လံာ်ယၡါယၤ 9 - Sgaw Karen Common Bible

¹ ကျဲလၢအဝဲသ့ၣ်ကထူၣ်ဖျဲးထီၣ်ဝဲလၢတၢ်ကီတၢ်ခဲအဆၢ ကတီၢ်အံၤန့ၣ်တအိၣ်နီတဘိဘၣ်. တဘျီန့ၣ်စဘူလိၣ်ဒီးနးသၤလံအဒူၣ်တဖၣ်အကီၢ်ဘၣ်တၢ် မၤမဲာ်ဆှးအီၤ, ဘၣ်ဆၣ်ဒီးခါဆူညါကဟဲစိာ်တၢ်လၤကပီၤ ဆူတၢ်လီၢ်တပူၤအံၤ, စးထီၣ်လၢပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ် အမုၢ်ထီၣ်တကပၤဆူထံကီၢ်လၢထံကျိယၢ်ဒ့ၣ်အတခီပၤ, ဒီးတုၤဒၣ်လဲာ်ဆူပီၣ်လဲၣ်ကၤလံၤ လါဖဲပှၤတခီဘီမုၢ်ဖိတဖၣ်အိၣ်ဆိးဝဲန့ၣ်လီၤ.

ခါဆူညါအစီၤပၤ

² ပှၤလၢအဟးတ့ၢ်ဝဲလၢတၢ်ခံးတၢ်နၤအပူၤတဖၣ် ထံၣ်တ့ၢ်တၢ်ကပီၤဖးဒိၣ်လီၤ. အဝဲသ့ၣ်အိၣ်မူတ့ၢ်ဝဲလၢကီၢ်လၢအပှဲၤဒီးတၢ်ကဒုတဖၣ်, ဘၣ်ဆၣ်ဒီးအခဲအံၤတၢ်ကပီၤဆဲးလီၤဘၣ်အဝဲသ့ၣ်လီၤ.

³ ယွၤဧၢ, နဟ့ၣ်တ့ၢ်အဝဲသ့ၣ်လၢတၢ်သးခုဖးဒိၣ်, ဒီးနမၤသူၣ်ဖှံသးညီတ့ၢ်အဝဲသ့ၣ်န့ၣ်လီၤ. အဝဲသ့ၣ်သးမုာ်သးခုဝဲလၢတၢ်လၢနမၤတ့ၢ်, ဒ်ပှၤသးမုာ်သးခုဝဲဖဲအဝဲသ့ၣ်ကူးက့ၤဘုခ့အကတီၢ်, မ့တမ့ၢ်, ဖဲအဝဲသ့ၣ်နီၤဟ့ၣ်လိာ်အသးလၢတၢ် ထူးတၢ်တီၤလၢအဂုာ်န့ၢ်ဝဲအကတီၢ်, အသိးန့ၣ်လီၤ.

⁴ အဂ့ၢ်ဒ်အံၤ, နမၤကၢ်တ့ၢ်နီၣ်ယိးဘိလၢအမၤဃၢမၤစံာ်အီၤ ဒီးနီၣ်တီၢ်လၢအတီၢ်အဝဲသ့ၣ်အဖံဘၣ်ခိၣ် တဖၣ်န့ၣ်လီၤ. နမၤနၢၤကွံာ်ပှၤကလုာ်လၢအမၤအၢမၤ နးဒီးဃုအဘျုးလၢနပှၤဂီၢ်မုၢ်အဖီခိၣ်, ဒ်နမၤနၢၤကွံာ်ကီၢ်မံးဒယၣ်အသုးမုၢ်လၢပျၢၤ အသိးန့ၣ်လီၤ.

⁵ သုးမုၢ်လၢအဟဲထီၣ်ဒုးတၢ်တဖုအသုးခီၣ်ဖံးတဖၣ် ဒီးအကူအသိးလၢအဘၣ်အၢဒီးတၢ်သွံၣ်တၢ်စီၤခဲလၢာ်, ကဘၣ်တၢ်မၤဟးဂီၤကွံာ်အီၤလၢမ့ၣ်အူန့ၣ်လီၤ.

⁶ ဖိသၣ်တဂၤအိၣ်ဖျဲၣ်လၢပဂီၢ်, တၢ်ဟ့ၣ်လီၤပှၤလၢဖိခွါတဂၤလီၤ. ဒီးအဝဲဒၣ်ကမ့ၢ်ပပှၤပၢတၢ်လီၤ. အဝဲကဘၣ်တၢ်ကိးအီၤလၢ “ပှၤလီၤလး ” “တၢ်ကူၣ်လိာ်တၢ်”, “စိဒိၣ်ကမီၤထီကစၢ်ယွၤ”, “ပၢ်အထူအယိာ်”, “တၢ်ဃူတၢ်ဖိးအစီၤပၤ” န့ၣ်လီၤ.

⁷ အစီၤလိၣ်စီၤပၤအစိကမီၤကဒိၣ်ထီၣ်ကွ့ၢ်ကွ့ၢ် ဒီးအဘီအမုၢ်ကမုာ်ကခုၣ်ဝဲထီဘိန့ၣ်လီၤ. အဝဲကပၢတၢ်ဒ်ပှၤလၢအကထီၣ်စီၤပၤစီၤဒၤဝံးအလီၢ် တဂၤအသိး, အတၢ်စိတၢ်ကမီၤန့ၣ်ကသူၣ်ထီၣ်ဝဲလၢတၢ်တီတၢ်လိၤ ဒီးတၢ်စံၣ်ညီၣ်တီအဖီခိၣ်, စးထီၣ်ခဲအံၤတုၤတၢ်အစိၤကတၢၢ်န့ၣ်လီၤ. ယွၤ, သ့တၢ်လၢာ်ကစၢ်န့ၣ်, ပာ်လီၤအသးသပှၢ်တၢၢ်လၢကမၤတၢ်အံၤခဲ လၢာ်လီၤ.

ယွၤကစံၣ်ညီၣ်ကီၢ်အံၣ်စရ့လး

⁸ ယွၤအတၢ်စံၣ်ညီၣ်အကလုၢ်လီၤဘၣ်အံၣ်စရ့လးအဘီအမုၢ်, လၢစီၤယၤကိာ်အစၢၤအသွဲၣ်တဖၣ်အဖီခိၣ်လီၤ.

⁹ ပှၤဂီၢ်မုၢ်ခဲလၢာ်လၢကီၢ်အံၣ်စရ့လး, ပှၤခဲလၢာ်လၢအအိၣ်လၢ ဝ့ၢ်ၡၤမရံကသ့ၣ်ညါဝဲလၢအဝဲမၤတ့ၢ်တၢ်အံၤလီၤ. အခဲအံၤ, အဝဲသ့ၣ်ပာ်ထီၣ်ထီအသးဒီးပာ်ကဖၢလၢအသးလီၤ. အဝဲသ့ၣ်စံးဝဲ,

¹⁰ “တၢ်သူၣ်ထီၣ်တဖၣ်လၢတၢ်မၤအီၤလၢဒၢးခီန့ၣ်လီၤပှီၢ်လၢာ်လံ. ဘၣ်ဆၣ်ဒီး, ပကသူၣ်ထီၣ်က့ၤလၢၢ်တၢ်သူၣ်ထီၣ်တဖၣ်လၢ အလီၢ်လီၤ. ကျိၤတဖၣ်လၢအဘၣ်တၢ်မၤအီၤလၢသ့ၣ်သိး ဝံာ်ဒၢတဖၣ်ဘၣ်တၢ်မၤတဲာ်ကွံာ်အီၤလံ. ဘၣ်ဆၣ်ဒီးလၢအလီၢ်န့ၣ်, ပကမၤက့ၤအီၤလၢ သ့ၣ်ဆှိးအ့ရ့းအဂ့ၤကတၢၢ်လီၤ.”

¹¹ ယွၤထိၣ်ဂဲၤတ့ၢ်အဒုၣ်အဒါတဖၣ်လၢကဒုးအဝဲသ့ၣ်အဂီၢ်န့ၣ်လီၤ.

¹² ကီၢ်စူၤရံလၢမုၢ်ထီၣ်တခီဒီးကီၢ်ဖလ့ၡသးလၢမုၢ်နုာ်တခီအိးထီၣ် တ့ၢ်အကိာ်ပူၤတဖၣ်လၢကအီၣ်ယူၢ်လီၤကွံာ်ကီၢ်အံၣ်စရ့လးလီၤ. အန့ၣ်ဒၣ်လဲာ်, ယွၤအတၢ်သးထီၣ်တဆိကတီၢ်တ့ၢ်အသးဘၣ်. အစုယူာ်ထီၣ်ဒံးအသးလၢကစံၣ်ညီၣ်တၢ်အဂီၢ်လီၤ.

¹³ ပှၤအံၣ်စရ့လးဖိတဖၣ်တပီၢ်ယၢ်လီၤက့ၤအသးဘၣ်. ယွၤသ့တၢ်လၢာ်ကစၢ်, စံၣ်ညီၣ်တ့ၢ်လံအဝဲသ့ၣ်ဒၣ်လဲာ်န့ၣ်, အဝဲသ့ၣ်တဟဲက့ၤကဒါက့ၤဆူအအိၣ်ဘၣ်.

¹⁴ လၢမုၢ်တနံၤဃီအတီၢ်ပူၤန့ၣ်, ယွၤကစံၣ်ညီၣ်ကီၢ်အံၣ်စရ့လး အခိၣ်အနၢ်တဖၣ်ဒီးအပှၤဂီၢ်မုၢ်လီၤ. ကဒီၣ်တဲာ်ကွံာ်အဝဲသ့ၣ်, အခိၣ်ဒီးအမဲၢ်လီၤ.

¹⁵ ပှၤသးပှၢ်ဒီးပှၤအိၣ်ဒီးအလၤကပီၤတဖၣ်မ့ၢ်အခိၣ်, ဒီးဝံတဖၣ်လၢအတၢ်သိၣ်လိသီလိမ့ၢ်တၢ်လီတၢ်ဝ့ၤတဖၣ်, မ့ၢ်အမဲၢ်လီၤ.

¹⁶ ပှၤလၢအဆှၢပှၤသ့ၣ်တဖၣ်အံၤဆှၢကမၣ်တ့ၢ်အဝဲသ့ၣ်ဒီး မၤကဒံကဒါအဝဲသ့ၣ်လၢာ်လၢာ်ဆ့ဆ့လီၤ.

¹⁷ လၢတၢ်န့ၣ်အဃိ, ယွၤတပျဲပူၤဖျဲးပှၤသးစၢ်ပိာ်ခွါနီတဂၤ ဘၣ်, ဒီးအဝဲတဒုးနဲၣ်တၢ်သးကညီၤလၢမုၣ် ကမဲဒီးဖိၣ်ဃဲနီတဂၤဘၣ်. အဂ့ၢ်ဒ်အံၤ, ပှၤခဲလၢာ်န့ၣ်အယွၤတအိၣ်ဘၣ်, အၢဝဲသီဝဲဒီးတၢ်ခဲလၢာ်လၢအစံးက တိၤဝဲန့ၣ်အၢဝဲသီဝဲလီၤ. အန့ၣ်ဒၣ်လဲာ်, ယွၤအတၢ်သးထီၣ်တဆိကတီၢ်ဝဲဘၣ်. အစုယူာ်ထီၣ်ဒံးအသးလၢက စံၣ်ညီၣ်တၢ်အဂီၢ်လီၤ.

¹⁸ ပှၤဂီၢ်မုၢ်အတၢ်အၢတၢ်သီအီၣ်ကွံာ်တၢ်ဒ်မ့ၣ်အူလၢအမၤဟးဂီၤ တပှီာ်တၤဆှုၣ်တဖၣ်ဒီးတၤဆှုၣ် တၤမဲတဖၣ်အသိးန့ၣ်လီၤ. အီၣ်ကွံာ်တၢ်ဒ်သ့ၣ်ပှၢ်မ့ၣ်အူအသိးလၢအဆှၢထီၣ်မ့ၣ်အူလုၢ် အထူၣ်တဖၣ်န့ၣ်လီၤ.

¹⁹ မ့ၢ်လၢယွၤ, သ့တၢ်လၢာ်ကစၢ်အသးထီၣ်အဃိ, အဝဲအတၢ်စံၣ်ညီၣ်အီၣ်ကွံာ်တၢ်ဒ်မ့ၣ်အူအီၣ်တၢ်လၢထံကီၢ် ဒီဘ့ၣ်အသိး, ဒီးမၤဟးဂီၤကွံာ်ပှၤဂီၢ်မုၢ်လီၤ. ဒီးပှၤကိးဂၤဒဲးန့ၣ်မ့ၢ်ပှၤအဲၣ်လီၤထဲအသးဒၣ်ဝဲဧိၤန့ၣ်လီၤ.

²⁰ လၢတၢ်လီၢ်ကိးပူၤဒဲးလၢထံကီၢ်အပူၤန့ၣ်, ပှၤဂုာ်န့ၢ်ထဲးန့ၢ်ဒီးအီၣ်တၢ်အီၣ်တစဲးဂ့ၤတမှဲးဂ့ၤလၢအထံၣ်န့ၢ်ဝဲသ့, ဘၣ်ဆၣ်ဒီးတၢ်သၣ်ဝံၤအသးတတုာ်နီတစုဘၣ်. အဝဲသ့ၣ်အီၣ်က့ၤဒၣ်လဲာ်အဖိတဖၣ်န့ၣ်လီၤ.

²¹ ကီၢ်မနၤၡ့ၤဒီးကီၢ်အ့ဖရဲၣ်အပှၤတဖၣ်ဒုးလိာ်ယၤလိာ်အသး, ဒီးအဝဲသ့ၣ်ပာ်ဖှိၣ်အသးဒီးဒုးတၢ်ထီဒါကီၢ်ယူဒၤလီၤ. အန့ၣ်ဒၣ်လဲာ်, ယွၤအတၢ်သးထီၣ်တဆိကတီၢ်ဝဲဘၣ်. အစုယူာ်ထီၣ်ဒံးအသး လၢကစံၣ်ညီၣ်တၢ်အဂီၢ်လီၤ.