီးခံဂၤလိာ်လီၤဃံၤဝဲလၢ ဟီၣ်ခိၣ်လိၤန့ၣ်လီၤ.

စီၤနဘူၤကးန့စၢ်အတၢ်ဟဲဝဲ

¹³ ဖဲကီၢ်ဘၤဘူၤလိၣ်အစီၤပၤနဘူၤကးန့စၢ် ဟဲထီၣ်ဒုးကီၢ်အဲၤကူပတူး အခါန့ၣ်, ယွၤကတိၤတၢ်ဒီးယၤလီၤ. အဝဲစံးဝဲဒၣ်,

¹⁴ “တဲဖျါထီၣ်တၢ်အံၤ လၢကီၢ်အဲၤကူပတူးအဝ့ၢ်တဖၣ်လၢ အမ့ၢ်မံးကဒိးလး, မဲဖံး, ဒီးဝ့ၢ်တၤပါန့ၤအပူၤတက့ၢ်. ကတဲာ်ကတီၤထီၣ်သုသးလၢ နကဒီဒၣ်လီၤသုသးအဂီၢ်တက့ၢ်. တၢ်လၢအအိၣ်ဒီး သုခဲလၢာ်န့ၣ် ကဘၣ်တၢ်မၤဟးဂီၤကွံာ်အီၤလၢ တၢ်ဒုးတၢ်ယၤအပူၤန့ၣ်လီၤ.

¹⁵ ဘၣ်မနုၤအဃိ သုကစၢ်ကျီၢ်ဖါလၢ အဂံၢ်ဆူၣ်ဘါဆူၣ် အ့ပ့း(စ်) လီၤဃံၤကွံာ်ဝဲလဲၣ်. ယွၤတီၢ်လီၤဃံၤကွံာ်အီၤအဃိလီၤ.

¹⁶ သုသုးဖိတဖၣ်အခီၣ်ဘၣ်တိၢ်ဒီး လီၤဃံၤဝဲလံ. တဂၤစံးဘၣ်အဂၤတဂၤ, မၤချ့ချ့, ပကက့ၤဆူဟံၣ်ဆူပပှၤဂီၢ်မုၢ်အအိၣ်ဒ်သိး ကပူၤဖျဲးထီၣ်ကွံာ်လၢ ဒုၣ်ဒါအနးအဂီၢ်န့ၣ်တက့ၢ်.’

¹⁷ ဟ့ၣ်ကီၢ်အဲၤကူပတူးအစီၤပၤအမံၤ အသီတယုၢ်လၢ အဝဲမ့ၢ်ဝဲ, ပှၤသီၣ်သဲကတီၤဒိၣ်လီၤအကိာ်လၢ အခွဲးအယာ် လီၤမၢ်ကွံာ်’ န့ၣ်တက့ၢ်.

¹⁸ ယၤ, ယွၤသ့တၢ်လၢာ်, ယမ့ၢ်စီၤပၤ, ယမ့ၢ်ကစၢ်ယွၤလၢ အမူဝဲလီၤ. ဒ်ကစၢၢ်တၤဘိၢ်ကစီၤထီၣ်ထီမးလၢကစၢၢ်တဖၣ်အဖီခိၣ်အသိး, ဒီးဒ်ကစၢၢ်ကၢ်မ့ၤလးအိၣ်ထီၣ်ထီဝဲလၢပီၣ်လဲၣ်အဖီခိၣ်အသိးန့ၣ်, ပှၤလၢအဒုးသုတဂၤအဂံၢ်အဘါ ကမ့ၢ်တၢ် ဒ်န့ၣ်အသိးလီၤ.

¹⁹ သုဝဲကီၢ်အဲၤကူပတူးအပှၤဂီၢ်မုၢ်သ့ၣ်ဧၢ, အိၣ်ကတဲာ်ကတီၤသုသးလၢ သုကလဲၤကဲ ကုၢ်အဂီၢ်တက့ၢ်. ဝ့ၢ်မဲဖံးကဘၣ်တၢ်ဒုးကဲထီၣ်အီၤဆူ မဲးမုၢ်ခိၣ်တတီၤ, တၢ်ဟးဂီၤအလီၢ်တပူၤဖဲ ပှၤတအိၣ်တဆိးနီတဂၤ ဘၣ်န့ၣ်လီၤ.

²⁰ ကီၢ်အဲၤကူပတူးလီၤဂာ်ဒီး ဂီၤဖံးမိၢ်လၢလီၤကဟု ကညီၣ်ဒိၣ်မးတဒု လၢအဘၣ်တၢ်ဆဲးအီၤလၢ ပကိာ်တဘ့ၣ်လၢ ကလံၤ စိးတခီန့ၣ်လီၤ.

²¹ အသုးဖိတဖၣ်လၢ အဒိးလဲန့ၢ်ဝဲဒၣ်လဲာ် မၤစၢၤလီၤက့ၤအသးတသ့ဘၣ်ဒ် ဂီၤဖံးဖိတဖၣ်အသိးန့ၣ်လီၤ. အဝဲသ့ၣ် တဆၢထၢၣ်ဒီး ဒုးတၢ်ဘၣ်. အဝဲသ့ၣ်ခဲလၢာ်ဃၣ်အသးဒီး ဃ့ၢ်ကွံာ်ဝဲလီၤ. တၢ်စံၣ်ညီၣ်ဃါမနၤအမုၢ်တနံၤတုၤ အိၣ်အဝဲသ့ၣ်လံ. မ့ၢ်အဝဲသ့ၣ်အတၢ်ဟးဂီၤအဆၢကတီၢ်န့ၣ်လီၤ.

²² ဖဲဒုၣ်ဒါအသုးမုၢ်သုးဘူးအသးအခါန့ၣ် ကီၢ်အဲၤကူပတူး ဃ့ၢ်ကွံာ်ဝဲသီၣ်ဒ်ဂုၢ်တဘိဃ့ၢ်ပူၤဖျဲးကွံာ် အသိးန့ၣ်လီၤ. အဝဲသ့ၣ်ဒုးပှၤအဲၤကူပတူးဖိတဖၣ်လၢ ကွါတဖၣ် ဒ်ပှၤပိာ်ခွါတဖၣ်ကူာ်လီၤသ့ၣ်တဖၣ်,

²³ ဒီးမၤဟးဂီၤကွံာ်သ့ၣ် ပှၢ်တပှၢ်လၢ အတီၣ်အသိးန့ၣ်လီၤ. အဝဲသ့ၣ်အပှၤပိာ်ခွါတဖၣ် အါကဲၣ်ဆိးလၢ နကဂံၢ်အီၤအဂီၢ်ဒီး အသုးဖိတဖၣ် အနီၣ်ဂံၢ်အါန့ၢ်ဒံး ဒွဲၣ်ဧိၤတကံၤဧိၤတက့ၢ်န့ၣ် လီၤ.

²⁴ ကီၢ်အဲၤကူပတူး အပှၤဂီၢ်မုၢ်ဘၣ်တၢ်မၤမဲာ်ဆှးအီၤလံ. အဝဲသ့ၣ်ဘၣ်တၢ်မၤနၢၤကွံာ်အီၤလၢ ပှၤဂီၢ်မုၢ်လၢ ကလံစိးတခီန့ၣ်လီၤ. ယၤ, ယွၤအံၤ, ကတိၤလံတၢ်လံ.”

²⁵ ယွၤသ့တၢ်လၢာ်, အံၣ်စရ့လးအကစၢ်ယွၤစံးဝဲဒၣ်, ယကစံၣ်ညီၣ်ဝ့ၢ်သံဘံးအကစၢ်ဧၣ်မိၣ်, ဃုာ်ဒီး ကီၢ်အဲၤကူပတူးဒီး အကစၢ်တဖၣ်ဒီး အစီၤပၤတဖၣ်န့ၣ်လီၤ. ယကဟံးထီၣ်ကွံာ် ကီၢ်အဲၤကူပတူး အစီၤပၤဒီးကယဲၢ်ပှၤခဲ လၢာ်လၢ အပာ်အတၢ်နာ်လၢအပူၤ,

²⁶ ဒီးဟ့ၣ်လီၤကွံာ်အဝဲသ့ၣ် ဆူပှၤတဖၣ်လၢအသးအိၣ်မၤသံအဝဲသ့ၣ်, လၢအမ့ၢ်ကီၢ်ဘၤဘူၤလိၣ်အစီၤပၤနဘူၤကးန့စၢ်ဒီးအသုးမုၢ်, အစုပူၤန့ၣ်လီၤ. ဘၣ်ဆၣ်ဒီး လၢခံက့ၤန့ၣ်, ပှၤဂီၢ်မုၢ်ကအိၣ်ကဆိး ကဒီးလၢကီၢ်အဲၤကူပတူးအပူၤ, ဒ်အဝဲသ့ၣ်အိၣ်ဆိးတ့ၢ်ဝဲလၢ ခ့ခါပူၤကွံာ်အသိးန့ၣ်လီၤ. ယၤ, ယွၤအံၤကတိၤလံတၢ်လံ.”

ယွၤကအုၣ်က့ၤခီၣ်က့ၤအပှၤဂီၢ်မုၢ်

²⁷ “ယပှၤဂီၢ်မုၢ်သ့ၣ်ဧၢ, ပျံၤတၢ်တဂ့ၤ. ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, ပျံၤတၢ်ဖုးတၢ်တဂ့ၤ. ယကမၤထူၣ်ဖျဲးသုလၢ ထံကီၢ်လၢအယံၤတဘ့ၣ်, လၢထံကီၢ်တဘ့ၣ်ဖဲ တၢ်စိာ်မၢကဲကုၢ်သုန့ၣ်လီၤ. သုကဟဲက့ၤကဒါက့ၤ ဆူဟံၣ်ဒီးအိၣ်ဆိးလၢ တၢ်ဃူတၢ်ဖိးအပူၤန့ၣ်လီၤ. သုကအိၣ်ဂၢၢ်ဆိးကျၢၤဒီး ပှၤတမၤပျံၤဘၣ်သုနီတဂၤဘၣ်.

²⁸ ယကဟဲဆူ သုအိၣ်ဒီးအုၣ်က့ၤခီၣ်က့ၤသုလီၤ. ယကမၤဟးဂီၤပှၤကလုာ်ခဲလၢာ်လၢယမၤလီၤပြံလီၤပြါတ့ၢ် သုလၢအကျါ, ဘၣ်ဆၣ်ဒီး ယတမၤဟးဂီၤသုဘၣ်. ယတပျၢ်ဖျဲးသုလၢ တၢ်စံၣ်ညီၣ်အပူၤဘၣ်. မ့မ့ၢ်, ဖဲယစံၣ်ညီၣ်သုဒီး ယကမၤအီၤဖဲအတီအဘၣ်န့ၣ်လီၤ. ယၤ, ယွၤအံၤ, ကတိၤလံတၢ်လံ.”