လံာ်စီၤဧ့စြၤ 1 - Sgaw Karen Common Bible

စီၤကိရ့ၣ်ဟ့ၣ်လီၤအကလုၢ် လၢပှၤယူဒၤဖိသ့ၣ်တဖၣ်ကက့ၤကဒါက့ၤ

¹ ဖဲကီၢ်ပၤရၣ်အစီၤပၤဖးဒိၣ်စီၤကိရ့ၣ်ပၢတၢ်အခီၣ်ထံးတနံၣ် န့ၣ်, ယွၤမၤလၢထီၣ်ပှဲၤထီၣ်တၢ်လၢအစံးတ့ၢ်ဝဲခီဖျိဝံယံးရမံယၤ န့ၣ်လီၤ. အဝဲမၢန့ၢ်ဆီၣ်ခံစီၤကိရ့ၣ်ဒ်သိးအကဟ့ၣ်လီၤအကလုၢ်ဒီးဆှၢ လီၤအီၤလၢတၢ်ကွဲးဒ်လၢလာ်အံၤအသိး, လၢကဘၣ်တၢ်ဖးအီၤလၢအကလုၢ်ဖးဒိၣ်လၢတၢ်လီၢ်ကိးပူၤဒဲးလၢ အဘီအမုၢ်အပူၤန့ၣ်လီၤ.

² “အအံၤမ့ၢ်ကီၢ်ပၤရၣ်အစီၤပၤဖးဒိၣ်စီၤကိရ့ၣ်အတၢ်မၤလိာ်န့ၣ် လီၤ. ယွၤ, မူခိၣ်အကစၢ်ယွၤဒုးကဲတ့ၢ်လံယၤပှၤပၢဟီၣ်ခိၣ်ဒီဘ့ၣ်, ဒီးဟ့ၣ်မူဟ့ၣ်ဒါတ့ၢ်လံယၤလၢယကသူၣ်ထီၣ်တၢ်လုၢ်ဟံၣ်တဖျၢၣ်လၢ အဂီၢ်လၢဝ့ၢ်ယရူၤၡလ့ၣ်, လၢကီၢ်ယူဒၤအပူၤန့ၣ်လီၤ.

³ မ်ကစၢ်ယွၤအိၣ်ဒီးသုဝဲခဲလၢာ်လၢအမ့ၢ်အပှၤဂီၢ်မုၢ်န့ၣ်တ က့ၢ်. သုကဘၣ်လဲၤဆူဝ့ၢ်ယရူၤၡလ့ၣ်ဒီးသူၣ်ထီၣ်ကဒါက့ၤယွၤ, အံၣ်စရ့လးအကစၢ်ယွၤလၢအဘၣ်တၢ်ဘူၣ်ထီၣ်ဘါထီၣ်အီၤလၢဝ့ၢ်ယရူၤ ၡလ့ၣ်အပူၤအတၢ်လုၢ်ဟံၣ်န့ၣ်လီၤ.

⁴ အပှၤဂီၢ်မုၢ်လၢတၢ်စိာ်မၢကဲကုၢ်အကျါမ့ၢ်လိၣ်ဘၣ်တၢ်မၤစၢၤလၢ ကက့ၤကဒါက့ၤန့ၣ်, အဝဲသ့ၣ်အပှၤအိၣ်ခိၣ်အိၣ်ဃၢၤတဖၣ်ကဘၣ်မၤစၢၤအဝဲသ့ၣ်န့ၣ်လီၤ. ပှၤအိၣ်ခိၣ်အိၣ်ဃၢၤကဘၣ်ဟ့ၣ်အဝဲသ့ၣ်လၢစ့ဒီးထူ, တၢ်လၢအလိၣ်ဝဲတဖၣ်ဒီးဆၣ်ဖိကီၢ်ဖိအဒၢလၢအဂီၤကၢ်အသးတဖၣ် ဃုာ်ဒီးတၢ်ဟ့ၣ်မၤဘူၣ်လၢကဟ့ၣ်ဝဲဆူကစၢ်ယွၤအတၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤန့ၣ်လီၤ.”

⁵ တုၤနုၤတစုပှၤအခိၣ်တဖၣ်လၢ, ဒူၣ်ထၢတဖၣ်လၢယူဒၤအဒူၣ် ဒီးဘံၣ်ယၤမံၣ်အဒူၣ်အပူၤ, ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိ တဖၣ်, ဒီးပှၤကိးဂၤဒဲးလၢကစၢ်ယွၤထိၣ်ဂဲၤထီၣ်အသးန့ၣ်ကတဲာ်ကတီၤ ထီၣ်အသးလၢကက့ၤဒီးသူၣ်ထီၣ်ကဒါက့ၤယွၤအတၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤန့ၣ်လီၤ.

⁶ ကယဲၢ်ပှၤအိၣ်ခိၣ်အိၣ်ဃၢၤခဲလၢာ်မၤစၢၤအဝဲသ့ၣ်ခီဖျိဟ့ၣ်အ ဝဲသ့ၣ်လၢတၢ်အါမံၤဒ်, တၢ်အဃၢၤအဃိၢ်စ့တဖၣ်, ထူဧိၤလွဲဧိၤ, တၢ်အလိၣ်တဖၣ်, ဆၣ်ဖိကီၢ်ဖိအဒၢလၢဂီၤကၢ်အသး တဖၣ်, တၢ်လုၢ်ဒိၣ်ပှ့ၤဒိၣ်အဂၤတဖၣ်, ဒီးတၢ်မၤဘူၣ်မၤတီၢ်တဖၣ်လၢတၢ် လုၢ်ဟံၣ်အဂီၢ်န့ၣ်လီၤ.

⁷ စီၤပၤဖးဒိၣ်ကိရ့ၣ်ဟ့ၣ်က့ၤအဝဲသ့ၣ်လၢသီတ့ၤတဖၣ်ဒီးလီခီ တဖၣ်လၢစီၤပၤနဘူၤကးန့စၢ်ဟံးန့ၢ်တ့ၢ်ဝဲလၢဝ့ၢ်ယရူၤၡလ့ၣ် အတၢ်လုၢ်ဟံၣ်ပူၤဒီးပာ်ဝဲလၢအကစၢ်တဖၣ်အတၢ်လုၢ်ဟံၣ်ပူၤန့ၣ်လီၤ.

⁸ အဝဲဟ့ၣ်က့ၤတၢ်သ့ၣ်တဖၣ်အံၤဆူစီၤပၤအပှၤပၢၤတၢ်လုၢ်ဒိၣ်ပှ့ၤဒိၣ် အခိၣ်စီၤမံးသြၤဒး, လၢအဂံၢ်ဒီးကွဲးနီၣ်တၢ်ဖိတၢ်လံၤအနီၣ်ဂံၢ်ဒီးကၢပှ့ၤကၢ ကလံၤလၢကီၢ်ယူဒၤအပဒိၣ်ဖးဒိၣ်စီၤၡ့ၡဘးစၢ်အဂီၢ်ဒ်လာ်အံၤလီၤ.

^9-10 သီတ့ၤထူတဖၣ်လၢတၢ်လုၢ်တၢ်ပာ်အဂီၢ် အဘ့ၣ်သၢဆံ သီတ့ၤစ့တဖၣ်လၢတၢ်လုၢ်တၢ်ပာ်အဂီၢ် အဘ့ၣ်တကထိ သီတ့ၤအဂၤတဖၣ် ခံဆံခွံဘ့ၣ် သလၢထူအဆံးတဖၣ် အဖျၢၣ်သၢဆံ သလၢစ့အဆံးတဖၣ် အဖျၣ်လွံၢ်ကယၤတဆံ တၢ်အဃၢၤအဃိၢ်အဂၤ အခါတကထိ

¹¹ တၢ်အဃၢၤအဃိၢ်ခဲလၢာ်လၢထူဒီးစ့န့ၣ်မ့ၢ်ဝဲယဲၢ်ကထိလွံၢ် ကယၤဒီးတၢ်အဂုၤအဂၤလၢစီၤၡ့ၡဘးစၢ်ဟဲက့ၤစိာ်ဝဲဖဲအဝဲဒီး ပှၤဘၣ်တၢ်စိာ်မၢကဲကုၢ်အဂၤတဖၣ်ဟးထီၣ်လၢကီၢ်ဘၤဘူၤလိၣ်ဒီး ဟဲက့ၤဆူဝ့ၢ်ယရူၤၡလ့ၣ်န့ၣ်လီၤ.