လံာ်ယၡါယၤ 46 - Sgaw Karen Common Bible

¹ တၢ်အံၤမ့ၢ်တၢ်အကတၢၢ်လၢကီၢ်ဘၤဘူၤလိၣ်အကစၢ်တဖၣ်အဂီၢ်လီၤ. ဘ့လးဒီးနဘိတဖၣ်, တဘျီဘၣ်တၢ်ဘူၣ်ထီၣ်ဘါထီၣ်တ့ၢ်အီၤ, ဘၣ်ဆၣ်ဒီးခဲအံၤန့ၣ်ဘၣ်တၢ်ပဒၢးထီၣ်အီၤလၢကသ့ၣ်ယီၤတဖၣ် အလိၤ ဒီးမ့ၢ်တၢ်ဝံဃၢလၢဆၣ်ဖိကီၢ်ဖိလၢအလီၤဘှံးလီၤတီၤတဖၣ် အဂီၢ်န့ၣ်လီၤ.

² တၢ်ဂီၤတဖၣ်အုၣ်က့ၤခီၣ်က့ၤလီၤအသးတသ့ဘၣ်. အဝဲသ့ၣ်ဘၣ်တၢ်ဖီၣ်န့ၢ်အီၤဒီးစိာ်ကွံာ်အီၤလီၤ. အဝဲအံၤမ့ၢ်တၢ်အကတၢၢ်လၢကီၢ်ဘၤဘူၤလိၣ်အကစၢ်တဖၣ်အဂီၢ်လီၤ.

³ ဒိကနၣ်ယၤတက့ၢ်, စီၤယၤကိာ်အစၢၤအသွဲၣ်, ပှၤအိၣ်လီၤတဲာ်ခဲလၢာ်လၢယပှၤဂီၢ်မုၢ်အကျါသ့ၣ်ဧၢ, ယသူၣ်အိၣ်သးအိၣ်တ့ၢ်သုစးထီၣ်လၢသုအိၣ်ဖျဲၣ်ထီၣ်အဆၢ ကတီၢ်လီၤ.

⁴ ယမ့ၢ်သုကစၢ်ယွၤဒီးယကသူၣ်အိၣ်သးအိၣ်သု တုၤသုသးပှၢ်ထီၣ်ဒီးသုခိၣ်ဝါလီၤ. ယတ့လီၤသုဒီးယကအံးထွဲကွၢ်ထွဲသုလီၤ. ယကဟ့ၣ်သုတၢ်မၤစၢၤဒီးမၤပူၤမၤဖျဲးသုလီၤ.

⁵ “သုကထိၣ်သတြီၤယၤဒီးမတၤလဲၣ်.” ယွၤစံးဝဲဒၣ်, “ပှၤလၢအလီၤဂာ်ဒီးယၤအိၣ်ဝဲတဂၤဂၤဧါ.”

⁶ ပှၤဂီၢ်မုၢ်အိးထီၣ်အကျိၣ်ဧိၤစ့ဧိၤအထၢၣ်တဖၣ်ဒီး ဂၢ်လီၤထူလီၤ. အဝဲသ့ၣ်စီၤစ့လၢစီၤပီၢ်အပူၤလီၤ. အဝဲသ့ၣ်ဒိးလဲပှၤပိာ်ထူတဂၤလၢကတ့ထီၣ်ကစၢ်တဂၤ, ဝံၤဒီးအဝဲသ့ၣ်တီၤလီၤကဒွံကျိာ်ဒီး ဘူၣ်ထီၣ်ဘါထီၣ်အီၤလီၤ.

⁷ အဝဲသ့ၣ်ယိးထီၣ်ဝဲလၢအဖံဘၣ်ခိၣ်ဒီးစိာ်အီၤလီၤ. အဝဲသ့ၣ်ပာ်လီၤအီၤလၢအလီၢ်ဒၣ်ဝဲ, ဒီးအိၣ်ဆၢထၢၣ်ဖဲန့ၣ် ဒီးသုးအသးလၢအအိၣ်ဆၢထၢၣ်အလီၢ်န့ၣ် တသ့ဘၣ်ဝဲဘၣ်. ပှၤတဂၤဂၤမ့ၢ်ဃ့ထုကဖၣ်ဆူအအိၣ်ဒီး, စံးဆၢတၢ်တသ့, ဒီးအုၣ်က့ၤခီၣ်က့ၤအီၤလၢ တၢ်တတၢးတနါတသ့ဘၣ်.

⁸ သ့ၣ်နီၣ်ထီၣ်က့ၤတၢ်အံၤ, သုဝဲပှၤမၤတၢ်ဒဲးဘးဖိသ့ၣ်ဧၢ. ကွၢ်ဆိကမိၣ်တၢ်လၢယမၤတ့ၢ်န့ၣ်တက့ၢ်.

⁹ သ့ၣ်နီၣ်ထီၣ်က့ၤတၢ်လၢအမၤတ့ၢ်အသးလၢပျၢၤတက့ၢ်. အၢၣ်လီၤအီလီၤလၢထဲယၤတဂၤဧိၤန့ၣ်မ့ၢ်ကစၢ်ယွၤဒီးပှၤ အဂၤ ဒ်သိးယၤတအိၣ်ဝဲနီတဂၤဘၣ်န့ၣ်တက့ၢ်.

¹⁰ လၢထံးလၢသီလံၤလံၤယကတိၤဆိပာ်တ့ၢ်တၢ်လၢ အကကဲထီၣ်လိၣ်ထီၣ်ဝဲ, ဒီးလၢပျၢၤလံၤလံၤယတဲတ့ၢ်ပာ်စၢၤတၢ်လၢအကမၤအသးလီၤ. ယစံးတ့ၢ်လၢယတၢ်ကူၣ်ကျဲၤတဖၣ်တကဲထီၣ်ဒီးတအိၣ်ဘၣ်နီ တဘျီဘၣ် ဒီးယကမၤတၢ်ခဲလၢာ်လၢယတိာ်သူၣ်ပာ်သးလၢယကမၤအီၤန့ၣ်လီၤ.

¹¹ ယကိးပှၤကညီတဂၤလၢကဟဲလၢမုၢ်ထီၣ်တခီလီၤ. အဝဲကယူၤသဖှိလီၤဒ်လံာ်ဖးဒိၣ်တဘ့ၣ်အသိး ဒီးအဝဲကမၤလၢပှဲၤတၢ်လၢယကူၣ်ထီၣ်ကျဲၤလီၤတ့ၢ်တဖၣ်လီၤ. ယကတိၤတ့ၢ်လံတၢ်, ဒီးတၢ်အံၤကမၤအသးန့ၣ်လီၤ.

¹² သုဝဲပှၤလၢအခိၣ်ကိၤဒီးဆိကမိၣ်လၢတၢ်မၤနၢၤအံၤယံၤဒံးဝဲ တဖၣ်ဧၢ, ဒိကနၣ်ယၤတက့ၢ်.

¹³ တၢ်မၤနၢၤအမုၢ်နံၤအံၤယဟဲစိာ်ဘူးထီၣ်အီၤလံ. တအိၣ်ယံၤလၢၤဘၣ်. ယတၢ်မၤနၢၤအံၤတၢ်တမၤယံာ်လၢၤဘၣ်အီၤဘၣ်, ယကအုၣ်က့ၤခီၣ်က့ၤဝ့ၢ်ယရူၤၡလ့ၣ်ဒီးဟဲစိာ်တၢ်လၤတၢ်ကပီၤလၢ ကီၢ်အံၣ်စရ့လးအဂီၢ်ဖဲန့ၣ်လီၤ.