လံာ်ဟိၤၡ့ 9 - Sgaw Karen Common Bible

စီၤဟိၤၡ့ဘိးဘၣ်သ့ၣ်ညါတၢ်စံၣ်ညီၣ် လၢကီၢ်အံၣ်စရ့လးအဂီၢ်

¹ ကီၢ်အံၣ်စရ့လးအပှၤဂီၢ်မုၢ်ဧၢ, ပာ်ကတီၢ်သု တၢ်မၤမူးမၤပွဲလၢအလီၤဂာ်ဒ်ပှၤဘါတၢ်ဂီၤတဖၣ်အသိးန့ၣ်တ က့ၢ်. သုဃၣ်ကပၤကွံာ်သုသးလၢသုကစၢ်ယွၤဒီးသု တသူၣ်တီသးရၤတ့ၢ်ဒီးအီၤဘၣ်. လၢကီၢ်ဒီဘ့ၣ်ညါအံၤသုဆါလီၤကွံာ်သုသးဒ် ပှၤဃဲသဲမုၣ်တဖၣ်အသိးဆူကစၢ်ဘဧၤလးအအိၣ်ဒီးသုအဲၣ်တ့ၢ် ဘုခ့လၢသုဆိကမိၣ်လၢအဝဲဟ့ၣ်သုလၢတၢ်ဘူးတၢ်လဲအဂီၢ်န့ၣ် လီၤ.

² ဘၣ်ဆၣ်တယံာ်ဘၣ်န့ၣ်ဘုခ့မ့ၢ်ဂ့ၤ, သ့ၣ်စၤယံးအသိမ့ၢ်ဂ့ၤတအိၣ် လၢၤလၢသုဂီၢ်လၢၤဘၣ်ဒီးစပံးထံတမ့ၢ်ကအိၣ်လၢၤဘၣ်.

³ ကီၢ်အံၣ်စရ့လးအပှၤဂီၢ်မုၢ်တအိၣ်တ့ၢ်ဘၣ်လၢယွၤအကီၢ် ပူၤလၢၤဘၣ်. မ့မ့ၢ်ကဘၣ်က့ၤကဒါက့ၤဆူကီၢ်အဲၤကူပတူးဒီးကဘၣ်အီၣ်တၢ်အီၣ် လၢတၢ်တြီအဝဲသ့ၣ်တဖၣ်လၢကဘၣ်ဟးဆှဲးဝဲလၢကီၢ်အၤၡူၢ်အပူၤ န့ၣ်လီၤ.

⁴ လၢတခီထံတခီကီၢ်တဖၣ်အပူၤန့ၣ်, အဝဲသ့ၣ်လုၢ်ထီၣ်အစပံးထံ အတၢ်လုၢ်တၢ်ပာ်တဖၣ်မ့ၢ်ဂ့ၤ, ဟဲစိာ်ဃီၤအတၢ်လုၢ်တၢ်ပာ်တ ဖၣ်မ့ၢ်ဂ့ၤဆူယွၤအအိၣ်တသ့လၢၤဘၣ်. အဝဲသ့ၣ်အတၢ်အီၣ်ကမၤတကဆှီဘၣ် ပှၤလၢအအီၣ်အီၤကိးဂၤဒဲးဒ်တၢ်အီၣ်လၢအဘၣ်တၢ်အီၣ်အီၤဖဲတၢ် သံတၢ်ပှၢ်အလီၢ်တဖၣ်အသိးန့ၣ်လီၤ. တၢ်န့ၣ်အဘျုးကအိၣ်ဒၣ်ထဲလၢကဒုးသးမံက့ၤပှၤလၢအတၢ်သၣ်ဝံၤ သၣ်စ့ၤန့ၣ်လီၤ. လဲၤစိာ်အီၤဆူယွၤအတၢ်လုၢ်ဟံၣ်အပူၤဒ်တၢ်လုၢ်တၢ်ပာ်အသိးတသ့ ဘၣ်နီတမံၤဘၣ်.

⁵ ဒီးဖဲတၢ်ဆၢကတီၢ်တုၤဝဲလၢဘူၣ်တဖၣ်လၢတၢ်ပာ်လီၤအီၤလၢတၢ် မၤလၤကပီၤယွၤအဂီၢ်တုၤဝဲန့ၣ်အဝဲသ့ၣ်ကမၤဒ်လဲၣ်.

⁶ ဖဲတၢ်တတၢးတနါဟဲတုၤဃီၤဝဲဒီးပှၤဂီၢ်မုၢ်တဖၣ်လီၤပြံပြါ ကွံာ်ဝဲန့ၣ်, ပှၤအဲၤကူပတူးဖိတဖၣ်ကပာ်ဖှိၣ်အဝဲသ့ၣ်, လၢကခူၣ်လီၤကွံာ်အဝဲသ့ၣ်ဖဲဝ့ၢ်မဲဖ့းအပူၤန့ၣ်လီၤ. အဝဲသ့ၣ်အတၢ်လုၢ်ဒိၣ်ပှ့ၤဒိၣ်တဖၣ်လၢစ့ဒီးတၢ်လီၢ် တၢ်ကျဲတဖၣ်ဖဲတဘျီအဝဲသ့ၣ်အဟံၣ်တဖၣ်သူၣ်ထီၣ်တ့ၢ်အ သးန့ၣ်နီၣ်ဧိၤမံၤဧိၤဒီးတၤဆှူၣ်တပှီာ်တဖၣ်ကဒိၣ်ဘၢကွံာ်အီၤ န့ၣ်လီၤ.

⁷ တၢ်ဆၢကတီၢ်လၢတၢ်စံၣ်ညီၣ်အဂီၢ်, တၢ်ဆၢကတီၢ်လၢပှၤဂီၢ်မုၢ်တဖၣ်ကဒိးန့ၢ်တၢ်လၢအကြၢးဒိးန့ၢ်ဘၣ် ဝဲန့ၣ်ဟဲတုၤလံ. ဖဲတၢ်န့ၣ်မၤအသးဒီးကီၢ်အံၣ်စရ့လးကသ့ၣ်ညါအီၤလီၤ. သုစံးလၢဝံတဂၤအံၤမ့ၢ်ပှၤဟးဂီၤဖိန့ၣ်လီၤ. ပှၤလၢယွၤဟ့ၣ်စိဟ့ၣ်ကမီၤအီၤတဂၤအံၤပျုၢ်လီၤ. သုပှၤဂီၢ်မုၢ်တဖၣ်သးဟ့ယၤနးနးကလဲာ်မ့ၢ်လၢသုတၢ်ဒဲးဘး န့ၣ်အါဝဲအဃိလီၤ.

⁸ ကစၢ်ယွၤမၢလီၤယၤဒ်ဝံတဂၤလၢအကဟ့ၣ်ပလီၢ်အပှၤဂီၢ်မုၢ်အံၣ်စရ့ လးအသိးန့ၣ်လီၤ. အန့ၣ်ဒၣ်လဲာ်, ဖဲယလဲၤတပူၤလၢ်လၢ်န့ၣ်သုပာ်လီၤပျံၤသကွီၤလၢ ယဂီၢ်ဒ်ထိၣ်တဘ့ၣ်အသိးန့ၣ်လီၤ. လၢကစၢ်ယွၤအတၢ်လုၢ်ဟံၣ်အပူၤဒၣ်လဲာ်ပှၤဂီၢ်မုၢ်တဖၣ်မ့ၢ်ဝဲဝံ အဒုၣ်အဒါတဖၣ်န့ၣ်လီၤ.

⁹ တၢ်လၢအဝဲသ့ၣ်မၤဝဲန့ၣ်မ့ၢ်ဒၣ်တၢ်အၢတၢ်သီလၢအတၢ်မုၢ်လၢ် တအိၣ်ဘၣ်ဒ်သိးဒၣ်လၢအဝဲသ့ၣ်အိၣ်တ့ၢ်လၢဝ့ၢ်ကံးဘဧးအခါန့ၣ် လီၤ. ကစၢ်ယွၤကသ့ၣ်နီၣ်ထီၣ်အဝဲသ့ၣ်အတၢ်ဒဲးဘးတဖၣ်ဒီးစံၣ်ညီၣ် အဝဲသ့ၣ်လၢတၢ်အံၤအဃိန့ၣ်လီၤ.

ကီၢ်အံၣ်စရ့လးအတၢ်ဒဲးဘး ဒီးတၢ်လၢအပိာ်ထွဲထီၣ်အခံတဖၣ်

¹⁰ ယွၤစံးဝဲဒၣ်, ဖဲယထံၣ်ကီၢ်အံၣ်စရ့လးအဆိကတၢၢ်အခါန့ၣ် လီၤဂာ်ဒ်တၢ်ထံၣ်န့ၢ်စပံးသၣ်တဖၣ်မဲထီၣ်လၢပှၢ် မုၢ်ကနၢအပူၤအသိးန့ၣ်လီၤ. ဖဲယထံၣ်ဘၣ်သုမိၢ်ပၢ်ဖံဖုလၢပျၢၤတဖၣ်အဆိကတၢၢ် အခါန့ၣ်, လီၤဂာ်ဒ်တၢ်ထံၣ်ဘၣ်သ့ၣ်ချၢၣ်ဒၢသၣ်အမံဆိလၢအဆၢကတီၢ်ဘၣ်ဝဲ အခါန့ၣ်လီၤ. ဘၣ်ဆၣ်တုၤအဝဲသ့ၣ်ဟဲဆူကစၢၢ်ဘဧၤလးပဧိၤန့ၣ်စး ထီၣ်ဘါထီၣ်သီဘဧၤလး, ဒီးတယံာ်ဘၣ်န့ၣ်မၤအသးလီၤသးဘၣ်အၢဒ် ယွၤတဖၣ်လၢအဝဲသ့ၣ်အဲၣ်ဝဲအသိးန့ၣ်လီၤ.

¹¹ ကီၢ်အံၣ်စရ့လးအတၢ်ဒိၣ်တၢ်မုၢ်ကယူၤကွံာ်ဒ်ထိၣ် တဘ့ၣ်အသိးဒီးဖိတဖၣ်တအိၣ်ဖျဲၣ်ထီၣ်လၢအဂီၢ်လၢၤဘၣ်. ပိာ်မုၣ်တဖၣ်တအိၣ်ဟုးအိၣ်သးထီၣ်လၢၤဘၣ်ဒီးဖိသၣ်တဖၣ် တဘၣ်တၢ်ဒၢထီၣ်အီၤလၢၤဘၣ်.

¹² ဘၣ်ဆၣ်အဝဲသ့ၣ်မ့ၢ်ဒုးဒိၣ်ထီၣ်ဖိသၣ်တဖၣ်ဒၣ်လဲာ်န့ၣ်, ယကဟံးန့ၢ်ကွံာ်အီၤဒီးတပာ်တ့ၢ်မူဒံးအီၤနီတဂၤဘၣ်. တုၤယစူးကွံာ်ညိကွံာ်ပှၤဂီၢ်မုၢ်အံၤန့ၣ်, တၢ်လီၤပျံၤလီၤဖုးတဖၣ်ကမၤအသးဒီးအဝဲသ့ၣ်န့ၣ်လီၤ.

¹³ ယွၤဧၢ, ယထံၣ်ဘၣ်အဝဲသ့ၣ်အဖိတဖၣ်ဘၣ်တၢ်လူၤခးဒီးမၤ သံကွံာ်အီၤန့ၣ်လီၤ.

¹⁴ ယကဘၣ်ဃ့နၤလၢနကဘၣ်မၤပှၤဂီၢ်မုၢ်အံၤဒ်လဲၣ်. မၤတူာ်ဖိအပှၤပိာ်မုၣ်တဖၣ်တက့ၢ်. မၤဒ်သိးအဝဲသ့ၣ်ဒုးအီၣ်အဖိဆံး တဖၣ်အနုၢ်ထံသုတသ့တဂ့ၤန့ၣ်တက့ၢ်.

ယွၤအတၢ်စံၣ်ညီၣ်လၢကီၢ်အံၣ်စရ့လးအဖီခိၣ်

¹⁵ ယွၤစံးဝဲဒၣ်, အဝဲသ့ၣ်အတၢ်အၢတၢ်သီခဲလၢာ်န့ၣ်စးထီၣ်အသးလၢဝ့ၢ်ကံး လကၤလးလီၤ. တၢ်န့ၣ်မ့ၢ်တၢ်လီၢ်ဖဲယစးထီၣ်သးဟ့ အဝဲသ့ၣ်လီၤ. ဒီးမ့ၢ်လၢတၢ်အၢလၢအဝဲသ့ၣ်မၤဝဲအဃိန့ၣ် ယကဒုးဟးထီၣ်ကွံာ်အီၤလၢယကီၢ်ပူၤန့ၣ်လီၤ. ယတအဲၣ်လၢၤအဝဲသ့ၣ်နီတစုဘၣ်. အဝဲသ့ၣ်အပှၤခိၣ်ပှၤနၢ်တဖၣ်ခဲလၢာ်ပူထီၣ်ထီဒါယၤန့ၣ်လီၤ.

¹⁶ ကီၢ်အံၣ်စရ့လးအပှၤဂီၢ်မုၢ်အံၤလီၤဂာ်ဒ်တၢ်မုၢ်တမုၢ်လၢ အဂံၢ်တဖၣ်ဃ့ထီကွံာ်ဝဲဒီးတသၣ်ထီၣ်နီတဖျၢၣ်ဘၣ်အသိး န့ၣ်လီၤ. အဝဲသ့ၣ်တအိၣ်ဒီးအဖိတဖၣ်ဘၣ်. ဒီးမ့ၢ်အိၣ်ဒၣ်လဲာ်န့ၣ်ယကမၤသံကွံာ်အဖိတဖၣ်လၢအအဲၣ်ဝဲဒိၣ် မးန့ၣ်လီၤ.

ဝံကတိၤတၢ်ဘၣ်ထွဲဒီးကီၢ်အံၣ်စရ့လး

¹⁷ ကစၢ်ယွၤလၢယမၤအတၢ်န့ၣ်ကစူးကွံာ်ညိကွံာ်အပှၤဂီၢ်မုၢ်, မ့ၢ်လၢအဝဲသ့ၣ်တဒိကနၣ်အီၤအဃိန့ၣ်လီၤ. အဝဲသ့ၣ်ကကဲထီၣ်ပှၤဟးဝ့ၤဝီၤတဖၣ်လၢပှၤကလုာ်တဖၣ်အကျါန့ၣ် လီၤ.