လံာ်ယၡါယၤ 38 - Sgaw Karen Common Bible

စီၤပၤဃံးစကံယၤအတၢ်ဆူးတၢ်ဆါ ဒီးအတၢ်အိၣ်ဆူၣ်အိၣ်ချ့ထီၣ်က့ၤ

¹ ဖဲတၢ်ဆၢကတီၢ်အံၤအဘၢၣ်ကဝီၤန့ၣ်, စီၤပၤဃံးစကံယၤဆါထီၣ် ဘူးတ့ၢ်မးကသံဝဲလီၤ. စီၤအၤမိာ်အဖိခွါဝံယၡါယၤလဲၤဆူအ အိၣ်ဒီးစံးဘၣ်အီၤ, “ယွၤစံးဘၣ်နၤဒ်သိးနကကတဲာ်ကတီၤတၢ်ခဲ လၢာ်လၢအဂ့ၢ်အဝီဒၣ်ဝဲလီၤ. အဂ့ၢ်ဒ်အံၤ, နတအိၣ်ဆူၣ်အိၣ်ချ့ထီၣ်က့ၤလၢၤဘၣ်. ကတဲာ်ကတီၤနသးလၢ နကသံတက့ၢ်.”

² စီၤဃံးစကံယၤဃၣ်ကွံာ်အမဲာ်ဆူတၢ်ဒူၣ်ဒီးဃ့ဘါထုကဖၣ်တၢ် လီၤ.

³ “ယွၤဧၢ, သ့ၣ်နီၣ်ထီၣ်က့ၤလၢယမၤတ့ၢ်နတၢ်မၤလၢတၢ်ကလုၢ်တီ ဒီးတၢ်သူၣ်တီသးရၤအပူၤ, ဒီးထီဘိန့ၣ်ယကျဲးစၢးမၤတ့ၢ်တၢ်လၢနသးအိၣ်လၢယကမၤအီၤန့ၣ် တက့ၢ်.” ဝံၤဒီးအဝဲဟီၣ်နးနးကလဲာ်န့ၣ်လီၤ.

⁴ အန့ၣ်ဒီး, ယွၤမၤလိာ်ဝံယၡါယၤ,

⁵ ဒ်သိးအကလဲၤကဒါက့ၤဆူစီၤပၤဃံးစကံယၤအအိၣ်ဒီးစံးဘၣ် အီၤ, “ယၤ, ယွၤ, နပၢ်ဖးဒိၣ်စီၤဒၤဝံးအကစၢ်ယွၤ, နၢ်ဟူတ့ၢ်နတၢ်ထုကဖၣ်ဒီးထံၣ်တ့ၢ်နမဲာ်ထံမဲာ်နိတဖၣ်လီၤ. ယကပျဲနအိၣ်မူယံာ်ထီၣ်အါထီၣ်တဆံယဲၢ်နံၣ်လီၤ.

⁶ ယကမၤပူၤဖျဲးနၤဒီးဝ့ၢ်ယရူၤၡလ့ၣ်အံၤလၢကီၢ်အၤၡူၢ်အစီၤပၤ ဖးဒိၣ်အစုပူၤ, ဒီးယကဒီဒၣ်အိၣ်ပှိၤဒံးဝ့ၢ်အံၤဆူညါန့ၣ်လီၤ.

⁷ ယွၤကဟ့ၣ်နၤတၢ်အုၣ်သးအပနီၣ်တမံၤလၢအဝဲကတီဒီးအတၢ် အၢၣ်လီၤန့ၣ်လီၤ.

⁸ ကွၢ်ကွၢ်, ယကဒုးက့ၤကဒါက့ၤတၢ်ကဒုလၢအတီၤတဖၣ်လၢအလဲၤ လီၤပူၤကွံာ်တ့ၢ်လၢစီၤအၤဃးအမုၢ်အနၣ်ရံၣ်အလိၤ, ကက့ၤကဒါက့ၤအတီၤဆံဆဲၣ်တီၤလီၤ.” ဒီးမုၢ်န့ၣ်က့ၤက့ၤကဒါက့ၤဆံဆဲၣ်တီၤလၢအလဲၤလီၤပူၤကွံာ် တ့ၢ်ဝဲလီၤ.

⁹ ဖဲစီၤပၤဃံးစကံယၤဘျါက့ၤလၢအတၢ်ဆါဝံၤအလီၢ်ခံဒီး, အဝဲကွဲးထါစံးထီၣ်ပတြၢၤအံၤန့ၣ်လီၤ.

¹⁰ ယဆိကမိၣ်တ့ၢ်လၢ, လၢတၢ်အိၣ်မူမုၢ်ထူၣ်အကတီၢ်န့ၣ်, ယလဲၤလီၤတ့ၢ်ဆူပှၤသံတဖၣ်အကီၢ်ပူၤဒီးတအိၣ်မူဘၣ်လၢၤ ယတၢ်အိၣ်မူနီတစုဘၣ်န့ၣ်လီၤ.

¹¹ ယဆိကမိၣ်တ့ၢ်, လၢပှၤမူတဖၣ်အကီၢ်ပူၤအံၤ, ယတထံၣ်ဘၣ်ကဒီးယွၤမ့ၢ်ဂ့ၤ, ပှၤအမူတဂၤဂၤမ့ၢ်ဂ့ၤ, နီတစုလၢၤဘၣ်.

¹² ယတၢ်အိၣ်မူဘၣ်တၢ်မၤထီၣ်တဲာ်ကွံာ်အီၤဒီးကတၢၢ်ဝဲ, လီၤဂာ်ဒ်ဒဲတဖျၢၣ်လၢဘၣ်တၢ်ဃိလီၤပှီၢ်ကွံာ်အီၤ ဒီးတၢ်ကံးယာ်လၢဘၣ်တၢ်ကူးတဲာ်ကွံာ်အီၤလၢ ထၣ်အလိၤအသိးန့ၣ်လီၤ. ယဆိကမိၣ်တ့ၢ်လၢကစၢ်ယွၤမၤကတၢၢ်ယတၢ်အိၣ်မူလံန့ၣ်လီၤ.

¹³ ဒီနၤညါန့ၣ်, ယကိးထီၣ်လၢတၢ်ဆူးတၢ်ဆါအပူၤ, မၤသးဒ်သိးခ့ယုၢ်တဒုမၤကၢ်ယဃံယကွဲတဖၣ်န့ၣ်လီၤ. ယဆိကမိၣ်တ့ၢ်လၢကစၢ်ယွၤမၤကတၢၢ်ယတၢ်အိၣ်မူလံန့ၣ်လီၤ.

¹⁴ ယကလုၢ်သီၣ်ကသွံဒံဒီးစၢ်ဝဲလီၤ. ယကအုဒ်ထိၣ်လွံၢ်အသိးလီၤ. ယမဲာ်ချံလီၤဘှံးဝဲလၢယကွၢ်ထီၣ်တၢ်ဆူမူခိၣ်အဃိလီၤ. ယွၤဧၢ, မၤပူၤမၤဖျဲးယၤလၢကယဲၢ်တၢ်ကီတၢ်ခဲတဖၣ်အံၤတက့ၢ်.

¹⁵ ယစံးမနုၤကသ့လဲၣ်. ယွၤမၤတ့ၢ်တၢ်အံၤလီၤ. ယသးခၣ်ဝဲဒီးယမံတန့ၢ်ဘၣ်.

¹⁶ ယွၤဧၢ, ယအိၣ်မူလၢနဂီၢ်, ထဲနၤတဂၤဧိၤအဂီၢ်လီၤ. မၤဘျါက့ၤယၤဒီးဒုးအိၣ်မူယၤတက့ၢ်.

¹⁷ ယတၢ်သးခၣ်ကဃၣ်က့ၤအသးဆူတၢ်ဃူတၢ်ဖိးလီၤ. နအုၣ်က့ၤခီၣ်က့ၤယသးသမူလၢတၢ်လီၤပျံၤ လီၤဘၣ်ယိၣ်ခဲလၢာ် ဒီးနပျၢ်ယတၢ်ဒဲးဘးခဲလၢာ်လီၤ.

¹⁸ ပှၤလၢတၢ်သံအကီၢ်ပူၤလၢအစံးထီၣ်ပတြၢၤနၤသ့တအိၣ်နီ တဂၤဘၣ်. ပှၤလၢအလဲၤလီၤဆူပျူၤပူၤတဖၣ်နာ်နတၢ်သူၣ်တီသးရၤတသ့ဘၣ်.

¹⁹ ဒ်ယစံးထီၣ်ပတြၢၤနၤခဲအံၤအသိး, ပှၤလၢအစံးထီၣ်ပတြၢၤနၤမ့ၢ်ပှၤအမူန့ၣ်လီၤ. ပၢ်တဖၣ်စံးဘၣ်တဲဘၣ်အဖိတဖၣ်လၢနသူၣ်တီသးရၤထဲလဲၣ်အဂ့ၢ် န့ၣ်လီၤ.

²⁰ ယွၤဧၢ, နမၤဘျါတ့ၢ်ယၤလံ. ပကဒ့တနၢ်သီတူၢ်တဖၣ်ဒီးသးဝံၣ် နတၢ်စံးထီၣ်ပတြၢၤလီၤ. ပကသးဝံၣ်စံးထီၣ်ပတြၢၤတၢ်လၢနတၢ်လုၢ်ဟံၣ်အပူၤလၢပသးသမူ တစိၤဒၣ်ပှၤလီၤ.

²¹ အဂ့ၢ်ဒ်အံၤ, ဝံယၡါယၤစံးတ့ၢ်ဝဲစီၤပၤ, “ပျဲအဝဲသ့ၣ်ဟံး န့ၢ်ချၢၣ်ဒၢသၣ်အဃ့တလိၣ်, စံၢ်အီၤဒီးပဲလီၤအီၤလၢတၢ်ဝ့အ ဖီခိၣ်တက့ၢ်. ဒီးကဘျါက့ၤဝဲလီၤ.”

²² ဒီးစီၤပၤဃံးစကံယၤစ့ၢ်ကီးသံကွၢ်တ့ၢ်ဝဲ, “လၢယကလဲၤထီၣ်ဆူယွၤအဟံၣ်အဂီၢ်, တၢ်ပနီၣ်မ့ၢ်တၢ်မနုၤလဲၣ်,” န့ၣ်လီၤ.