လံာ်တၢ်ဟးထီၣ်ကွံာ် 37 - Sgaw Karen Common Bible

တၢ်ဘှီထီၣ်တၢ်အၢၣ်လီၤအီလီၤအတလါစီဆှံ

¹ စီၤဘစၤလအ့လးမၤထီၣ်တၢ်အၢၣ်လီၤအီလီၤအတလါစီဆှံ လၢသ့ၣ်ဖှ့ၡံးတၤန့ၣ်လီၤ. အထီအိၣ်ဝဲခံပျၢ်တထါ, အလဲၢ်တပျၢ်တထါဒီးအကစီၤထီၣ်တပျၢ်တထါ န့ၣ်လီၤ.

² ကးဘၢဝဲတလါအအိပူၤဒီးအချၢဒီဖျၢၣ်ညါလၢထူစီဒီးအကနူၤ ဝးတရံးန့ၣ်ပီၤဝဲလၢထူန့ၣ်လီၤ.

³ အဝဲမၤထီၣ်ကွီၤထူလွံၢ်ကွီၤလၢလၢတၢ်ကစိာ်တလါန့ၣ်အဂီၢ်ဒီး ထီထီၣ်အီၤဖဲအခီၣ်လွံၢ်ခီ, တကပၤခံကွီၤစုာ်စုာ်န့ၣ်လီၤ.

⁴ အဝဲမၤနီၣ်ယိးဘိတဖၣ်လၢသ့ၣ်ဖှ့ၡံးတၤဒီးကးဘၢအီၤလၢထူ,

⁵ ဒီးဂိာ်နုာ်အီၤဆူကွီၤတဖၣ်ဖဲတလါအကပၤခံခီယၢ်ခီန့ၣ်လီၤ.

⁶ အဝဲမၤတလါအခိၣ်ကးတခါလၢထူစီဒီးအထီအိၣ်ခံပျၢ်တထါ, အလဲၢ်အိၣ်တပျၢ်တထါန့ၣ်လီၤ.

⁷ အဝဲမၤထီၣ်တၢ်အသးအိၣ်ဒီးအဒံးအဆ့တဖၣ်အဂီၤခံဂၤ, လၢထူစီ,

⁸ တဂၤစုာ်စုာ်န့ၣ်ဖဲတလါအခိၣ်ကးအထိးနါစုာ်စုာ်န့ၣ်လီၤ. အဝဲသိဝဲတၢ်ဂီၤတဖၣ်န့ၣ်တုၤအကဲထီၣ်ထူတလိၣ်ဃီဒီးအခိၣ်ကးန့ၣ်လီၤ.

⁹ တၢ်အသးအိၣ်ဒီးအဒံးဆ့တဖၣ်အမဲာ်ကွၢ်လိာ်အသးတဂၤဒီးတဂၤလၢ တလါအခိၣ်ကးဖီခိၣ်ဒီးအဒံးဆ့ယူာ်ထီၣ်အသးတဖၣ်မၤဘၢတလါ အခိၣ်ကးန့ၣ်လီၤ.

တၢ်ဘှီထီၣ်စီၢ်နီၤခိၣ်လၢတၢ်လုၢ်ထီၣ် ကိၣ်ဆူကစၢ်ယွၤအအိၣ်အဂီၢ်

¹⁰ အဝဲဘှီထီၣ်စီၢ်နီၤခိၣ်လၢသ့ၣ်ဖှံၡံးတၤ, အထီခံပျၢ်, ဒီးကစီၤထီၣ်တပျၢ်တထါန့ၣ်လီၤ.

¹¹ အဝဲကးဘၢအီၤလၢထူစီ, ဒီးကွီၤအကနူၤဝးတရံးလၢထူန့ၣ်လီၤ.

¹² အဝဲမၤသကျီၤအလဲၢ်သၢစုမုၢ်တခါဝးတရံးစီၢ်နီၤခိၣ်ဒီးကွီၤသကျီၤန့ၣ်အကနူၤလၢထူဝးတရံးလီၤ.

¹³ အဝဲမၤကွီၤထူလွံၢ်ကွီၤလၢတၢ်ကစိာ်စီၢ်နီၤခိၣ်အဂီၢ်ဒီးထီ ထီၣ်အီၤဖဲအခီၣ်လွံၢ်ခီအိၣ်ဝဲအသနၢၣ်လွံၢ်သနၢၣ်န့ၣ်လီၤ.

¹⁴ ကွီၤတဖၣ်လၢကဟံးဃာ်နီၣ်ဘိတဖၣ်လၢတၢ်ကစိာ်စီၢ်နီၤခိၣ်အဂီၢ် န့ၣ်တၢ်ပာ်အီၤဘူးဒီးသကျီၤန့ၣ်လီၤ.

¹⁵ အဝဲမၤနီၣ်ယိးဘိတဖၣ်လၢသ့ၣ်ဖှ့ၡံးတၤဒီးကးဘၢအီၤလၢထူန့ၣ်လီၤ.

¹⁶ အဝဲမၤလီခီတဖၣ်လၢထူစီလၢစီၢ်နီၤခိၣ်အဂီၢ်, လီခီတဖၣ်, ထံခွးတဖၣ်, သလၢတဖၣ်ဒီးကိတဖၣ်လၢတၢ်ကသူအီၤလၢတၢ်လုၢ်ထီၣ်စပံးထံအဂီၢ်န့ၣ်လီၤ.

တၢ်ဘှီထီၣ်တၢ်ပာ်မ့ၣ်အူဒၢအလီၢ်

¹⁷ အဝဲဘှီထီၣ်တၢ်ပာ်မ့ၣ်အူဒၢအလီၢ်လၢထူစီလီၤ. ဒီးအခီၣ်ထံးအထူၣ်ဒီးအဒ့န့ၣ်လၢထူကိၢ်လိၢ်ဒီးအဖီတဖၣ်ဃုာ် ဒီးအဘိၣ်တဖၣ်ဒီးအလၣ်ကဘျံးတဖၣ်လၢတၢ်ကယၢကယဲအီၤန့ၣ်အိၣ်ဝဲဒ် တၢ်တခါဃီဒီးတၢ်ပာ်မ့ၣ်အူဒၢအလီၢ်န့ၣ်လီၤ.

¹⁸ အဒ့ဃုဒ့ဆဲးဖးထီၣ်ဝဲဆူအကပၤတခီသၢဒ့, စုာ်စုာ်န့ၣ်လီၤ.

¹⁹ အဒ့တဒ့စုာ်စုာ်န့ၣ်အိၣ်ဒီးဖီလၢတၢ်ကယၢကယဲအီၤသၢဖိးလီၤ ဂာ်ဒီးၡၤကးသၣ်ဖီထီၣ်ဃုာ်ဒီးအဘိၣ်ဒီးအဖီအကဘျံးတဖၣ်န့ၣ်လီၤ.

²⁰ တၢ်ပာ်မ့ၣ်အူဒၢအလီၢ်အဘိန့ၣ်အိၣ်ဒီးအဖီလၢတၢ်ကယၢကယဲအီၤ လွံၢ်ဖိးလီၤဂာ်ဒီးၡၤကးသၣ်ဖီထီၣ်ဖးထီၣ်ဃုာ်ဒီးအဘိၣ်ဒီးအဖီကဘျံးတဖၣ်န့ၣ်လီၤ.

²¹ လၢအဒ့သၢစူၣ်, ခံဒ့တစူၣ်စုာ်စုာ်အဖီလာ်န့ၣ်အဘိၣ်အိၣ်ဝဲတခါစုာ်စုာ်လီၤ.

²² အဘိၣ်တဖၣ်, အဒ့တဖၣ်ဒီးတၢ်ပာ်မ့ၣ်အူအလီၢ်တဖၣ်န့ၣ်မ့ၢ်ထူစီ တကိၢ်လိၣ်ဃီန့ၣ်လီၤ.

²³ အဝဲမၤထီၣ်မ့ၣ်အူဒၢနွံဖျၢၣ်လၢတၢ်ပာ်မ့ၣ်အူအလီၢ်အဂီၢ်ဒီးအနီၣ်တံာ်မ့ၣ်အူ ဒီးနီၣ်တံာ်အလီခီတဖၣ်န့ၣ်မ့ၢ်ထူစီန့ၣ်လီၤ.

²⁴ အဝဲသူထူစီလီၤတယၢၢ်ခံမၢတပီၢ်လၢတၢ်ဘှီတၢ်ပာ်မ့ၣ်အူဒၢ အလီၢ်ဒီးကယဲၢ်အတၢ်ပီးတၢ်လီတဖၣ်အဂီၢ်န့ၣ်လီၤ.

တၢ်ဘှီထီၣ်တၢ်လုၢ်လီၢ်လၢတၢ်ဆိၣ်ကဲၤ တၢ်နၢမူအဂီၢ်

²⁵ အဝဲမၤထီၣ်တၢ်လုၢ်လီၢ်တခါလၢသ့ၣ်ဖှံၡံးတၤလၢတၢ်ဆိၣ်ကဲၤတၢ်နၢမူအဂီၢ်န့ၣ်လီၤ. တၢ်လုၢ်လီၢ်န့ၣ်အနီၣ်ထိၣ်ဃူလွံၢ်ကပၤလိာ်လၢအထီဒီးအလဲၢ်အိၣ် ဝဲတပျၢ်စုာ်စုာ်ဒီးအကစီၤထီၣ်အိၣ်ခံပျၢ်န့ၣ်လီၤ. အနၢၤလွံၢ်နၢၤလၢအသနၢၣ်လွံၢ်သနၢၣ်န့ၣ်မ့ၢ်တၢ်တမံၤဃီဒီးအမိၢ်ပှၢ်န့ၣ်လီၤ.

²⁶ အဝဲကးဘၢတၢ်လုၢ်လီၢ်အဖီခိၣ်, အကပၤလွံၢ်ခီလိာ်, ဒီးအနၢၤတဖၣ်လၢထူစီဒီးပီၤအကနူၤဝးတရံးလၢထူလီၤ.

²⁷ အဝဲမၤထီၣ်ကွီၤထူခံကွီၤလၢတၢ်ကစိာ်အီၤအဂီၢ်, ဒီးထီထီၣ်အီၤဖဲအခိၣ်ကျီၤအဖီလာ်, ခံကပၤလိာ်လၢကဟံးဃာ်နီၣ်ယိးဘိတဖၣ်လၢတၢ် ကစိာ်အီၤအဂီၢ်န့ၣ်လီၤ.

²⁸ အဝဲမၤနီၣ်ယိးဘိတဖၣ်လၢသ့ၣ်ဖှံၡံးတၤဒီးကးဘၢအီၤလၢထူန့ၣ်လီၤ.

တၢ်မၤကဲထီၣ်သိဖှူတၢ်ဒီးသိနၢမူ

²⁹ အဝဲမၤစ့ၢ်ကီးသိဖှူတၢ်စီဆှံဒီးတၢ်ဆိၣ်ကဲၤနၢမူအဆၢ, လၢအဃါဃုာ်အသးဒ်သိနၢမူအသိးန့ၣ်လီၤ.