လံာ်ယံးရမံယၤ 26 - Sgaw Karen Common Bible

စီၤယံးရမံၤယၤဘၣ်တၢ်လိာ်ကွီၢ်သမံသမိးအီၤ

¹ ဖဲစီၤယိၤၡံယၤ အဖိခွါ စီၤယဟိယါကံၣ်ကဲထီၣ်စီၤပၤလၢ ကီၢ်ယူဒၤဝံၤတယံာ်ဘၣ်န့ၣ်,

² ယွၤစံးဘၣ်တ့ၢ်ယၤ, “ဆၢထၢၣ်လၢယွၤအတၢ်လုၢ်ဟံၣ်အဂၢၤ ပူၤဒီးတဲဖျါထီၣ် ကယဲၢ်တၢ်ခဲလၢာ်လၢ ယမၤလိာ်နၤလၢ နကစံးဘၣ် ပှၤဂီၢ်မုၢ်လၢ အဟဲလၢကီၢ်ယူဒၤအဝ့ၢ်တဖၣ်လၢ ကဘူၣ်တၢ်ဘါတၢ်ဖဲန့ၣ်တက့ၢ်. ပာ်တ့ၢ်တၢ်နီတမံၤတဂ့ၤ.

³ ဘၣ်သ့ၣ်သ့ၣ် ပှၤဂီၢ်မုၢ်ကဒိကနၣ်ဝဲဒီး ဃၣ်ကွံာ်အသးလၢ အကျဲ အအၢအသီတဖၣ်န့ၣ်လီၤ. အဝဲသ့ၣ်မ့ၢ် မၤဝဲဒီး, ယကလဲလိာ်ကွံာ် ယတၢ်ပာ်လီၤယသးလၢ တၢ်ဟးဂီၤလၢ ယကူၣ်ထီၣ်လၢ ယကဒုးလီၤဘၣ်လၢ အဝဲသ့ၣ်အလိၤလၢ အဝဲသ့ၣ်အတၢ်မၤအအၢအသီ တဖၣ်အဃိန့ၣ်လီၤ.”

⁴ ယွၤမၢယစံးဘၣ် အပှၤဂီၢ်မုၢ်, “ယၤ, ယွၤအံၤ, စံးတ့ၢ်ဝဲလၢသုကဘၣ်စူၢ်ယၤခီဖျိသုတၢ်လူၤပိာ်ထွဲ တၢ်သိၣ်လိသီလိလၢယဟ့ၣ်လီၤတ့ၢ်သု,

⁵ ဒီးခီဖျိသုတၢ်ဒိကနၣ် တၢ်ကတိၤတဖၣ်လၢ ယခ့ယပှၤဝံ တဖၣ်လၢ ယဆှၢလီၤတ့ၢ်ဆူ သုအိၣ်တထံၣ်ဃီ, စံးဝဲန့ၣ်လီၤ. သုတစူၢ်တၢ်လၢ အဝဲသ့ၣ်စံးတ့ၢ်ဝဲန့ၣ် နီတစုဘၣ်.

⁶ သုမ့ၢ်တစူၢ်ဒံးဒၣ်တၢ်ဆူညါန့ၣ်, ယကမၤယွၤအတၢ်လုၢ်ဟံၣ် အံၤ ဒ်ယမၤတ့ၢ်ဝ့ၢ်ၡံလိၣ်အသိး, ဒီးပှၤကလုာ်လၢဟီၣ်ခိၣ်ချၢခဲလၢာ် ကသူဝ့ၢ်အံၤ အမံၤဒ်တၢ်ဆိၣ်အၢတမံၤအသိးန့ၣ်လီၤ.”

⁷ ပှၤလုၢ်တၢ်အခိၣ်တဖၣ်, ဝံတဖၣ်, ဒီးပှၤဂီၢ်မုၢ်ခဲလၢာ်နၢ်ဟူ ယစံးတၢ်သ့ၣ်တဖၣ်အံၤလၢယွၤအတၢ်လုၢ်ဟံၣ်အပူၤ,

⁸ ဒီးဖဲယကတိၤတၢ်လၢယွၤမၤလိာ်တ့ၢ်ယၤတဖၣ် ဝံၤတဘျီဃီန့ၣ်, အဝဲသ့ၣ်ဖီၣ်စှီၤတံၢ်ဃာ်ယၤဒီး ကိးထီၣ်ဝဲ, “နကြၢးဘၣ်တၢ်မၤသံနၤလၢ တၢ်အံၤအဃိန့ၣ်လီၤ.

⁹ ဘၣ်မနုၤအဃိ, လၢယွၤအမံၤအပူၤန့ၣ် နစံးလၢ, ယွၤအတၢ်လုၢ်ဟံၣ်အံၤ ကကဲထီၣ်ဒ် ဝ့ၢ်ၡံလိၣ်အသိးဒီး လၢဝ့ၢ်အံၤကဘၣ်တၢ်မၤဟးဂီၤကွံာ်အီၤဒီး ပှၤတအိၣ်လၢၤလၢ အပူၤနီတဂၤန့ၣ်လဲၣ်.” အန့ၣ်ဝံၤဒီး, ပှၤဂီၢ်မုၢ်ဟဲဖှိၣ်ပှဲၤကတံာ်ဝးတရံးယၤန့ၣ်လီၤ.

¹⁰ ဖဲကီၢ်ယူဒၤအခိၣ်အနၢ်တဖၣ် နၢ်ဟူတၢ်လၢအမၤတ့ၢ် အသးအံၤန့ၣ်, အဝဲသ့ၣ်ဟးထီၣ်ချ့ချ့လၢ စီၤပၤအနူၢ်ပူၤ ဟဲဝဲဆူယွၤအတၢ်လုၢ်ဟံၣ် ဒီးဟံးန့ၢ်တၢ်အလီၢ်တဖၣ် ဖဲယွၤအတၢ်လုၢ်ဟံၣ်အတြဲၤအသီန့ၣ်လီၤ.

¹¹ အန့ၣ်ဝံၤဒီး ပှၤလုၢ်တၢ်အခိၣ်တဖၣ်ဒီး ဝံတဖၣ်စံးဘၣ်ပှၤ ခိၣ်ပှၤနၢ်တဖၣ်ဒီး ပှၤဂီၢ်မုၢ်န့ၣ်, “ပှၤတဂၤအံၤကြၢးဘၣ်တၢ် စံၣ်ညီၣ်သံအီၤမ့ၢ်လၢ အဝဲကတိၤတၢ်ထီဒါ ပဝ့ၢ်အဃိန့ၣ်လီၤ. သုနၢ်ဟူအီၤလၢ သုနၢ်ဒၣ် သုဝဲန့ၣ်လီၤ.”

¹² အန့ၣ်ဒီးယစံး, “ကယဲၢ်တၢ်ခဲလၢာ်လၢ သုနၢ်ဟူတ့ၢ်ယစံးကတိၤ ထီဒါတၢ်လုၢ်ဟံၣ်အံၤဒီး ထီဒါဝ့ၢ်အံၤန့ၣ်, မ့ၢ်တၢ်လၢယွၤမၢ ယတဲဖျါအီၤန့ၣ်လီၤ.

¹³ သုကဘၣ်လဲလိာ်ကွံာ်ကျဲလၢ သုအိၣ်မူအီၤဒီးတၢ်တဖၣ် လၢ သုမၤအီၤ, ဒီးသုကဘၣ်စူၢ်ယွၤ, သုကစၢ်ယွၤန့ၣ်လီၤ. သုမ့ၢ်မၤအီၤဒီး, အဝဲကလဲလိာ်ကွံာ် အတၢ်ပာ်လီၤသးဘၣ်ဃးတၢ်မၤဟးဂီၤလၢ အဝဲစံးတ့ၢ်ဝဲလၢ ကဒုးလီၤဘၣ်အီၤလၢသုလိၤန့ၣ်လီၤ.

¹⁴ မ့မ့ၢ်ယဲဒၣ်အံၤ, ယအိၣ်လၢသုစုပူၤလီၤ. မၤယၤဒ်တၢ်လၢသု ဆိကမိၣ်လၢ အဘၣ်ဒီးအတီဝဲတမံၤမံၤန့ၣ်တက့ၢ်.

¹⁵ ဘၣ်ဆၣ်ဒီး, သ့ၣ်ညါတၢ်အံၤ သပှၢ်ကတၢၢ်တက့ၢ်. သုမ့ၢ် မၤသံယၤဒီး, သုဝဲဒီးဝ့ၢ်အံၤ အပှၤဂီၢ်မုၢ်ခဲလၢာ်အတၢ်ကမၣ် ကအိၣ်လၢ အမၤသံပှၤတဂၤလၢ အတၢ်ကမၣ်တအိၣ်ဘၣ် အဃိန့ၣ်လီၤ. အဂ့ၢ်ဒ်အံၤ, ပှၤလၢအမၢလီၤယၤလၢယကဟ့ၣ်ဒုး ပလီၢ်သုလၢ တၢ်ဂ့ၢ်အံၤန့ၣ် မ့ၢ်ယွၤလီၤ.”

¹⁶ အန့ၣ်ဒီး, ပှၤခိၣ်ပှၤနၢ်တဖၣ်ဒီး ပှၤဂီၢ်မုၢ်စံးဘၣ်ပှၤ လုၢ်တၢ်အခိၣ် တဖၣ်ဒီးဝံတဖၣ်, စံးဝဲ, ပှၤတဂၤအံၤ ကတိၤတၢ်ဒီး ပှၤလၢယွၤ ပကစၢ်ယွၤအမံၤအပူၤန့ၣ်လီၤ. အဝဲတကြၢးဘၣ်တၢ်မၤသံအီၤဘၣ်.

¹⁷ တၢ်အံၤဝံၤအလီၢ်ခံ ပှၤသးပှၢ်တနီၤ ဆၢထၢၣ်ဒီး စံးဘၣ်ပှၤဂီၢ်မုၢ်လၢ အပာ်ဖှိၣ်ထီၣ်အသးန့ၣ်,

¹⁸ “ဖဲစီၤဃံးစကံယၤမ့ၢ် ကီၢ်ယူဒၤအစီၤပၤအဆၢကတီၢ်န့ၣ်, ပှၤမိရၤၡးဖိဝံ မံကၤတဲဘၣ်တ့ၢ် ပှၤဂီၢ်မုၢ်ခဲလၢာ်လၢယွၤသ့တၢ်လၢာ်စံးတ့ၢ်ဝဲဒ်အံၤ, ‘ဝ့ၢ်စံယိၣ်ကဘၣ်တၢ်ထဲၣ်အီၤဒ် စံာ်ပျီတဘ့ၣ်အသိး, ဝ့ၢ်ယရူၤၡလ့ၣ် ကကဲထီၣ်တၢ်ဟးဂီၤတဖၣ် အတၢ်ပူၣ်ထီၣ်အသး, ဒီးယွၤအတၢ်လုၢ်ဟံၣ် အတၢ်လူၢ်ကကဲထီၣ်ပှၢ်လၢ်ကျါတတီၤ န့ၣ်လီၤ.’

¹⁹ စီၤပၤဃံးစကံယၤဒီး ကီၢ်ယူဒအပှၤဂီၢ်မုၢ်တမၤသံကွံာ်ဝံမံကၤဘၣ်. အခိၣ်တလိာ်စီၤဃံးစကံယၤ ယူးယီၣ်မၤလၤကပီၤတ့ၢ်ယွၤဒီး ကျဲးစၢးမၤန့ၢ် ယွၤအတၢ်ကွၢ်မဲာ်န့ၣ်လီၤ. ဒီးယွၤလဲလိာ်တၢ်ပာ်လီၤအသး ဘၣ်ဃးတၢ်တတၢး တနါလၢ အစံးတ့ၢ်ဝဲလၢ အကဒုးဘၣ်လီၤက့ၤ ပသးလၢ တၢ်တတၢးတနါလၢ အလီၤပျံၤလီၤဖုးဒိၣ်မးတမံၤန့ၣ်လီၤ.”

²⁰ (ပှၤအိၣ်ဒံးဝဲ အဂၤတဂၤ, လၢအမ့ၢ်ဝဲ စီၤၡမါယၤလၢ ကံးရယး ယဧၤရံၣ်အပူၤ အဖိခွါ စီၤအူၤရံယၤ, လၢအ ကတိၤတ့ၢ်တၢ်လၢ ယွၤအမံၤအပူၤထီဒါ ဝ့ၢ်အံၤဒီးပှၤ ုကလုာ်အံၤ ဒ်သိးဒၣ်စီၤယံးရမံၤယၤ မၤတ့ၢ်ဝဲခဲအံၤန့ၣ်လီၤ.

²¹ ဖဲစီၤပၤယဟိၤယါ ကံၣ်ဒီးအသုးဖိတဖၣ်ဒီးအပဒိၣ်ပပှၢ်တဖၣ် နၢ်ဟူ တၢ်လၢစီၤအူၤရံယၤကတိၤတ့ၢ်ဝဲန့ၣ်, စီၤပၤကျဲးစၢးတ့ၢ် လၢကမၤသံအီၤန့ၣ်လီၤ. ဘၣ်ဆၣ် စီၤအူၤရံယၤနၢ်ဟူတ့ၢ်တၢ်အံၤ, သတးဒီး အဝဲထွးထီၣ်ဃ့ၢ်ပူၤဖျဲးကွံာ်ဝဲလၢ တၢ်ပျံၤတၢ်ဖုးအ ပူၤ ဆူကီၢ်အဲၤကူပတူးန့ၣ်လီၤ.

²² သနာ်က့, စီၤပၤယဟိၤယါ ကံၣ်မၢလီၤစီၤဧးကဘိၣ်အဖိခွါ စီၤအ့လနၤသၣ်ဒီး ပှၤအဂၤတနီၤဆူ ကီၢ်အဲၤကူပတူးဒ်သိး ကမၤန့ၢ်က့ၤ စီၤအူၤရံယၤအဂီၢ်န့ၣ်လီၤ.

²³ အဝဲသ့ၣ်ဟဲက့ၤ စိာ်က့ၤအီၤဆူ စီၤပၤယဟိၤယါကံၣ် အအိၣ်ဒီးအဝဲဒၣ် မၤသံကွံာ်အီၤဒီး အစိၣ်ဘၣ်တၢ်ကွံာ်လီၤအီၤဆူ ကမျၢၢ်အတၢ်သွၣ်ခိၣ် အပူၤန့ၣ်လီၤ.)

²⁴ ဘၣ်ဆၣ်, မ့ၢ်လၢစီၤၡ့ၤဖၣ်အဖိခွါ စီၤအဃံကၣ်အတၢ်မၤ စၢၤယၤအဃိဒီး, ယတဘၣ်တၢ်ဟ့ၣ်လီၤကွံာ်ယၤဆူပှၤဂီၢ် မုၢ်အစုပူၤလၢ တၢ်ကမၤသံယၤအဂီၢ်န့ၣ်ဘၣ်.