လံာ်ယၡါယၤ 6 - Sgaw Karen Common Bible

ကစၢ်ယွၤကိးထီၣ်စီၤယၡါယၤ လၢကကဲထီၣ်ဝံတဂၤအဂီၢ်

¹ လၢစီၤပၤဧူးစံယါသံဝဲအနံၣ်န့ၣ်, ယထံၣ်ဘၣ်ယွၤလီၤ. အဝဲဆ့ၣ်နီၤဝဲလၢအလီၢ်ပစိာ်အဖီခိၣ်, အိၣ်ထီၣ်ထီဝဲဒီးတၢ်ပာ် ထီၣ်ထီအီၤ, ဒီးအဆ့ကၤဖးဒိၣ်မၤပှဲၤတၢ်လုၢ်ဟံၣ်ဒီဖျၢၣ်လီၤ.

² စ့ရၤဖးတဖၣ်ဆၢထၢၣ်ဝးတရံးအီၤတဂၤအိၣ်ဒီးအဒံးဆ့ ဃုဘ့ၣ်စုာ်စုာ်လီၤ. မၤဘၢအမဲာ်ခံဘ့ၣ်, ဒီးအနီၢ်ခိခံဘ့ၣ်ဒီးအဂၤခံဘ့ၣ်န့ၣ်သူဝဲလၢကယူၤဝဲအဂီၢ်လီၤ.

³ အဝဲသ့ၣ်ကိးထီၣ်ဝဲတဂၤဆူတဂၤအအိၣ်, “စီဆှံ, စီဆှံ, စီဆှံ, ယွၤသ့တၢ်လၢာ်ကစၢ်အံၤစီဆှံဝဲလီၤ. အလၤကပီၤပှဲၤလၢဟီၣ်ခိၣ်ဒီဘ့ၣ်ညါလီၤ.”

⁴ အကလုၢ်တဖၣ်အသီၣ်ဒုးဟူးဝးထီၣ်တၢ်လုၢ်ဟံၣ်အခီၣ်ထံး, ဒီးတၢ်လုၢ်ဟံၣ်အကစၢ်ဒၣ်ဝဲပှဲၤဝဲဒီးမ့ၣ်အူလုၣ်န့ၣ်လီၤ.

⁵ ဒီးယစံး, “လၢယဂီၢ်တၢ်မုၢ်လၢ်တအိၣ်ဘၣ်. ယဘၣ်တၢ်စံၣ်ညီၣ်ဃါမနၤလီၤ. အဂ့ၢ်ဒ်အံၤ, တၢ်ကတိၤကိးထံၣ်ဒဲးလၢအဟဲထီၣ်လၢ ယထးခိၣ်န့ၣ်ပှဲၤဒီးတၢ်ဒဲးဘးလီၤ. ဒီးယအိၣ်ယဆိးလၢပှၤတကလုာ်လၢအတၢ်ကတိၤကိးထံၣ်ဒဲး ပှဲၤဒီးတၢ်ဒဲးဘးအကျါန့ၣ်လီၤ. ဒီးခဲကနံၣ်အံၤတခီ, ယထံၣ်ဘၣ်လံစီၤပၤ တဂၤ, ယွၤသ့တၢ်လၢာ်ကစၢ်လၢယမဲာ်ချံ ဒၣ်ယဲလီၤ.”

⁶ အန့ၣ်ဒီး, စ့ရၤဖးတဖၣ်အကျါတဂၤယူၤလီၤဝဲဆူယအိၣ်, စိာ်ဝဲဒီးမ့ၣ်အူ ကဖးတကိၢ်လိၣ်လၢအဟံးန့ၢ်ဝဲလၢတၢ်လုၢ်လီၢ်ခီဖျိနီၣ်တံာ်လီၤ.

⁷ အဝဲထိးယနိးဖံးလၢမ့ၣ်အူကဖးကိၢ်လိၣ်ဒီးစံးဝဲ, “တၢ်အံၤထိးဘၣ်နနိးဖံးလံဒီးအခဲအံၤနတၢ်ကမၣ်လဲၤပူၤကွံာ်လံ, ဒီးနတၢ်ဒဲးဘးတဖၣ်ဘၣ်တၢ်ပျၢ်အီၤလံ.”

⁸ အန့ၣ်ဒီးယနၢ်ဟူယွၤစံးဝဲဒၣ်, “ယကမၢလီၤမတၤတဂၤလဲၣ်. ဒီးမ့ၢ်မတၤကကဲထီၣ်ပပှၤစိာ် တၢ်ကစီၣ်တဂၤလဲၣ်.” ဒီးယစံး, “ယကလဲၤလီၤ. ဆှၢလီၤယၤတက့ၢ်.”

⁹ အန့ၣ်ဒီး, အဝဲစံးဘၣ်ယၤလၢယကလဲၤဒီးစံးဘၣ်တဲဘၣ် အပှၤဂီၢ်မုၢ်လၢတၢ်ကစီၣ်အအံၤ, “သုဒိကနၣ်ထဲလဲၣ်ထဲလဲၣ် နာ်က့, သုတနၢ်ပၢၢ်ဘၣ်. သုကွၢ်ထံတၢ်ထဲလဲၣ်ထဲလဲၣ်နာ်က့, သုတသ့ၣ်ညါတၢ်လၢအမၤအသးတဖၣ်ဘၣ်.”

¹⁰ ဝံၤဒီးအဝဲစံးဘၣ်ယၤ, “မၤဃၢပှၤတဖၣ်အံၤအသး, မၤတအၢအနၢ်တဖၣ်, ဒီးမၤဘျီၣ်အမဲာ်ချံတဖၣ်ဒ်သိးအဝဲသ့ၣ် အသုတထံၣ်တၢ်, နၢ်ဟူတၢ်, ဒီးနၢ်ပၢၢ်တၢ်တဂ့ၤန့ၣ်တက့ၢ်. အဝဲသ့ၣ်မ့ၢ်ထံၣ်တၢ်, နၢ်ဟူတၢ်, ဒီးနၢ်ပၢၢ်ဘၣ်ဖုးတၢ်ဒီး, အဝဲသ့ၣ်ကဃၣ်ကဒါက့ၤဘၣ်ဖုးအသးဆူယ အိၣ်ဒီးကန့ၢ်ဘၣ်ဖုးတၢ်မၤဘျါက့ၤန့ၣ်လီၤ.”

¹¹ ယသံကွၢ်တၢ်ဒီးစံး, “ယွၤဧၢ, တၢ်ဒ်သိးအံၤကမၤဒံးအသး ဆံးယံာ်လဲၣ်.” အဝဲဒၣ်စံးဆၢယၤ, “တုၤလီၤလၢဝ့ၢ်တဖၣ် ဟးဂီၤကွံာ်ခဲလၢာ်ဒီးအိၣ်ကလီဝဲ, တုၤလီၤလၢဟံၣ်တဖၣ်ပှၤ တအိၣ်လၢအပူၤလၢၤဘၣ်, ဒီးတုၤလီၤလၢထံကီၢ်အနီၢ်ကစၢ်အံၤ အိၣ်သယုၢ်သညိဒီးလီၤဃီကွံာ်ဝဲတစုန့ၣ်လီၤ.

¹² ယကဆှၢကွံာ်ပှၤဂီၢ်မုၢ်ဆူတၢ်လီၢ်ဖးယံၤဒီးဒုးကဲထီၣ်ထံကီၢ် ဒီဘ့ၣ်လၢတၢ်အိၣ်သယုၢ်သညိအလီၢ်န့ၣ်လီၤ.

¹³ လၢပှၤအဂၤတဆံအကျါပှၤမ့ၢ်အိၣ်လီၤတဲာ်တ့ၢ်ထဲတဂၤဧိၤ လၢထံကီၢ်အံၤအပူၤဒၣ်လဲာ်, အဝဲစ့ၢ်ကီးကဘၣ်တၢ်မၤဟးဂီၤ ကွံာ်အီၤလီၤ. အဝဲကလီၤဂာ်ဒ်သ့ထိးဖၣ်အခိၣ် ဆၢၣ်လၢအအိၣ်လီၤတဲာ်ဖဲတၢ်ကူၢ်လီၤအီၤဝံၤအလီၢ်ခံလီၤ.” (သ့ၣ်ခိၣ်ဆၢၣ်မ့ၢ်တၢ်ဒိလီၤတၢ်စးထီၣ်အသီတမံၤလၢယွၤ အပှၤဂီၢ်မုၢ်အဂီၢ်န့ၣ်လီၤ.)