ဧ့ၤဘြံၤ 1 - Sgaw Karen Common Bible

ကစၢ်ယွၤကတိၤတၢ်ခီဖျိအဖိခွါ

¹ လၢပျၢၤန့ၣ်, ကစၢ်ယွၤကတိၤတ့ၢ်တၢ်ဒီးပမိၢ်ပၢ်ဖံဖုလၢပျၢၤ တဖၣ်ဘၣ်ထွဲတၢ်အါမံၤအါကလုာ်ဒီးအါဘျီခီဖျိဝံတဖၣ်လီၤ.

² ဘၣ်ဆၣ်ဒီးလၢခံကတၢၢ်လၢပဆၢပကတီၢ်အံၤကစၢ်ယွၤ ကတိၤတၢ်ဒီးပှၤခီဖျိအဖိခွါလီၤ. အဝဲမ့ၢ်ပှၤလၢကစၢ်ယွၤဃုထၢတ့ၢ်လံလၢအကန့ၢ်သါဘၣ် တၢ်ခဲလၢာ်ဒီးခီဖျိအီၤန့ၣ်, ကစၢ်ယွၤတ့လီၤတ့ၢ်လံဟီၣ်ခိၣ်မူခိၣ်ဒီးတၢ်ခဲလၢာ်န့ၣ်လီၤ.

³ အဝဲလီၣ်ဖျါထီၣ်န့ၢ်ပှၤလၢကစၢ်ယွၤအလၤကပီၤဒီးစိာ်မူ ဝဲကစၢ်ယွၤအက့ၢ်အဂီၤအန့ဆၢၣ်လီၤတံၢ်လီၤဆဲးဒီးဟံး ဃာ်ပၢၤဃာ်ဟီၣ်ခိၣ်မူခိၣ်လၢအကလုၢ်အစိအကမီၤလီၤ. တုၤအမၤကဆှီထီၣ်ပှၤလၢပတၢ်ဒဲးဘးလၢအကစၢ် ဒၣ်ဝဲဝံၤဒီး, ဆ့ၣ်နီၤဝဲလၢတၢ်စိဒိၣ်ကမီၤထီကစၢ်ယွၤ အစုထွဲတခီလီၤ.

ကစၢ်ယွၤအဖိခွါအတၢ်ဒိၣ်တၢ်ထီ

⁴ ဒ်အမံၤလၢကစၢ်ယွၤဟ့ၣ်အီၤအံၤဒိၣ်န့ၢ်ထီန့ၢ်ကလူး တဖၣ်အမံၤတက့ၢ်အသိးန့ၣ်, ဖိခွါအံၤဒိၣ်န့ၢ်ထီန့ၢ်ကလူး တဖၣ်တက့ၢ်လီၤ.

⁵ အဂ့ၢ်ဒ်အံၤ, ကစၢ်ယွၤတစံးဘၣ်အကလူးနီတဂၤလၢ “နမ့ၢ်ယဖိခွါလီၤ. တနံၤအံၤယထီၣ်ဖိလံနၤလံ.” န့ၣ်ဘၣ်. မ့တမ့ၢ်, ကစၢ်ယွၤစံးဘၣ်ကလူးတဂၤဂၤလၢ, ယကကဲထီၣ်နပၢ်ဒီးနကမၤယဖိခွါလီၤ” န့ၣ်ဧါ.

⁶ မ့မ့ၢ်ဖဲကစၢ်ယွၤကဆှၢလီၤအဖိဝဲၢ်ကိဆူဟီၣ်ခိၣ်န့ၣ် စံးဝဲ, “မ်ကစၢ်ယွၤအကလူးခဲလၢာ်တီၤလီၤဘါအီၤတက့ၢ်.”

⁷ ဘၣ်ဃးဒီးကလူးတဖၣ်န့ၣ်ကစၢ်ယွၤစံးဝဲ, “ကစၢ်ယွၤဒုးကဲထီၣ်အကလူးတဖၣ်လၢကလံၤ, ဒီးအခ့အပှၤလၢမ့ၣ်အူလၣ်တဖၣ်လီၤ.”

⁸ ဘၣ်ဆၣ်ဒီးဖဲအဘၣ်ဃးဒီးဖိခွါန့ၣ်စံးဝဲ, “ကစၢ်ယွၤဧၢ, နဘီနမုၢ်အိၣ်ဝဲအစိၤစိၤအဃၣ်ဃၣ်, နပၢတၢ်ဒီးတၢ်တီတၢ်လိၤလီၤ.

⁹ နအဲၣ်တၢ်လၢအဘၣ်ဒီး နသးဟ့တၢ်လၢအတဘၣ်ဘၣ်န့ၣ်လီၤ. လၢတၢ်န့ၣ်အဃိကစၢ်ယွၤ, နကစၢ်ယွၤဃုထၢထီၣ် ဒီးဖှူနၤလၢတၢ်သးခုအသိ အါန့ၢ်ဒိၣ်န့ၢ်ဒံးနတံၤသကိးတဖၣ်တက့ၢ်လီၤ.”

¹⁰ အဝဲစံးစ့ၢ်ကီးဝဲ, “ကစၢ်ဧၢ, လၢထံးလၢသီန့ၣ်နတ့လီၤဟီၣ်ခိၣ် ဒီးလၢနစုဒၣ်နဲနဒုးအိၣ်ထီၣ်မူခိၣ်တဖၣ်န့ၣ်လီၤ.

¹¹ အဝဲသ့ၣ်ကဟးဂီၤဒီးဟါမၢ်ကွံာ်လီၤ. မ့မ့ၢ်နဲဒၣ်နကအိၣ်ကဆိးနဲလီၤ. အဝဲသ့ၣ်ခဲလၢာ်ကယာ်ပြဲးကွံာ်ဒ် တၢ်ကူတၢ်ကၤအသိးလီၤ.

¹² ဒီးနကချံးထီၣ်အီၤဒ်တၢ်ကူတၢ်ကၤအသိးန့ၣ်လီၤ. အဝဲသ့ၣ်ကဘၣ်တၢ်လဲလိာ်ကွံာ်အီၤဒ် တၢ်ကူတၢ်ကၤအသိး ဘၣ်ဆၣ်ဒီးနဲနကမ့ၢ်တၢ်ဒ်လီၢ်လီၢ် ဒီးနနံၣ်နလါတဖၣ်အကတၢၢ်တအိၣ်ဘၣ်.”

¹³ ကစၢ်ယွၤတစံးဘၣ်အကလူးနီတဂၤနီတဘျီလၢ “ဆ့ၣ်နီၤဖဲအံၤလၢယစုထွဲတခီ တုၤယပာ်လီၤနဒုၣ်နဒါခဲလၢာ် ဒ်နခီၣ်ယီၢ်အသိးလၢနခီၣ်အဖီလာ်” န့ၣ်ဘၣ်.

¹⁴ မ့မ့ၢ်ဒ်န့ၣ်ဒီးကလူးတဖၣ်မ့ၢ်တၢ်မနုၤလဲၣ်. အဝဲသ့ၣ်မ့ၢ်ဒၣ်သးတဖၣ်လၢအမၤကစၢ်ယွၤအတၢ် လၢယွၤဆှၢလီၤဒ်သိးအကမၤစၢၤပှၤဟီၣ်ခိၣ်ဖိတဖၣ်လၢ အကဒိးန့ၢ်ဘၣ်တၢ်အုၣ်က့ၤခီၣ်က့ၤအဂီၢ်န့ၣ်လီၤ.