လံာ်ယဃ့းစက့လး 1 - Sgaw Karen Common Bible

စီၤယဃ့းစက့လးအတၢ်ထံၣ်လၢညါခီ အဆိကတၢၢ်တမံၤဘၣ်ဃးကစၢ်ယွၤ ( ၁:၁-၇:၂၇ ) ကစၢ်ယွၤအလီၢ်ပစိာ်

¹ လၢသၢဆံနံၣ်တနံၣ်, လွံၢ်လါတလါ, လါထီၣ်ယဲၢ်သီတသီန့ၣ်, ယၤ, စီၤဘူၤစံအဖိခွါ, ပှၤလုၢ်တၢ်အခိၣ်စီၤယဃ့းစက့လး အိၣ်ဆိးဒီးပှၤယူဒၤဖိလၢတၢ်စိာ်မၢကဲကုၢ်အီၤတဖၣ်လၢထံ ကျိကဘၢ်အနံၤလၢကီၢ်ဘၤဘူၤလိၣ်အပူၤလီၤ. မူကပိာ်လိၤအိးထီၣ်အသးဒီးယထံၣ်တၢ်ထံၣ်လၢညါခီတမံၤဘၣ်ဃး ဒီးကစၢ်ယွၤလီၤ.

² (တၢ်အံၤမ့ၢ်ဖဲစီၤပၤယဟိၤယါခံၣ်ဘၣ်တၢ်စိာ်မၢကဲကုၢ်အီၤ ပှဲၤထီၣ်ယဲၢ်နံၣ်တနံၣ်လီၤ.)

³ ဖဲန့ၣ်လၢကီၢ်ဘၤဘူၤလိၣ်အပူၤ, လၢထံကျိကဘၢ်အနံၤန့ၣ်, ယနၢ်ဟူယွၤကတိၤတၢ်ဒီးယၤလီၤ. ဒီးယကလၢၢ်ဘၣ်အစိကမီၤလီၤ.

⁴ ယကွၢ်ထီၣ်တၢ်ဒီးထံၣ်ဘၣ်ကလံၤမုၢ်ဟဲထီၣ်လၢကလံၤစိးတခီလီၤ. လီဝၢ်ထီၣ်အဒံးလၢတၢ်အၢၣ်ဖးဒိၣ်တလိၣ်အလိၤဒီးမူကပိာ်လိၤဝး တရံးအီၤန့ၣ်ကပြုၢ်ကပြီၤထီၣ်ဝဲလီၤ. ဖဲလီၢ်ဝၢ်ထီၣ်အဒံးအလီၢ်န့ၣ်, တၢ်ကပီၤထီၣ်ဝဲတမံၤဒ်တိၢ်ဘီအသိးန့ၣ်လီၤ.

⁵ လၢကလံၤမုၢ်အသးကံၢ်ပူၤန့ၣ်, ယထံၣ်ဘၣ်တၢ်လီၤဂာ်ဒီးတၢ်ဘၣ်တ့ အမူလွံာ်ဂၤလၢအဖျါလီၤဂာ်ဒီးပှၤကညီအက့ၢ်အဂီၤ,

⁶ ဘၣ်ဆၣ်ဒီး, အဝဲသ့ၣ်တဂၤဘၣ်တဂၤန့ၣ်, အိၣ်ဒီးအမဲာ်သၣ်လွံၢ်ဘ့ၣ် ဒီးအဒံးဆ့လွံၢ်ခီန့ၣ်လီၤ.

⁷ အခိၣ်တဖၣ်ဘျၢဝဲ, ဒီးအဝဲသ့ၣ်အိၣ်ဒီးခီၣ်မ့ၣ်တဖၣ်ဒ်ကျီၢ်ဖါတ ဒုအသိးဒီးကပြုၢ်ကပြီၤထီၣ်ဝဲဒ်တိၢ်ဘီလၢအဘၣ်တၢ်ထူးဘျ့ တ့ၢ်အီၤအသိးန့ၣ်လီၤ.

⁸ လၢအမဲာ်သၣ်လွံၢ်ဘ့ၣ်ဒီးအဒံးလွံၢ်ခီအမဲာ်ညါ, အဝဲသ့ၣ်တဂၤဘၣ်တဂၤစုာ်စုာ်အိၣ်ဒီးပှၤကညီအစုလွံၢ်ခီ, လၢအစုတခီစုာ်စုာ်အိၣ်လၢအဒံးဆ့တခီစုာ်စုာ်အဖီလာ်န့ၣ် လီၤ.

⁹ တၢ်ဘၣ်တ့တဂၤစုာ်စုာ်အဒံးခံခီသလၣ်ထီၣ်အသးဒ်သိးတၢ်ဘၣ် တ့တဖၣ်ကဒုးကဲထီၣ်တၢ်အက့ၢ်အဂီၤလွံၢ်ကပၤလွံၢ်နၢၣ်ဃူလိာ် အသးလၢအဒံးထိးနါတဖၣ်ထိးလိာ်အသးန့ၣ်လီၤ. ဖဲအဝဲသ့ၣ်သုးအသးဒီး, သုးအသးတကရူၢ်ဃီဒီးတဃၣ်အနီၢ်ခိ တဖၣ်ဘၣ်.

¹⁰ တၢ်ဘၣ်တ့အမူတဂၤစုာ်စုာ်အိၣ်ဒီးအမဲာ်သၣ်လၢအလီၤဆီလိာ် အသးလွံၢ်ဘ့ၣ်လီၤ. ပှၤကညီအမဲာ်သၣ်လၢတၢ်မဲာ်ညါတကပၤ, ခ့ယုၢ်အမဲာ်သၣ်လၢစုထွဲတကပၤ, ကျီၢ်ဖါအမဲာ်သၣ်လၢစုစ့ၣ် တကပၤ, ဒီးလံာ်ကြီကြၣ်အမဲာ်သၣ်လၢအလီၢ်ခံတကပၤန့ၣ်လီၤ.

¹¹ တၢ်ဘၣ်တ့တဂၤစုာ်စုာ်အဒံးခံခီဘၣ်တၢ်ယူာ်ထီၣ်အီၤတုၤအထိး ဘၣ်တၢ်ဘၣ်တ့လၢအကပၤအဒံးထိးနါ, ဒီးအဒံးအဂၤခံခီန့ၣ်ကျၢၢ်ဘၢအနီၢ်ခိတဖၣ်န့ၣ်လီၤ.

¹² တၢ်ဘၣ်တ့တဂၤစုာ်စုာ်န့ၣ်ကွၢ်ဆၢညါတၢ်ဆူတၢ်အကျိၤလွံၢ်ကပၤ လိာ်, သတးဒီးပှၤတကရူၢ်န့ၣ်လဲၤဝဲဖဲအအဲၣ်ဒိးလဲၤဝဲသ့, ဒီးတလိၣ်အဃၣ်အသးဘၣ်လီၤ.

¹³ လၢတၢ်ဘၣ်တ့တဖၣ်အကျါအံၤ, တၢ်အိၣ်ဝဲတမံၤလၢအအိၣ်ဖျါလီၤဂာ်ဒီးဆှီလၢအကဲၤကပီၤ, ဒီးသုးအသးတပယူာ်ဃီန့ၣ်လီၤ. မ့ၣ်အူကကဲၤကပီၤထီၣ်ဒီးဒုးကပြုၢ်ထီၣ်လီဝၢ်ဒံးန့ၣ်လီၤ.

¹⁴ တၢ်ဘၣ်တ့တဖၣ်အကစၢ်ဒၣ်ဝဲဃ့ၢ်သဘျိၣ်ဆူန့ၣ်ဆူအံၤချ့ဝဲဒ်လီ ဝၢ်ဒံးအသိးန့ၣ်လီၤ.

¹⁵ ဖဲယကွၢ်တၢ်ဘၣ်တ့လွံၢ်ဂၤအံၤန့ၣ်, ယထံၣ်ဘၣ်လ့ၣ်ဖံဘၣ်လွံၢ်ခါ လၢအထိးလီၤဘၣ်ဟီၣ်ခိၣ်, တခါအိၣ်လၢတၢ်ဘၣ်တ့တဂၤအကပၤတခီစုာ်စုာ်န့ၣ်လီၤ.

¹⁶ လ့ၣ်ဖံဘၣ်လွံၢ်ခါလၢာ်အံၤလီၤဂာ်လိာ်အသးလီၤ. တခါစုာ်စုာ်ကပီၤထီၣ်ဝဲဒ်လၢၢ်လုၢ်ဒိၣ်ပှ့ၤဒိၣ်တဖျၢၣ်အသိး, ဒီးတခါစုာ်စုာ်လဲၤခီတူာ်လိာ်အသးလၢအဂၤတခါအပူၤ, မၤအသးဒ်လ့ၣ်ဖံဘၣ်တခါအိၣ်ဝဲလၢလ့ၣ်ဖံဘၣ်အဂၤတခါအပူၤ အသိး,

¹⁷ ဒ်သိးလ့ၣ်ဖံဘၣ်တဖၣ်သုးအသးဆူတၢ်အကျိၤလွံၢ်ကပၤအကျါ တကျိၤကျိၤကသ့ဝဲအဂီၢ်န့ၣ်လီၤ.

¹⁸ လ့ၣ်ဖံဘၣ်အကနူၤတဖၣ်အိၣ်ပှဲၤဒီးမဲာ်ချံတဖၣ်န့ၣ်လီၤ.

¹⁹ ဖဲတၢ်ဘၣ်တ့တဖၣ်သုးအသးတဘျီလၢ်လၢ်န့ၣ်, လ့ၣ်ဖံဘၣ်တဖၣ်သုးဃုာ်အသးဒီးအီၤ, ဒီးတၢ်ဘၣ်တ့အသးတဖၣ်မ့ၢ်ဂဲၤထၢၣ်လၢဟီၣ်ခိၣ်ဒီး, လ့ၣ်ဖံဘၣ်တဖၣ်ဂဲၤထၢၣ်ဝဲစ့ၢ်ကီးလီၤ.

²⁰ တၢ်ဘၣ်တ့တဖၣ်အံၤလဲၤဝဲဖဲအအဲၣ်ဒိးလဲၤဝဲ, ဒီးလ့ၣ်ဖံဘၣ်တဖၣ်မၤတၢ်ဒ်တၢ်ဘၣ်တ့တဖၣ်မၤတ့ၢ်ဝဲအသိး, မ့ၢ်လၢတၢ်ဘၣ်တ့တဖၣ်ပၢဘၣ်အဝဲသ့ၣ်အဃိန့ၣ်လီၤ.

²¹ အဃိဒီး, တဘျီလၢ်လၢ်ဖဲတၢ်ဘၣ်တ့တဖၣ်သုးအသးမ့ၢ်ဂ့ၤ, ဆိကတီၢ်မ့ၢ်ဂ့ၤ, ဆၢထၢၣ်လၢကလံၤကျါမ့ၢ်ဂ့ၤန့ၣ်, လ့ၣ်ဖံဘၣ်တဖၣ်မၤထွဲဝဲဒ်န့ၣ်အသိးလီၤ.

²² လၢတၢ်ဘၣ်တ့တဖၣ်အခိၣ်အဖီခိၣ်န့ၣ်, တၢ်အိၣ်ဝဲတမံၤလၢအဖျါလီၤ ဂာ်ဒီးတၢ်အခိၣ်ဒုးဖျၢၣ်သလၢၣ်တခါလၢအဘၣ်တၢ်မၤအီၤလၢလၢၢ်ဖျါ ကလၤလၢအဆဲးကပြုၢ်န့ၣ်လီၤ.

²³ ဖဲန့ၣ်လၢတၢ်အခိၣ်ဒုးဖျၢၣ်သလၢၣ်အဖီလာ်န့ၣ်, တၢ်ဘၣ်တ့တဖၣ်ဆၢထၢၣ်ဝဲ, တဂၤစုာ်စုာ်သလၣ်ထီၣ်အဒံးခံခီဆူ အဂၤတဂၤလၢအကပၤဒီးမၤဘၢအနီၢ်ကစၢ်ဒီးအဒံးအဂၤခံခီန့ၣ် လီၤ.

²⁴ ယနၢ်ဟူအဝဲသ့ၣ်အဒံးတဖၣ်အတၢ်သီၣ်လၢ အသီၣ်လီၤဂာ်ဒ်ပီၣ်လဲၣ်အသီၣ်ရုၢ်ရုၢ်အသိး, လီၤဂာ်ဒီးသုးမုၢ်ဖးဒိၣ်တဖုအတၢ်သီၣ်, လီၤဂာ်ဒီးကစၢ်ယွၤသ့ တၢ်လၢာ်အကလုၢ်န့ၣ်လီၤ. ဖဲအဝဲသ့ၣ်ဆိကတီၢ်ယူၤဝဲဒီး, အဝဲသ့ၣ်ကချံးလီၤအဒံးတဖၣ်,

²⁵ ဘၣ်ဆၣ်ဒီးတၢ်အသီၣ်အိၣ်ဒံးဝဲလၢအဟဲလၢတၢ်အခိၣ်ဒုးဖျၢၣ် သလၢၣ်အဖီခိၣ်လၢအအိၣ်လၢအဝဲသ့ၣ်အခိၣ်တဖၣ်အဖီခိၣ်န့ၣ်လီၤ.

²⁶ လၢတၢ်အခိၣ်ဖျၢၣ်သလၢၣ်အဖီခိၣ်န့ၣ်, တၢ်အိၣ်ဝဲတမံၤလၢ အဖျါလီၤဂာ်ဒီးလီၢ်ပစိာ်တခါလၢအဘၣ်တၢ်မၤအီၤ လၢတၢ်မျၢ်နံၤလါအဲး, ဒီးတၢ်အက့ၢ်အဂီၤတမံၤလၢအလီၤဂာ်ဒီးပှၤကညီတဂၤဆ့ၣ်နီၤဝဲ လၢလီၢ်ပစိာ်န့ၣ်အဖီခိၣ်လီၤ.

²⁷ က့ၢ်ဂီၤအံၤဖျါကပီၤထီၣ်ဝဲဒ်တိၢ်ဘီလၢအအိၣ်လၢမ့ၣ်အူကဲၤ ကဖးအပူၤအသိးန့ၣ်လီၤ. ကပီၤထီၣ်ဝဲဝးဝးလၢတၢ်ကပီၤဆှံ,

²⁸ အိၣ်ဒီးတၢၢ်ကွဲၤအလွဲၢ်တဖၣ်ခဲလၢာ်လၢအပူၤန့ၣ်လီၤ. အဝဲအံၤမ့ၢ်တၢ်ကပီၤလၢအဆဲးကပြုၢ်ကပြီၤလၢအဒုးနဲၣ်ယွၤ အတၢ်အိၣ်ဝဲန့ၣ်လီၤ.