လံာ်တၢ်ဟးထီၣ်ကွံာ် 40 - Sgaw Karen Common Bible

တၢ်ထီထီၣ်ဒီးတၢ်ပာ်စီဆှံယွၤအိၣ်ဝဲ ဆိးဝဲအဒဲစီဆှံ

^1-2 ယွၤစံးဘၣ်စီၤမိၤၡ့, လၢလါအခီၣ်ထံးတလါထီၣ်တသီန့ၣ်ထီထီၣ်ယွၤအိၣ်ဝဲဆိးဝဲအဒဲစီဆှံတက့ၢ်.

³ ဒၢနုာ်လီၤတၢ်အၢၣ်လီၤအီလီၤအတလါစီဆှံလၢအအိၣ်ဒီးတၢ်မၤ လိာ်အထံၣ်တဆံန့ၣ်လၢအပူၤ, ဒီးဘျးထီၣ်ယၣ်ဘျးသဒၢတၢ်လၢအမဲာ်ညါတက့ၢ်.

⁴ ဟဲစိာ်နုာ်စီၢ်နီၤခိၣ်ဒီးပာ်ထီၣ်တၢ်အပီးအလီလၢအလိၤတက့ၢ်. ဟဲစိာ်နုာ်စ့ၢ်ကီးတၢ်ပာ်ထီၣ်မ့ၣ်အူဒၢအလီၢ်ဒီးပာ်ထီၣ်မ့ၣ်အူဒၢတဖၣ်လၢအလိၤန့ၣ်တက့ၢ်.

⁵ ပာ်လီၤတၢ်လုၢ်ထီၣ်ထူလၢတၢ်ဆိၣ်ကဲၤတၢ်နၢမူအဂီၢ်လၢတၢ်အၢၣ် လီၤအီလီၤတလါစီဆှံအမဲာ်ညါဒီးဘျးထီၣ်ယၣ်ဘျးသဒၢတၢ်လၢဒဲစီဆှံအကျဲစၢၤန့ၣ်တက့ၢ်.

⁶ ပာ်လီၤတၢ်လုၢ်လီၢ်လၢတၢ်လုၢ်မ့ၣ်အူတဖၣ်အဂီၢ်လၢဒဲစီဆှံ အမဲာ်ညါတက့ၢ်.

⁷ ပာ်လီၤသရာ်လၢတၢ်သ့စီအဂီၢ်ဖဲဒဲစီဆှံဒီးတၢ်လုၢ်လီၢ်အဘၢၣ် စၢၤဒီးမၤပှဲၤအီၤလၢထံတက့ၢ်.

⁸ ဘျးထီၣ်ယၣ်ဘျးသဒၢဝးတရံးဒဲစီဆှံဒီးဘျးလီၤယၣ်ဘျးသဒၢ ဖဲအကျဲစၢၤန့ၣ်တက့ၢ်.

⁹ အန့ၣ်ဝံၤဒီးပာ်စီဆှံထီၣ်ဒဲစီဆှံဒီးကယဲၢ်အတၢ်ပီးတၢ်လီ ခဲလၢာ်ခီဖျိတၢ်ဖှူအီၤလၢသိစီဆှံ, ဒီးကစီဆှံဝဲလီၤ.

¹⁰ မၤကဒီးတစု, ပာ်စီဆှံထီၣ်တၢ်လုၢ်လီၢ်ဒီးကယဲၢ်အတၢ်ပီးတၢ် လီခဲလၢာ်ခီဖျိတၢ်ဖှူအီၤဒီးကစီဆှံဝဲလၢလၢပှဲၤပှဲၤန့ၣ်လီၤ.

¹¹ ပာ်စီဆှံထီၣ်စ့ၢ်ကီးသရာ်လၢတၢ်သ့စီအဂီၢ်ဒီးအခီၣ်ထံးဒ်န့ၣ်အသိးတက့ၢ်.

¹² ဟဲကိးစီၤအၤဟရိၣ်ဒီးအဖိခွါတဖၣ်ဆူဒဲစီဆှံအကျဲစၢၤဒီး တဲအဝဲသ့ၣ်လၢကလုၣ်ထံဒ်တၢ်ဘူၣ်တၢ်ဘါအလုၢ်အလၢ်အသိးန့ၣ်တက့ၢ်.

¹³ ဒုးကူထီၣ်သိးထီၣ်စီၤအၤဟရိၣ်လၢပှၤလုၢ်တၢ်အခိၣ်အကူအသိးတဖၣ်, ဖှူအီၤဒီးလၢကျဲဒ်အံၤန့ၣ်ပာ်စီဆှံအီၤဒ်သိးအဝဲမၤယတၢ်မၤ ဒ်ပှၤလုၢ်တၢ်အခိၣ်တဂၤအသိးကသ့န့ၣ်တက့ၢ်.

¹⁴ ဟဲကိးအဖိခွါတဖၣ်ဒီးဒုးသိးထီၣ်အီၤလၢပိာ်ခွါဆ့ကၤတဖၣ်တက့ၢ်.

¹⁵ အန့ၣ်ဝံၤဒီးဖှူအဝဲသ့ၣ်ဒ်နဖှူအပၢ်အသိးဒ်သိးအဝဲသ့ၣ်မၤယတၢ် မၤဒ်ပှၤလုၢ်တၢ်အခိၣ်တဖၣ်အသိးကသ့ဝဲန့ၣ်တက့ၢ်. တၢ်အံၤမ့ၢ်ဒ်သိးကဒုးကဲထီၣ်အဝဲသ့ၣ်လၢပှၤလုၢ်တၢ်အခိၣ်တဖၣ် ဆူညါထီဘိအဂီၢ်န့ၣ်တက့ၢ်.

¹⁶ စီၤမိၤၡ့မၤတၢ်ကိးမံၤဒဲးဒ်ယွၤမၤလိာ်တ့ၢ်အီၤအသိးန့ၣ်လီၤ.

¹⁷ မၤသးဒ်န့ၣ်ဒီးဖဲအဝဲသ့ၣ်ဟးထီၣ်ကွံာ်လၢကီၢ်အဲၤကူပတူး အလီၢ်ခံ, ခံနံၣ်တနံၣ်လါအခီၣ်ထံးတလါထီၣ်တသီအနံၤန့ၣ်ယွၤအိၣ်ဝဲဆိး ဝဲအဒဲစီဆှံဘၣ်တၢ်ထီထီၣ်အီၤန့ၣ်လီၤ.

¹⁸ စီၤမိၤၡ့ပာ်လီၤဒဲစီဆှံအခီၣ်ထံးတဖၣ်, ထီထီၣ်ဝဲအကွီၣ်တဖၣ်, ဒုးစဲဘူးအနီၣ်ဘိတဖၣ်ဒီးပာ်လီၤအထူၣ်တဖၣ်န့ၣ်လီၤ.

¹⁹ အဝဲသလၣ်ထီၣ်တၢ်ကျၢၢ်ဘၢလၢဒဲစီဆှံအဖီခိၣ်ဒီးပာ်ထီၣ်တၢ် အခိၣ်ဒုးလၢတၢ်အဖီခိၣ်ဒ်ယွၤမၤလိာ်တ့ၢ်ဝဲအသိးန့ၣ်လီၤ.

²⁰ အန့ၣ်ဝံၤဒီးအဝဲဟံးထီၣ်တၢ်မၤလိာ်အထံၣ်တဆံအလၢၢ်ဘ့ၣ်ဘၣ်ဒီး ဒၢနုာ်အီၤဆူတလါစီဆှံအပူၤန့ၣ်လီၤ. အဝဲဂိာ်နုာ်နီၣ်ယိးဘိတဖၣ်ဆူတလါအကွီၤတဖၣ်အပူၤဒီးပာ်ထီၣ် တလါစီဆှံအခိၣ်ကၢၢ်န့ၣ်လီၤ.

²¹ အန့ၣ်ဝံၤဒီးအဝဲဒၢနုာ်တလါစီဆှံန့ၣ်ဆူဒဲစီဆှံအပူၤဒီး ဘျးလီၤယၣ်ဘျးသဒၢတၢ်လၢအကမၤသဒၢအီၤန့ၣ်လီၤ. လၢကျဲဒ်အံၤန့ၣ်အဝဲဘျးသဒၢတၢ်အၢၣ်လီၤအီလီၤအတလါစီဆှံဒ် ယွၤမၤလိာ်တ့ၢ်ဝဲအသိးန့ၣ်လီၤ.

²² အဝဲဒၢနုာ်စီၢ်နီၤခိၣ်လၢဒဲစီဆှံအပူၤလၢကလံၤစိးတကပၤဖဲ ယၣ်ဘျးသၢတၢ်အချၢတခီ,

²³ ဒီးလၢအဖီခိၣ်န့ၣ်ပာ်ထီၣ်ကိၣ်လၢတၢ်လုၢ်ထီၣ်ဆူယွၤအအိၣ်, ဒ်ယွၤမၤလိာ်တ့ၢ်ဝဲအသိးန့ၣ်လီၤ.

²⁴ အဝဲဒၢနုာ်တၢ်ပာ်မ့ၣ်အူဒၢအလီၢ်လၢဒဲစီဆှံအပူၤ, လၢကလံၤထံးတကပၤကွၢ်သဃီၤလိာ်သးဒီးစီၢ်နီၤခိၣ်န့ၣ်လီၤ.

²⁵ ဒီးဖဲန့ၣ်လၢယွၤအမဲာ်ညါန့ၣ်, အဝဲဒွဲၣ်ကပီၤထီၣ်မ့ၣ်အူဒၢ တဖၣ်ဒ်ယွၤမၤလိာ်တ့ၢ်ဝဲအသိးန့ၣ်လီၤ.

²⁶ အဝဲဒၢနုာ်တၢ်လုၢ်လီၢ်ထူလၢဒဲစီဆှံအပူၤဖဲယၣ်ဘျးသဒၢတၢ်အမဲာ်ညါ,

²⁷ ဒီးဆိၣ်ကဲၤထီၣ်တၢ်နၢမူဒ်ယွၤမၤလိာ်တ့ၢ်ဝဲအသိးန့ၣ်လီၤ.

²⁸ အဝဲဘျးလီၤယၣ်ဘျးသဒၢတၢ်ဖဲဒဲစီဆှံအကျဲစၢၤ,

²⁹ ဒီးဖဲန့ၣ်လၢယၣ်ဘျးသဒၢတၢ်အမဲာ်ညါန့ၣ်, အဝဲပာ်လီၤတၢ်လုၢ် လီၢ်လၢတၢ်ကဆိၣ်ကဲၤအတၢ်လုၢ်တၢ်ပာ်တဖၣ်အဂီၢ်န့ၣ်လီၤ. လၢတၢ်လုၢ်လီၢ်အဖီခိၣ်န့ၣ်အဝဲလုၢ်ထီၣ်ပာ်ထီၣ်တၢ်လုၢ်မ့ၣ်အူဒီးတၢ် လုၢ်ဘုဧိၤဟုဧိၤဒ်ယွၤမၤလိာ်တ့ၢ်ဝဲအသိးန့ၣ်လီၤ.

³⁰ အဝဲပာ်သရာ်လၢတၢ်သ့စီအဂီၢ်ဖဲဒဲစီဆှံဒီးတၢ်လုၢ်လီၢ်အဘၢၣ် စၢၤဒီးမၤပှဲၤအီၤလၢထံန့ၣ်လီၤ.

³¹ စီၤမိၤၡ့, စီၤအၤဟရိၣ်ဒီးအဝဲအဖိခွါတဖၣ်သ့အစုဒီးအခီၣ်တဖၣ်ဖဲန့ၣ်,

³² တဘျီလၢ်လၢ်ဖဲအဝဲသ့ၣ်တဖၣ်လဲၤနုာ်ဆူဒဲစီဆှံအပူၤမ့ၣ်ဂ့ၤ, ဆူတၢ်လုၢ်လီၢ်မ့ၢ်ဂ့ၤဒ်ယွၤမၤလိာ်တ့ၢ်ဝဲအသိးန့ၣ်လီၤ.

³³ စီၤမိၤၡ့ဘျးထီၣ်ဘျးသဒၢတၢ်ဝးတရံးဒဲစီဆှံဒီးတၢ်လုၢ် လီၢ်ဒီးဘျးလီၤစဲၤယၣ်ဘျးသဒၢဖဲဒဲစီဆှံအကျဲစၢၤန့ၣ်လီၤ. မၤသးဒ်န့ၣ်ဒီး, အဝဲမၤဝံၤကယဲၢ်တၢ်မၤခဲလၢာ်န့ၣ်လီၤ.

တၢ်အၢၣ်လၢယွၤအိၣ်ဝဲဆိးဝဲအဒဲစီဆှံအဖီခိၣ်

³⁴ တုၤနုၤတစုတၢ်အၢၣ်ကးဘၢဒဲစီဆှံ, ဒီးကစၢ်ယွၤအိၣ်ဝဲ ဆိးဝဲအတၢ်ကပီၤကပြုၢ်ကပြီၤန့ၣ်မၤပှဲၤအီၤန့ၣ်လီၤ.

³⁵ လၢတၢ်အံၤအဃိ, စီၤမိၤၡ့လဲၤနုာ်ဆူဒဲစီဆှံအပူၤတသ့ဝဲဘၣ်.

³⁶ ပှၤအံၣ်စရ့လးဖိတဖၣ်သုးအသူၣ်ဒဲအလီၢ်, ဆူတၢ်လီၢ်အဂၤတတီၤ, ထဲဒၣ်ဖဲလၢတၢ်အၢၣ်သုးကွံာ်အသးလၢဒဲ စီဆှံအဖီခိၣ်အခါဧိၤန့ၣ်လီၤ.

³⁷ ဖဲတၢ်အၢၣ်ကျၢၢ်ဘၢဒံးအသးလၢဒဲစီဆှံအဖီခိၣ်အခါန့ၣ်, အဝဲသ့ၣ်တသုးဘၣ်အသူၣ်ဒဲအလီၢ်ဘၣ်.

³⁸ ဖဲအဝဲသ့ၣ်ဟးဝ့ၤဝီၤဝဲအဆၢကတီၢ်ဒီကတီၢ်န့ၣ်အဝဲသ့ၣ်ထံၣ်ဘၣ် ယွၤအိၣ်ဝဲဆိးဝဲအတၢ်အၢၣ်လၢဒဲစီဆှံအဖီခိၣ်လၢမုၢ်ဆါကတီၢ်, ဒီးမ့ၣ်အူကပီၤထီၣ်လၢအဖီခိၣ်လၢမုၢ်နၤအကတီၢ်န့ၣ်လီၤ.