ဧ့ၤဘြံၤ 10 - Sgaw Karen Common Bible1 အဂ့ၢ်ဒ်အံၤ, ပှၤယူဒၤဖိအတၢ်သိၣ်တၢ်သီတမ့ၢ်ဘၣ်တၢ်နီၢ်နီၢ် လၢအကဟဲဝဲတဖၣ်အက့ၢ်အဂီၤလၢအမ့ၢ်အတီန့ၣ်ဘၣ်. မ့ၢ်ဒၣ်တၢ်နီၢ်နီၢ်န့ၣ်အကဒုန့ၣ်လီၤ. တၢ်လုၢ်တၢ်ပာ်တမံၤဃီဘၣ်တၢ်လုၢ်ထီၣ်ပာ်ထီၣ်အီၤထီဘိ တနံၣ်ဘၣ်တနံၣ်န့ၣ်လီၤ. လၢတၢ်န့ၣ်အဃိတၢ်သိၣ်တၢ်သီအံၤမၤလၢပှဲၤပှၤလၢအဟဲဆူ အအိၣ်တဖၣ်ခီဖျိတၢ်လုၢ်တၢ်ပာ်တဖၣ်အံၤကသ့ဝဲဒ်လဲၣ်. 2 ပှၤတဖၣ်လၢအဟဲဘူၣ်ထီၣ်ဘါထီၣ်ကစၢ်ယွၤမ့ၢ်ဘၣ်တၢ်သ့စီ မၤကဆှီထီၣ်တ့ၢ်အီၤလၢအတၢ်ဒဲးဘးတဖၣ်ဒီး, တမ့ၢ်လၢအသးကဘၣ်တံာ်တာ်ဒံးဝဲလၢအတၢ်ဒဲးဘး အဃိဘၣ်ဒီးတၢ်လုၢ်တၢ်ပာ်ခဲလၢာ်ကဘၣ်တၢ်ဆိကတီၢ် တ့ၢ်လံဝဲန့ၣ်လီၤ. 3 မ့မ့ၢ်တၢ်လုၢ်တၢ်ပာ်တဖၣ်အံၤကဲဝဲတၢ်လၢအဒုးသ့ၣ်နီၣ် ထီၣ်က့ၤပှၤလၢပှၤအတၢ်ဒဲးဘးတဖၣ်တနံၣ်ဘၣ်တနံၣ်လီၤ. 4 အဂ့ၢ်ဒ်အံၤဂီၤဖံးဖါဒီးမဲာ်တဲးလဲးတဖၣ်အသွံၣ်ဟံးထီၣ်ကွံာ်ပှၤ အတၢ်ဒဲးဘးတဖၣ်တသ့နီတဘျီဘၣ်. 5 လၢတၢ်အံၤအဃိဖဲခရံာ်ကဟဲလီၤဆူဟီၣ်ခိၣ်ချၢန့ၣ်စံးဝဲဒၣ်, “နတသးလီဘၣ်တၢ်လုၢ်တၢ်ပာ်ဒီး တၢ်မၤဘူၣ်တဖၣ်ဘၣ်. မ့မ့ၢ်နကတဲာ်ကတီၤန့ၢ်နီၢ်ခိလၢယဂီၢ်လီၤ. 6 တဘၣ်နသးလၢတၢ်ဆိၣ်ကဲၤဒီဒု ဒီးတၢ်လုၢ်တၢ်ဒဲးဘးန့ၣ်ဘၣ်. 7 လၢတၢ်န့ၣ်အဃိယစံးယဲ, ‘ကွၢ်ကွၢ်ကစၢ်ယွၤဧၢ, ယဟဲယဲဒ်သိးယကမၤတၢ်ဘၣ်နသး ဒ်တၢ်ကွဲးအသးလၢလံာ်တၢ်သိၣ်တၢ်သီ အလံာ်ထူပူၤအသိးန့ၣ်လီၤ.’ ” 8 ဖဲအစံးဝဲဒ်လၢထးအသိး, “နတသးလီဘၣ်တၢ်လုၢ်တၢ်ပာ်ဒီးတၢ်မၤဘူၣ်မၤတီၢ်ဘၣ်ဒီး တဘၣ်ဘၣ်နသးလၢတၢ်လုၢ်ဆိၣ်ကဲၤဒီဒုဒီးတၢ်လုၢ်တၢ်ဒဲးဘး ဘၣ်.” အကတီၢ်န့ၣ်, တၢ်သ့ၣ်တဖၣ်အံၤဘၣ်တၢ်လုၢ်ထီၣ်အီၤဒ်တၢ်သိၣ်တၢ်သီအသိး, 9 ဒီးစံးကဒီးဝဲ, “ကွၢ်ကွၢ်ယဟဲယဲဒ်သိးယကမၤတၢ်ဘၣ်နသး န့ၣ်လီၤ.” အဝဲဒၣ်ပာ်ကွံာ်တၢ်အခီၣ်ထံးတမံၤဒ်သိးဒီး အကပာ်ဂၢၢ်ပာ်ကျၢၤတၢ်ခံမံၤတမံၤန့ၣ်လီၤ. 10 ဒီးလၢတၢ်ဘၣ်ကစၢ်ယွၤအသးအံၤအဃိ, ပဘၣ်တၢ်မၤစီထီၣ်ဆှံထီၣ်ပှၤခီဖျိယ့ၣ်ၡူးခရံာ်အတၢ်လုၢ်ထီၣ် အနီၢ်ခိထဲတဘျီဧိၤန့ၣ်လီၤ. 11 ပှၤယူဒၤဖိအပှၤလုၢ်တၢ်အခိၣ်မၤအတၢ်မၤကိးနံၤဒဲးဒီးလုၢ်ထီၣ် တၢ်လုၢ်တၢ်ပာ်တမံၤဃီအဘျီတဖၣ်အဘျီဘၣ်ဆၣ်ဒီး တၢ်လုၢ်တၢ်ပာ်တဖၣ်အံၤဟံးထီၣ်ကွံာ်တၢ်ဒဲးဘးတဖၣ် တသ့ဘၣ်. 12 မ့မ့ၢ်ခရံာ်လုၢ်ထီၣ်တၢ်လုၢ်တမံၤလၢတၢ်လုၢ်တၢ်ဒဲးဘးအဂီၢ်, တၢ်လုၢ်တမံၤလၢအဒုးကဲထီၣ်တၢ်ဘျုးလီၤထူလီၤယိာ်, ဝံၤဒီးဆ့ၣ်နီၤဝဲလၢ ကစၢ်ယွၤအစုထွဲတခီလီၤ. 13 ဖဲန့ၣ်အိၣ်ခိးဝဲဒၣ်တုၤယွၤပာ်လီၤအဒုၣ်အဒါတဖၣ် လၢအခီၣ်ယီၢ်အလီၢ်တစုန့ၣ်လီၤ. 14 အဂ့ၢ်ဒ်အံၤခီဖျိတၢ်လုၢ်ထီၣ်ပာ်ထီၣ်တဘျီဧိၤန့ၣ်အဝဲဒၣ် မၤလၢထီၣ်ပှဲၤထီၣ်လံပှၤလၢအဘၣ်တၢ်မၤစီဆှံအီၤ တဖၣ်န့ၣ်လံ. 15 ဒီးသးစီဆှံအုၣ်အသးလၢအဂ့ၢ်လၢပဂီၢ်စ့ၢ်ကီးလီၤ. အဝဲစံးတ့ၢ်ဝဲ, 16 “အအံၤမ့ၢ်တၢ်အၢၣ်လီၤအီလီၤလၢ ယကမၤဒီးအဝဲသ့ၣ် လၢမုၢ်နံၤလၢအကဟဲတဖၣ်, ကစၢ်စံးဝဲဒၣ်, ယကဒၢနုာ်ယတၢ်သိၣ်တၢ်သီတဖၣ်လၢ အဝဲသ့ၣ်အသးကံၢ်ပူၤ, ဒီးကွဲးအီၤလၢအဝဲသ့ၣ်အခိၣ်နူာ်အလိၤလီၤ.” 17 စံးကဒီးဝဲ, “ယတသ့ၣ်နီၣ်ထီၣ်အဝဲသ့ၣ်အတၢ်ဒဲးဘးတဖၣ် ဒီးအတၢ်မၤအအၢအသီတဖၣ်လၢၤဘၣ်.” 18 ဖဲတၢ်ပျၢ်ကွံာ်တၢ်တဖၣ်အံၤအိၣ်ဝဲန့ၣ်တၢ်လုၢ်တၢ်ပာ်လၢတၢ်ဒဲးဘး အဂီၢ်အလီၢ်တအိၣ်လၢၤဘၣ်. မ်ပသုးဘူးပသးဆူကစၢ်ယွၤအအိၣ် 19 လၢတၢ်န့ၣ်အဃိယဒီပုၢ်ဝဲၢ်သ့ၣ်ဧၢ, ပအိၣ်ဒီးတၢ်သဘျ့အလၢအပှဲၤလၢပကလဲၤနုာ်ဘၣ်ဆူတၢ်လီၢ် စီဆှံကတၢၢ်အပူၤခီဖျိယ့ၣ်ၡူးအတၢ်သံန့ၣ်လီၤ. 20 ခီဖျိအကစၢ်ဒၣ်ဝဲအနီၢ်ခိန့ၣ်အဝဲဒၣ်အိးထီၣ်န့ၢ်ပှၤတၢ်မူအကျဲ အသီတဘိလၢအလဲၤဖျိကွံာ်ယၣ်ဘျးသဒၢန့ၣ်လီၤ. 21 ပအိၣ်ဒီးပှၤလုၢ်တၢ်အခိၣ်ဖးဒိၣ်တဂၤလၢကစၢ်ယွၤအဟံၣ် အဖီခိၣ်သတးဒီး, 22 မ်ပသုးဘူးပသးဆူကစၢ်ယွၤအအိၣ်လၢသးလၢအမ့ၢ်အတီ အပူၤအိၣ်ဒီးတၢ်နာ်အဂၢၢ်အကျၢၤ, သးလၢအဘၣ်တၢ်မၤ ကဆှီထီၣ်အီၤလၢတၢ်ပာ်ဒ့ၣ်ပာ်ကမၢ်လီၤက့ၤအသး, ဒီးနီၢ်ခိလၢအဘၣ်တၢ်သ့စီအီၤလၢထံအဆှံန့ၣ်တက့ၢ်. 23 မ်ပဟံးဃာ်ပတၢ်မုၢ်လၢ်လၢပအၢၣ်လီၤအီလီၤ, ပူၤဖျဲးဒီး တၢ်သးဒ့ဒီတက့ၢ်. အဂ့ၢ်ဒ်အံၤ, ပှၤလၢအစံးပာ်တၢ်တဂၤမ့ၢ်ပှၤလၢအကလုၢ်တီဝဲလီၤ. 24 မ်ပကွၢ်တၢ်လၢတဂၤဒီးတဂၤအဂီၢ်ဒီးထိၣ်ဂဲၤလိာ်ပသးဒ်သိး ပကအိၣ်ဒီးတၢ်အဲၣ်တၢ်ကွံဒီးတၢ်မၤဂ့ၤတၢ်န့ၣ်တက့ၢ်. 25 မ်ပသုတဟးဆှဲးတၢ်ပာ်ဖှိၣ်ရိဖှိၣ်ထီၣ်ပသးဒ်ပှၤတနီၤမၤဝဲ အသိးန့ၣ်တဂ့ၤ. မ့မ့ၢ်, မ်ပသဆၣ်ထီၣ်လိာ်ပခံဒီးပဒံးထံၣ်လၢကစၢ်အမုၢ်တနံၤဒံးဘူး ထီၣ်ဝဲန့ၣ်မ်ပဟ့ၣ်ဂံၢ်ဟ့ၣ်ဘါလိာ်ပသးဒံးအါထီၣ်တက့ၢ်. 26 အဂ့ၢ်ဒ်အံၤ, ပတူၢ်လိာ်ဒိးန့ၢ်တၢ်မ့ၢ်တၢ်တီဝံၤအလီၢ်ခံ, ပမ့ၢ်မၤတၢ်ဒဲးဘးလၢတၢ်လူၤဘၣ်ပသးအပူၤန့ၣ်, တၢ်လုၢ်လၢပတၢ်ဒဲးဘးအဂီၢ်တအိၣ်လၢၤဘၣ်. 27 မ့မ့ၢ်အိၣ်တ့ၢ်ဒၣ်ထဲတၢ်အိၣ်ခိးကွၢ်လၢ်, လၢတၢ်ပျံၤတၢ်ဖုးအပူၤ, တၢ်စံၣ်ညီၣ်လၢအကဟဲဝဲဒီးမ့ၣ်အူဖးဒိၣ်လၢအကအီၣ်ကွံာ် ကစၢ်ယွၤအဒုၣ်အဒါတဖၣ်န့ၣ်လီၤ. 28 ပှၤတဂၤဂၤလၢ, ဖဲပှၤခံဂၤသၢဂၤအုၣ်အသးလၢအလုၣ် သ့ၣ်ခါပတာ်စီၤမိၤၡ့အတၢ်သိၣ်တၢ်သီန့ၣ်, ဘၣ်တၢ်မၤသံကွံာ်အီၤတအိၣ်ဒီးတၢ်သးကညီၤအီၤဘၣ်လီၤ. 29 မ့မ့ၢ်ဒ်န့ၣ်ဒီးပှၤလၢအကွၢ်တလီၤကစၢ်ယွၤအဖိခွါ, ဒီးတပာ်လုၢ်ပာ်ပှ့ၤဘၣ်ကစၢ်ယွၤအတၢ်အၢၣ်လီၤအီလီၤလၢ အမ့ၢ်ယ့ၣ်ၡူးခရံာ်အသွံၣ်လၢအမၤကဆှီထီၣ်အီၤလၢအတၢ် ဒဲးဘး, ဒီးကတိၤဒုၣ်ဒွဲၣ်ယွၤအသးလၢအလၢပှဲၤဒီးတၢ်ဘျုး တၢ်ဖှိၣ်တဂၤန့ၣ်, ကြၢးဒိးဘၣ်တၢ်စံၣ်ညီၣ်ဃၣ်အီၤနးန့ၢ်အန့ၣ် တက့ၢ်ဆံးဒိၣ်လဲၣ်. 30 အဂ့ၢ်ဒ်အံၤပသ့ၣ်ညါပှၤလၢအစံးဝဲ, “တၢ်ဟ့ၣ်ကၣ်တၢ်မ့ၢ် ယတၢ်မၤဒီးယကဟ့ၣ်ကၣ်ဆၢက့ၤတၢ်လီၤ.” ပသ့ၣ်ညါစ့ၢ်ကီး ပှၤလၢအစံး, “ကစၢ်ကစံၣ်ညီၣ်အပှၤဂီၢ်မုၢ်” န့ၣ်လီၤ. 31 တၢ်လီၤနုာ်ဘၣ်ဆူ ကစၢ်ယွၤလၢအမူဝဲတဂၤအစုပူၤန့ၣ်, မ့ၢ်တၢ်လၢအလီၤပျံၤလီၤဖုးဒိၣ်မးလီၤ. 32 ဘၣ်ဆၣ်ဒီးသ့ၣ်နီၣ်ထီၣ်မုၢ်နံၤလၢအပူၤကွံာ်တဖၣ်, ဖဲသုသးဘၣ်တၢ်မၤကပီၤထီၣ်အီၤဝံၤအလီၢ်ခံ, ဖဲသုဘၣ်ကွၢ်ဆၢၣ်မဲာ်ဒီးတၢ်နးတၢ်ဖှီၣ်အဒိၣ်အအါသနာ် က့သုတူၢ်အီၤပှဲၤကစီဒီန့ၣ်တက့ၢ်. 33 တဘျီဘျီသုဘၣ်တၢ်ကတိၤဒုၣ်ဒွဲၣ်ဒီးဘၣ်တၢ်မၤအၢမၤနး သုလၢကမျၢၢ်အမဲာ်ညါ, ဒီးတဘျီဘျီသုမ့ၢ်ပှၤလၢအဘၣ်တၢ်မၤအီၤဒ်န့ၣ်အသိး တဖၣ်အသကိးန့ၣ်လီၤ. 34 အဂ့ၢ်ဒ်အံၤ, သုသးအိၣ်သးကညီၤဘၣ်ပှၤလၢအလီၤဘၣ်လၢ ဃိာ်ပူၤတဖၣ်ဒီးဖဲတၢ်လၢအအိၣ်ဒီးသုတဖၣ်ဘၣ်တၢ်ဟံးန့ၢ် ကွံာ်အီၤလၢသုအိၣ်န့ၣ်, သုတူၢ်အီၤလၢတၢ်သးမုာ်သးခုအပူၤမ့ၢ်လၢသုသ့ၣ်ညါ လၢတၢ်လၢအဂ့ၤဒီးဂၢၢ်ကျၢၤဒိၣ်န့ၢ်အန့ၣ်တက့ၢ်အိၣ်ဒံး ဒီးသုအဃိန့ၣ်လီၤ. 35 မၤသးဒ်န့ၣ်ဒီး တဘၣ်ညိကွံာ်သုတၢ်သးခူတလ့ၣ် လၢအအိၣ်ဒီးအဘူးအလဲဒိၣ်ဒိၣ်ကလဲာ်န့ၣ်တဂ့ၤ. 36 သုကဘၣ်ဝံသးစူၤဒီးတူၢ်တၢ်ဒ်သိးသုကမၤတၢ်ဘၣ်ကစၢ်ယွၤ အသးဝံၤ, ဒီးဒိးန့ၢ်ဘၣ်တၢ်လၢအဘၣ်တၢ်စံးပာ်တ့ၢ်အီၤန့ၣ်လီၤ. 37 အဂ့ၢ်ဒ်အံၤ, “တစိၢ်ဖိဒီးပှၤလၢအကဟဲဝဲတဂၤန့ၣ် ကဟဲဝဲဒီးတမၤယံာ်မၤနီၢ်အသးဘၣ်. 38 ဘၣ်ဆၣ်ဒီးယပှၤဂီၢ်မုၢ်အတီအလိၤန့ၣ် ကမူဝဲလၢတၢ်နာ်လီၤ. ဘၣ်ဆၣ်အဝဲသ့ၣ်အကျါတဂၤမ့ၢ်ဂုၤက့ၤဆူအလီၢ်ခံဒီး ယတဘၣ်သူၣ်ဘၣ်သးလၢၤအီၤဘၣ်. 39 ပဝဲဒၣ်အံၤပတမ့ၢ်ပှၤလၢအဂုၤက့ၤအလီၢ်ခံဒီးဘၣ်တုၤဆူ တၢ်ဟးဂီၤအပူၤန့ၣ်ဘၣ်, မ့မ့ၢ်ပအိၣ်ဒီးတၢ်စူၢ်တၢ်နာ်ဒီးပဘၣ်တၢ်မၤပူၤဖျဲးကွံာ်ပှၤန့ၣ်လီၤ. |
Sgaw Karen Common Bible © Bible Society of Myanmar, 1992.
Bible Society of Myanmar