ဧ့ၤဘြံၤ 5 - Sgaw Karen Common Bible

¹ ပှၤလုၢ်တၢ်အခိၣ်အဒိၣ်ကတၢၢ်ကိးဂၤဒဲးဘၣ်တၢ်ဃုထၢထီၣ် အီၤလၢပှၤဂီၢ်မုၢ်အကျါဒီးဘၣ်တၢ်ပာ်လီၤအီၤလၢကမၤကစၢ်ယွၤ အတၢ်မၤလၢပှၤဂီၢ်မုၢ်အခၢၣ်စးလၢအကလုၢ်ထီၣ်တၢ်မၤဘူၣ် ဒီးတၢ်လုၢ်လၢတၢ်ဒဲးဘးတဖၣ်အဂီၢ်လီၤ.

² ဒ်အနီၢ်ကစၢ်ဒၣ်ဝဲအိၣ်ဒီးတၢ်ဂံၢ်စၢ်ဘါစၢ်လၢကျဲအါဘိအပူၤ အသိး, အဝဲဘၣ်ထွဲဒီးပှၤလၢအတသ့ၣ်ညါတၢ်ဒီးပှၤလၢအမၤ ကမၣ်တၢ်တဖၣ်န့ၣ်လၢတၢ်သးအိၣ်အပူၤသ့ဝဲန့ၣ်လီၤ.

³ ဒီးမ့ၢ်လၢအနီၢ်ကစၢ်ဒၣ်ဝဲအိၣ်ဒီးတၢ်ဂံၢ်စၢ်ဘါစၢ်အဃိ, အဝဲဒၣ်ဘၣ်လုၢ်ထီၣ်တၢ်လုၢ်တမ့ၢ်ထဲလၢပှၤဂီၢ်မုၢ်အတၢ် ဒဲးဘးအဂီၢ်ဧိၤဘၣ်. မ့ၢ်လၢအနီၢ်ကစၢ်ဒၣ်ဝဲအတၢ်ဒဲးဘး အဂီၢ်စ့ၢ်ကီးလီၤ.

⁴ တၢ်လၤကပီၤဘၣ်ဃးဒီးတၢ်ကဲထီၣ်ပှၤလုၢ်တၢ်အခိၣ်အဒိၣ် ကတၢၢ်အံၤပှၤလၢအဃုထၢန့ၢ်အီၤလၢအဂီၢ်ဒၣ်ဝဲတအိၣ်နီ တဂၤဘၣ်. မ့ၢ်ဒၣ်တၢ်လၢအဟဲခီဖျိကစၢ်ယွၤအတၢ်ကိးဒ် တၢ်ကိးန့ၢ်စီၤအၤဟရိၣ်အသိးန့ၣ်လီၤ.

⁵ ဒ်န့ၣ်အသိး, ခရံာ်တမၤလၤကပီၤလီၤက့ၤအသးဒၣ်ဝဲလၢ ကကဲထီၣ်ပှၤလုၢ်တၢ်အခိၣ်အဒိၣ်ကတၢၢ်လၢအဂီၢ်ဒၣ်ဝဲန့ၣ်ဘၣ်. အခိၣ်တလိာ်ကစၢ်ယွၤစံးဘၣ်အီၤ, “နမ့ၢ်ယဖိခွါ, တနံၤအံၤယထီၣ်ဖိလံနၤလံ”

⁶ စံးစ့ၢ်ကီးဝဲလၢတၢ်လီၢ်အဂၤတတီၤ, “နကမ့ၢ်ပှၤလုၢ်တၢ်အခိၣ်လီၤစိၤလီၤထီ, လၢအမ့ၢ်တကလုာ်ဃီဒီးစီၤမၤလကံစဒ့းန့ၣ်လီၤ.”

⁷ ဖဲယ့ၣ်ၡူးခရံာ်အိၣ်ဒံးလၢဟီၣ်ခိၣ်ချၢအကတီၢ်န့ၣ်အဝဲဒၣ် လုၢ်ထီၣ်အတၢ်ထုကဖၣ်ဒီးအတၢ်သကွံၢ်ကညးတဖၣ်လၢ အကလုၢ်ဖးဒိၣ်အိၣ်ဒီးတၢ်မဲာ်ထံမဲာ်နိဆူကစၢ်ယွၤလၢ အမၤပူၤဖျဲးထီၣ်အီၤလၢတၢ်သံအပူၤသ့ဝဲတဂၤအအိၣ် န့ၣ်လီၤ. ယွၤဒိကနၣ်အီၤမ့ၢ်လၢအတၢ်အဲၣ်ကစၢ်ယွၤပျံၤ ကစၢ်ယွၤအဃိလီၤ.

⁸ အဝဲမ့ၢ်ကစၢ်ယွၤအဖိခွါဘၣ်ဆၣ်ခီဖျိအတၢ်နးတၢ်ဖှီၣ်န့ၣ် အဝဲမၤလိန့ၢ်တၢ်ဒိကနၣ်လီၤ.

⁹ တုၤအဝဲဒၣ်လၢထီၣ်ပှဲၤထီၣ်ဝဲဒီးကဲထီၣ်လၢတၢ်အုၣ်က့ၤ ခီၣ်က့ၤအထူအယိာ်အကစၢ်လၢပှၤခဲလၢာ်လၢအစူၢ်အီၤ တဖၣ်အဂီၢ်.

¹⁰ ဒီးကစၢ်ယွၤပာ်ထီၣ်အီၤလၢပှၤလုၢ်တၢ်အခိၣ်အဒိၣ်ကတၢၢ် အလီၢ်တကလုာ်ဃီဒီးစီၤမၤလကံစဒ့းန့ၣ်လီၤ.

တၢ်ဟ့ၣ်ပလီၢ်ထီဒါတၢ်စူးကွံာ်ညိကွံာ် တၢ်စူၢ်တၢ်နာ်

¹¹ ဘၣ်ဃးတၢ်ဂ့ၢ်အံၤတၢ်လၢပကဘၣ်တဲဘၣ်သုအိၣ်အါမးလီၤ. ဘၣ်ဆၣ်မ့ၢ်လၢသုနူၤဃၢနၢ်ဃၢအဃိ, ပကတဲနၢ်ပၢၢ်သုမ့ၢ် တၢ်ကီဝဲလီၤ.

¹² နီၢ်နီၢ်တခီ, တုၤလၢဆၢကတီၢ်ခဲအံၤန့ၣ်သုဂ့ၤကဲထီၣ်တ့ၢ်လံ သရၣ်တဖၣ်လံ. မ့ၢ်နာ်သက့ဒ်န့ၣ်ဒီး သုလိၣ်ဘၣ်ဒံးပှၤလၢအကသိၣ်လိသုလၢကစၢ်ယွၤ အကလုၢ်ကထါကစၢ်အခီၣ်ထံးခီၣ်ဘိကဒီးန့ၣ်လီၤ. လၢသုဘၣ်အီၣ်တၢ်အသံးအကာ်အလီၢ်န့ၣ်သုဘၣ်အီ ဒံးဒၣ်တၢ်နုၢ်ထံလီၤ.

¹³ အဂ့ၢ်ဒ်အံၤ, ကယဲၢ်ပှၤလၢအဘၣ်အီဒံးဒၣ်တၢ်နုၢ်ထံတဖၣ် န့ၣ်မ့ၢ်ဒံးဒၣ်ပှၤဖိသၣ်တဂၤလၢတအိၣ်ဒံးဒီးတၢ်လဲၤခီဖျိလၢ ကနီၤဖးပဲာ်ဖးတၢ်ဂ့ၢ်အဘၣ်ဒီးအကမၣ်ဘၣ်န့ၣ်လီၤ.

¹⁴ ဘၣ်ဆၣ်ဒီးတၢ်အသံးအကာ်မ့ၢ်လၢပှၤဒိၣ်တုာ်ခိၣ်ပှဲၤ အဂီၢ်, ပှၤလၢအအိၣ်ကတဲာ်ကတီၤတ့ၢ်လံအသးခီဖျိ အပဲာ်ဖးနီၤဖးညီနုၢ်တၢ်ဂ့ၤဒီးတၢ်အၢအဆၢန့ၣ်လီၤ.