လံာ်ပှၤစံၣ်ညီၣ်ကွီၢ် 1 - Sgaw Karen Common Bible

ယူဒၤဒီးစူၤမ့းအိၣ်အဒူၣ်တဖၣ်မၤန့ၢ် စီၤအဒိနံၤဘ့စ့း

¹ ဖဲစီၤယိၤၡူသံဝံၤအလီၢ်ခံန့ၣ်ပှၤအံၣ်စရ့လးဖိသံကွၢ်တၢ်လၢယွၤ, “မ့ၢ်မတၤလၢပပှၤအဒူၣ်တဖၣ်အကျါကြၢးမ့ၢ်ပှၤအဆိကတၢၢ်တဒူၣ်လၢ ကလဲၤထီၣ်ဒုးပှၤကနၤဧၣ်ဖိတဖၣ်လဲၣ်.”

² ဒီးယွၤစံးဝဲဒၣ်, “ယူဒၤအဒူၣ်ကလဲၤလၢညါလီၤ. ယဟ့ၣ်လီၤကီၢ်တဘ့ၣ်န့ၣ်လၢအတၢ်ပၢအဖီလာ်လီၤ.”

³ ဒီးယူဒၤအပှၤဂီၢ်မုၢ်စံးဘၣ်စူၤမ့းအိၣ်အပှၤဂီၢ်မုၢ်, “လဲၤဃုာ်ဒီးပှၤဆူကီၢ်လၢတၢ်ဟ့ၣ်လီၤပှၤမူဒါဒ်သိးပကဒုးသကိးပှၤကနၤဧၣ်ဖိတဖၣ်တက့ၢ်. မ့ၢ်ဝံၤဒီးပကလဲၤသကိးဒီးသုဆူကီၢ်လၢတၢ်ဟ့ၣ်မူဟ့ၣ်ဒါသု န့ၣ်လီၤ.” မၤသးဒ်န့ၣ်ဒီးစူၤမ့းအိၣ်အဒူၣ်ဒီးယူဒၤအဒူၣ်လဲၤသကိးဆူ တၢ်ဒုးတၢ်ယၤအပူၤလီၤ.

⁴ ဒီးယွၤဟ့ၣ်လီၤကွံာ်ပှၤကနၤဧၣ်ဒီးပှၤပရးစၤဖိတဖၣ်လၢအဝဲ သ့ၣ်အစုပူၤဒီးအဝဲသ့ၣ်တဖၣ်မၤနၢၤမၤဃၣ်ကွံာ်ပှၤအဂၤတကလးဖဲ ဝ့ၢ်ဘ့စ့းအပူၤန့ၣ်လီၤ.

⁵ ဒီးအဝဲသ့ၣ်ထံၣ်န့ၢ်စီၤပၤအဒိနံၤဘ့စ့းဖဲန့ၣ်ဒီးဒုးအီၤလီၤ.

⁶ စီၤပၤအဒိနံၤဘ့စ့းထွးထီၣ်ဃ့ၢ်ဝဲဘၣ်ဆၣ်ဒီး, အဝဲသ့ၣ်လူၤဝဲဒီးဖီၣ်န့ၢ်အီၤဒီး ကျီတဲာ်ကွံာ်အစုမုၢ်ကျၢၢ်ခီၣ်မုၢ်ကျၢၢ်တဖၣ်လီၤ.

⁷ ဒီးစီၤပၤအဒိနံၤဘ့စ့းစံးဝဲ, “စီၤပၤအဂၤနွံဆံလၢ အစုမုၢ်ကျၢၢ်ခီၣ်မုၢ်ကျၢၢ်တဖၣ်ဘၣ်တၢ်ကျီတဲာ်ကွံာ်အီၤန့ၣ် ထၢအီၣ်တၢ်လီၤဆှုလီၤပလ့ၤလၢယစီၤနီၤခိၣ်အဖီလာ်လီၤ. ခဲအံၤကစၢ်ယွၤမၤယၤဒ်ယမၤတ့ၢ်အဝဲသ့ၣ်တဖၣ်အသိးန့ၣ်လီၤ.” ဒီးအဝဲဘၣ်တၢ်စိာ်ကွံာ်အီၤဆူဝ့ၢ်ယရူၤၡလ့ၣ်ဒီးသံဝဲဖဲန့ၣ်လီၤ.

ယူဒၤအဒူၣ်မၤနၢၤဝ့ၢ်ယရူၤၡလ့ၣ်ဒီးဝ့ၢ်ဃ့ဘြိၣ်

⁸ ဒီးယူဒၤအပှၤပိာ်ခွါတဖၣ်ဒုးဝ့ၢ်ယရူၤၡလ့ၣ်ဒီးမၤန့ၢ်အီၤ လီၤ. ဒီးအဝဲသ့ၣ်မၤသံကွံာ်ပှၤဂီၢ်မုၢ်အိၣ်လၢဝ့ၢ်ပူၤတဖၣ်ဒီး ဒွဲၣ်ထီၣ်ဝ့ၢ်လၢမ့ၣ်အူန့ၣ်လီၤ.

⁹ အန့ၣ်ဝံၤဒီးအဝဲသ့ၣ်လဲၤဒုးပှၤကနၤဧၣ်ဖိတဖၣ်လၢအအိၣ်လၢ ကစၢၢ်ကလိလၢကစၢၢ်ခီၣ်ထံး, ဒီးဝ့ၢ်လၢအအိၣ်လၢကလံၤထံးတခီန့ၣ်လီၤ.

¹⁰ ဒီးအဝဲသ့ၣ်လဲၤထီၣ်ထီဒါပှၤကနၤဧၣ်ဖိအိၣ်လၢဝ့ၢ်ဃ့ဘြိၣ်လၢ တၢ်ညီနုၢ်ကိးအီၤလၢဝ့ၢ်ကံးရယးအၢ်ဘၤန့ၣ်လီၤ. ဖဲန့ၣ်, အဝဲသ့ၣ်မၤနၢၤကွံာ်စီၤၡ့ၤၡဲအဒူၣ်, စီၤအဃံမ့ၣ်အဒူၣ်ဒီး စီၤတၤလမဲအဒူၣ်တဖၣ်န့ၣ်လီၤ.

စီၤဧီၤသန့လးဒုးန့ၢ်မၤနၢၤဝ့ၢ်ဒဘံၢ်

¹¹ စးထီၣ်ဖဲန့ၣ်ဒီးယူဒၤအပှၤပိာ်ခွါတဖၣ်လဲၤထီၣ်ထီဒါဝ့ၢ်ဒဘံၢ်, လၢတၢ်ကိးအီၤလၢဝ့ၢ်ကံးရယးစ့ဖ့ၢ်န့ၣ်လီၤ.

¹² ဒီးလၢအဝဲသ့ၣ်အကျါပှၤတဂၤလၢအဘၣ်တၢ်ကိးအီၤလၢစီၤကၤလ့း န့ၣ်စံးဝဲ, “ပှၤလၢအမၤနၢၤဝ့ၢ်ကံးရယးစ့ဖ့ၢ်တဂၤန့ၣ် ယကဖျီအီၤဒီးယဖိမုၣ်နီၢ်ဧၤကစ့ၤန့ၣ်လီၤ.”

¹³ စီၤကၤလ့းအပုၢ်စီၤကနးစးအဖိခွါစီၤဧီၤသန့လးမၤနၢၤဝ့ၢ်န့ၣ်သတးဒီး, စီၤကၤလ့းဖျီအီၤဒီးအဖိမုၣ်နီၢ်ဧၤကစ့ၤန့ၣ်လီၤ.

¹⁴ ဒီးလၢတၢ်တ့တၢ်ဖျီအမုၢ်နံၤန့ၣ်စီၤဧီၤသန့လးမၢန့ၢ်ဆီၣ် ခံအမါလၢကဃ့န့ၢ်ဟီၣ်ခိၣ်တကဝီၤလၢအပၢ်အအိၣ်န့ၣ်လီၤ. ဒီးဖဲနီၢ်ဧၤကစ့ၤစံၣ်လီၤလၢအကသ့ၣ်ယီၤအလိၤန့ၣ် စီၤကၤလ့းသံကွၢ်အီၤတၢ်လၢအအဲၣ်ဒိးဝဲမ့ၢ်မနုၤတမံၤလဲၣ်န့ၣ်လီၤ.

¹⁵ ဒီးအဝဲစံးဘၣ်အီၤ, “ယသးလီထံပူၤတနီၤလီၤ. တၢ်လီၢ်လၢနဟ့ၣ်တ့ၢ်ယၤန့ၣ်အိၣ်လၢကီၢ်အဃ့ထီတဘ့ၣ်အပူၤလီၤ.” မၤသးဒ်န့ၣ်ဒီးစီၤကၤလ့းဟ့ၣ်အီၤလၢထံထီၣ်ပၢၢ်လၢထးခီဒီး လာ်ခီတဖၣ်န့ၣ်လီၤ.

ယူဒၤဒီးဘံၣ်ယၤမံၣ်အဒူၣ်တဖၣ်အတၢ်မၤနၢၤ

¹⁶ ဒီးပှၤက့ၣ်ဖိ, စီၤမိၤၡ့အမံၤပှၢ်အစၢၤအသွဲၣ်တဖၣ်လဲၤဃုာ်တၢ် ဒီးယူဒၤအပှၤဂီၢ်မုၢ်စးထီၣ်လၢဝ့ၢ်ယရံၤဃိ, ဝ့ၢ်လၢအအိၣ်ဒီးသ့ၣ်စူၣ်ပလူၣ်တဖၣ်ဒီးပၢၢ်တုၤဆူကီၢ်ယူဒၤ အဝ့ၢ်ဧရးအကလံၤထံးဖဲတၢ်မုၢ်တၢ်ဘိတကဲထီၣ်ဘၣ်အလီၢ်န့ၣ်လီၤ. ဒီးဖဲန့ၣ်အဝဲသ့ၣ်အိၣ်ဆိးဃုာ်ဒီးပှၤဧမၤလ့းဖိတဖၣ်န့ၣ်လီၤ.

¹⁷ ဒီးယူဒၤအပှၤဂီၢ်မုၢ်လဲၤဃုာ်တၢ်ဒီးစူၤမ့းအိၣ်အပှၤ, ဒီးအဝဲသ့ၣ်မၤနၢၤကွံာ်ပှၤကနၤဧၣ်ဖိတဖၣ်လၢအအိၣ်ဆိးဝဲလၢ ဝ့ၢ်စ့ဖးအပူၤန့ၣ်လီၤ. အဝဲသ့ၣ်ဆိၣ်အၢဝ့ၢ်န့ၣ်, ဒီးအဝဲသ့ၣ်မၤဟးဂီၤဝ့ၢ်န့ၣ်ဒီးကိးအီၤလၢဝ့ၢ်ဃိၢ်မါလီၤ.

¹⁸ ယူဒၤအပှၤဂီၢ်မုၢ်မၤန့ၢ်ဝ့ၢ်ဂါစၤဒီးအလီၢ်ကဝီၤ, ဝ့ၢ်အၤၡကလိၣ်ဒီးအလီၢ်ကဝီၤ, ဝ့ၢ်ဧ့ဘြိၣ်ဒီးအလီၢ်ကဝီၤန့ၣ်လီၤ.

¹⁹ ယွၤအိၣ်ဒီးယူဒၤ, ဒီးအဝဲမၤန့ၢ်ကွံာ်ကစၢၢ်ကလိအထံ အကီၢ်ဒ်အတၢ်န့ၢ်သါ, ဘၣ်ဆၣ်နီၣ်ထီၣ်ကွံာ်ပှၤအိၣ်ဝဲ ဆိးဝဲလၢတၢ်ပၢၤခိၣ်တဖၣ်တသ့ဘၣ်, မ့ၢ်လၢအဝဲသ့ၣ်အိၣ်ဒီးအလ့ၣ်ကဟၣ်ထးတဖၣ်အဃိန့ၣ်လီၤ.

²⁰ ဒ်စီၤမိၤၡ့မၤလိာ်တ့ၢ်ဝဲအသိးတၢ်ဟ့ၣ်လီၤဝ့ၢ်ဃ့ဘြိၣ်ဆူ စီၤကၤလ့းန့ၣ်လီၤ. ဒီးအဝဲနီၣ်ထီၣ်ကွံာ်စီၤဧနးအဒူၣ်အထၢသၢဒူၣ်န့ၣ်လီၤ.

²¹ မ့မ့ၢ်ဘံၣ်ယၤမံၣ်အဒူၣ်အပှၤဂီၢ်မုၢ်န့ၣ်တနီၣ်ထီၣ်ကွံာ်ပှၤယဘူၣ် ဖိတဖၣ်လၢအအိၣ်လၢဝ့ၢ်ယရူၤၡလ့ၣ်အပူၤန့ၣ်ဘၣ်. ဒီးပှၤယဘူၣ်ဖိတဖၣ်အိၣ်ဆိးဃုာ်ဒီးပှၤဘံၣ်ယၤမံၣ်ဖိတဖၣ်စး ထီၣ်လၢန့ၣ်လံၤလံၤန့ၣ်လီၤ.

အ့ဖရဲၣ်ဒီးမနၤၡ့ၤအဒူၣ်တဖၣ်မၤနၢၤ ဝ့ၢ်ဘ့ၤသ့လး

²² ဒီးအ့ဖရဲၣ်ဒီးမနၤၡ့ၤအဒူၣ်တဖၣ်လဲၤဒ်သိးအကဒုးဝ့ၢ်ဘ့ၤသ့လး န့ၣ်လီၤ. ဒီးယွၤမၤစၢၤအဝဲသ့ၣ်လီၤ.

²³ အကတီၢ်ဖဲန့ၣ်ဝ့ၢ်အံၤဘၣ်တၢ်ကိးအီၤလၢဝ့ၢ်လူးစးန့ၣ်လီၤ. အဝဲသ့ၣ်ဆှၢလီၤပှၤကွၢ်ဟုၣ်ကွၢ်စုးတၢ်တဖၣ်ဆူဝ့ၢ်န့ၣ်လီၤ.

²⁴ ဒီးအဝဲသ့ၣ်ထံၣ်ပှၤတဂၤလၢအဟးထီၣ်လၢဝ့ၢ်ပူၤဒီးစံးဘၣ်အီၤ, “ဒုးနဲၣ်ပှၤကျဲလၢပကလဲၤနုာ်ဆူဝ့ၢ်ပူၤတက့ၢ်ဒီးပတမၤဆါ နၤဘၣ်.”

²⁵ ဒီးအဝဲဒုးနဲၣ်အဝဲသ့ၣ်လၢကျဲ, ဒီးအ့ဖရဲၣ်ဒီးမနၤၡ့ၤအပှၤ ဂီၢ်မုၢ်မၤသံကွံာ်ကယဲၢ်ပှၤအိၣ်လၢဝ့ၢ်ပူၤဒီး ပျဲပူၤထဲပှၤတဂၤန့ၣ်ဒီးအဟံၣ်ဖိဃီဖိန့ၣ်လီၤ.

²⁶ ဒီးပှၤတဂၤန့ၣ်လဲၤဆူပှၤဃ့ၤသးဖိအကီၢ်ဒီးသူၣ်ထီၣ်ဝ့ၢ်တဝ့ၢ် ဒီးကိးအီၤလၢဝ့ၢ်လူးစးဒီးဝ့ၢ်န့ၣ်အမံၤအိၣ်တုၤမုၢ်မဆါတနံၤအံၤ န့ၣ်လီၤ.

ပှၤဂီၢ်မုၢ်လၢပှၤအံၣ်စရ့လးဖိတဖၣ် တဟီထီၣ်ကွံာ်အီၤ

²⁷ ဒီးမနၤၡ့ၤအဒူၣ်တနီၣ်ထီၣ်ကွံာ်ပှၤဂီၢ်မုၢ်လၢအအိၣ်ဝဲလၢဝ့ၢ် ဘ့ၤသၡၣ်, ဝ့ၢ်တၤနး, ဝ့ၢ်ဒိၢ်, ဝ့ၢ်ယံးဘျၣ်, ဝ့ၢ်မကံးဒိၤဒီးဝ့ၢ်ဖိလၢအအိၣ်ဘူး တဖၣ်အပူၤန့ၣ်ဘၣ်လီၤ. ဒီးပှၤကနၤဧၣ်ဖိတဖၣ်အိၣ်ဆိးဒီးအဝဲသ့ၣ်ဖဲတၢ်လီၢ်န့ၣ်လီၤ.

²⁸ ဒီးဖဲပှၤအံၣ်စရ့လးဖိတဖၣ်အဂံၢ်ဆူၣ်အဘါဆူၣ်ထီၣ်န့ၣ်, အဝဲသ့ၣ်မၤဆူၣ်ပှၤကနၤဧၣ်ဖိလၢကမၤတၢ်လၢအဝဲသ့ၣ်အဂီၢ်န့ၣ်လီၤ. ဘၣ်ဆၣ်ဒီးအဝဲသ့ၣ်တနီၣ်ထီၣ်ကွံာ်ဒံးပှၤကနၤဧၣ်ဖိခဲလၢာ်ဘၣ်လီၤ.

²⁹ ဒီးအ့ဖရဲၣ်အဒူၣ်တနီၣ်ထီၣ်ကွံာ်ပှၤကနၤဧၣ်ဖိလၢအအိၣ်လၢဝ့ၢ်က့စ့ၢ်အပူၤအဃိဒီး ပှၤကနၤဧၣ်ဖိတဖၣ်အိၣ်ဆိးဃုာ်ဒီးအဝဲသ့ၣ်ဖဲန့ၣ်လီၤ.

³⁰ ဒီးစဘူလိၣ်အဒူၣ်တနီၣ်ထီၣ်ကွံာ်ပှၤအိၣ်ဖဲဝ့ၢ်ကံဘြိၣ်ဒီးဝ့ၢ်နၤဟလိလးအပူၤဘၣ်အဃိ ပှၤကနၤဧၣ်ဖိလၢအအိၣ်ဆိးဃုာ်ဒီးအဝဲသ့ၣ်တဖၣ်ဖဲန့ၣ်, ဘၣ်တၢ်မၤဆူၣ်အီၤလၢကမၤတၢ်လၢအဝဲသ့ၣ်အဂီၢ်န့ၣ်လီၤ.

³¹ ဒီးအၤၡ့ၢ်အဒူၣ်တနီၣ်ထီၣ်ကွံာ်ပှၤအိၣ်လၢဝ့ၢ်ဧးကိၤ, ဝ့ၢ်စံဒိၣ်, ဝ့ၢ်အၤဃလာ်, ဝ့ၢ်အၤကစံာ်, ဝ့ၢ်ဃ့လဘၤ, ဝ့ၢ်အဖံး, ဒီးဝ့ၢ်ရဃိာ်အပူၤန့ၣ်ဘၣ်လီၤ.

³² ဒီးအၤၡ့ၢ်အပှၤဂီၢ်မုၢ်အိၣ်ဆိးဃုာ်ဒီးပှၤကနၤဧၣ်လၢအအိၣ်ဖဲ န့ၣ်တဖၣ်မ့ၢ်လၢတဟီထီၣ်ကွံာ်အဝဲသ့ၣ်ဘၣ်အဃိန့ၣ်လီၤ.

³³ ဒီးနးသၤလံအဒူၣ်တနီၣ်ထီၣ်ကွံာ်ပှၤအိၣ်လၢဝ့ၢ်ဘ့ၤသၡ့မ့ၣ် ဒီးဝ့ၢ်ဘ့ၤသၤနးအပူၤဘၣ်န့ၣ်လီၤ. ဒီးနးသၤလံအပှၤဂီၢ်မုၢ်အိၣ်ဆိးဃုာ်ဒီးပှၤကနၤဧၣ်ဖိလၢ အအိၣ်ဖဲန့ၣ်တဖၣ်ဒီးမၢဆူၣ်အဝဲသ့ၣ်လၢကမၤတၢ်လၢအဝဲသ့ၣ်အဂီၢ်န့ၣ်လီၤ.

³⁴ ဒီးပှၤအမိၢ်ဖိတဖၣ်မၢဆူၣ်ဒၣ်အဒူၣ်အပှၤဂီၢ်မုၢ်လဲၤဆူကစၢၢ်ကလိဒီးတပျဲအဝဲသ့ၣ်ဟဲလီၤဆူတၢ်ပၢၤခိၣ်ဘၣ်န့ၣ်လီၤ.

³⁵ ဒီးပှၤအမိၢ်ဖိတဖၣ်အိၣ်ဆိးထွဲဒံးဖဲဝ့ၢ်အးယၤလိၣ်ဒီးဝ့ၢ်ၡးလဘံၣ်အပူၤဒီးကစၢၢ်ဃ့ရ့းအလိၤန့ၣ်လီၤ. ဘၣ်ဆၣ်အ့ဖရဲၣ်ဒီးမနၤၡ့ၤအဒူၣ်ပာ်အီၤလၢအဝဲသ့ၣ်အတၢ်ပၢအဖီ လာ်ဒီးမၢဆူၣ်အီၤလၢကမၤတၢ်လၢအဝဲသ့ၣ်အဂီၢ်န့ၣ်လီၤ.

³⁶ ဒီးလၢဝ့ၢ်စ့လၤအကလံၤစိးန့ၣ်ပှၤအဒိၣ်ဖိအကီၢ်ဆၢအိၣ်ရဲၣ်လီၤအသး တုၤလၢဝ့ၢ်ဧးကရၤဘံၣ်တၢ်ဟဲနုာ်ဟးထီၣ်အကျဲန့ၣ်လီၤ.