လံာ်ယၡါယၤ 48 - Sgaw Karen Common Bible

ကစၢ်ယွၤမ့ၢ်ခါဆူညါအယွၤ

¹ ကီၢ်အံၣ်စရ့လးအပှၤဂီၢ်မုၢ်, သုဝဲလၢအဟဲလီၤစၢၤလၢ စီၤယူဒၤသ့ၣ်ဧၢ, ဒိကနၣ်တၢ်အံၤတက့ၢ်. သုဆိၣ်တၢ်လၢယွၤအမံၤ ဒီးစံးလၢသုကဘူၣ်ထီၣ်ဘါထီၣ် ကီၢ်အံၣ်စရ့လးအကစၢ်ယွၤလီၤ. ဘၣ်ဆၣ်ဒီးသုတမၤအီၤဒ်သုကတိၤတၢ် အသိးန့ၣ်ဘၣ်.

² အန့ၣ်ဒၣ်လဲာ်, သုပာ်ကဖၢလၢလီၤသုသးလၢသုကစံး လၢသုမ့ၢ်ဝ့ၢ်စီဆှံအထံဖိကီၢ်ဖိတဖၣ် ဒီးလၢသုသန့ၤသုသးလၢ ကီၢ်အံၣ်စရ့လးအကစၢ်ယွၤလၢ အမံၤမ့ၢ်ဝဲသ့တၢ်လၢာ်အယွၤအဂီၢ်န့ၣ်လီၤ.

³ ယွၤစံးဘၣ်ကီၢ်အံၣ်စရ့လး, “လၢပျၢၤလံၤလံၤယကတိၤဆိပာ်တ့ၢ် တၢ်လၢကမၤအသး, ဝံၤဒီးသတူၢ်ကလာ်ယဒုးကဲထီၣ်အီၤလီၤ.

⁴ ယသ့ၣ်ညါတ့ၢ်လၢသုကမၤသုသးသုခိၣ်ကိၤကနံ ထဲသိးသိးဒီးထး, ဒီးတဆုးလီၤပိာ်လီၤဘၣ်အသး ဒ်တိၢ်ဘီအသိးဘၣ်န့ၣ်လီၤ.

⁵ လၢတၢ်န့ၣ်အဃိ, ယကတိၤဆိပာ်တ့ၢ်တၢ်လၢအကမၤအသးဒီးသုတၢ်အိၣ် မူဆူညါ, လၢပျၢၤလံၤလံၤန့ၣ်လီၤ. ယဘိးဘၣ်သ့ၣ်ညါတၢ်မၤအသးတဖၣ်တချုးလၢအမၤဒံးဘၣ်အသး, ဒ်သိးကတြီဃာ်သုလၢသုသုတစံးဘၣ်လၢသု တၢ်ဂီၤသိအသးဒီးစိးပျၤအသးတဖၣ်ဒုးကဲထီၣ်လိၣ်ထီၣ်တၢ်တဖၣ် န့ၣ်တဂ့ၤအဂီၢ်လီၤ.

⁶ ကယဲၢ်တၢ်လၢယတဲဆိပာ်စၢၤတဖၣ်, ခဲအံၤမၤအသးလံ. သုကဘၣ်အၢၣ်လီၤလၢယတၢ်ကတိၤဆိပာ်စၢၤတဖၣ်မ့ၢ်တၢ်အဘၣ်လီၤ. ခဲအံၤ, ယကတဲဘၣ်သုတၢ်အသီတဖၣ်လၢအကဟဲ, တၢ်မၤအသးတဖၣ်, လၢယတလီၣ်ဖျါတ့ၢ်အီၤလၢညါဘၣ်န့ၣ်လီၤ.

⁷ ယဒုးကဲထီၣ်တၢ်သ့ၣ်တဖၣ်အံၤဖဲတၢ်အကတီၢ်အံၤလီၤ. တၢ်ဒ်သိးအံၤတမၤတ့ၢ်အသးလၢအပူၤကွံာ်န့ၣ်ဘၣ်. ယမ့ၢ်မၤတ့ၢ်အီၤဒီး, သုကစံးလၢသုသ့ၣ်ညါတၢ်တဖၣ်အံၤခဲလၢာ်လီၤ.

⁸ ယသ့ၣ်ညါတ့ၢ်လၢတၢ်နာ်န့ၢ်သုတသ့ဘၣ်. သုဘၣ်တၢ်သ့ၣ်ညါတ့ၢ်သုထီဘိဒ်ပှၤပူထီၣ် တၢ်အသိးလီၤ. တၢ်န့ၣ်မ့ၢ်လၢသုတနၢ်ဟူတ့ၢ်တၢ်ဂ့ၢ်အံၤနီတဘျီနီတစုဘၣ်အဃိ ဒီး မ့ၢ်လၢတၢ်ကတိၤတတုၤအိၣ်သုနၢ်တဖၣ်နီတဖျၢၣ်နီတဘျီဘၣ်အဃိ န့ၣ်လီၤ.

⁹ ဒ်သိးပှၤဂီၢ်မုၢ်ကစံးထီၣ်ပတြၢၤယမံၤ ဒီးယပၢၤဃာ်ယတၢ်သးထီၣ်လၢတၢ်ပလီၢ်ပဒီသးအပူၤလီၤ. ယထုးက့ၤအီၤဒီးယတမၤဟးဂီၤသုဘၣ်.

¹⁰ ယမၤကွၢ်တ့ၢ်သုလၢတၢ်နးတၢ်ဖှီၣ်အမ့ၣ်အူအပူၤ, ဒ်စ့ဘၣ်တၢ်ပှံၢ်အီၤလၢမ့ၣ်အူအဖၣ်ကပူၤအသိးလီၤ. ဘၣ်ဆၣ်ယထံၣ်တ့ၢ်လၢသုလုၢ်သုပှ့ၤတအိၣ်ဘၣ်.

¹¹ တၢ်လၢယမၤအီၤန့ၣ်, ယမၤတ့ၢ်အီၤလၢယကစၢ်ဒၣ်ယဲအဃိလီၤ. ယတပျဲယမံၤအလၤကပီၤဟးဂီၤမ့ၢ်ဂ့ၤပှၤအဂၤတဂၤဂၤနီၤဟံးန့ၢ် တၢ်လၤကပီၤအဝဲန့ၣ်မ့ၢ်ဂ့ၤဘၣ်. အဝဲန့ၣ်ကြၢးမ့ၢ်ဒၣ်ယတၢ်, ထဲယၤတဂၤဧိၤအတၢ်န့ၣ်လီၤ.”

စီၤပၤကိရ့ၣ်, ခိၣ်နၢ်လၢယွၤဃုထၢအီၤ

¹² ယွၤစံးဝဲ, “ဒိကနၣ်ယၤတက့ၢ်. ကီၢ်အံၣ်စရ့လးဧၢ, ပှၤဂီၢ်မုၢ်လၢယကိးထီၣ်တ့ၢ်အီၤသ့ၣ်ဧၢ, ယမ့ၢ်ကစၢ်ယွၤ, တၢ်အခီၣ်ထံး, တၢ်အကတၢၢ်ဒီးကစၢ်ယွၤထဲတဂၤဧိၤလီၤ.

¹³ ယစုတ့ဟီၣ်ခိၣ်အခီၣ်ထံးတဖၣ်ဒီးသလၣ်ထီၣ်မူခိၣ်မူကပိာ်လိၤ လီၤ. ဖဲယကိးဖှိၣ်မူခိၣ်ဒီးဟီၣ်ခိၣ်န့ၣ်, အဝဲသ့ၣ်ဟဲတဘျီဃီဒီးဒုးနဲၣ်ဖျါထီၣ်အသးလီၤ.

¹⁴ သုဝဲခဲလၢာ်, အိၣ်ဖှိၣ်ရိဖှိၣ်ဒီးဒိကနၣ်တၢ်တက့ၢ်. ပှၤလၢယဃုထၢတ့ၢ်အီၤတဂၤကဒုးဝ့ၢ်ဘၤဘူၤလိၣ်အဂ့ၢ်န့ၣ်, ကစၢ်အဂၤတဖၣ်ကတိၤဆိပာ်အီၤတသ့နီတဂၤဘၣ်. အဝဲကမၤတၢ်လၢယသးအိၣ်လၢအဝဲကမၤဝဲန့ၣ်လီၤ.

¹⁵ ယမ့ၢ်ပှၤတဂၤလၢအကတိၤတ့ၢ်တၢ်ဒီးကိးတ့ၢ်အီၤလီၤ. ယဆှၢထီၣ်တ့ၢ်အီၤဒီးဟ့ၣ်တ့ၢ်အီၤတၢ်မၤနၢၤလီၤ.

¹⁶ ခဲအံၤ, ဟဲဘူးဒီးယၤဒီးဒိကနၣ်တၢ်လၢယစံးတက့ၢ်. လၢထံးလၢသီလံၤလံၤ, ယကတိၤတ့ၢ်တၢ်ဖျိဖျိဖျါဖျါ ဒီးမၤတီယကလုၢ်ထီဘိလီၤ.” (ခဲအံၤ, ယွၤပၢဘၣ်တၢ်ခဲလၢာ်ကစၢ်ဟ့ၣ်တ့ၢ်ယၤအတၢ်စိ တၢ်ကမီၤဒီးမၢလီၤယၤလီၤ.)

ယွၤအတၢ်ကူၣ်ထီၣ်ကျဲၤလီၤ လၢအပှၤဂီၢ်မုၢ်အဂီၢ်

¹⁷ ကီၢ်အံၣ်စရ့လးအကစၢ်ယွၤစီဆှံ, ယွၤလၢအအုၣ်က့ၤခီၣ်က့ၤသုစံးဝဲ, “ယမ့ၢ်ယွၤ, သုကစၢ်ယွၤ, ပှၤတဂၤလၢအသးအိၣ်သိၣ်လိသုလၢ အတၢ်ဂ့ၤဒၣ်ဝဲအဂီၢ် ဒီးနဲၣ်သုဆှၢသုလၢကျဲတဘိလၢသုကြၢးလဲၤန့ၣ်လီၤ.

¹⁸ သုမ့ၢ်ဒိကနၣ်တ့ၢ်ယတၢ်မၤလိာ်တဖၣ်ဒီး, တၢ်ဆိၣ်ဂ့ၤတဖၣ်ကယွၤလီၤဝဲလၢသုဂီၢ်, ဒ်ထံကျိဖိတဘိလၢအတလီၤသံးနီတစုအသိးန့ၣ်လီၤ. တၢ်မၤနၢၤကဟဲတုၤအိၣ်သု ဒ်လပီတဖၣ်တလ့ၣ်ထီၣ်အသးလၢပီၣ်လဲၣ်ကၢၢ်နံၤအသိးန့ၣ်လီၤ.

¹⁹ သုစၢၤသုသွဲၣ်တဖၣ်ကအါဝဲဂီၢ်ဝဲဒ် မဲးအဖျၢၣ်တဖၣ်အသိး, ဒီးယကမၤလီၤတံၢ်တၢ်ဒ်သိးအဝဲသ့ၣ်အသုတဘၣ်တၢ်မၤဟးဂီၤအီၤ နီတစုတဂ့ၤအဂီၢ်န့ၣ်လီၤ.

²⁰ ဟးထီၣ်လၢဝ့ၢ်ဘၤဘူၤလိၣ်တက့ၢ်. ဟးထီၣ်လၢတၢ်သဘျ့ အပူၤတက့ၢ်. ကိးပသူထီၣ်တၢ်ကစီၣ်လၢတၢ်သးခုအပူၤဒီးဘိးဘၣ်သ့ၣ်ညါအီၤ လၢတၢ်လီၢ်ကိးပူၤဒဲးတက့ၢ်. “ယွၤအုၣ်က့ၤခီၣ်က့ၤတ့ၢ်အခ့အပှၤအံၣ်စရ့လးလံ.”

²¹ ဖဲယွၤဆှၢခီဖျိအပှၤဂီၢ်မုၢ်လၢမဲးမုၢ်ခိၣ်တတီၤလၢအကိၢ် ဒီးအဃ့ထီအခါန့ၣ်, အဝဲသ့ၣ်တတူၢ်ဘၣ်တၢ်သူအသးလၢထံဘၣ်. ဒုးယွၤလီၤထံလၢလၢၢ်တဖျၢၣ်အပူၤ လၢအဝဲသ့ၣ်အဂီၢ်လီၤ. အဝဲဒိသ့ၣ်ဖးလၢၢ်ဒီးထံပုာ်ထီၣ်ယွၤလီၤဝဲလီၤ.

²² “လၢပှၤတတီတလိၤတဖၣ်အဂီၢ်န့ၣ်တၢ်ဃူတၢ်ဖိးတအိၣ်ဘၣ်.” ယွၤစံးဝဲဒၣ်လီၤ.