လံာ်ဃးကဲ 1 - Sgaw Karen Common Bible

ယွၤအတၢ်မၤလိာ်လၢတၢ်ကဘှီကဒါက့ၤ တၢ်လုၢ်ဟံၣ်

¹ ဖဲစီၤဒၤရယါဝ့ၣ်ကဲကီၢ်ပၤရၣ်အစီၤပၤဖးဒိၣ်ခံနံၣ်တနံၣ်အပူၤအတ့ၤ, လၢလါဃုလါတလါထီၣ်တသီအနံၤန့ၣ်, ယွၤကတိၤတ့ၢ်တၢ်ခီဖျိဝံဃးကဲလီၤ. တၢ်ကစီၣ်န့ၣ်, မ့ၢ်လၢကီၢ်ယူဒၤအပဒိၣ်ဖးဒိၣ်စီၤၡၤလတံၤအ့လး အဖိခွါစီၤစရူၤဘၤဘ့လး, ဒီးလၢပှၤလုၢ်တၢ်အခိၣ်အဒိၣ်ကတၢၢ်, စီၤယိၤစါဒးအဖိခွါစီၤယိၤရူအဂီၢ်န့ၣ်လီၤ.

² ယွၤသ့တၢ်လၢာ်ကစၢ်စံးဘၣ်တ့ၢ်စီၤဃးကဲ, “ပှၤဂီၢ်မုၢ်အံၤ, စံးလၢတၢ်အံၤတမ့ၢ်တၢ်ဘၣ်ဆၢဘၣ်ကတီၢ်လၢတၢ်ကဘှီ ကဒါက့ၤတၢ်လုၢ်ဟံၣ်အဂီၢ်န့ၣ်ဘၣ်.”

³ ယွၤဟ့ၣ်လီၤကဒီးတၢ်ကစီၣ်အံၤဆူပှၤဂီၢ်မုၢ်ခီဖျိဝံဃးကဲန့ၣ်လီၤ.

⁴ “ယပှၤဂီၢ်မုၢ်သ့ၣ်ဧၢ, ဘၣ်မနုၤသုအိၣ်ဆိးလၢဟံၣ်တဖၣ်လၢတၢ်ဘှီအီၤဂ့ၤဂ့ၤအပူၤ, ဖဲယတၢ်လုၢ်ဟံၣ်အိၣ်လၢတၢ်ဟးဂီၤတဖၣ်အပူၤအခါန့ၣ်လဲၣ်.

⁵ တၢ်မနုၤမၤအသးဒီးသုလဲၣ်န့ၣ်, မ့ၢ်သုတထံၣ်ဘၣ်ဧါ.

⁶ သုသူၣ်လီၤဖျးလီၤတ့ၢ်ဘုဧိၤဟုဧိၤအါမး, ဘၣ်ဆၣ်ကူးဘၣ်က့ၤတၢ်ထဲတဆံးတက့ၢ်လီၤ. သုအိၣ်ဒီးတၢ်အီၣ်လၢသုကအီၣ်, ဘၣ်ဆၣ်တလၢဝဲလၢကမၤကၢသုဟၢဖၢဘၣ်. သုအိၣ်ဒီးစပံးထံလၢသုကအီ, ဘၣ်ဆၣ်တလၢဝဲလၢသု ကအီမူၤသုသးဘၣ်. သုအိၣ်ဒီးတၢ်ကူတၢ်သိး, ဘၣ်ဆၣ်တလၢဝဲ လၢကမၤလၢၤသုန့ၣ်ဘၣ်. ဘူးလဲကလၢဝဲလၢတၢ်လုၢ်အီၣ်သးသမူအဂီၢ်န့ၣ်, ပှၤမၤတၢ်ဖိတဂၤဒိးန့ၢ်ဝဲတသ့ဘၣ်.

⁷ ဘၣ်မနုၤတၢ်အံၤမၤတ့ၢ်အသးလဲၣ်န့ၣ်, သုထံၣ်တသ့ဘၣ်ဧါ.

⁸ ခဲကနံၣ်အံၤ, လဲၤထီၣ်ဆူတၢ်လူၢ်တဖၣ်, မၤန့ၢ်သ့ၣ်တၢၢ်သ့ၣ်ဘၣ်, ဒီးဘှီထီၣ်ကဒါက့ၤတၢ်လုၢ်ဟံၣ်တက့ၢ်. ဒီးယကသူၣ်ခုသးခု ဒီးဒိးဘၣ်တၢ်ဘူၣ်ထီၣ်ဘါထီၣ်ယၤဒ်ယကြၢးအသိးန့ၣ်လီၤ.

⁹ သုမုၢ်လၢ်တ့ၢ်လၢတၢ်ကူးဘၣ်က့ၤတၢ်အါအါဂီၢ်ဂီၢ်, ဘၣ်ဆၣ်ကဲထီၣ်က့ၤထဲတၢ်စှၤကိာ်ဧိၤလီၤ. ဒီးဖဲသုဟဲက့ၤစိာ်တၢ်ကူးဘၣ်က့ၤဆူဟံၣ်န့ၣ်, ယအူဒံကွံာ်အီၤလီၤ. ဘၣ်မနုၤယမၤတ့ၢ်တၢ်န့ၣ်လဲၣ်. မ့ၢ်လၢယတၢ်လုၢ်ဟံၣ်အိၣ်လၢတၢ်ဟးဂီၤတဖၣ်အပူၤ, ဖဲသုဝဲတဂၤဘၣ်တဂၤအတၢ်မၤအါဝဲလၢတၢ်မၤထီၣ်သုဟံၣ်ဒၣ်ဝဲ အခါန့ၣ်လီၤ.

¹⁰ လၢတၢ်န့ၣ်အဃိတၢ်တဟဲစူၤဘၣ်ဒီး တၢ်မဲထီၣ်တသ့နီတမံၤဘၣ်.

¹¹ ယမၢလီၤတ့ၢ်တၢ်ယီၤဃ့လီၤဘၣ်လၢထံဧိၤကီၢ်ဧိၤအလိၤ, လၢအတၢ်လူၢ်တဖၣ်အလိၤ, စံာ်ဧိၤပျီဧိၤ, စပံးလီၢ်တဖၣ်ဒီးသ့ၣ်စၤယံးအကရၢၢ်တဖၣ်အလိၤ, လၢကယဲၢ်တၢ်မုၢ်တၢ်ဘိလၢဟီၣ်ခိၣ်ဒုးမဲထီၣ်တဖၣ်အလိၤ, လၢပှၤကညီတဖၣ်ဒီးဆၣ်ဖိကီၢ်ဖိတဖၣ်အလိၤ, လၢတၢ်ကိးမံၤဒဲးလၢသုကျဲးစၢးသူၣ်လီၤဖျးလီၤအလိၤန့ၣ်လီၤ.”

ပှၤဂီၢ်မုၢ်စူၢ်ယွၤအတၢ်မၤလိာ်

¹² တုၤနုၤတစု, စီၤစရူၤဘၤဘ့လးဒီးစီၤယိၤရူဒီးပှၤဂီၢ်မုၢ်ခဲလၢာ်လၢ အဟဲက့ၤကဒါက့ၤတ့ၢ်လၢတၢ်စိာ်မၢကဲကုၢ်အပူၤလၢကီၢ်ဘၤဘူၤ လိၣ်န့ၣ်, မၤတ့ၢ်တၢ်လၢယွၤ, အဝဲသ့ၣ်အကစၢ်ယွၤစံးဘၣ်တ့ၢ်အီၤလၢကဘၣ်မၤဝဲန့ၣ်လီၤ. အဝဲသ့ၣ်ပျံၤဘၣ်ဒီးစူၢ်တ့ၢ်ဝံဃးကဲလၢအမ့ၢ်ယွၤအပှၤစိာ်တၢ် ကစီၣ်အကလုၢ်လီၤ.

¹³ ဒီးစီၤဃးကဲတဲဘၣ်ပှၤဂီၢ်မုၢ်လၢယွၤအတၢ်ကစီၣ်, “ယကအိၣ်ဒီးသု, တၢ်န့ၣ်မ့ၢ်ယတၢ်အၢၣ်လီၤအီလီၤလီၤ.”

¹⁴ ယွၤထိၣ်ဂဲၤတ့ၢ်ပှၤကိးဂၤဒဲး, ကီၢ်ယူဒၤအပဒိၣ်ဖးဒိၣ်စီၤစရူၤဘၤဘ့လး, ပှၤလုၢ်တၢ်အခိၣ်အဒိၣ်ကတၢၢ်စီၤယိၤရူဒီးပှၤဂီၢ်မုၢ်ခဲလၢာ်လၢ အဟဲက့ၤကဒါက့ၤလၢတၢ်မၢကဲကုၢ်အပူၤအသး, ဒ်သိးကမၤတၢ်လၢတၢ်လုၢ်ဟံၣ်န့ၣ်လီၤ. အဝဲသ့ၣ်စးထီၣ်မၤတ့ၢ်တၢ်လၢယွၤသ့တၢ်လၢာ်ကစၢ်, အဝဲသ့ၣ်အကစၢ်ယွၤအတၢ်လုၢ်ဟံၣ်,

¹⁵ ဖဲစီၤဒၤရယါဝ့ၣ်ကဲစီၤပၤဖးဒိၣ်ခံနံၣ် တနံၣ်, လါဃုလါတလါထီၣ်ခံဆံလွံၢ်သီအနံၤန့ၣ်လီၤ.