လံာ်တၢ်ကဲထီၣ်အခီၣ်ထံး 33 - Sgaw Karen Common Bible

စီၤယၤကိာ်သဂၢၢ်လိာ်အသးဒီးစီၤဧ့ၡီၤ

¹ စီၤယၤကိာ်ထံၣ်ဃီၤစီၤဧ့ၡီၤဟဲဝဲဒီးအပှၤလွံၢ်ကယၤဂၤန့ၣ် လီၤ. လၢတၢ်န့ၣ်အဃိအဝဲနီၤဖးလီၤန့ၢ်နီၢ်လ့ၤအၤ, နီၢ်ရၤဃ့လးဒီးအသံၣ်မါခံဂၤလၢအဖိဒၣ်ဝဲတဖၣ်စုာ်စုာ်လီၤ.

² အဝဲပာ်လီၤအသံၣ်မါခံဂၤဒီးအဖိတဖၣ်လၢတၢ်မဲာ်ညါကတၢၢ်, ဝံၤနီၢ်လ့ၤအၤဒီးအဖိတဖၣ်, ဒီးလၢခံကတၢၢ်နီၢ်ရၤဃ့လးဒီး စီၤယိၤသးအိၣ်ဝဲလၢတၢ်လီၢ်ခံကတၢၢ်န့ၣ်လီၤ.

³ စီၤယၤကိာ်လဲၤဆိတၢ်လၢအဝဲသ့ၣ်အမဲာ်ညါဒီးဖဲအဘူးထီၣ်ဒီး အဒီပုၢ်ဝဲၢ်ခွါန့ၣ်အဝဲထိၣ်လီၤပှီၤအသးတုၤလၢဟီၣ်ခိၣ်လိၤ နွံဘျီန့ၣ်လီၤ.

⁴ မ့မ့ၢ်စီၤဧ့ၡီၤဃ့ၢ်သဂၢၢ်အီၤ, ဖိးဟုအီၤဒီးနၢမူအီၤန့ၣ် လီၤ. အဝဲသ့ၣ်ခံဂၤလိာ်ဟီၣ်ဝဲဒၣ်န့ၣ်လီၤ.

⁵ တုၤစီၤဧ့ၡီၤကွၢ်တၢ်ဝးဝးဒီးထံၣ်ဝဲပှၤပိာ်မုၣ်တဖၣ်ဒီးဖိ သၣ်တဖၣ်န့ၣ်သံကွၢ်ဝဲ, “ပှၤအိၣ်ဒီးနၤတဖၣ်အံၤမ့ၢ်မတၤလဲၣ်.” စီၤယၤကိာ်စံးဆၢဝဲ, “တၢ်ဒိၣ်ဧၢ, အဝဲသ့ၣ်တဖၣ်အံၤမ့ၢ်ဖိ သၣ်တဖၣ်လၢကစၢ်ယွၤဟ့ၣ်သးကညီၤယၤန့ၣ်လီၤ.”

⁶ တုၤနုၤတစု, စီၤယၤကိာ်အသံၣ်မါခံဂၤဟဲဝဲဒီးအဖိတဖၣ်ဒီး ထိၣ်လီၤပှီၤအသးန့ၣ်လီၤ.

⁷ ဒီးနီၢ်လ့ၤအၤဒီးအဖိတဖၣ်ဟဲဝဲဒီးလၢခံကတၢၢ်န့ၣ်နီၢ်ရၤ ဃ့လးဟဲဝဲဒီးထိၣ်လီၤပှီၤအသးန့ၣ်လီၤ.

⁸ စီၤဧ့ၡီၤသံကွၢ်ဝဲ, “ဆၣ်ဖိကီၢ်ဖိလၢနဟဲနီၣ်ဃုာ်ဒီးနၤ တဖၣ်တခီ, အခီပညီဒ်လဲၣ်.” စီၤယၤကိာ်စံးဆၢဝဲ, “တၢ်န့ၣ်မ့ၢ်လၢယက ဒိးန့ၢ်နတၢ်သးကညီၤကွၢ်မဲာ်ယၤအဂီၢ်လီၤ.”

⁹ ဘၣ်ဆၣ်ဒီး, စီၤဧ့ၡီၤစံးဝဲ, “ယပုၢ်ဧၢ, ယတၢ်အိၣ်လၢလၢပှဲၤပှဲၤလီၤ. ပၢၤဃာ်နတၢ်အိၣ်ဒီးနၤတက့ၢ်.”

¹⁰ စီၤယၤကိာ်စံးဝဲ, “တမ့ၢ်ဘၣ်. နမ့ၢ်သးကညီၤကွၢ်မဲာ်ယၤဒီး ဝံသးစူၤတူၢ်လိာ်ယတၢ်ဟ့ၣ်တက့ၢ်. တၢ်ထံၣ်ဘၣ်နမဲာ်ဒ်လၢအခဲအံၤဖျါပှဲၤဒီးတၢ်သးကညီၤကွၢ်မဲာ် န့ၣ်, လၢယဂီၢ်လီၤဂာ်ဒ်တၢ်ထံၣ်ဘၣ်ကစၢ်ယွၤအမဲာ်အသိးလီၤ.

¹¹ ဝံသးစူၤတူၢ်လိာ်တၢ်ဟ့ၣ်လၢယဟဲစိာ်လၢနဂီၢ်န့ၣ်တက့ၢ်. ကစၢ်ယွၤသူၣ်ကညီၤသးကညီၤတ့ၢ်ယၤဒီးဟ့ၣ်တ့ၢ်ယၤကယဲၢ်တၢ်လၢ ယလိၣ်ခဲလၢာ်န့ၣ်လီၤ.” စီၤယၤကိာ်ဃ့ကညးအီၤသပှၢ်ပှၢ်တုၤလၢစီၤဧ့ၡီၤတူၢ်လိာ်ဝဲ န့ၣ်လီၤ.

¹² စီၤဧ့ၡီၤစံးဝဲ, “မ်ပကတဲာ်ကတီၤပသးလၢပကဟးထီၣ်တက့ၢ်. ယကလဲၤဆိတၢ်လၢနမဲာ်ညါလီၤ.”

¹³ စီၤယၤကိာ်စံးဆၢဝဲ, “နသ့ၣ်ညါလၢဖိသၣ်တဖၣ်အဂံၢ်စၢ်ဘါစၢ် ဝဲ, ဒီးယကဘၣ်ဆိကမိၣ်တၢ်လၢသိ, ဂီၤဘုၣ်ဂီၤဖံးဒီးအဖိတဖၣ်အဂီၢ် လီၤ. အဝဲသ့ၣ်မ့ၢ်ဘၣ်တၢ်မိၤဆူၣ်အီၤလၢတနံၤဃီအတီၢ်ပူၤန့ၣ်, ဆၣ်ဖိကီၢ်ဖိဒီတဖုကသံဝဲလီၤ.

¹⁴ ဝံသးစူၤလဲၤဆိတၢ်လၢယမဲာ်ညါ, ဒီးယကပိာ်ထွဲထီၣ်ကယီ ကယီ, လဲၤတၢ်တချ့ဖဲအချ့ဒ်ယသ့ဃုာ်ဒီးယဂီၤဘုၣ်ဂီၤဖံးဒီး ဖိသၣ်တဖၣ်တုၤယချုးန့ၢ်နၤလၢကီၢ်အဒိၣ်အပူၤန့ၣ်တက့ၢ်.”

¹⁵ စီၤဧ့ၡီၤစံးဝဲ, “ပမ့ၢ်မၤဒ်န့ၣ်ဒီးပျဲယပာ်တီၢ်ယပှၤတနီၤ ဒီးနၤတက့ၢ်.” ဘၣ်ဆၣ်စီၤယၤကိာ်စံးဆၢဝဲ, “အဝဲန့ၣ်အလီၢ်တအိၣ်ဘၣ်. အဂ့ၢ်ဒ်အံၤ, ယအဲၣ်ဒိးထဲနတၢ်သးကညီၤကွၢ်မဲာ်ဧိၤလီၤ.”

¹⁶ ဒီးလၢတနံၤဃီန့ၣ်စီၤဧ့ၡီၤစးထီၣ်က့ၤကဒါက့ၤဝဲဆူကီၢ် အဒိၣ်န့ၣ်လီၤ.

¹⁷ မ့မ့ၢ်စီၤယၤကိာ်လဲၤဝဲဆူစူးကိၤသးဖဲအသူၣ်ထီၣ်ဟံၣ်တဖျၢၣ် လၢအဂီၢ်ဒၣ်ဝဲဒီးတၢ်အိၣ်ကဒုအလီၢ်လၢအဂီၤဘုၣ်ဂီၤဖံးတဖၣ်အ ဂီၢ်န့ၣ်လီၤ. လၢတၢ်န့ၣ်အဃိတၢ်လီၢ်န့ၣ်ဘၣ်တၢ်ကိးအီၤလၢစူး ကိၤသးန့ၣ်လီၤ.

¹⁸ လၢအတၢ်ဟဲက့ၤကဒါက့ၤလၢကီၢ်မ့းစပတၤမံန့ၣ်စီၤယၤကိာ်ဟဲ တုၤဘၣ်ဝဲဂ့ၤဂ့ၤဘၣ်ဘၣ်ဆူဝ့ၢ်ၡက့ၣ်အိၣ်လၢကီၢ်ကနၤဧၣ်အပူၤ ဒီးပာ်လီၤအသူၣ်ဒဲအလီၢ်လၢပျီတဘ့ၣ်အပူၤဘူးဒီးဝ့ၢ်န့ၣ် လီၤ.

¹⁹ အဝဲပှ့ၤန့ၢ်ဝဲပျီတတီၤန့ၣ်လၢစီၤၡက့ၣ်အပၢ်ပှၤဃမိၣ်ဖိအစၢၤ အသွဲၣ်တဖၣ်အအိၣ်လၢစ့ညၣ်အဘ့ၣ်တကယၤလီၤ.

²⁰ ဒီးဖဲန့ၣ်မၤထီၣ်ဝဲတၢ်လုၢ်လီၢ်တခါဒီးကိးဝဲအမံၤလၢ “အ့ၤလံ,” ဒ်ပစံးတၢ်အသိး, “အံၣ်စရ့လးအကစၢ်ယွၤ” န့ၣ်လီၤ.