လံာ်ယဃ့းစက့လး 32 - Sgaw Karen Common Bible

ကီၢ်အဲၤကူပတူးအစီၤပၤဘၣ်တၢ် ထိၣ်သတြီၤအီၤဒီးသမၣ်တဘိ

¹ လၢတၢ်စိာ်မၢကဲကုၢ်ပှၤပှဲၤထီၣ်တဆံခံနံၣ်တနံၣ်လါတဆံခံလါတလါ ထီၣ်တသီန့ၣ်, ယွၤကတိၤတ့ၢ်တၢ်ဒီးယၤလီၤ.

² အဝဲစံးဝဲဒၣ်, “ပှၤကညီလၢအသံသ့ဧၢ, ဟ့ၣ်ကီၢ်အဲၤကူပတူး အစီၤပၤလၢတၢ်ဟ့ၣ်ပလီၢ်သမှံၤသပှၢ်တမံၤအံၤတက့ၢ်. ဟ့ၣ်အီၤ လၢယတၢ်ကစီၣ်အံၤန့ၣ်တက့ၢ်. နမၤနသးဒ်ခ့ယုၢ်တဒုလၢပှၤ ကလုာ်တဖၣ်အကျါအသိး, ဘၣ်ဆၣ်နလီၤဂာ်ဒိၣ်ဒၣ်တၢ်တက့ၢ်ဒီး သမၣ်တဘိလၢအလဲၤတၢ်သီၣ်ပြူၤပြူၤလၢထံကျိပူၤအသိး န့ၣ်လီၤ. နမၤဒုထီၣ်ထံလၢနခိၣ်ဒီးမၤဘၣ်အၢထံကျိတဖၣ်န့ၣ်လီၤ.

³ ဖဲပှၤကလုာ်တဖၣ်အါကလုာ်ပာ်ဖှိၣ်သကိးအသးန့ၣ်, ယကဖီၣ်နၤ လၢယပှာ်ပူၤဒီးပျဲအဝဲသ့ၣ်တွံၢ်ထုးထီၣ်ပှာ်န့ၣ်ဆူထံကၢၢ်ခိၣ်န့ၣ်လီၤ.

⁴ ယကကွံာ်လီၤနၤလၢဟီၣ်ခိၣ်လိၤဒီးဟဲစိာ်ဃီၤကယဲၢ်ထိၣ်တဖၣ်ဒီး ဆၣ်ဖိကီၢ်ဖိတဖၣ်လၢဟီၣ်ခိၣ်လၢကအီၣ်နၤအဂီၢ်လီၤ.

⁵ ယကမၤဘၢကစၢၢ်ကလိတဖၣ်ဒီးတြီၤတဖၣ်လၢနစိၣ်လၢအအုၣ် ကျၣ်န့ၣ်လီၤ.

⁶ ယကလူလီၤနသွံၣ်တဖၣ်တုၤလၢအရၤလီၤအသးလၢကစၢၢ်ကလိ တဖၣ်အဖီခိၣ်ဒီးမၤပှဲၤထံဖိကျိတဖၣ်န့ၣ်လီၤ.

⁷ ဖဲယမၤဟးဂီၤကွံာ်နၤန့ၣ်, ယကကးဘၢမူကပိာ်လိၤဒီးတြီတံာ် ဃးဆၣ်ဧိၤဖီဧိၤတဖၣ်န့ၣ်လီၤ. မုၢ်န့ၣ်ကအိၣ်ခူသူၣ်လၢတၢ်အၢၣ်တဖၣ် အလီၢ်ခံဒီးလါန့ၣ်တဟ့ၣ်ထီၣ်ဘၣ်အတၢ်ကပီၤဘၣ်.

⁸ ယကမၤလီၤပံာ်ကွံာ်မူခိၣ်အတၢ်ကပီၤတဖၣ်ဒီးမၤခံးလီၤနဟီၣ်ခိၣ် ဒီဘ့ၣ်ညါန့ၣ်လီၤ. ယၤ, ယွၤ, ပၢဘၣ်တၢ်ခဲလၢာ်ကစၢ် ကတိၤတ့ၢ်လံတၢ်လံ.

⁹ ပှၤကလုာ်တဖၣ်အါကလုာ်ကဘၣ်ကိၢ်ဘၣ်ဂီၤ, ဖဲယရၤလီၤ တၢ်ကစီၣ်ဘၣ်ဃးဒီးနတၢ်ဟးဂီၤအဂ့ၢ်ဆူထံကီၢ်တဖၣ်လၢ နတနၢ်ဟူဘၣ်တ့ၢ်အဂ့ၢ်နီတဘျီဘၣ်န့ၣ်လီၤ.

¹⁰ တၢ်လၢယမၤဘၣ်နၤတဖၣ်န့ၣ်ကမၤဖုးမၤပျီၢ်ပှၤကလုာ်တဖၣ် န့ၣ်လီၤ. ဖဲယမၤဟူးဝးထီၣ်ယနးန့ၣ်စီၤပၤတဖၣ်ကကနိးကစုာ် လၢတၢ်ပျံၤတၢ်ဖုးအပူၤန့ၣ်လီၤ. မုၢ်တနံၤလၢနလီၤကွံာ်န့ၣ်, အဝဲသ့ၣ်ခဲလၢာ်ကကနိးကစုာ်လၢတၢ်ပျံၤတၢ်ဖုးအပူၤလၢ အသးသမူဒၣ်ဝဲအဂီၢ်န့ၣ်လီၤ.”

¹¹ ယွၤပၢဘၣ်တၢ်ခဲလၢာ်ကစၢ်စံးဘၣ်ကီၢ်အဲၤကူပတူးအစီၤပၤ, “နကဘၣ်ကွၢ်ဆၢၣ်မဲာ်ဒီးကီၢ်ဘၤဘူၤလိၣ်အစီၤပၤအနးန့ၣ်လီၤ.

¹² ယကပျဲပှၤကလုာ်အအၢအသီအသုးဖိတဖၣ်ထုးထီၣ်အနးတဖၣ်ဒီး မၤသံကယဲၢ်နပှၤဂီၢ်မုၢ်ခဲလၢာ်န့ၣ်လီၤ. နပှၤဂီၢ်မုၢ်ခဲလၢာ်ဒီး တၢ်ခဲလၢာ်လၢနပာ်ကဖၢလၢနသးလၢအဃိန့ၣ်ကဘၣ်တၢ်မၤဟးဂီၤ ကွံာ်အီၤန့ၣ်လီၤ.

¹³ ယကမၤသံကွံာ်နဂီၤဘုၣ်ဂီၤဖံးတဖၣ်လၢကယဲၢ်ထံပူၤအဃၢၤန့ၣ်လီၤ. ပှၤကညီမ့ၢ်ဂ့ၤ, ဂီၤဘုၣ်ဂီၤဖံးမ့ၢ်ဂ့ၤလၢအကမၤဒုထီၣ်ထံတအိၣ် လၢၤဘၣ်ဝဲဘၣ်.

¹⁴ ယကပျဲနထံတဖၣ်လီၤဒးဒီးဆှံထီၣ်က့ၤဝဲဒီးနထံကျိတဖၣ်ကယွၤလီၤ ဝဲဂၢၢ်ဂၢၢ်န့ၣ်လီၤ. ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.

¹⁵ ဖဲယဒုးအိၣ်သယုၢ်အိၣ်ကလီကီၢ်အဲၤကူပတူးဒီးမၤဟးဂီၤကယဲၢ် ပှၤလၢအအိၣ်ဆိးဖဲန့ၣ်ခဲလၢာ်ဒီးအဝဲသ့ၣ်ကသ့ၣ်ညါဝဲလၢယမ့ၢ် ယွၤန့ၣ်လီၤ.

¹⁶ တၢ်ဟ့ၣ်ပလီၢ်သမှံၤသပှၢ်တမံၤအံၤကကဲထီၣ်တၢ်သံအတၢ်သးဝံၣ် တယုၢ်န့ၣ်လီၤ. ပှၤကလုာ်တဖၣ်အပှၤပိာ်မုၣ်တဖၣ်ကသးဝံၣ်တၢ်လၢ တၢ်ဟီၣ်ဘၣ်ယၢၤဘၣ်တၢ်လၢကီၢ်အဲၤကူပတူးဒီးအပှၤဂီၢ်မုၢ်အဃိ န့ၣ်လီၤ. ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.”

ပှၤသံတဖၣ်အကီၢ်

¹⁷ လၢပဘၣ်တၢ်စိာ်မၢကဲကုၢ်ပှၤပှဲၤထီၣ်တဆံခံနံၣ်တနံၣ်လါအခီၣ်ထံး တလါထီၣ်တဆံယဲၢ်သီတသီန့ၣ်ယွၤကတိၤတ့ၢ်တၢ်ဒီးယၤလီၤ.

¹⁸ အဝဲစံးဝဲဒၣ်, “ပှၤကညီလၢအသံသ့ဧၢ, ဘၣ်မိၣ်ဘၣ်မးလၢ ကယဲၢ်ပှၤကီၢ်အဲၤကူပတူးဖိအါဂၤအဂီၢ်တက့ၢ်. ဆှၢလီၤ အဝဲသ့ၣ်ဃုာ်ဒီးပှၤကလုာ်ဂံၢ်ဆူၣ်ဘါဆူၣ်အဂၤတဖၣ်ဆူတၢ်သံ အကီၢ်ပူၤန့ၣ်တက့ၢ်.

¹⁹ စံးဘၣ်အဝဲသ့ၣ်တက့ၢ်. မ့ၢ်သုဆိကမိၣ်လၢသုဃံလၤဒိၣ်န့ၢ် ဒံးပှၤအဂၤတက့ၢ်ဧါ. သုကလဲၤလီၤဆူတၢ်သံအကီၢ် ပူၤဒီးမံလီၤဖဲန့ၣ်လၢပှၤလၢအယွၤတအိၣ်တဖၣ်အကျါန့ၣ်လီၤ.

²⁰ ကီၢ်အဲၤကူပတူးအပှၤဂီၢ်မုၢ်ကလီၤဃံၤဃုာ်ဒီးပှၤတဖၣ်လၢ အဘၣ်တၢ်မၤသံအီၤလၢတၢ်ဒုးအပူၤန့ၣ်လီၤ. နးတဘ့ၣ်အိၣ် ကတဲာ်ကတီၤအသးလၢကမၤသံအဝဲခဲလၢာ်န့ၣ်လီၤ.

²¹ ပှၤဒူပှၤဃိၤအဒိၣ်ကတၢၢ်တဖၣ်ဒီးပှၤတဖၣ်လၢအဒုးတၢ်လၢ ပှၤအဲၤကူပတူးဖိအအိၣ်တကပၤန့ၣ်တူၢ်လိာ်မုာ်ပှၤအဲၤကူပတူးဖိ တဖၣ်ဆူတၢ်သံအကီၢ်ပူၤန့ၣ်လီၤ. အဝဲသ့ၣ်ကိးထီၣ်ဝဲ, ပှၤတဖၣ် လၢအယွၤတအိၣ်လၢအဘၣ်တၢ်မၤသံအီၤလၢတၢ်ဒုးအပူၤန့ၣ် ဟဲလီၤဝဲဖဲအံၤ, ဒီးမံလီၤဝဲဖဲအံၤန့ၣ်လီၤ.

²² ကီၢ်အၤၡူၢ်အိၣ်ဖဲန့ၣ်ဃုာ်ဒီးအသုးဖိတဖၣ်အသွၣ်ခိၣ်တဖၣ်လၢ အအိၣ်ဝးတရံးအီၤန့ၣ်လီၤ. အဝဲသ့ၣ်ခဲလၢာ်ဘၣ်တၢ်မၤသံအီၤ လၢတၢ်ဒုးအပူၤ,

²³ ဒီးအဝဲသ့ၣ်အသွၣ်ခိၣ်တဖၣ်အိၣ်ဝဲလၢတၢ်သံအကီၢ်အယိာ်ကတၢၢ် အလီၢ်န့ၣ်လီၤ. အဝဲအပှၤသုးဖိခဲလၢာ်လီၤဃံၤတ့ၢ်လၢတၢ်ဒုး အပူၤဒီးအဝဲသ့ၣ်အသွၣ်ခိၣ်တဖၣ်အိၣ်ဝးတရံးအဝဲအသွၣ်ခိၣ်အပူၤ န့ၣ်လီၤ. တဘျီန့ၣ်အဝဲသ့ၣ်မ့ၢ်ဒၣ်လဲာ်ပှၤလၢအမၤပျံၤမၤဖုး ပှၤမူတဖၣ်အကီၢ်န့ၣ်လီၤ.

²⁴ ကီၢ်ဧ့ၤလၣ်အိၣ်ဖဲန့ၣ်ဃုာ်ဒီးအသုးဖိတဖၣ်အသွၣ်ခိၣ်လၢအအိၣ် ဝးတရံးအီၤန့ၣ်လီၤ. အဝဲသ့ၣ်ခဲလၢာ်ဘၣ်တၢ်မၤသံအီၤလၢ တၢ်ဒုးအပူၤဒီးအဝဲလဲၤလီၤဝဲဒၣ်ဆူပှၤသံတဖၣ်အကီၢ်ပူၤတအိၣ် ဘၣ်ဒီးတၢ်ဒိးဘၣ်တၢ်ကူးတရံးဘၣ်န့ၣ်လီၤ. ဖဲအအိၣ်မူဒံးအ ခါန့ၣ်အဝဲသ့ၣ်, ရၤလီၤတၢ်မၤပျံၤမၤဖုး, ဘၣ်ဆၣ်ခဲအံၤအဝဲသ့ၣ် သံကွံာ်ဝဲဒၣ်လၢတၢ်လီၤမဲာ်ဆှးအပူၤန့ၣ်လီၤ.

²⁵ ကီၢ်ဧ့ၤလၣ်မံလီၤလၢပှၤတဖၣ်လၢအဘၣ်တၢ်မၤသံလၢတၢ်ဒုး အပူၤအကျါ, ဒီးအဝဲအပှၤသုးဖိတဖၣ်အသွၣ်ခိၣ်န့ၣ်, အိၣ်ဝး တရံးအီၤန့ၣ်လီၤ. အဝဲသ့ၣ်ခဲလၢာ်တဒိးဘၣ်တၢ်ကူးတရံး အီၤဘၣ်, ခဲလၢာ်န့ၣ်ဘၣ်တၢ်မၤသံအီၤလၢတၢ်ဒုးအပူၤန့ၣ်လီၤ. ဖဲအိၣ်မူအခါအဝဲသ့ၣ်ရၤလီၤတၢ်မၤပျံၤမၤဖုး, ဘၣ်ဆၣ်ခဲအံၤ သံကွံာ်ဝဲလၢတၢ်လီၤမဲာ်ဆှးအပူၤအိၣ်ဒီးတၢ်ဟဲဝံတမံၤဃီဒီး ပှၤတဖၣ်လၢအဘၣ်တၢ်မၤသံအီၤလၢတၢ်ဒုးအပူၤန့ၣ်လီၤ.

²⁶ ဝ့ၢ်မ့ၤၡးဒီးဝ့ၢ်တူၤဘလးတဖၣ်အိၣ်ဖဲန့ၣ်, ဃုာ်ဒီးအသုးဖိတဖၣ် အသွၣ်ခိၣ်လၢအိၣ်ဝးတရံးအဝဲသ့ၣ်န့ၣ်လီၤ. အဝဲသ့ၣ်တဖၣ် ခဲလၢာ်တဒိးဘၣ်တၢ်ကူးတရံးအီၤဘၣ်, ခဲလၢာ်ဘၣ်တၢ်မၤသံအီၤ တၢ်ဒုးအပူၤန့ၣ်လီၤ. တဘျီန့ၣ်အဝဲသ့ၣ်မၤပျံၤမၤဖုးဒၣ်လဲာ် ပှၤလၢအမူတဖၣ်လီၤ.

²⁷ အဝဲသ့ၣ်တဖၣ်တဘၣ်တၢ်ဟ့ၣ်အီၤလၢတၢ်မၤလၤကပီၤအတၢ်ခူၣ်လီၤ ဘျၢလီၤဒ်ပှၤဒူပှၤဃိၤလၢပျၢၤတဖၣ်အသိးလၢအလဲၤထီၣ်ဆူ တၢ်သံအကီၢ်ပူၤန့ၣ်ဘၣ်. ပှၤဒူပှၤဃိၤတဖၣ်န့ၣ်ကံာ်တူာ်အသး လၢလၢပှဲၤပှဲၤ, အဝဲသ့ၣ်အနးတဖၣ်ဘၣ်တၢ်ပာ်လီၤအီၤလၢအခိၣ် တဖၣ်အဖီလာ်ဒီးအကတီၤတဖၣ်လၢအမိၢ်ပှၢ်တဖၣ်အလိၤန့ၣ်လီၤ. ပှၤဒူပှၤဃိၤတဖၣ်အံၤတဘျီန့ၣ်အိၣ်ဒီးအစိကမီၤလၢလၢပှဲၤပှဲၤ လၢကမၤပျံၤပှၤမူတဖၣ်န့ၣ်လီၤ.

²⁸ တၢ်န့ၣ်မ့ၢ်တၢ်လၢပှၤအဲၤကူပတူးဖိတဖၣ်ကဘၣ်တၢ်မၤလီၤသဘှံး အီၤဒီးမံလီၤလၢပှၤတဖၣ်လၢအတဒိးဘၣ်တၢ်ကူးတရံး, လၢ အဘၣ်တၢ်မၤသံအီၤလၢတၢ်ဒုးအပူၤအကျါဒ်လဲၣ်န့ၣ်လီၤ.

²⁹ ကီၢ်အဒိၣ်အိၣ်ဖဲန့ၣ်ဃုာ်ဒီးအစီၤပၤတဖၣ်ဒီးအပှၤပၢတၢ်တဖၣ် န့ၣ်လီၤ. အဝဲသ့ၣ်တဖၣ်မ့ၢ်သုးဖိအဂံၢ်ဆူၣ်ဘါဆူၣ်, ဘၣ်ဆၣ် ခဲအံၤအဝဲသ့ၣ်မံလီၤလၢပှၤသံတဖၣ်အကီၢ်ပူၤဃုာ်ဒီးပှၤတဖၣ်လၢ အတဒိးဘၣ်တၢ်ကူးတရံးလၢအဘၣ်တၢ်မၤသံလၢတၢ်ဒုးအပူၤ န့ၣ်လီၤ.

³⁰ ကယဲၢ်အပဒိၣ်ဖးဒိၣ်တဖၣ်လၢကလံၤစိးအိၣ်ဖဲန့ၣ်ဒီးပှၤစံဒိၣ်ဖိတဖၣ် စ့ၢ်ကီးန့ၣ်လီၤ. တဘျီန့ၣ်အဝဲသ့ၣ်အစိကမီၤရၤလီၤတၢ်မၤပျံၤ မၤဖုးဘၣ်ဆၣ်ခဲအံၤအဝဲသ့ၣ်လဲၤလီၤလၢတၢ်လီၤမဲာ်ဆှးအပူၤ ဃုာ်ဒီးပှၤတဖၣ်လၢအဘၣ်တၢ်မၤသံအီၤလၢတၢ်ဒုးပူၤဒီးမံလီၤတ့ၢ် လၢတၢ်အိၣ်ဘှံးအပူၤတအိၣ်ဒီးတၢ်ဒိးဘၣ်တၢ်ကူးတရံးဘၣ်န့ၣ်လီၤ. အဝဲသ့ၣ်ဒိးဘၣ်တၢ်မဲာ်ဆှးတမံၤဃီဒ်သိးဒၣ်ပှၤတဖၣ် လၢအလဲၤလီၤတ့ၢ်ဆူတၢ်သံအကီၢ်ပူၤန့ၣ်လီၤ.

³¹ တၢ်ထံၣ်ဘၣ်ပှၤတဖၣ်လၢအဘၣ်တၢ်မၤသံအီၤလၢတၢ်ဒုးပူၤန့ၣ် ကမ့ၢ်တၢ်မၤမုာ်တမံၤလၢကီၢ်အဲၤကူပတူးအစီၤပၤဒီးအသုးမုၢ် အဂီၢ်န့ၣ်လီၤ. ယွၤပၢဘၣ်တၢ်ခဲလၢာ်ကစၢ်စံးတၢ်အံၤလီၤ.

³² ယမၢတ့ၢ်ကီၢ်အဲၤကူပတူးအစီၤပၤလၢကမၤပျံၤမၤဖုးပှၤမူတဖၣ်, ဘၣ်ဆၣ်အဝဲဒီးအသုးမုၢ်ကဘၣ် တၢ်မၤသံအီၤဒီးမံလီၤဝဲလၢတၢ်အိၣ်ဘှံးအပူၤဃုာ်ဒီးကယဲၢ် ပှၤလၢအတဒိးဘၣ်တၢ်ကူးတရံးတဖၣ်လၢအသံလၢတၢ်ဒုးအပူၤန့ၣ် လီၤ.” ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.