လံာ်ယၡါယၤ 2 - Sgaw Karen Common Bible

တၢ်ဃူတၢ်ဖိးအထူအယိာ်

¹ အအံၤမ့ၢ်တၢ်ကစီၣ်လၢကစၢ်ယွၤဟ့ၣ်လီၤ စီၤအၤမိာ်အဖိခွါဝံယၡါယၤဘၣ်ဃးဒီး ကီၢ်ယူဒၤဒီးဝ့ၢ်ယရူၤရှလ့ၣ်အဂ့ၢ်န့ၣ်လီၤ.

² လၢမုၢ်နံၤလၢအကဟဲတဖၣ်အပူၤန့ၣ်, ကစၢၢ်လၢယွၤအတၢ်လုၢ်ဟံၣ်အိၣ်ဆၢထၢၣ်န့ၣ် ကမ့ၢ်ကစၢၢ်အထီကတၢၢ်လၢအကစီၤ ထီၣ်ဒိၣ်ဘၢကစၢၢ်ခဲလၢာ်န့ၣ်လီၤ. ပှၤကလုာ်တဖၣ်ကဟဲယွၤနုာ်လီၤဝဲဆူအအိၣ်,

³ ဒီးအပှၤဂီၢ်မုၢ်တဖၣ်ကစံးဝဲ, “မ်ပလဲၤထီၣ်သကိးဆူယွၤအကစၢၢ်, ဆူအံၣ်စရ့လးအကစၢ်ယွၤအတၢ်လုၢ်ဟံၣ်န့ၣ်တက့ၢ်. အဝဲကသိၣ်လိပှၤတၢ်လၢအဝဲသးအိၣ်လၢပကမၤအီၤ ဒီးပကလဲၤတၢ်လၢကျဲတဖၣ်လၢအဝဲဃုထၢတ့ၢ်ဝဲလီၤ. အဂ့ၢ်ဒ်အံၤ, ယွၤအတၢ်သိၣ်လိသီလိဟဲလၢ ဝ့ၢ်ယရူၤရှလ့ၣ် ဒီးလၢကစၢၢ်စံယိၣ်န့ၣ်အဝဲကတိၤတၢ်ဒီး အပှၤဂီၢ်မုၢ်လီၤ.”

⁴ အဝဲကမၤလိၤမၤဘၣ်တၢ်ဂ့ၢ်လိာ် ဘှီလိာ်လၢပှၤကလုာ်ဖးဒိၣ်တဖၣ်အကျါလီၤ. အဝဲသ့ၣ်ကပိာ်က့ၤအနးတဖၣ်ဆူထဲၣ်အကနၣ် ဒီးအဘီတဖၣ်ဆူဒီပဲာ်ဃိတၢ်တဖၣ်လီၤ. ပှၤကလုာ်တဖၣ်တလဲၤဒုးတၢ်ယၤတၢ်လၢၤဘၣ်, တကတဲာ်ကတီၤကဒီးအသးလၢတၢ်ဒုးသုးအဂီၢ်နီတစုလၢၤဘၣ်.

⁵ ခဲအံၤ, စီၤယၤကိာ်အစၢၤအသွဲၣ်သ့ၣ်ဧၢ, မ်ပလဲၤတၢ်လၢတၢ်ကပီၤလၢယွၤဟ့ၣ်လီၤပှၤအပူၤန့ၣ်တက့ၢ်.

တၢ်ပာ်ဒိၣ်ပာ်ထီသးကဘၣ်တၢ်မၤဟးဂီၤအီၤ

⁶ အိကစၢ်ယွၤဧၢ, နညိကွံာ်တ့ၢ်နပှၤဂီၢ်မုၢ်စီၤယၤကိာ်အစၢၤ အသွဲၣ်တဖၣ်လံ. ထံကီၢ်အံၤပှဲၤဝဲဒီးတၢ်မၤကဒါပှၤအမဲာ်အလုၢ် အလၢ်ဟဲလၢမုၢ်ထီၣ်ဒီးလၢကီၢ်ဖလ့ၡသးလီၤ. ပှၤဂီၢ်မုၢ်ပိာ်ထွဲ ပှၤတခီဘီမုၢ်အလုၢ်အလၢ်တဖၣ်န့ၣ်လီၤ.

⁷ အထံအကီၢ်ပှဲၤဝဲဒီးထူဒီးစ့ဒီးအတၢ်လုၢ်ဒိၣ်ပှ့ၤဒိၣ်တဖၣ် အကတၢၢ်ကတာ်တအိၣ်ဘၣ်. အထံအကီၢ်ပှဲၤဝဲဒီးကသ့ၣ်တဖၣ် ဒီးအလ့ၣ်ကဟၣ်တဖၣ်အကတၢၢ်ကတာ်တအိၣ်ဘၣ်.

⁸ အထံအကီၢ်ပှဲၤဝဲဒီးတၢ်ဂီၤတၢ်ဖီၣ်တဖၣ်ဒီးအဝဲသ့ၣ်ဘူၣ် ထီၣ်ဘါထီၣ်တၢ်တဖၣ်လၢမၤတ့ၢ်ဝဲလၢအစုဒၣ်ဝဲန့ၣ်လီၤ.

⁹ ပှၤကိးဂၤဒဲးကဘၣ်တၢ်ဆီၣ်လီၤအီၤဒီးမၤမဲာ်ဆှးအီၤလီၤ. ယွၤဧၢ, ပျၢ်အတၢ်ကမၣ်တက့ၢ်.

¹⁰ အဝဲသ့ၣ်ကအိၣ်ခူသူၣ်လၢလၢၢ်ကအိပူၤလၢလၢၢ်ကစၢၢ်တဖၣ် အကျါ, မ့တမ့ၢ်, ခူၣ်လီၤတၢ်ပူၤတဖၣ်လၢဟီၣ်ခိၣ်အပူၤလၢတၢ်ကျဲးစၢးဃ့ၢ်ပူၤဖျဲးကွံာ် အသးလၢယွၤအတၢ်သးဒိၣ်ထီၣ်ဒီးလၢတၢ်အိၣ်ခူသူၣ်လၢယွၤ အစိကမီၤဒီးအလၤကပီၤအဂီၢ်န့ၣ်လီၤ.

¹¹ မုၢ်တနံၤကဟဲဝဲဖဲပှၤကညီအတၢ်ပာ်ထီၣ်ထီသးကဘၣ်တၢ်မၤ ကတၢၢ်ကွံာ်အီၤဒီးပှၤကညီအတၢ်ပာ်ကဖိအသးကဟးဂီၤကွံာ်ဝဲလီၤ. အန့ၣ်ဒီးထဲယွၤတဂၤဧိၤကဘၣ်တၢ်ပာ်ထီၣ်ထီအီၤန့ၣ်လီၤ.

¹² လၢနံၤအဝဲန့ၣ်န့ၣ်, ယွၤသ့တၢ်လၢာ်ကဆီၣ် လီၤပှၤကိးဂၤဒဲးလၢအဂံၢ်ဆူၣ်ဘါဆူၣ်, ပှၤကိးဂၤဒဲးလၢအပာ် ထီၣ်ထီအသးဒီးပာ်ကဖၢလၢအသးလီၤ.

¹³ အဝဲကမၤဟးဂီၤကီၢ်လဘၤနိၣ်အသ့ၣ်ဆှိအ့ရ့းလၢအထီတဖၣ် ဒီးသ့ၣ်သ့ထိးဖၣ်ခဲလၢာ်လၢကီၢ်ဘၤၡၣ်အပူၤလီၤ.

¹⁴ အဝဲကမၤပၢၤကစၢၢ်ကလိလၢအထီၣ်ထီတဖၣ်ဒီးတၢ်လူၢ်ခိၣ် တဖၣ်,

¹⁵ ဒီးကယဲၢ်တၢးထီခဲလၢာ်ဒီးတိာ်ခဲလၢာ်အဒူၣ်တဖၣ်လီၤ.

¹⁶ အဝဲကမၤလီၤဘျၢကွံာ်ကဘီလၢအဒိၣ်ကတၢၢ်ဒီးအဃံလၤ ကတၢၢ်တဖၣ်ဒၣ်လဲာ်န့ၣ်လီၤ.

¹⁷ ပှၤကညီအတၢ်ပာ်ထီၣ်ထီအသးန့ၣ်ကဘၣ်တၢ်မၤကတၢၢ် ကွံာ်အီၤဒီးပှၤကညီအတၢ်ပာ်ကဖိအသးန့ၣ်ကဘၣ်တၢ်မၤဟး ဂီၤကွံာ်အီၤလီၤ.

¹⁸ တၢ်ဂီၤတၢ်ဖီၣ်တဖၣ်ကဟါမၢ်ကွံာ်ဝဲလၢာ်လၢာ်ဆ့ဆ့ဒီးထဲယွၤ တဂၤဧိၤကဘၣ်တၢ်ပာ်ထီၣ်ထီအီၤလၢမုၢ်နံၤအဝဲန့ၣ်, န့ၣ်လီၤ.

¹⁹ ပှၤကအိၣ်ခူသူၣ်လၢလၢၢ်ကအိပူၤလၢလၢၢ်ကစၢၢ်တဖၣ်အကျါ, မ့တမ့ၢ်, ခူၣ်လီၤတၢ်ပူၤတဖၣ်လၢဟီၣ်ခိၣ်အပူၤလၢတၢ်ကျဲးစၢး ဃ့ၢ်ပူၤဖျဲးကွံာ်အသးလၢယွၤအတၢ်သးဒိၣ်ထီၣ်ဒီးအိၣ်ခူသူၣ် လၢယွၤအစိကမီၤဒီးအလၤကပီၤဖဲအဟဲဝဲလၢကမၤဟူးဟီၣ်ခိၣ် အဂီၢ်လီၤ.

²⁰ ဖဲမုၢ်နံၤအဝဲန့ၣ်ဟဲလံဒီး, အဝဲသ့ၣ်ကစူးကွံာ်တၢ်ဂီၤထူတၢ် ဂီၤစ့တဖၣ်လၢအတ့တ့ၢ်ဝဲ, ဒီးပာ်လီၤတဲာ်ကွံာ်အီၤလၢဝံၤဒီးဘျါတဖၣ်အဂီၢ်လီၤ.

²¹ ဖဲယွၤဟဲဝဲလၢကမၤဟူးဟီၣ်ခိၣ်အဂီၢ်န့ၣ်, ပှၤဂီၢ်မုၢ်ကအိၣ်ခူသူၣ်လၢ တၢ်ပူၤတဖၣ်ဒီးလၢၢ်ကအိပူၤတဖၣ်လၢလၢၢ်ကစၢၢ်တဖၣ် အလိၤလၢတၢ်ကျဲးစၢးဃ့ၢ်ပူၤဖျဲးကွံာ်လၢယွၤအတၢ်သး ဒိၣ်ထီၣ်ဒီးအိၣ်ခူသူၣ်ဝဲလၢအဝဲအစိကမီၤဒီးအလၤကပီၤလီၤ.

²² ပာ်နတၢ်သန့ၤနသးလၢပှၤကညီလၢအသံသ့အံၤအပူၤလၢၤ တဂ့ၤ. အဝဲသ့ၣ်အလုၢ်အပှ့ၤမ့ၢ်မနုၤလဲၣ်.