ဧ့ၤဘြံၤ 2 - Sgaw Karen Common Bible

တၢ်အုၣ်က့ၤခီၣ်က့ၤဖးဒိၣ်

¹ လၢတၢ်န့ၣ်အဃိပကဘၣ်ဟံးဃာ်တၢ်မ့ၢ်တၢ်တီလၢပနၢ်ဟူ တ့ၢ်လံတဖၣ်ကျၢၤန့ၢ်အလီၢ်တက့ၢ်ဒ်သိးဒီးပသုတဘၣ် တၢ်စိာ်ကွံာ်ပှၤတဂ့ၤအဂီၢ်န့ၣ်လီၤ.

² တၢ်ကစီၣ်လၢကလူးတဖၣ်ဟ့ၣ်လီၤပမိၢ်ပၢ်ဖံဖုလၢပျၢၤ တဖၣ်မ့ၢ်တၢ်လၢအတီဒီးပှၤတဂၤလၢ်လၢ်လၢအတစူၢ်ဒီး ဒိကနၣ်အီၤတဖၣ်ဘၣ်တၢ်စံၣ်ညီၣ်အီၤဒ်အကြၢးအဘၣ်ဝဲ အသိးန့ၣ်လီၤ.

³ မ့မ့ၢ်ဒ်န့ၣ်ဒီးပမ့ၢ်တပာ်ဒိၣ်ပာ်ကဲတၢ်အုၣ်က့ၤခီၣ်က့ၤ လၢအဒိၣ်ထဲထဲအံၤန့ၣ်ပကပူၤဖျဲးပဝဲဒ်လဲၣ်. ကစၢ်အနီၢ်ကစၢ်ဒၣ်ဝဲဘိးဘၣ်သ့ၣ်ညါပှၤအဆိကတၢၢ် လၢတၢ်အုၣ်က့ၤခီၣ်က့ၤအံၤအဂ့ၢ်ဒီးပှၤလၢအနၢ်ဟူတ့ၢ် အဝဲအတၢ်ကတိၤတဖၣ်စံးဘၣ်တဲဘၣ်ပှၤဒီးအုၣ်အသး လၢအမ့ၢ်ဝဲတီဝဲလီၤ.

⁴ တဘျီဃီကစၢ်ယွၤစ့ၢ်ကီးအုၣ်အသးခီဖျိတၢ်ပနီၣ်လီၤလး တဖၣ်, တၢ်လီၤကမၢကမၣ်တဖၣ်ဒီးတၢ်လီၤလးအတၢ်မၤ အကလုာ်ကလုာ်ဒီးခီဖျိအဟ့ၣ်နီၤသးစီဆှံအတၢ်ဟ့ၣ်ဒ် အသးဒၣ်ဝဲအသိးန့ၣ်လီၤ.

ခိၣ်နၢ်လၢအဆှၢပှၤဆူတၢ်အုၣ်က့ၤခီၣ်က့ၤ

⁵ ကစၢ်ယွၤတပာ်ဘၣ်ကလူးတဖၣ်လၢအကပၢဟီၣ်ခိၣ် အသီလၢအကဟဲ, ဟီၣ်ခိၣ်လၢပစံးတ့ၢ်လၢအဂ့ၢ်န့ၣ်ဘၣ်.

⁶ မ့မ့ၢ်ဒ်တၢ်စံးတ့ၢ်ဝဲလၢတၢ်ကွဲးအသးစီဆှံတတီၤအပူၤအသိး, “ပှၤဟီၣ်ခိၣ်ဖိမ့ၢ်တၢ်မနုၤလၢ နဘၣ်ဆိကမိၣ်ထီၣ်အဂ့ၢ်လဲၣ်. ပှၤဟီၣ်ခိၣ်ဖိမ့ၢ်တၢ်မနုၤလၢ နဘၣ်သူၣ်အိၣ်သးအိၣ်အီၤန့ၣ်လဲၣ်.

⁷ လၢတစိၢ်တလီၢ်အတီၢ်ပူၤန့ၣ် နပာ်န့ၢ်အလီၢ်ဖုၣ်န့ၢ်ကလူးတဖၣ်, နကုာ်ထီၣ်အီၤလၢတၢ်လၤကပီၤ ဒီးတၢ်ကဟုကညီၢ်,

⁸ နဒုးပၢအီၤလၢတၢ်ခဲလၢာ်လီၤ. ဒီးလၢနတၢ်ဒုးပၢအီၤလၢတၢ်ခဲလၢာ်န့ၣ်, နတပာ်တ့ၢ်တၢ်လၢအတပၢဘၣ်ဝဲနီတမံၤဘၣ်.” နာ်သက့အခဲအံၤပတထံၣ်ဘၣ်ပှၤကညီပၢတၢ်ခဲလၢာ်ဘၣ်.

⁹ မ့မ့ၢ်ပထံၣ်ယ့ၣ်ၡူး, လၢအဘၣ်တၢ်ပာ်အလီၢ်ဖုၣ်န့ၢ်ကလူးတဖၣ် တစိၢ်တလီၢ်, ဒ်သိးခီဖျိကစၢ်ယွၤအဘျုးအဖှိၣ်န့ၣ်အဝဲကဘၣ် သံဝဲလၢပှၤကိးဂၤဒဲးအဂီၢ်လီၤ. ပထံၣ်အီၤခဲအံၤဘၣ်တၢ်ကုာ်ထီၣ်အီၤလၢတၢ်လၤကပီၤဒီး တၢ်ကဟုကညီၢ်လၢအဝဲတူၢ်သံအသးအဃိလီၤ.

¹⁰ မ့ၢ်တၢ်အဂ့ၤဒီးကြၢးဝဲလၢကစၢ်ယွၤ, ပှၤလၢတၢ်ခဲလၢာ်မ့ၢ်လၢ အဂီၢ်ဒီးတၢ်ခဲလၢာ်ကဲထီၣ်လၢအီၤတဂၤန့ၣ်, ကမၤလၢပှဲၤတၢ်အခိၣ်လၢအဝဲသ့ၣ်အတၢ်အုၣ်က့ၤခီၣ်က့ၤအဂီၢ် တဂၤ, ခီဖျိတၢ်တူၢ်တၢ်ဒ်သိးဒီးကစၢ်ယွၤအဖိခွါအါဂၤကဒိး န့ၢ်ဘၣ်အလၤအကပီၤအဂီၢ်လီၤ.

¹¹ ပှၤလၢအမၤစီထီၣ်ဆှံထီၣ်ပှၤတဖၣ်လၢအတၢ်ဒဲးဘးဒီး ပှၤလၢအဘၣ်တၢ်မၤစီထီၣ်ဆှံထီၣ်အီၤတဖၣ်အိၣ်ဒီးပၢ်တဂၤ ဃီလီၤ. လၢတၢ်န့ၣ်အဃိယ့ၣ်ၡူးအမဲာ်တဆှးဘၣ်လၢကကိး အဝဲသ့ၣ်လၢဒီပုၢ်ဝဲၢ်ဘၣ်.

¹² ဒီးစံးဝဲဒၣ်, “ယကဘိးဘၣ်သ့ၣ်ညါယဒီပုၢ်ဝဲၢ်သ့ၣ်တဖၣ်လၢနမံၤ ဒီးလၢအဝဲသ့ၣ်အတၢ်အိၣ်ဖှိၣ်အပူၤန့ၣ် ယကစံးထီၣ်ပတြၢၤနၤလီၤ.”

¹³ စံးစ့ၢ်ကီးဝဲ, “ယကနာ်ကစၢ်ယွၤလီၤ” စံးကဒီးဝဲ, “ယအိၣ်ယဲဒီးဖိတဖၣ်လၢကစၢ်ယွၤဟ့ၣ်လီၤယၤလီၤ.”

¹⁴ ဒ်အကိးဝဲအသိး, ဖိတဖၣ်အံၤမ့ၢ်ပှၤဘၣ်ဃးဒီးနီၢ်ခိနီၢ်ခီလၢဖံး လၢညၣ်သတးဒီးယ့ၣ်ၡူးအနီၢ်ကစၢ်ဒၣ်ဝဲဟံးန့ၢ်ပှၤဟီၣ်ခိၣ်ဖိ အက့ၢ်အဂီၤအန့ဆၢၣ်လီၤ. မၤဝဲဒ်အံၤမ့ၢ်ဒ်သိးဒီးခီဖျိအတၢ် သံန့ၣ်, ကမၤဟးဂီၤကွံာ်ပှၤလၢအအိၣ်ဒီးတၢ်စိတၢ်ကမီၤလၢ တၢ်သံအဖီခိၣ်တဂၤဒ်ပစံးတၢ်အသိးမုၣ်ကီၤလံၢ်,

¹⁵ ဒီးမၤထူၣ်ဖျဲးထီၣ်ကွံာ်ပှၤဘၣ်တၢ်စၢဃာ်အီၤတစိၤသးလၢ အပျံၤတၢ်သံအဃိတဖၣ်န့ၣ်ခဲလၢာ်လီၤ.

¹⁶ ဖျါဆှံဂ့ၤမးလၢအဝဲဒၣ်တမၤတၢ်လၢကလူးတဖၣ်အဂီၢ် ဘၣ်, မ့မ့ၢ်မၤတၢ်လၢစီၤအၤဘြၤဟၣ်အစၢၤအသွဲၣ်တဖၣ် အဂီၢ်တခီလီၤ.

¹⁷ လၢတၢ်န့ၣ်အဃိအဝဲဘၣ်ကဲထီၣ်ဒ်အဒီပုၢ်ဝဲၢ်တဖၣ်အသိး လၢတၢ်ကိးမံၤဒဲးအပူၤဒ်သိးလၢအတၢ်မၤကစၢ်ယွၤအတၢ်မၤ အပူၤန့ၣ်ကမ့ၢ်ပှၤလုၢ်တၢ်အခိၣ်အဒိၣ်ကတၢၢ်လၢအသူၣ် ကညီၤသးကညီၤတၢ်ဒီးအကလုၢ်တီဝဲတဂၤသတးဒီးကမၤ ပူၤဖျဲးတၢ်လၢပှၤကညီအတၢ်ဒဲးဘးအဂီၢ်န့ၣ်လီၤ.

¹⁸ အဂ့ၢ်ဒ်အံၤ, ဒ်အဝဲအနီၢ်ကစၢ်ဒၣ်ဝဲတူၢ်ဘၣ်တၢ်ဒီးဘၣ်တၢ်လ့ ပစီတ့ၢ်လံအီၤအသိးန့ၣ်, မၤစၢၤပှၤလၢအဘၣ်တၢ်လ့ပစီ အီၤတဖၣ်သ့ဝဲလီၤ.